ಒಂದೇ ಒಂದು ಮದ್ಯದ ಬಾಟಲಿ ಮಾರಾಟ ಮಾಡದೆ ತೆಲಂಗಾಣ ಅಬಕಾರಿ ಇಲಾಖೆಗೆ 2,600 ಕೋಟಿ ರೂ. ಹರಿದುಬಂದಿದ್ಹೇಗೆ?

ಒಂದೇ ಒಂದು ಮದ್ಯದ ಬಾಟಲಿ ಮಾರಾಟ ಮಾಡದೆಯೂ ತೆಲಂಗಾಣ ಅಬಕಾರಿಗೆ ಇಲಾಖೆಗೆ 2,600 ಕೋಟಿ ರೂ. ಹರಿದುಬಂದಿದೆ. ರಾಜ್ಯದಲ್ಲಿ 2,620 ಮದ್ಯದಂಗಡಿಗಳ ಹಂಚಿಕೆಗಾಗಿ ಸುಮಾರು 1.32 ಲಕ್ಷ ಅರ್ಜಿದಾರರಿಂದ ಅರ್ಜಿ ಶುಲ್ಕದ ರೂಪದಲ್ಲಿ ಈ ಮೊತ್ತವನ್ನು ಪಡೆಯಲಾಗಿದೆ. 2023-25ರ ಹೊಸ ಮದ್ಯ ನೀತಿಯ ಪ್ರಕಾರ ಅರ್ಜಿ ಶುಲ್ಕವನ್ನು 2 ಲಕ್ಷ ರೂ.ಗೆ ನಿಗದಿಪಡಿಸಲಾಗಿದೆ. ರಾಜ್ಯ ಸರ್ಕಾರವು ಅರ್ಜಿಗಳಿಗೆ ಕೊನೆಯ ದಿನಾಂಕವನ್ನು ಘೋಷಿಸಿದ ನಂತರ ಆಗಸ್ಟ್ 18 ರಂದು ಅಬಕಾರಿ ಇಲಾಖೆ ಕಚೇರಿಗೆ ಹಣದ ಹೊಳೆಯೇ ಹರಿಯುತ್ತಿತ್ತು, ಕಳೆದ ಎರಡು ದಿನಗಳಲ್ಲೇ 87 ಸಾವಿರಕ್ಕೂ ಹೆಚ್ಚು ಅರ್ಜಿಗಳು ಬಂದಿವೆ.

ಅಂಗಡಿಗಳ ಹಂಚಿಕೆಗೆ ಅರ್ಜಿ ಸಲ್ಲಿಸುವ ಪ್ರಕ್ರಿಯೆ ಶುಕ್ರವಾರ ಸಂಜೆ ಕೊನೆಗೊಂಡಿದೆ. ಸರೂರನಗರದಲ್ಲಿ ಅತಿ ಹೆಚ್ಚು ಅಂದರೆ 10,908 ಅರ್ಜಿಗಳು ಬಂದಿದ್ದರೆ, ಶಂಶಾಬಾದ್‌ನಲ್ಲಿ 10,811 ಅರ್ಜಿಗಳು ಬಂದಿವೆ. ಕುಮ್ರಂಭೀಮ್ ಆಸಿಫಾಬಾದ್ ಕಡಿಮೆ ಸಂಖ್ಯೆ 967 ಹೊಂದಿದೆ. ಪ್ರತಿ ಮದ್ಯದಂಗಡಿಗೆ ಸುಮಾರು 50 ಮಂದಿ ಪೈಪೋಟಿ ನಡೆಸುತ್ತಿದ್ದಾರೆ. ಲಕ್ಕಿ ಡ್ರಾ ವ್ಯವಸ್ಥೆಯ ಮೂಲಕ ಆಗಸ್ಟ್ 21 ರಂದು ಮದ್ಯದಂಗಡಿಗಳನ್ನು ಹಂಚಿಕೆ ಮಾಡಲಾಗುವುದು. ಅಬಕಾರಿ ಇಲಾಖೆಯು ಡಿಸೆಂಬರ್ 1, 2023 ರಿಂದ ನವೆಂಬರ್ 2025 ರವರೆಗೆ ಅಂಗಡಿಗಳಿಗೆ ಪರವಾನಗಿಗಳನ್ನು ನೀಡುತ್ತದೆ.

ಪ್ರತಿ ಅಂಗಡಿಯ ವಾರ್ಷಿಕ ಪರವಾನಗಿ ಶುಲ್ಕವು ಪ್ರದೇಶದ ಜನಸಂಖ್ಯೆಗೆ ಅನುಗುಣವಾಗಿ 50 ಲಕ್ಷದಿಂದ 1.1 ಕೋಟಿ ರೂ. ಅರ್ಹ ಅರ್ಜಿದಾರರು ಒಂದು ವರ್ಷಕ್ಕೆ ಅಬಕಾರಿ ತೆರಿಗೆಯಾಗಿ ಮೊತ್ತದ 25 ಪ್ರತಿಶತವನ್ನು ಸಲ್ಲಿಸಬೇಕು. ವಿಶೇಷ ಚಿಲ್ಲರೆ ಅಬಕಾರಿ ತೆರಿಗೆ ವಾರ್ಷಿಕ 5 ಲಕ್ಷ ರೂ. ರಾಜ್ಯಾದ್ಯಂತ 2,620 ಅಂಗಡಿಗಳಿಗೆ ಪರವಾನಗಿ ನೀಡಲಾಗುತ್ತದೆ.

ಮತ್ತಷ್ಟು ಓದಿ: Liquor: ಹೊಸ ವರ್ಷಕ್ಕೆ ಭರ್ಜರಿ ಮದ್ಯ ಮಾರಾಟ: ಅಬಕಾರಿ ಇಲಾಖೆ ಬೊಕ್ಕಸಕ್ಕೆ ಹರಿದು ಬಂತು 657 ಕೋಟಿ ರೂ. ಆದಾಯ

15 ರಷ್ಟು ಅಂಗಡಿಗಳನ್ನು ವಿವಿಧ ದುರ್ಬಲ ವರ್ಗಗಳಿಗೆ ಸರ್ಕಾರ ಮೀಸಲಿಟ್ಟಿದೆ. ಗೌಡರು, ಎಸ್‌ಸಿ ಮತ್ತು ಎಸ್‌ಟಿಗಳಿಗೆ ಒಟ್ಟು 786 ಅಂಗಡಿಗಳನ್ನು ಮಂಜೂರು ಮಾಡಲಾಗುವುದು. ಪಾರಂಪರಿಕವಾಗಿ ಕಡ್ಡಿ ಕುಟ್ಟುವುದು, ಮದ್ಯ ಮಾರಾಟ ಮಾಡುವ ವೃತ್ತಿಯಲ್ಲಿರುವ ಗೌಡ ಸಮುದಾಯದವರಿಗೆ ಮದ್ಯದಂಗಡಿಗಳಲ್ಲಿ ಶೇ.15ರಷ್ಟು ಮೀಸಲಾತಿ ನೀಡಿದ್ದರೆ, ಶೇ.10ರಷ್ಟು ಮಾರಾಟ ಮಳಿಗೆಗಳನ್ನು ಎಸ್‌ಸಿಗಳಿಗೆ ಹಾಗೂ ಶೇ.5ರಷ್ಟು ಮೀಸಲಾತಿ ಎಸ್ಟಿಗಳಿಗೆ ಕಲ್ಪಿಸಲಾಗಿದೆ.

ಒಟ್ಟು ಅಂಗಡಿಗಳ ಪೈಕಿ 615 ಅಂಗಡಿಗಳನ್ನು ಹೈದರಾಬಾದ್‌ನಲ್ಲಿ ಹಂಚಿಕೆ ಮಾಡಲಾಗುವುದು. ಹೊಸ ಮದ್ಯ ನೀತಿಯಂತೆ ವ್ಯಾಪಾರಿಗಳಿಗೆ ಸಾಮಾನ್ಯ ವರ್ಗಕ್ಕೆ ಶೇ 27, ಪ್ರೀಮಿಯಂ ವರ್ಗ ಮತ್ತು ಬಿಯರ್‌ಗೆ ಶೇ 20 ರಷ್ಟು ಮಾರ್ಜಿನ್ ನಿಗದಿಪಡಿಸಲಾಗಿದೆ. ಪ್ರಸ್ತುತ ಪರವಾನಗಿಗಳು ನವೆಂಬರ್ 30 ರವರೆಗೆ ಚಾಲ್ತಿಯಲ್ಲಿದ್ದರೂ, ರಾಜ್ಯ ಸರ್ಕಾರವು ನವೆಂಬರ್ ನಿಂದ ಡಿಸೆಂಬರ್ ಆಸುಪಾಸಿನಲ್ಲಿ ನಡೆಯುವ ವಿಧಾನಸಭಾ ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಟೆಂಡರ್ ಪ್ರಕ್ರಿಯೆಯನ್ನು ಬಹಳ ಮುಂಚಿತವಾಗಿ ಪ್ರಾರಂಭಿಸಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:56 am, Mon, 21 August 23