ಉದ್ಯಮಿ ಕೇತನ್ ಅಗರ್ವಾಲ್ ಹತ್ಯೆ, ಸುಮ್ನಿರು ಇಲ್ದಿದ್ರೆ ನಿನ್ನನ್ನೂ ಕೋಟೆಯಿಂದ ತಳ್ತೀನಿ, ಪ್ರತ್ಯಕ್ಷದರ್ಶಿಯನ್ನು ಬೆದರಿಸಿದ್ದ ಚೇತನ್

ಪುಣೆ, ಸೆಪ್ಟೆಂಬರ್ 28: ಮಹಾರಾಷ್ಟ್ರದ ಪುಣೆ ಸಮೀಪದ ಪ್ರಸಿದ್ಧ ಲೋಹಗಡ್ ಕೋಟೆಯಲ್ಲಿ ನಡೆದ 25 ವರ್ಷದ ಉದ್ಯಮಿ ಕೇತನ್ ಅಗರ್ವಾಲ್ ಹತ್ಯೆ ಪ್ರಕರಣದಲ್ಲಿ ಬೆಚ್ಚಿಬೀಳಿಸುವ ಹೊಸ ತಿರುವು ಸಿಕ್ಕಿದೆ. ಕೇತನ್‌ನನ್ನು ಆತನ ಭಾವಿ ಪತ್ನಿ ಸಿಯಾ ಗೋಯಲ್ ಮತ್ತು ಆಕೆಯ ರಹಸ್ಯ ಪ್ರಿಯಕರ ಚೇತನ್ ಚೌಧರಿ ಬಂಡೆಯಿಂದ ಕಂದಕಕ್ಕೆ ತಳ್ಳುವುದನ್ನು ಕಣ್ಣಾರೆ ಕಂಡ ಪ್ರತ್ಯಕ್ಷದರ್ಶಿಯೊಬ್ಬರು ಪೊಲೀಸರ ಮುಂದೆ ಹಾಜರಾಗಿ ಸ್ಫೋಟಕ ಹೇಳಿಕೆ ದಾಖಲಿಸಿದ್ದಾರೆ.

ಪ್ರತ್ಯಕ್ಷದರ್ಶಿ ಕಂಡಿದ್ದೇನು?

ಜೂನ್ 18 ರಂದು ನಡೆದ ಈ ಘಟನೆಯನ್ನು ಕಂಡಿದ್ದ ಪ್ರತ್ಯಕ್ಷದರ್ಶಿಯು ಕೊಲೆ ನಡೆದು ಐದು ದಿನಗಳ ನಂತರ ಮಾಧ್ಯಮಗಳಲ್ಲಿ ಬಂದ ವರದಿಗಳನ್ನು ನೋಡಿ ಪೊಲೀಸರನ್ನು ಸಂಪರ್ಕಿಸಿದ್ದಾರೆ. ಪ್ರತ್ಯಕ್ಷದರ್ಶಿಯ ಪ್ರಕಾರ, ಕೋಟೆಯ ತುದಿಯಲ್ಲಿದ್ದಾಗ ಸಿಯಾ ತನ್ನ ಪ್ರಿಯಕರ ಚೇತನ್‌ಗೆ ಕಣ್ಣಿನಲ್ಲೇ ಸನ್ನೆ ಮಾಡಿದ್ದಳು. ತಕ್ಷಣವೇ ಚೇತನ್ ಕೇತನ್​ನ ಕಾಲಿಗೆ ಬಲವಾಗಿ ಒದ್ದಿದ್ದ, ಇದರಿಂದ ಸಮತೋಲನ ಕಳೆದುಕೊಂಡ ಕೇತನ್ ನೂರಾರು ಅಡಿ ಆಳದ ಕಂದಕಕ್ಕೆ ಜಾರಿಬಿದ್ದರು.

ಕೊಲೆ ನಡೆಯುತ್ತಿದ್ದಂತೆ ಗಾಬರಿಗೊಂಡ ಪ್ರತ್ಯಕ್ಷದರ್ಶಿಯನ್ನು ಬೆದರಿಸಿದ ಹಂತಕ ಚೇತನ್, ಬಾಯಿ ಮುಚ್ಚಿಕೊಂಡು ಸುಮ್ಮನಿರು, ಇಲ್ಲದಿದ್ದರೆ ನಿನ್ನನ್ನೂ ಕೋಟೆಯಿಂದ ಕೆಳಗೆ ಎಸೆಯುತ್ತೇನೆ ಎಂದು ಜೀವ ಬೆದರಿಕೆ ಹಾಕಿದ್ದಾಗಿ ತಿಳಿಸಿದ್ದಾರೆ. ಘಟನೆ ನಡೆದ ದಿನ ವಿಪರೀತ ಬಿಸಿಲಿದ್ದರೂ ಚೇತನ್ ಮುಖ ಮುಚ್ಚಿಕೊಳ್ಳುವ ಹೂಡಿ ಧರಿಸಿದ್ದ. ಇನ್ನೊಬ್ಬ ಪ್ರವಾಸಿಗ ಇಷ್ಟು ಬಿಸಿಲಿನಲ್ಲಿ ಹೂಡಿ ಏಕೆ ಹಾಕಿದ್ದೀರಿ? ಎಂದು ಕೇಳಿದ್ದರಿಂದ ಸಾಕ್ಷಿಗೆ ಆತನ ಮುಖ ಮತ್ತು ನಡವಳಿಕೆ ಸ್ಪಷ್ಟವಾಗಿ ನೆನಪಿನಲ್ಲಿ ಉಳಿದಿತ್ತು.

ಕೇತನ್ (25) ಮತ್ತು ಸಿಯಾ (20) ಅವರಿಗೆ ನವೆಂಬರ್‌ನಲ್ಲಿ ಮದುವೆ ನಿಶ್ಚಯವಾಗಿತ್ತು. ಜೂನ್ 18 ರಂದು ಕೇತನ್‌ನನ್ನು ಟ್ರೆಕ್ಕಿಂಗ್ ನೆಪದಲ್ಲಿ ಲೋಹಗಡ್ ಕೋಟೆಗೆ ಕರೆದೊಯ್ಯಲಾಗಿತ್ತು. ಬೆಳಗ್ಗೆ 10.45 ರ ಸುಮಾರಿಗೆ ಸಿಯಾ ಕೇತನ್ ತಾಯಿಗೆ ಕರೆ ಮಾಡಿ, “ಕೇತನ್ ಆಕಸ್ಮಿಕವಾಗಿ ಕಾಲು ಜಾರಿ ಕಂದಕಕ್ಕೆ ಬಿದ್ದಿದ್ದಾನೆ” ಎಂದು ನಾಟಕವಾಡಿದ್ದಳು. ಆರಂಭದಲ್ಲಿ ಪೊಲೀಸರು ಇದನ್ನು ಆಕಸ್ಮಿಕ ಸಾವು ಎಂದೇ ದಾಖಲಿಸಿದ್ದರು. ಆದರೆ, ಸಿಯಾಳ ನಡವಳಿಕೆಯ ಮೇಲೆ ಕೇತನ್ ಸಹೋದರಿಗೆ ತೀವ್ರ ಅನುಮಾನ ಬಂದು ಪ್ರಶ್ನಿಸಿದಾಗ ಪೊಲೀಸರು ಮರು ತನಿಖೆ ಕೈಗೆತ್ತಿಕೊಂಡರು.

ಮತ್ತಷ್ಟು ಓದಿ: ಬಂಟ್ವಾಳ ರಹಿಮಾನ್ ಹತ್ಯೆ ಕೇಸ್: ಕಲ್ಲಡ್ಕ ಪ್ರಭಾಕರ ಭಟ್​ಗೆ ನೊಟೀಸ್, ಸಿಡಿದೆದ್ದ ವಿಹೆಚ್​​ಪಿ

12 ಟಿಬಿ ಡೇಟಾ, ಅಳಿಸಿದ ಚಾಟ್‌ಗಳು ಪತ್ತೆ:

ಪೊಲೀಸರು ಆರೋಪಿಗಳಿಂದ 6 ಮೊಬೈಲ್‌ಗಳು, 9 ಪೆನ್‌ಡ್ರೈವ್‌ಗಳು ಸೇರಿದಂತೆ ಬರೋಬ್ಬರಿ 12 ಟಿಬಿ (TB) ಡಿಜಿಟಲ್ ಡೇಟಾವನ್ನು ವಶಪಡಿಸಿಕೊಂಡಿದ್ದಾರೆ. ತನಿಖೆಯ ವೇಳೆ, ಐಫೋನ್‌ನಿಂದ ಚಾಟ್‌ಗಳು ಮತ್ತು ಡೇಟಾವನ್ನು ಶಾಶ್ವತವಾಗಿ ಅಳಿಸುವುದು ಹೇಗೆ ಎಂದು ಗೂಗಲ್‌ನಲ್ಲಿ ಸರ್ಚ್ ಮಾಡಿರುವುದು ಪತ್ತೆಯಾಗಿದೆ. ಸಿಯಾ ಮನೆಯಲ್ಲಿ ಅಡಗಿಸಿಟ್ಟು ನಂತರ ಪುಡಿಪುಡಿ ಮಾಡಿದ್ದ ಮತ್ತೊಂದು ರಹಸ್ಯ ಮೊಬೈಲ್ ಫೋನ್‌ನ ಬ್ಯಾಕಪ್ ಡೇಟಾವನ್ನು ಸೈಬರ್ ಪೊಲೀಸರು ಯಶಸ್ವಿಯಾಗಿ ರಿಕವರಿ ಮಾಡಿದ್ದಾರೆ.

ಈ ಹತ್ಯೆ ಸಂಚಿನಲ್ಲಿ ಭಾಗಿಯಾಗಿದ್ದ ಚೇತನ್‌ನ ಆಪ್ತ ಸ್ನೇಹಿತ ರಿತೇಶ್ ಹಾಂಗೆ ಸೇರಿದಂತೆ ಒಟ್ಟು ಮೂವರು ಆರೋಪಿಗಳನ್ನು (ಸಿಯಾ ಗೋಯಲ್, ಚೇತನ್ ಚೌಧರಿ, ರಿತೇಶ್ ಹಾಂಗೆ) ಪೊಲೀಸರು ಬಂಧಿಸಿದ್ದಾರೆ.

ಆರೋಪಿಗಳು ಕೃತ್ಯ ಎಸಗುವ ಮುನ್ನ ಮೇ 31 ಮತ್ತು ಜೂನ್ 14 ರಂದು ಎರಡು ಬಾರಿ ಲೋಹಗಡ್ ಕೋಟೆಗೆ ತೆರಳಿ, ಸಿಸಿಟಿವಿ ಇಲ್ಲದ ಹಾಗೂ ಜನಸಂಚಾರ ಕಡಿಮೆ ಇರುವ ಕಡಿದಾದ ಪ್ರಪಾತದ ಜಾಗವನ್ನು ಆಯ್ಕೆ ಮಾಡಿಕೊಂಡು ಪೂರ್ವಸಿದ್ಧತೆ ನಡೆಸಿದ್ದರು ಎಂಬುದು ತನಿಖೆಯಲ್ಲಿ ಬಹಿರಂಗವಾಗಿದೆ.

ಕಾನೂನು ಕ್ರಮ ಮತ್ತು ಸೆಕ್ಷನ್‌ಗಳು: ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯಡಿ ಕೊಲೆ ಸಂಚು , ಸಾಕ್ಷ್ಯ ನಾಶ ಮತ್ತು ಜೀವ ಬೆದರಿಕೆ ಕಾಯ್ದೆಗಳಡಿ ಗಂಭೀರ ಪ್ರಕರಣಗಳನ್ನು ದಾಖಲಿಸಲಾಗಿದೆ. ಆರೋಪಿಗಳು ಸಾಕ್ಷಿಗೆ ಜೀವ ಬೆದರಿಕೆ ಹಾಕಿರುವುದರಿಂದ, ಸುಪ್ರೀಂ ಕೋರ್ಟ್‌ನ ‘ಸಾಕ್ಷಿ ಸಂರಕ್ಷಣಾ ಯೋಜನೆ’ ಅಡಿಯಲ್ಲಿ ಪ್ರತ್ಯಕ್ಷದರ್ಶಿಯ ವಿವರಗಳನ್ನು ಗೌಪ್ಯವಾಗಿಟ್ಟು ಪೊಲೀಸರು ಸೂಕ್ತ ರಕ್ಷಣೆ ಒದಗಿಸಿದ್ದಾರೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ