ಇಂಜೆಕ್ಷನ್ ನೀಡುವಾಗ ಪಶು ವೈದ್ಯರಿಗೇ ಕಚ್ಚಿದ ನಾಯಿ; ಕೇರಳದಲ್ಲಿ ಹೆಚ್ಚುತ್ತಿದೆ ಶ್ವಾನದ ದಾಳಿ

ತಿರುವನಂತಪುರಂ: ಕೇರಳದಲ್ಲಿ ನಾಯಿಗಳ ಕಾಟ ಹೆಚ್ಚಾಗಿದೆ. ಕೇರಳದ ತಿರುವನಂತಪುರಂ (Tiruvanantapuram) ಜಿಲ್ಲೆಯ ತಿರುಪುರಂನಲ್ಲಿ ಪಶು ವೈದ್ಯರು (Veterinary Doctor) ನಾಯಿಗೆ ಆ್ಯಂಟಿ ರೇಬಿಸ್ ಲಸಿಕೆ (Anti-Rabies Vaccine) ನೀಡುತ್ತಿದ್ದಾಗ ಆ ನಾಯಿ ಅವರ ಮೇಲೆ ದಾಳಿ ಮಾಡಿದೆ. ಬಿಜೇಶ್ ಎಂಬ ಪಶು ವೈದ್ಯರ ಮುಖ ಮತ್ತು ಎಡಗೈಗೆ ನಾಯಿ ಕಚ್ಚಿದ್ದರಿಂದ ತೀವ್ರವಾದ ಗಾಯಗಳಾಗಿವೆ. ವೈದ್ಯರು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ತೆರಳಿದ್ದಾರೆ.

ತಿರುಪುರಂನ ಮನೆಯೊಂದರಲ್ಲಿ ಪಶುವೈದ್ಯರು ಸಾಕು ನಾಯಿಗಳಿಗೆ ರೇಬಿಸ್ ಇಂಜೆಕ್ಷನ್ ನೀಡುತ್ತಿದ್ದಾಗ ಈ ಘಟನೆ ನಡೆದಿದೆ. ತಮ್ಮ ಮೇಲೆ ದಾಳಿ ನಡೆಸಿದ ನಾಯಿಗೆ ವೈದ್ಯರು ಲಸಿಕೆ ನೀಡುವಾಗ ಆ ನಾಯಿಯ ಮುಖಕ್ಕೆ ಮಾಸ್ಕ್ ಹಾಕಲಾಗಿತ್ತು. ಆದರೂ ಮಾಲೀಕನ ಹಿಡಿತದಿಂದ ಬಿಡಿಸಿಕೊಂಡ ಆ ಸಾಕು ನಾಯಿ ವೈದ್ಯ ಬಿಜೇಶ್ ಮೇಲೆ ಹಲ್ಲೆ ನಡೆಸಿದೆ. ನಾಯಿ ತನ್ನ ಮಾಸ್ಕ್ ತೆಗೆದುಕೊಂಡು ವೈದ್ಯರ ಕೈ, ಮುಖಕ್ಕೆ ಕಚ್ಚಿದೆ.

ಇದನ್ನೂ ಓದಿ: Viral Video: ನಾಯಿಯನ್ನು ಕಾರಿಗೆ ಕಟ್ಟಿ ರಸ್ತೆಯಲ್ಲಿ ಎಳೆದುಕೊಂಡು ಹೋದ ವೈದ್ಯನ ವಿಡಿಯೋ ವೈರಲ್

ನಾಯಿಯ ದಾಳಿಯನ್ನು ತಡೆಯಲು ಮುಂದಾದಾಗ ಆ ಸಾಕು ನಾಯಿ ತನ್ನ ಮಾಲೀಕರ ಮೇಲೂ ದಾಳಿ ಮಾಡಿದೆ. ಈ ನಡುವೆ ವೈದ್ಯರು ಮನೆಯಿಂದ ಹೊರಗೆ ಬಂದು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಸೆಪ್ಟೆಂಬರ್ 13ರಂದು ಕೇರಳದ ಕೋಳಿಕ್ಕೋಡ್ ಜಿಲ್ಲೆಯ ಅರಕ್ಕಿನಾರ್ ಗ್ರಾಮದಲ್ಲಿ 12 ವರ್ಷದ ಬಾಲಕನ ಮೇಲೆ ನಾಯಿ ಹಲ್ಲೆ ನಡೆಸಿತ್ತು. ನಾಯಿಯ ದಾಳಿಯ ವಿಡಿಯೋ ಕೂಡ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಈ ಘಟನೆಗೂ ಮೊದಲು ಆ ಗ್ರಾಮದಲ್ಲಿ ಬೀದಿ ನಾಯಿಗಳ ಹಿಂಡು ಇಬ್ಬರು ಮಕ್ಕಳು ಸೇರಿದಂತೆ ಐವರ ಮೇಲೆ ದಾಳಿ ನಡೆಸಿತ್ತು. ಸೆಪ್ಟೆಂಬರ್ 5ರಂದು ಹಾಲು ಖರೀದಿಸಲು ತೆರಳುತ್ತಿದ್ದ 12 ವರ್ಷದ ಬಾಲಕಿಯನ್ನು ನಾಯಿ ಕಚ್ಚಿ, ಕೊಂದು ಹಾಕಿತ್ತು.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ