ಕೊವಿಡ್​ 19 ಲಸಿಕೆ 2ನೇ ಡೋಸ್​, ಬೂಸ್ಟರ್​ ಡೋಸ್​ ನಡುವಿನ ಅಂತರ 9-12 ತಿಂಗಳುಗಳು; ಆರೋಗ್ಯ ತಜ್ಞರ ಹೇಳಿಕೆ

ಕೊವಿಡ್​ 19 ಲಸಿಕೆ 2ನೇ ಡೋಸ್​, ಬೂಸ್ಟರ್​ ಡೋಸ್​ ನಡುವಿನ ಅಂತರ 9-12 ತಿಂಗಳುಗಳು; ಆರೋಗ್ಯ ತಜ್ಞರ ಹೇಳಿಕೆ
ಪ್ರಾತಿನಿಧಿಕ ಚಿತ್ರ

ಕೊವಿಶೀಲ್ಡ್​ ಲಸಿಕೆಯ ಮೊದಲ ಡೋಸ್​ಗೂ -ಎರಡನೇ ಡೋಸ್​ಗೂ ನಡುವಿನ ಅಂತರ 12-16 ವಾರಗಳಿದ್ದರೆ, ಕೊವ್ಯಾಕ್ಸಿನ್​ ಡೋಸ್​ಗಳ ಅಂತರ 6-8ವಾರಗಳು.

TV9kannada Web Team

| Edited By: Lakshmi Hegde

Dec 26, 2021 | 7:36 PM

ಕೊವಿಡ್​ 19 ಹೋರಾಟದಲ್ಲಿ ಮುಂಚೂಣಿಯಲ್ಲಿರುವ ಕಾರ್ಯಕರ್ತರಿಗೆ ಮತ್ತು 60 ವರ್ಷ ಮೇಲ್ಪಟ್ಟವರಿಗೆ ವೈದ್ಯರ ಸಲಹೆ ಮೇರೆಗೆ 2022ರ ಜನವರಿ 10ರಿಂದ ಕೊವಿಡ್​ 19 ಲಸಿಕೆ (Covid 19 Vaccine) ಮೂರನೇ ಡೋಸ್ ನೀಡಲಾಗುವುದು ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ(PM Narendra Modi) ನಿನ್ನೆ ರಾತ್ರಿ ದೇಶವನ್ನು ಉದ್ದೇಶಿಸಿ ಮಾತನಾಡುವಾಗ ಘೋಷಿಸಿದ್ದಾರೆ. ಹೀಗೆ ನೀಡಲಾಗುವದ ಬೂಸ್ಟರ್ ಡೋಸ್​ಗೆ ಬೇರೆಯದ್ದೇ ಲಸಿಕೆ ಬಳಸಲು, ಅಂದರೆ ಈಗಾಗಲೇ ಎರಡು ಡೋಸ್ ನೀಡಲಾದ ಕೊವಿಶೀಲ್ಡ್​ ಮತ್ತು ಕೊವ್ಯಾಕ್ಸಿನ್​ ಬಳಸದಿರಲು ಆರೋಗ್ಯ ತಜ್ಞರ ಶಿಫಾರಸ್ಸಿನ ಮೇರೆಗೆ ಕೇಂದ್ರ ಸರ್ಕಾರ ನಿರ್ಧರಿಸಿದೆ ಎಂದು ಹೇಳಲಾಗಿದೆ. ಇದೀಗ ಎದುರಾಗಿರುವ ಪ್ರಶ್ನೆ, ಹೀಗೆ ಬೂಸ್ಟರ್ ಡೋಸ್​ ತೆಗೆದುಕೊಳ್ಳುವವರಿಗೆ ಕೊರೊನಾ ಲಸಿಕೆಯ ಎರಡನೇ ಡೋಸ್​ಗೂ ಮತ್ತು ಈ ಮುನ್ನೆಚ್ಚರಿಕಾ ಡೋಸ್​ಗೂ ನಡುವೆ ಎಷ್ಟು ಸಮಯಗಳ ಅಂತರವಿರಬೇಕು ಎಂಬುದು.

ಕೊವಿಡ್ 19 ಲಸಿಕೆ ಎರಡನೇ ಡೋಸ್​ ಮತ್ತು ಮುನ್ನೆಚ್ಚರಿಕಾ ಡೋಸ್​ ನಡುವಿನ ಅಂತರ 9 ರಿಂದ 12 ತಿಂಗಳ ಕಾಲ ಇರಬೇಕು ಎಂದು ಅಧಿಕಾರಿಗಳು ಹೇಳಿದ್ದಾಗಿ ಪಿಟಿಐ ವರದಿ ಮಾಡಿದೆ.  ಭಾರತದಲ್ಲಿ ಅತ್ಯಂತ ಹೆಚ್ಚು ಪ್ರಮಾಣದಲ್ಲಿ ನೀಡಲಾದ ಲಸಿಕೆಗಳೆಂದರೆ ಕೊವಿಶೀಲ್ಡ್​ ಮತ್ತು ಕೊವ್ಯಾಕ್ಸಿನ್​ಗಳು. ಇವೆರಡೂ ಭಾರತದಲ್ಲೇ ತಯಾರಾದ ಕೊರೊನಾ ಲಸಿಕೆಗಳು. ಕೊವಿಶೀಲ್ಡ್​ ಲಸಿಕೆಯ ಮೊದಲ ಡೋಸ್​ಗೂ -ಎರಡನೇ ಡೋಸ್​ಗೂ ನಡುವಿನ ಅಂತರ 12-16 ವಾರಗಳಿದ್ದರೆ, ಕೊವ್ಯಾಕ್ಸಿನ್​ ಡೋಸ್​ಗಳ ಅಂತರ 6-8ವಾರಗಳು. ಈ ಲಸಿಕೆಗಳಲ್ಲಿ ಒಂದು ಲಸಿಕೆಯ ಎರಡೂ ಡೋಸ್ ಪಡೆದ ಆರೋಗ್ಯ ಕಾರ್ಯಕರ್ತರು ಮತ್ತು 60 ವರ್ಷ ಮೇಲ್ಪಟ್ಟವರಿಗೆ ಮೂರನೇ ಡೋಸ್​ ನೀಡುವ ಅಭಿಯಾನ ಜನವರಿ 10 ರಿಂದ ಶುರುವಾಗಲಿದೆ. ಸದ್ಯ ಭಾರತದಲ್ಲಿ ಶೇ.61ರಷ್ಟು ಜನರಿಗೆ ಎರಡೂ ಡೋಸ್ ಕೊರೊನಾ ಲಸಿಕೆ ನೀಡಲಾಗಿದ್ದು, ಶೇ.90ರಷ್ಟು ಮಂದಿ ಮೊದಲ ಡೋಸ್ ಪಡೆದಿದ್ದಾರೆ.

ಶನಿವಾರದವರೆಗೆ 60 ವರ್ಷ ಮೇಲ್ಪಟ್ಟ 12.04 ಕೋಟಿ ಜನರಿಗೆ ಕೊವಿಡ್​ 19 ಲಸಿಕೆ ನೀಡಲಾಗಿದೆ. ಅದರಲ್ಲಿ 9.21 ಜನರು ಸಂಪೂರ್ಣ ಡೋಸ್​ ಪಡೆದವರು. ಹಾಗೇ, 1.03 ಕೋಟಿ ಆರೋಗ್ಯ ಕಾರ್ಯಕರ್ತರು ಕೊರೊನಾ ಲಸಿಕೆ ಪಡೆದಿದ್ದು, ಅದರಲ್ಲಿ 96 ಲಕ್ಷ ಜನರಿಗೆ ಎರಡೂ ಡೋಸ್​ ಮುಕ್ತಾಯವಾಗಿದೆ. ಹಾಗೇ, 1.83 ಕೋಟಿ ಮುಂಚೂಣಿ ಕಾರ್ಯಕರ್ತರು ಕೊರೊನಾ ಲಸಿಕೆ ಪಡೆದಿದ್ದು, ಅದರಲ್ಲಿ 1.68 ಕೋಟಿ ಜನರಿಗೆ ಎರಡೂ ಡೋಸ್​ ಆಗಿದೆ. ಎರಡೂ ಡೋಸ್​ ಕೊರೊನಾ ಲಸಿಕೆ ಪಡೆದವರಿಗೆ ಮಾತ್ರ ಮೂರನೇ ಡೋಸ್​ ಅಂದರೆ ಬೂಸ್ಟರ್​ ಡೋಸ್ ಕೊಡಲು ಸಾಧ್ಯ. ಇದೀಗ ಸರ್ಕಾರ ಬಿಡುಗಡೆ ಮಾಡಿರುವ ಡಾಟಾ ಪ್ರಕಾರ ಸದ್ಯ ಮೂರನೇ ಡೋಸ್​ ಪಡೆಯುವ ಫಲಾನುಭವಿಗಳು 11 ಕೋಟಿ ಮಂದಿ ಇದ್ದಾರೆ.

ಇದನ್ನೂ ಓದಿ: ‘ಪೈರಸಿ ಮೂಲಕ ‘ರೈಡರ್​’ ನೋಡ್ಬೇಡಿ’; ಕೈ ಮುಗಿದು ಮನವಿ ಮಾಡಿದ ನಿಖಿಲ್​ ಕುಮಾರ್​

Follow us on

Related Stories

Most Read Stories

Click on your DTH Provider to Add TV9 Kannada