ಅಯೋಧ್ಯೆ ದೇಗುಲ ನಿರ್ಮಾಣಕ್ಕೆ ರಾಜಾಸ್ಥಾನದಿಂದ ತಿಳಿಕೆಂಪು ಬಣ್ಣದ ಕಲ್ಲು: ಇ-ಹರಾಜಿಗೆ ಮುಂದಾದ ಸರ್ಕಾರ

ಜೈಪುರ: ಅಯೋಧ್ಯೆ ರಾಮಮಂದಿರ ಸೇರಿದಂತೆ ಭಾರತದ ವಿವಿಧ ರಾಜ್ಯಗಳಲ್ಲಿ ದೇಗುಲ ನಿರ್ಮಾಣ ಕಾರ್ಯಕ್ಕೆ ವ್ಯಾಪಕವಾಗಿ ಬೇಡಿಕೆಯಲ್ಲಿದ್ದ ವಿಶೇಷ ತಿಳಿಕೆಂಪು ಬಣ್ಣದ ಅಮೃತಶಿಲೆಯ ಗಣಿಗಾರಿಕೆಗೆ ಅವಕಾಶ ನೀಡಲು ರಾಜಸ್ಥಾನ ಸರ್ಕಾರ ಮುಂದಾಗಿದೆ. ಕೇಂದ್ರ ಸರ್ಕಾರದ ಅನುಮತಿ ಸಿಕ್ಕ ತಕ್ಷಣವೇ ಭರತ್​ಪುರ ಪ್ರದೇಶದ ಬನ್ಸಿ ಪಹಾರ್​ಪುರ್​ನಲ್ಲಿ ಕಲ್ಲಿನ ಗಣಿಗಾರಿಕೆಗೆ ಅವಕಾಶ ನೀಡಲು ಆನ್​ಲೈನ್​ ಹರಾಜು ಕರೆಯಲಾಗುವುದು ಎಂದು ರಾಜಸ್ಥಾನ ಸರ್ಕಾರದ ಉನ್ನತ ಅಧಿಕಾರಿಗಳು ಹೇಳಿದ್ದಾರೆ.

ಬಂಧ್ ಬರೆಥಾ ಅಭಯಾರಣ್ಯದ 398 ಹೆಕ್ಟೇರ್​ ಪ್ರದೇಶದಲ್ಲಿ ಕಲ್ಲಿನ ಗಣಿಗಾರಿಕೆ ನಡೆಸಲು ಕೇಂದ್ರ ಸರ್ಕಾರವು ತಾತ್ವಿಕ ಒಪ್ಪಿಗೆ ನೀಡಿದ ತಕ್ಷಣ ಗಣಿ ವಲಯಗಳ ಹರಾಜು ಆರಂಭಿಸಲಾಗುತ್ತದೆ. ಈ ಪ್ರದೇಶದಲ್ಲಿ ಗಣಿಗಾರಿಕೆಗಾರಿಕೆಗಾಗಿ ತಿಳಿಕೆಂಪು ಕಲ್ಲು ಸಿಗುವ 70 ವಲಯಗಳನ್ನು ಗುರುತಿಸಲಾಗುವುದು. ಇದರಿಂದ ರಾಜ್ಯ ಸರ್ಕಾರಕ್ಕೆ ₹ 500 ಕೋಟಿ ಆದಾಯ ಸಿಗುವ ಸಾಧ್ಯತೆಯಿದೆ ಎಂದು ರಾಜಸ್ಥಾನ ಸರ್ಕಾರದ ಗಣಿ ಮತ್ತು ಪೆಟ್ರೋಲಿಯಂ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಸುಬೋಧ್ ಅಗರ್​ವಾಲ್ ಹೇಳಿದರು.

ಪ್ರಸ್ತುತ ಈ ಪ್ರದೇಶದಲ್ಲಿ ಗಣಿಗಾರಿಕೆಗೆ ನಿರ್ಬಂಧವಿದೆ. ಆದರೆ ಅಕ್ರಮ ಗಣಿಗಾರಿಕೆ ಎಗ್ಗಿಲ್ಲದೆ ನಡೆಯುತ್ತಿದೆ. ಇದೀಗ ಈ ವಲಯದಲ್ಲಿ ಶಾಸನಬದ್ಧ ಗಣಿಗಾರಿಕೆಗೆ ಅವಕಾಶ ನೀಡಿದರೆ ಅಯೋಧ್ಯೆ ದೇಗುಲಕ್ಕೆ ಕಾನೂನಿನ ಪ್ರಕಾರವೇ ಅಮೃತಶಿಲೆ ಸಿಗುತ್ತದೆ ಎಂದು ಮಾಹಿತಿ ನೀಡಿದರು. 2016ರಲ್ಲಿ ರಾಜಸ್ಥಾನದ ಅಭಯಾರಣ್ಯದಲ್ಲಿ ಗಣಿಗಾರಿಕೆಯನ್ನು ನಿರ್ಬಂಧಿಸಲಾಗಿತ್ತು. ಆದರೂ ಅಕ್ರಮವಾಗಿ ಇಲ್ಲಿಂದ ಕಲ್ಲು ಸಾಗಿಸುವ ಕ್ರಿಯೆ ನಡೆಯುತ್ತಲೇ ಇತ್ತು. ಭರತ್​ಪುರದ ಪ್ರಸಿದ್ಧ ತಿಳಿಗೆಂಪು ಬಣ್ಣದ ಶಿಲೆ ಕಳ್ಳ ಮಾರುಕಟ್ಟೆಯಲ್ಲಿ ಸಿಗುತ್ತಲೇ ಇತ್ತು.

ಅಯೋಧ್ಯೆಯ ರಾಮಮಂದಿರ ಸೇರಿದಂತೆ ದೇಶದ ವಿವಿಧ ರಾಜ್ಯಗಳಲ್ಲಿ ದೇಗುಲ ನಿರ್ಮಾಣ ಚಟುವಟಿಕೆಗೆ ಈ ಶಿಲೆಗೆ ಉತ್ತಮ ಬೇಡಿಕೆಯಿದೆ. ಧೋಲ್​ಪುರ್​ದಲ್ಲಿ ಸಿಗುವ ಶಿಲೆಯು ಬನ್ಸಿ ಪಹಾರ್​ಪುರ ಶಿಲೆಗೆ ಅತ್ಯಂತ ಸನಿಹವಾದುದು ಎಂದು ಹೇಳಲಾಗುತ್ತದೆ. ಕೇಂದ್ರ ಪರಿಸರ ಇಲಾಖೆಯು ಜೂನ್ 11ರಂದು ಬನ್ಸಿ ಪಹಾರ್​ಪುರ ಪ್ರದೇಶವನ್ನು ಅಭಯಾರಣ್ಯ ಸ್ಥಾನಮಾನದಿಂದ ಬದಲಿಸುವ ನಿರ್ಧಾರ ಪ್ರಕಟಿಸಿತು. ಈ ಪ್ರದೇಶದಲ್ಲಿ ಶಾಸನಾತ್ಮಕವಾಗಿ ಗಣಿಗಾರಿಕೆಗೆ ಅವಕಾಶ ಸಿಕ್ಕರೆ ಸಾವಿರಾ ಮಂದಿಗೆ ಪ್ರತ್ಯಕ್ಷ ಹಾಗೂ ಪರೋಕ್ಷವಾಗಿ ಉದ್ಯೋಗ ಸಿಗುತ್ತದೆ. ಇಲ್ಲಿ ಗಣಿಗಾರಿಕೆಗೆ ಅವಕಾಶ ನೀಡುವ ಪ್ರಸ್ತಾವವನ್ನು ರಾಜಸ್ಥಾನದ ವನ್ಯಜೀವಿ ಮಂಡಳಿಯು ಕಳೆದ ಫೆಬ್ರುವರಿಯಲ್ಲಿ ಅನುಮೋದಿಸಿದೆ.

ಕಾಂಗ್ರೆಸ್ ನೇತೃತ್ವದ ರಾಜಸ್ಥಾನ ಸರ್ಕಾರವು ಈ ಬೆಳವಣಿಗೆಗೂ ರಾಮ ಮಂದಿರ ನಿರ್ಮಾಣಕ್ಕೂ ನೇರ ಸಂಬಂಧ ಇದೆ ಎಂಬ ವರದಿಗಳನ್ನು ತಳ್ಳಿಹಾಕಿದೆ. ರಾಮಮಂದಿರಕ್ಕೆ ಶಿಲೆ ತರುವ ವಿಚಾರದಲ್ಲಿ ಇದ್ದ ತಾಂತ್ರಿಕ ತೊಡಕು ಈಗ ಪರಿಹಾರವಾಗಿದೆ ಎಂದು ಅಯೋಧ್ಯೆಯ ವಿಶ್ವ ಹಿಂದೂ ಪರಿಷತ್​ನ ನಾಯಕ ತ್ರಿಲೋಕಿ ನಾಥ್ ಪಾಂಡೆ ಪ್ರತಿಕ್ರಿಯಿಸಿದ್ದಾರೆ. ಬನ್ಸಿ ಪಹಾರ್​ಪುರ್ ಪ್ರದೇಶದಿಂದ ಸಾವಿರಾರು ಟನ್ ಶಿಲೆಯನ್ನು ಈವರೆಗೆ ದೇಶದ ವಿವಿಧೆಡೆ ದೇವಾಲಯ ನಿರ್ಮಾಣಕ್ಕೆ ಬಳಸಲಾಗುತ್ತಿದೆ. ಆದರೆ ಸರಬರಾಜು ಪ್ರಮಾಣ ಸಾಲುತ್ತಿರಲಿಲ್ಲ ಎಂದು ಅವರು ಹೇಳಿದ್ದಾರೆ.

ಅಯೋಧ್ಯೆಯಲ್ಲಿ ಕಲ್ಲುಗಳಿಗಾಗಿ ಹಲವು ದಿನಗಳಿಂದ ಬೇಡಿಕೆಯಿತ್ತು. ಆದರೆ ಕಳೆದ ಸೆಪ್ಟೆಂಬರ್​ನಲ್ಲಿ ಅಕ್ರಮ ಗಣಿಗಾರಿಕೆಯಿಂದ ಸಂಗ್ರಹಿಸಿದ್ದ ಕಲ್ಲು ಹೊತ್ತು ಸಾಗುತ್ತಿದ್ದ 25 ಟ್ರಕ್​ಗಳನ್ನು ರಾಜಸ್ಥಾನ ಸರ್ಕಾರ ತಡೆದ ನಂತರ ಕಲ್ಲಿನ ಸರಬರಾಜು ನಿಂತುಹೋಗಿತ್ತು.

(Rajasthan To Begin E-Auction To Mine Sandstone To Be Used For Ayodhya Ram Temple)

ಇದನ್ನೂ ಓದಿ: ‘ಅಯೋಧ್ಯೆಯಲ್ಲಿ ಶ್ರೀರಾಮಮಂದಿರ ನಿರ್ಮಾಣ ಕಾರ್ಯ ಭರದಿಂದ ಸಾಗುತ್ತಿದೆ..ಯಾವುದೇ ಅಡೆತಡೆಗಳೂ ಇಲ್ಲ’

ಇದನ್ನೂ ಓದಿ: ಮತ್ತೆ ವಿವಾದದಲ್ಲಿ ಅಯೋಧ್ಯೆ ಶ್ರೀರಾಮಜನ್ಮಭೂಮಿ; ಸಿಬಿಐ, ಇಡಿ ತನಿಖೆಗೆ ಆಗ್ರಹಿಸಿದ ಎಸ್​ಪಿ, ಆಪ್​ ಪಕ್ಷಗಳು

Published On - 10:33 pm, Mon, 14 June 21