ZyCoV-D: ಒಂದು ಕೋಟಿ ಝೈಕೊವ್​-ಡಿ ಲಸಿಕೆ ಖರೀದಿಗೆ ಭಾರತ ಸರ್ಕಾರ ಆದೇಶ

ದೆಹಲಿ: ಕೊರೊನಾ ವೈರಸ್​ ವಿರುದ್ಧ ಭಾರತವು ದೇಶೀಯವಾಗಿ ರೂಪಿಸಿರುವ 2ನೇ ಲಸಿಕೆ ಝೈಕೊವ್​-2ಡಿ ಲಸಿಕೆ ಖರೀದಿಗೆ ಕೇಂದ್ರ ಸರ್ಕಾರ ಮುಂದಾಗಿದೆ. ಒಂದು ಕೋಟಿ ಲಸಿಕೆಗಳನ್ನು ಪೂರೈಸುವಂತೆ ಕಂಪನಿಗೆ ಬೇಡಿಕೆಯಿಟ್ಟಿದೆ. ದೇಶಾದ್ಯಂತ ನಡೆಯುತ್ತಿರುವ ಲಸಿಕೆ ಅಭಿಯಾನದಲ್ಲಿಯೂ ಈ ಲಸಿಕೆಯನ್ನೂ ಸೇರಿಸಿಕೊಳ್ಳಲು ಸರ್ಕಾರವು ನಿರ್ಧರಿಸಿದೆ. ಸೂಜಿಯಿಲ್ಲದೆ ಔಷಧವನ್ನು ದೇಹಕ್ಕೆ ಸೇರಿರುವ ಈ ಲಸಿಕೆಗೆ ಕಳೆದ ಆಗಸ್ಟ್​ 20ರಂದು ಭಾರತದ ಔಷಧ ಮಹಾನಿಯಂತ್ರಕರ ಅನುಮೋದನೆ (Drugs Controller General of India – DCGI) ಪಡೆದುಕೊಂಡಿತ್ತು.

12ರಿಂದ 18 ವರ್ಷದೊಳಗಿನ ಮಕ್ಕಳಿಗೂ ಲಸಿಕೆ ನೀಡಬಹುದು ಎಂದು ಡಿಸಿಜಿಐ ಅನುಮೋದನೆ ನೀಡಿದ್ದರೂ, ಆರಂಭದಲ್ಲಿ ಲಸಿಕೆಯನ್ನು ಕೇವಲ ವಯಸ್ಕರಿಗೆ ಮಾತ್ರ ನೀಡಲಾಗುತ್ತದೆ. ಝೈಕೊವ್​-ಡಿ ಲಸಿಕೆಯ ಪ್ರತಿ ಡೋಸ್​ಗೆ ₹ 358 ದರ ನಿಗದಿಪಡಿಸಲಾಗಿದೆ. ಸಾಧ್ಯವಾದಷ್ಟೂ ಬೇಗ ಲಸಿಕೆಗಳನ್ನು ಪೂರೈಸುವಂತೆ ಸರ್ಕಾರವು ಕಂಪನಿಗೆ ವಿನಂತಿಸಿದೆ.

ಮಕ್ಕಳಿಗೂ ಲಸಿಕೆ ನೀಡಲು ಅವಕಾಶವಿದ್ದರೂ ವಯಸ್ಕರಿಗೆ ಮಾತ್ರವೇ ನೀಡಲು ಸರ್ಕಾರ ನಿರ್ಧರಿಸಿದೆ. ಈ ಕುರಿತು ಪ್ರತಿಕ್ರಿಯಿಸಿರುವ ಸರ್ಕಾರಿ ಅಧಿಕಾರಿಗಳು ಕಂಪನಿಯ ಉತ್ಪಾದನಾ ಸಾಮರ್ಥ್ಯ ಸೀಮಿತವಾಗಿದೆ. ಪ್ರತಿ ತಿಂಗಳು 1 ಕೋಟಿ ಲಸಿಕೆ ಡೋಸ್​ಗಳನ್ನು ಮಾತ್ರವೇ ನೀಡಲು ಕಂಪನಿಗೆ ಸಾಧ್ಯವಿದೆ. ಹೀಗಾಗಿ ಮೊದಲು ವಯಸ್ಕರಿಗೆ ಮಾತ್ರವೇ ಲಸಿಕೆ ಒದಗಿಸಲು ನಿರ್ಧರಿಸಲಾಯಿತು ಎಂದು ಹೇಳಿದರು.

ಕಳೆದ ಸೆಪ್ಟೆಂಬರ್ 30ರಂದು ನೀತಿ ಆಯೋಗದ ಸದಸ್ಯ ಡಾ.ವಿ.ಕೆ.ಪೌಲ್ ಮಾತನಾಡಿ, ವಿಶ್ವದ ಮೊದಲ ಡಿಎನ್​ಎ ಆಧರಿತ ಲಸಿಕೆಯನ್ನು ದೇಶವ್ಯಾಪಿ ಆಂದೋಲನದಲ್ಲಿ ಬಳಸಲಾಗುವುದು ಎಂದು ಹೇಳಿದ್ದರು. ಈ ಲಸಿಕೆಯ ಮೂರು ಡೋಸ್​ಗಳನ್ನು ನೀಡಬೇಕಾಗುತ್ತದೆ. ಮೊದಲ ಲಸಿಕೆ ತೆಗೆದುಕೊಂಡ 28 ಮತ್ತು 56ನೇ ದಿನಕ್ಕೆ ಕ್ರಮವಾಗಿ ಎರಡು ಮತ್ತು ಮೂರನೇ ಲಸಿಕೆಗಳನ್ನು ನೀಡಬೇಕಾಗುತ್ತದೆ ಎಂದು ಹೇಳಿದ್ದರು.

ಈವರೆಗೆ ಭಾರತದಲ್ಲಿ ಒಟ್ಟು 6 ಲಸಿಕೆಗಳು ತುರ್ತು ಬಳಕೆ ಅನುಮೋದನೆ (Emergency Use Authorisation – EUA) ಪಡೆದುಕೊಂಡಿವೆ. ಇದರಲ್ಲಿ ಝೈಕೊವ್-ಡಿ 6ನೆಯದ್ದು. ಹೈದರಾಬಾದ್ ಮೂಲದ ಭಾರತ್ ಬಯೊಟೆಕ್ ಅಭಿವೃದ್ಧಿಪಡಿಸಿರುವ ಕೊವ್ಯಾಕ್ಸಿನ್ ಭಾರತ ನಿರ್ಮಿತ ಮತ್ತೊಂದು ಕೊವಿಡ್ ಲಸಿಕೆಯಾಗಿದೆ. ಝೈಕೊವ್-2ಇ ಜೊತೆಗೆ ಕೊವ್ಯಾಕ್ಸಿನ್ ಸಹ ಮಕ್ಕಳಿಗೆ ನೀಡಬಹುದು ಎಂದು ಔಷಧ ನಿಯಂತ್ರಕರು ಹೇಳಿದ್ದಾರೆ.

ಇದನ್ನೂ ಓದಿ: ಅಮೆರಿಕದಲ್ಲಿ 2-18 ವರ್ಷದವರಿಗೆ ಕೊವ್ಯಾಕ್ಸಿನ್​ ಲಸಿಕೆ ತುರ್ತು ಬಳಕೆಗೆ ಅನುಮತಿ ಕೋರಿದ ಒಕುಜೆನ್​ ಕಂಪನಿ ಇದನ್ನೂ ಓದಿ: ಮಹಾರಾಷ್ಟ್ರದಲ್ಲಿ ಕೊವಿಡ್ ಸೋಂಕು ಮತ್ತು ಸಾವಿನ ಸಂಖ್ಯೆ ತಗ್ಗಿದೆ, ಆದರೆ ಲಸಿಕೆ ನೀಡುವ ಪ್ರಮಾಣವು ಕುಂಠಿತಗೊಂಡಿದೆ!