Greta Thunberg toolkit Case: ಮಾರ್ಚ್ 8ರವರೆಗೆ ಶಾಂತನು ಮುಲುಕ್ರನ್ನು ಬಂಧಿಸದಂತೆ ದೆಹಲಿ ಕೋರ್ಟ್ ಸೂಚನೆ
Shantanu Muluk: ಗ್ರೇಟಾ ಥನ್ಬರ್ಗ್ ಹಂಚಿಕೊಂಡ ಟೂಲ್ಕಿಟ್ನ್ನು ಶಾಂತನು ಎಂಬ ವ್ಯಕ್ತಿ ರಚಿಸಿದ್ದು, ದಿಶಾ ರವಿ, ನಿಖಿತಾ ಜಾಕೋಬ್ ಸೇರಿ ಇನ್ನಿತರರು ಸಂಪಾದನೆ ಮಾಡುವ ಆಪ್ಶನ್ ಹೊಂದಿದ್ದರು ಎಂದು ಪೊಲೀಸರು ಆರೋಪಿಸಿದ್ದರು.
Updated on: Feb 25, 2021 | 2:16 PM
ದೆಹಲಿ: ಗ್ರೇಟಾ ಥನ್ಬರ್ಗ್ ಟೂಲ್ಕಿಟ್ ತಯಾರಿಕೆ (Greta Thunberg toolkit Case) ಆರೋಪ ಎದುರಿಸುತ್ತಿರುವ ಶಾಂತನು ಮುಲುಕ್ರನ್ನು ಮಾರ್ಚ್ 8ರವರೆಗೆ ಬಂಧಿಸದಂತೆ ದೆಹಲಿ ನ್ಯಾಯಾಲಯ ಆದೇಶ ನೀಡಿದೆ. ಶಾಂತನು ಮುಲುಕ್ ಸಲ್ಲಿಸಿದ್ದ ಜಾಮೀನು ಅರ್ಜಿಯನ್ನು ವಿಚಾರಣೆ ನಡೆಸುವುದಕ್ಕೂ ಮುನ್ನ ಈ ಪ್ರಕರಣದ ಕುರಿತು ಅವರ ವಿಚಾರಣೆ/ತನಿಖೆ ನಡೆಸಲು ಹೆಚ್ಚಿನ ಕಾಲಾವಕಾಶ ಅಗತ್ಯವಿದೆ ಎಂದು ದೆಹಲಿ ಪೊಲೀಸರು ನ್ಯಾಯಾಲಯಕ್ಕೆ ಮನವಿ ಮಾಡಿದ್ದರು. ಆದರೆ, ದೆಹಲಿ ಪೊಲೀಸರ ಮನವಿ ಪುರಸ್ಕರಿಸದ ನ್ಯಾಯಾಲಯ ಮಾರ್ಚ್ 8ರವರೆಗೂ ಶಾಂತನು ಮುಲುಕ್ರನ್ನು ಬಂಧನ ಮಾಡದಂತೆ ಆದೇಶ ನೀಡಿದೆ. ಮಾರ್ಚ್ 9 ರಂದು ಈ ಪ್ರಕರಣದ ಮುಂದಿನ ವಿಚಾರಣೆ ನಡೆಸಲಾಗುವುದು ಎಂದು ಸಹ ಆದೇಶ ನೀಡಿದ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶ ಧರ್ಮೇಂದ್ರ ರಾಣಾ ದೆಹಲಿ ಪೊಲೀಸರಿಗೆ ತಿಳಿಸಿದ್ದಾರೆ
ಯಾರು ಈ ಶಾಂತನು ಮುಲುಕ್?
ಗ್ರೇಟಾ ಥನ್ಬರ್ಗ್ ಹಂಚಿಕೊಂಡ ಟೂಲ್ಕಿಟ್ನ್ನು ಶಾಂತನು ಎಂಬ ವ್ಯಕ್ತಿ ರಚಿಸಿದ್ದು, ದಿಶಾ ರವಿ, ನಿಖಿತಾ ಜಾಕೋಬ್ ಸೇರಿ ಇನ್ನಿತರರು ಸಂಪಾದನೆ ಮಾಡುವ ಆಪ್ಶನ್ ಹೊಂದಿದ್ದರು ಎಂದು ಪೊಲೀಸರು ಆರೋಪಿಸಿದ್ದರು.
ಪ್ರೋ ಖಲಿಸ್ತಾನಿ ಪೊಯೆಟಿಕ್ ಜಸ್ಟೀಸ್ ಫೌಂಡೇಶನ್ನ ಸ್ಥಾಪಕ ಮೊ ಧಲಿವಾಲ್ ಬೆಂಗಳೂರು ಮೂಲದ 21ರ ಹರೆಯದ ದಿಶಾ ರವಿ ಮತ್ತು ನಿಖಿತಾ ಜಾಕೋಬ್ರನ್ನು ಝೂಮ್ ಮೂಲಕ ಸಂಪರ್ಕಿಸಿದ್ದರು. ಗಣರಾಜ್ಯೋತ್ಸವದ ದಿನವೇ ಸಾಮಾಜಿಕ ಜಾಲತಾಣಗಳ ಮೂಲದ ವಿಶ್ವದಾದ್ಯಂತ ಭಾರತದ ಆಡಳಿತ ವಿರೋಧಿ ಅಲೆ ಮೂಡಿಸುವಂತೆ ಸಂಚಲನ ಸೃಷ್ಟಿಸಲು ಯೋಜನೆ ರೂಪಿಸಿದ್ದರು. ಈ ಕುರಿತು ಹಲವು ಸ್ಕ್ರೀನ್ಶಾಟ್ಗಳು ಮತ್ತು ಆಧಾರಗಳನ್ನು ಸಂಗ್ರಹಿಸಿದ ನಂತರವೇ ದೆಹಲಿ ಕೋರ್ಟ್ ಮೂಲಕ ಸರ್ಚ್ ವಾರಂಟ್ ಸಲ್ಲಿಸಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ. ಈ ಪ್ರಕರಣದ ಮುಖ್ಯ ಅಂಶವಾದ ಟೂಲ್ಕಿಟ್ ಅನ್ನು ಶಾಂತನು ಮುಲುಕ್ ರಚಿಸಿದ್ದ ಎಮದು ಪೊಲೀಸರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದರು.
ಈ ಮೊದಲೇ ದೊರಕಿತ್ತು ಪ್ರಯಾಣ ಕಾಲದ ನಿರೀಕ್ಷಣಾ ಜಾಮೀನು
ಗ್ರೇಟಾ ಥನ್ಬರ್ಗ್ ಟೂಲ್ಕಿಟ್ ಸಿದ್ಧಪಡಿಸಿದ ಪ್ರಕರಣಕ್ಕೆ ಸಂಬಂಧಿಸಿ ಶಂತನು ಮುಲುಕ್ಗೆ 10 ದಿನದವರೆಗೆ ಬಾಂಬೆ ಹೈಕೋರ್ಟ್ನ ಔರಂಗಾಬಾದ್ ಪೀಠ ಪ್ರಯಾಣ ಕಾಲದ ನಿರೀಕ್ಷಣಾ ಜಾಮೀನು (Transit Anticipatory Bail) ನೀಡಿದೆ. ಆದರೆ, ಇನ್ನೋರ್ವ ಆರೋಪಿ ನಿಕಿತಾ ಜಾಕೋಬ್ ಅರ್ಜಿ ವಿಚಾರಣೆಯನ್ನು ನಾಳೆ ಆಲಿಸುವುದಾಗಿ ಕೋರ್ಟ್ ತಿಳಿಸಿದೆ.
ಗ್ರೇಟಾ ಥನ್ಬರ್ಗ್ ಜತೆ ವಾಟ್ಸ್ಆ್ಯಪ್ ಚಾಟ್ ಮಾಡಿದ್ದ ದಿಶಾ ರವಿ ಫೆಬ್ರವರಿ 4ರಂದು ಗಲಭೆ ಕುರಿತು ಟೂಲ್ ಕಿಟ್ ತಯಾರಿಸಿದ್ದು, ಮೊಬೈಲ್ನಲ್ಲಿದ್ದ ಡಾಟಾ ಡಿಲೀಟ್ ಮಾಡಿದ್ದಾರೆ. ಆದರೂ, ದಿಶಾ ರವಿಯಿಂದ ವಶಕ್ಕೆ ಪಡೆದ 1 ಫೋನ್, 2 ಲ್ಯಾಪ್ಟಾಪ್ಗಳಲ್ಲಿ ಭಾರತದ ಹೆಸರನ್ನು ಜಾಗತಿಕ ಮಟ್ಟದಲ್ಲಿ ಕೆಡಿಸಲು ಸಂಚು ರೂಪಿಸಿದ್ದರ ಕುರಿತು ಸಾಕ್ಷ್ಯ ದೊರೆತಿದ್ದಾಗಿ ಎಂದು ಅವರು ತಿಳಿಸಿದ್ದರು.
“ಕೆಲಕಾಲ ನಾವು ಏನನ್ನೂ ಹೇಳದೇ ಸುಮ್ಮನೇ ಇರೋಣ.ನಾನು ವಕೀಲರ ಜೊತೆಗೆ ಚರ್ಚೆ ಮಾಡುತ್ತೇನೆ. ನಮ್ಮ ವಿರುದ್ಧ UAPA ಕಾಯ್ದೆಯಡಿ ಪ್ರಕರಣ ದಾಖಲಿಸಬಹುದು” ಎಂದು ಗ್ರೇಟಾ ಥನ್ಬರ್ಗ್ಗೆ ದಿಶಾ ರವಿ ವಾಟ್ಸ್ಆ್ಯಪ್ ಸಂದೇಶ ಕಳುಹಿಸಿದ್ದರು. ನಂತರ ಹಳೆಯ ಟೂಲ್ಕಿಟ್ನ್ನು ಗ್ರೇಟಾ ಥನ್ಬರ್ಗ್ ಡಿಲೀಟ್ ಮಾಡಿದ್ದರು ಎಂದು ಪೊಲೀಸರು ಹೇಳಿದ್ದರು.
ಹೋರಾಟಗಾರರ ಬಂಧನ ಖಂಡಿಸಿದ್ದ ವಿರೋದ ಪಕ್ಷಗಳು
21 ವರ್ಷದ ಬೆಂಗಳೂರು ಮೂಲದ ಪರಿಸರ ಕಾರ್ಯಕರ್ತೆ ದಿಶಾ ರವಿ (Disha Ravi) ಬಿಡುಗಡೆಗೆ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಆಗ್ರಹಿಸಿದ್ದಾರೆ. ಭಾರತವನ್ನು ಇನ್ನೂ ಮೌನದಿಂದಿರುವಂತೆ ಮಾಡಲು ಸಾಧ್ಯವಿಲ್ಲ ಎಂದು ಟ್ವೀಟ್ ಮಾಡಿರುವ ಅವರು, ಕೇಂದ್ರ ಸರ್ಕಾರ ಸ್ವತಃ ಭಯಗೊಂಡು, ಹೋರಾಟಗಾರರನ್ನು ಬಂಧಿಸುತ್ತಿದೆಯೇ ಹೊರತು, ದೇಶ ಭಯಗೊಂಡಿಲ್ಲ ಎಂದು ಟ್ವೀಟ್ ಮಾಡಿದ್ದಾರೆ. (Greta Thunberg toolkit)
ಸಾಕ್ಷ್ಯಗಳ ಕೊರತೆ
ಗೃಹ ಇಲಾಖೆಯ ಸಂಸದೀಯ ಸ್ಥಾಯಿ ಸಮಿತಿ ಅಧ್ಯಕ್ಷ ಆನಂದ್ ಶರ್ಮಾ, ಸ್ಥಾಯಿ ಸಮಿತಿಯ ಕಾರ್ಯದರ್ಶಿಗೆ ದಿಶಾ ರವಿ ವಿರುದ್ಧದ ದೇಶದ್ರೋಹದ ಆರೋಪ ಹೇಗೆ ಸಾಬೀತು ಮಾಡುತ್ತೀರಿ ಎಂದು ಪ್ರಶ್ನೆ ಮಾಡಿದ್ದರು. ದಿಶಾ ರವಿ ಬಂಧನದಿಂದ ಭಾರತದ ಬಗ್ಗೆ ಅಂತರಾಷ್ಟ್ರೀಯ ಮಟ್ಟದ ಗ್ರಹಿಕೆಗೆ ಹೊಡೆತ ಬೀಳುವುದಿಲ್ಲವೇ ಎಂದು ಪ್ರಶ್ನಿಸಿರುವ ಅವರು, ಪರಿಸರ ಕಾರ್ಯಕರ್ತೆಯ ವಿರುದ್ಧದ ಆರೋಪವನ್ನು ಸಾಬೀತುಪಡಿಸಲು ಯಾವ ಸಾಕ್ಷ್ಯಗಳಿವೆ ಎಂದು ಪ್ರಶ್ನಿಸಿದ್ದರು.
