ಪರಸ್ಪರ ಪ್ರೀತಿಸಿ, ಹಿಂದೂ ಶಾಸ್ತ್ರದಂತೆ ಮದುವೆಯಾದ ಇಬ್ಬರು ಯುವತಿಯರು; ಸಲಿಂಗಿಗಳ ವಿವಾಹ ನೋಡಿ ಸ್ಥಳೀಯರು ಕಂಗಾಲು

ಲುಧಿಯಾನಾ: ಸಲಿಂಗ ವಿವಾಹ (Same Sex Marriage) ಈಗೀಗ ಬೆಳಕಿಗೆ ಬರುತ್ತಿದ್ದರೂ ಅದನ್ನು ಮುಕ್ತ ಮನಸಿನಿಂದ ಎಲ್ಲರೂ ಒಪ್ಪಿಕೊಳ್ಳುವುದಿಲ್ಲ. ಅದರಲ್ಲೂ ಭಾರತದಂಥ ದೇಶದಲ್ಲಿ ಕೆಲವಕ್ಕೆಲ್ಲ ಕಾನೂನಿನಲ್ಲಿ ಅವಕಾಶ ಕೊಟ್ಟರೂ, ಜನರ ಮನಸಿನಲ್ಲಿ ಸ್ಥಳ ಇರುವುದಿಲ್ಲ. ಅನೇಕರು ಅದನ್ನು ಒಪ್ಪಿಕೊಳ್ಳುವುದಿಲ್ಲ. ಅದರಲ್ಲಿ ಈ ಸಲಿಂಗ ವಿವಾಹವೂ ಒಂದು. ಆದಾಗ್ಯೂ ಕೆಲವು ಕಡೆಗಳಲ್ಲಿ ಇಂಥ ಮದುವೆ (Wedding)ಗಳು ನಡೆಯುತ್ತಿವೆ. ಇದೀಗ ಪಂಜಾಬ್​ನ ಲುಧಿಯಾನಾ(ludhiana)ದಲ್ಲಿ ಇಬ್ಬರು ಹೆಣ್ಣುಮಕ್ಕಳು ಮದುವೆಯಾಗಿದ್ದಾರೆ.

ಇವರಿಬ್ಬರೂ ಹುಡುಗಿಯರೂ ಸಂಬಂಧದಲ್ಲಿ ಕಸಿನ್ಸ್​. ಆದರೆ ಪರಸ್ಪರ ಪ್ರೀತಿ ಮಾಡುತ್ತಿದ್ದರು. ಕೊನೆಗೂ ಧೈರ್ಯ ಮಾಡಿ ಮದುವೆಯಾಗಲು ನಿರ್ಧರಿಸಿ ಲುಧಿಯಾನಾದ ಒಂದು ದೇವಸ್ಥಾನದಲ್ಲಿ ಹಸೆಮಣೆಗೆ ಏರಿದ್ದಾರೆ. ಅದರಲ್ಲಿ ಒಬ್ಬ ಹುಡುಗಿಯ ಅಣ್ಣ ಕನ್ಯಾದಾನ ಮಾಡಿದ್ದಾನೆ. ಈ ಜೋಡಿ ಪರಸ್ಪರ ಮಾಲೆ ಹಾಕಿಕೊಳ್ಳುವ (ವರಮಾಲೆ ಸಂಪ್ರದಾಯ) ಕಾರ್ಯಕ್ರಮದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ವೈರಲ್ ಆದ ನಂತರ ಪರ-ವಿರೋಧ ಚರ್ಚೆಗಳು ಭರ್ಜರಿಯಾಗಿಯೇ ನಡೆಯುತ್ತಿವೆ.

ಈ ಯುವತಿಯರು ಲುಧಿಯಾನಾದವರೇ ಆಗಿದ್ದರೂ, ಬೇರೆಬೇರೆ ಹಳ್ಳಿಯವರು. ಇದೀಗ ಹಿಂದೂ ಸಂಪ್ರದಾಯದಂತೆ, ಎಲ್ಲ ರೀತಿಯ ಆಚರಣೆಗಳನ್ನೂ ಮಾಡಿಕೊಂಡು ಮದುವೆಯಾಗಿದ್ದಾರೆ. ಅದರಲ್ಲಿ ಒಬ್ಬಳು ಹುಡುಗಿ ಇನ್ನೊಬ್ಬಾಕೆಗೆ ಮಂಗಲಸೂತ್ರ ಕಟ್ಟಿ, ಹಣೆಗೆ ಸಿಂಧೂರ ಇಟ್ಟಿದ್ದಾಳೆ. ದೇಗುಲದ ಆವರಣದಲ್ಲಿ ಒಬ್ಬ ಯುವಕ ಕನ್ಯಾದಾನ ಶಾಸ್ತ್ರ ಮಾಡಿದ್ದು ಕೂಡ ವಿಡಿಯೋದಲ್ಲಿ ಸೆರೆಯಾಗಿದೆ. ಆದರೆ ವಿಡಿಯೋದಿಂದ ಸ್ಥಳೀಯರಂತೂ ಸಿಕ್ಕಾಪಟೆ ಶಾಕ್​ ಆಗಿದ್ದಾರೆ. ಅಚ್ಚರಿಗೂ ಒಳಗಾಗಿದ್ದಾರೆ. ಇಬ್ಬರೂ ಅಪ್ರಾಪ್ತೆಯರಲ್ಲ. ನಾವೇನೂ ಮಾಡಲು ಬರುವುದಿಲ್ಲ ಎಂದು ಪೊಲಿಸರೂ ಹೇಳಿಬಿಟ್ಟಿದ್ದಾರೆ. ಅದರಲ್ಲೂ ಈ ಇಬ್ಬರು ಹೆಣ್ಣುಮಕ್ಕಳಲ್ಲಿ ಒಬ್ಬಾಕೆಯ ಮನೆಯಲ್ಲಿ ಮದುವೆಗೆ ಸಂಪೂರ್ಣವಾಗಿ ಒಪ್ಪಿಗೆ ಕೂಡ ಕೊಟ್ಟಿದ್ದಾರೆ.

ನಮ್ಮ ದೇಶದಲ್ಲಿ ಸಲಿಂಗ ಕಾಮ ಅಪರಾಧ ಎಂದು ಹೇಳುತ್ತಿದ್ದ ಐಪಿಸಿ ಸೆಕ್ಷನ್ 377ನ್ನು 2018ರಲ್ಲಿ ಐವರು ನ್ಯಾಯಾಧೀಶರನ್ನೊಳಗೊಂಡ ಸುಪ್ರೀಂಕೋರ್ಟ್ ಪೀಠವೇ ರದ್ದುಗೊಳಿಸಿದೆ. ಈ ಮೂಲಕ ಸಲಿಂಗ ಸೆಕ್ಸ್ ಅಪರಾಧವಲ್ಲ ಎಂದು ಹೇಳಿದೆ. ಆದಾಗ್ಯೂ ಭಾರತೀಯರು ಸಲಿಂಗ ವಿವಾಹವನ್ನು ಸಂಪೂರ್ಣವಾಗಿ ಒಪ್ಪಿಕೊಂಡಿಲ್ಲ. ಇದು ನಮ್ಮ ಸಂಪ್ರದಾಯಕ್ಕೆ ತದ್ವಿರುದ್ಧ ಎಂದೇ ಹೇಳಿಕೊಂಡು ಬರುತ್ತಿದ್ದಾರೆ.

ಇದನ್ನೂ ಓದಿ: Viral Photo: ನಾಗರಹಾವನ್ನು ತಿನ್ನುತ್ತಿರುವ ಕಾಳಿಂಗ ಸರ್ಪ; ಈ ಫೋಟೋವನ್ನು ನೀವೂ ನೋಡಲೇಬೇಕು..!

Girls ties knot In Punjab this same sex marriage opposed By locals