Pandit Birju Maharaj Died: ಖ್ಯಾತ ಕಥಕ್ ನೃತ್ಯಪಟು, ಪದ್ಮವಿಭೂಷಣ ಪುರಸ್ಕೃತ ಬಿರ್ಜೂ ಮಹಾರಾಜ್ ನಿಧನ
ಬಿರ್ಜೂ ಮಹಾರಾಜ್ ಅವರ ಮೂಲ ಹೆಸರು ಬ್ರಿಜ್ ಮೋಹನ್ ನಾಥ್ ಮಿಶ್ರಾ. ಅವರು 1937ರ ಫೆಬ್ರವರಿ 4ರಂದು ಉತ್ತರ ಪ್ರದೇಶದ ಹಂಡಿಯಾದಲ್ಲಿ ಜನಿಸಿದ್ದಾರೆ. ಇವರು ಹುಟ್ಟಿದ್ದು ಕಥಕ್ ನೃತ್ಯಗಾರರ ಮಹಾರಾಜ್ ಕುಟುಂಬದಲ್ಲಿ.
Updated on:Jan 17, 2022 | 8:19 AM
ಖ್ಯಾತ ಕಥಕ್ ನೃತ್ಯಪಟು ಬಿರ್ಜೂ ಮಹಾರಾಜ್(Pandit Birju Maharaj) ನಿಧನರಾದರು. ಅವರಿಗೆ 83ವರ್ಷ ವಯಸ್ಸಾಗಿತ್ತು. ಭಾನುವಾರ ತಡರಾತ್ರಿ ಹೃದಯಾಘಾತದಿಂದ ನಿಧನಹೊಂದಿದ್ದಾಗಿ ಅವರ ಕುಟುಂಬ ಮೂಲಗಳು ತಿಳಿಸಿವೆ. ಕಲಾಸೇವೆಯನ್ನೇ ಬದುಕಾಗಿಸಿಕೊಂಡಿದ್ದ ಅವರು, ನಮ್ಮ ದೇಶದ ಎರಡನೇ ಅತ್ಯುನ್ನತ ಗೌರವ ಪುರಸ್ಕಾರ ಪದ್ಮ ವಿಭೂಷಣಕ್ಕೆ ಭಾಜನರಾಗಿದ್ದರು. ಶಿಷ್ಯರು ಮತ್ತು ಅನುಯಾಯಿಗಳು ಬಿರ್ಜೂ ಮಹಾರಾಜ್ರನ್ನು ಪ್ರೀತಿಯಿಂದ ಪಂಡಿತ್ ಜೀ, ಮಹಾರಾಜ್ ಜೀ ಎಂದೇ ಕರೆಯುತ್ತಿದ್ದರು. ಬಿರ್ಜೂ ಮಹಾರಾಜ್ ಕೆಲವು ದಿನಗಳಿಂದ ಕಿಡ್ನಿ ಸಮಸ್ಯೆಯಿಂದ ಬಳಲುತ್ತಿದ್ದರು. ಅವರಿಗೆ ಡಯಾಲಿಸಿಸ್ ಕೂಡ ಮಾಡಲಾಗಿತ್ತು. ಭಾನುವಾರ ತಡ ರಾತ್ರಿ ಬಿರ್ಜೂ ಅವರು ತಮ್ಮ ಮೊಮ್ಮಕ್ಕಳೊಂದಿಗೆ ಆಟವಾಡುತ್ತಿದ್ದಾಗ ಅವರ ಆರೋಗ್ಯ ಹದಗೆಟ್ಟಿ, ಪ್ರಜ್ಞಾಹೀನರಾದರು. ಕೂಡಲೇ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ ಅವರನ್ನು ಅವರನ್ನು ಬದುಕಿಸಲು ಆಗಲಿಲ್ಲ ಎಂದು ವರದಿಯಾಗಿದೆ.
ಬಿರ್ಜೂ ಮಹಾರಾಜ್ ಅವರ ಮೂಲ ಹೆಸರು ಬ್ರಿಜ್ ಮೋಹನ್ ನಾಥ್ ಮಿಶ್ರಾ. ಅವರು 1937ರ ಫೆಬ್ರವರಿ 4ರಂದು ಉತ್ತರ ಪ್ರದೇಶದ ಹಂಡಿಯಾದಲ್ಲಿ ಜನಿಸಿದ್ದಾರೆ. ಇವರು ಹುಟ್ಟಿದ್ದು ಕಥಕ್ ನೃತ್ಯಗಾರರ ಮಹಾರಾಜ್ ಕುಟುಂಬದಲ್ಲಿ. ಇವರ ತಂದೆ ಅರ್ಚನ್ ಮಹಾರಾಜ್ ಮತ್ತು ಚಿಕ್ಕಪ್ಪಂದಿರಾದ ಶಂಭು ಮತ್ತು ಲಚ್ಚು ಮಹಾರಾಜ್ ಕೂಡ ಕಥಕ್ ನೃತ್ಯಪಟುಗಳೇ ಆಗಿದ್ದರು. ಪಂಡಿತ್ ಬಿರ್ಜೂ ಅವರು ಬಾಲ್ಯದಿಂದಲೇ, ತಮ್ಮ ತಂದೆಯೊಂದಿಗೆ ಸೇರಿ ನೃತ್ಯಪ್ರದರ್ಶನ ನೀಡಲು ಪ್ರಾರಂಭಿಸಿದ್ದರು. ಹರೆಯದಲ್ಲೇ ನೃತ್ಯ ಕಲಿಸಲು ಪ್ರಾರಂಭಿಸಿದ ಗುರುಸ್ಥಾನಕ್ಕೆ ಏರಿದರು. ರಾಂಪುರ ನವಾಬನ ದರ್ಬಾರ್ನಲ್ಲೂ ನೃತ್ಯಪ್ರದರ್ಶನ ನೀಡಿದ್ದರು.
ಬಹುಮುಖ ಪ್ರತಿಭೆ ಪಂಡಿತ್ ಬಿರ್ಜೂ ಮಹಾರಾಜ್ ಅವರು ಕೇವಲ ನೃತ್ಯಪಟು ಆಗಿರಲಿಲ್ಲ. ಅದರೊಂದಿಗೆ ಅದ್ಭುತ ಗಾಯಕರೂ ಹೌದು. ತುಂಬ ಸುಂದರವಾಗಿ ಡ್ರಮ್ ಬಾರಿಸುತ್ತಿದ್ದರು. ತಬಲಾ ಮತ್ತು ನಾಲ್ಗಳನ್ನು ವಿಶೇಷವಾಗಿ ನುಡಿಸುತ್ತಿದ್ದರು. ಅಷ್ಟೇ ಅಲ್ಲ, ಯಾವುದೇ ವಿಧದ ಡ್ರಮ್ ಆದರೂ ಸರಿ ತುಂಬ ನಿಖರವಾಗಿ ಬಾರಿಸುತ್ತಿದ್ದರು. ಗಾಯಕರಾಗಿದ್ದ ಅವರು, ಠುಮ್ರಿ, ದಾದ್ರಾ, ಭಜನ್ ಮತ್ತು ಗಝಲ್ಗಳನ್ನು ಸುಂದರವಾಗಿ ಪ್ರಸ್ತುತಪಡಿಸುತ್ತಿದ್ದರು.
ಇದನ್ನೂ ಓದಿ: Paush Purnima 2022: ಪುಷ್ಯ ಪೂರ್ಣಿಮಾ ವ್ರತ ಮತ್ತು ಮಹತ್ವ, ಈ ದಿನ ಉಪವಾಸ ಮಾಡುವುದರಿಂದ ಮೋಕ್ಷ ಪ್ರಾಪ್ತಿಯಾಗುತ್ತದೆ
Published On - 8:13 am, Mon, 17 January 22
