ಪೊಲೀಸ್ ಶ್ವಾನಗಳಿಗೆ ಹೆದರಿ, ಕದ್ದ ಹಣವನ್ನು ಇನ್​​ಸ್ಟಾಲ್​​ಮೆಂಟ್​​ನಲ್ಲಿ ಹಿಂದಿರುಗಿಸಿದ ಕಳ್ಳ; ಅವನ್ಯಾರೆಂಬುದು ಮಾತ್ರ ಗೊತ್ತಾಗಿಲ್ಲ

ಹೈದರಾಬಾದ್​: ವಾಸನೆಯಿಂದಲೇ ಅಪರಾಧಿಗಳನ್ನು ಪತ್ತೆಹಚ್ಚುವ ಸ್ನಿಫರ್ ಶ್ವಾನಗಳಿಂದ ಅದೆಷ್ಟೋ ಅಪರಾಧ ಪ್ರಕರಣಗಳನ್ನು ಪೊಲೀಸರು ಭೇದಿಸಿದ್ದಾರೆ. ಹಲವು ತಳಿಯ ನಾಯಿಗಳನ್ನು ಸ್ನಿಫರ್ ಶ್ವಾನಗಳ ವಿಭಾಗಕ್ಕೆ ಸೇರಿಸಲಾಗಿದ್ದು, ಸೈನ್ಯ ಹಾಗೂ ಪೊಲೀಸ್​ ಇಲಾಖೆಯಲ್ಲಿ ಹೆಚ್ಚು ಬಳಕೆಯಾಗುತ್ತವೆ. ಇದೀಗ ಇಂಥ ಪೊಲೀಸ್ ಸ್ನಿಫರ್​ ನಾಯಿಗಳಿಗೆ ಹೆದರಿ ಕಳ್ಳನೊಬ್ಬ ತಾನು ಕದ್ದ ಹಣವನ್ನು ಸದ್ದಿಲ್ಲದೆ ಮರಳಿಸಿದ್ದಾನೆ.

ಈ ಘಟನೆ ನಡೆದದ್ದು ಹೈದರಾಬಾದ್​​ನ ಖಮ್ಮಮ್​ ಜಿಲ್ಲೆಯ ದುಬ್ಬತಾಂಡಾ ಗ್ರಾಮದಲ್ಲಿ. ಕಳ್ಳನೊಬ್ಬ ರೈತ ಗುಗುಲೋತ್ ಲಚ್ಚರಾಮ್ ಮನೆಯಿಂದ 1ಲಕ್ಷ ರೂಪಾಯಿಯನ್ನು ಕಳವು ಮಾಡಿದ್ದ. ಗುಗಲೋತ್​ ಅವರು, ತಮ್ಮ ಮನೆಯಿಂದ ಮಾರ್ಚ್​ 17ರಂದು, 1.7ಲಕ್ಷ ರೂ. ಕಳವಾಗಿದೆ ಎಂದು ದೂರು ನೀಡಿದ್ದರು. ಪೊಲೀಸರು ಮಾ.20ರಿಂದ ತನಿಖೆಯನ್ನೂ ಪ್ರಾರಂಭಿಸಿದ್ದರು.

ಅದರ ಮೊದಲ ಹಂತವಾಗಿ ಅಪರಾಧ ವಿಭಾಗದ ಪೊಲೀಸರು, ಶ್ವಾನದಳದೊಂದಿಗೆ ರೈತನ ಮನೆಯ ಬಳಿ ತೆರಳಿದ್ದರು. ಈ ಎಲ್ಲ ಚಟುವಟಿಕೆಗಳ ಮೇಲೆ ಕಳ್ಳ ಕಣ್ಣಿಟ್ಟಿದ್ದ. ಯಾವಾಗ ಶ್ವಾನದಳ ಅಪರಾಧ ನಡೆದ ಸ್ಥಳಕ್ಕೆ ಭೇಟಿ ನೀಡಿತೋ, ಆತ ಅಕ್ಷರಶಃ ಹೆದರಿದ್ದ. ಮಾರ್ಚ್​ 21ರಂದು, ಅಂದರೆ ಪೊಲೀಸರು ತನಿಖೆ ಶುರು ಮಾಡಿದ ಮರುದಿನವೇ ರೈತ ಲಚ್ಚರಾಮ್ ಮನೆಯೆದುರು 1 ಲಕ್ಷ ರೂ. ಇಟ್ಟು ಹೋಗಿದ್ದ. ಮಾರ್ಚ್​ 22ರಂದು ಉಳಿದ 70,000 ರೂ.ನ್ನೂ ಇಟ್ಟ. ಹಣವನ್ನು ರೈತ ವಾಪಸ್​ ಪಡೆದರೂ, ನಾವು ತನಿಖೆ ಮುಂದುವರಿಸುತ್ತೇವೆ ಎಂದು ಪೊಲೀಸರು ಹೇಳಿದ್ದಾರೆ. ಕಳ್ಳ ಯಾರು ಎಂಬುದು ಇನ್ನೂ ಪತ್ತೆಯಾಗಿಲ್ಲ ಎಂದೂ ಹೇಳಿದ್ದಾರೆ.

ಇದನ್ನೂ ಓದಿ: 20 ವಿದೇಶಿ ತಳಿಯ ಶ್ವಾನಗಳ ಪಾಲನೆ: ಬೀದರ್ ರಾಜಕಾರಣಿಯ ಶ್ವಾನ ಪ್ರೀತಿ ಇತರರಿಗೆ ಮಾದರಿ

‘ಮಹಿಳೆಯರು 8ರ ಶೇಪ್​ ಕಳೆದುಕೊಳ್ಳುತ್ತಿದ್ದಾರೆ.. ಸೊಂಟವೆಲ್ಲ ದೊಡ್ಡದಾಗುತ್ತಿದೆ’-ಅಸಭ್ಯ ಕೈಸನ್ನೆಯೊಂದಿಗೆ, ವಿವಾದಾತ್ಮಕ ಹೇಳಿಕೆ ನೀಡಿದ ರಾಜಕಾರಣಿ

Published On - 7:15 pm, Wed, 24 March 21