ಕೋವಿಡ್-19 ವಿರುದ್ಧ ಹೋರಾಡಲು ಯುಪಿಐ ಮಹತ್ವದ ಪಾತ್ರವಹಿಸಿದೆ: ಪ್ರಧಾನಿ ಮೋದಿ

ದೆಹಲಿ ಮೇ 27:  ಕೋವಿಡ್-19 (Covid 19) ಸಾಂಕ್ರಾಮಿಕ ರೋಗದ ವಿರುದ್ಧ ಭಾರತದ ಹೋರಾಟದಲ್ಲಿ ಯುನಿಫೈಡ್ ಪೇಮೆಂಟ್ಸ್ ಇಂಟರ್‌ಫೇಸ್ (UPI) ಸೌಲಭ್ಯವು ಮಹತ್ವದ ಪಾತ್ರ ವಹಿಸಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ (Narendra Modi) ಹೇಳಿದ್ದಾರೆ. ಐಎಎನ್ಎಸ್ ಸುದ್ದಿಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ನರೇಂದ್ರ ಮೋದಿ, “ಯುಪಿಐ ಇಲ್ಲದಿದ್ದರೆ, ನಾವು ಕೋವಿಡ್ ಯುದ್ಧವನ್ನು ಹೇಗೆ ಎದುರಿಸುತ್ತಿದ್ದೆವು ಎಂದು ಯಾರಾದರೂ ನನಗೆ ಹೇಳಬಹುದೇ? ಶ್ರೀಮಂತ ರಾಷ್ಟ್ರಗಳು ಸಹ ಸಾಕಷ್ಟು ಹಣವನ್ನು ಹೊಂದಿದ್ದರೂ ಸಹ ತಮ್ಮ ಜನರಿಗೆ ಹಣವನ್ನು ನೀಡಲು ಸಾಧ್ಯವಾಗಲಿಲ್ಲ. ನಾವು ಅದನ್ನು ಅಗತ್ಯವಿರುವವರಿಗೆ ಸುಲಭವಾಗಿ ನೀಡಿದ್ದೇವೆ” ಎಂದು ಹೇಳಿದ್ದಾರೆ.

“ಇಂದು ನಾವು 11 ಕೋಟಿ ರೈತರಿಗೆ 30 ಸೆಕೆಂಡ್‌ಗಳಲ್ಲಿ ಹಣ ಕಳುಹಿಸಬಹುದು. ಯಾವುದೇ ಸಾಮಾನ್ಯ ವ್ಯಕ್ತಿ ಬಳಸಬಹುದಾದಂತಹ ವಿಶ್ವದರ್ಜೆಯ ಉತ್ಪನ್ನಗಳನ್ನು ರಚಿಸುವ ಪ್ರತಿಭಾವಂತ ಯುವಕರಿಂದಾಗಿ ಈಗ, UPI ಬಳಕೆದಾರ ಸ್ನೇಹಿಯಾಗಿದೆ ಎಂದಿದ್ದಾರೆ ಮೋದಿ.

2020 ಮತ್ತು 2021 ರಲ್ಲಿ ದೇಶದಲ್ಲಿ ಕೋವಿಡ್-ಪ್ರೇರಿತ ಲಾಕ್‌ಡೌನ್‌ಗಳ ಸಮಯದಲ್ಲಿ ಭಾರತದಲ್ಲಿ ಇಂಟರ್ನೆಟ್ ಡೇಟಾವನ್ನು ಅಗ್ಗಗೊಳಿಸಲಾಗಿದೆ. ಇದು ಮಕ್ಕಳು ಮತ್ತು ಯುವಕರು ತಮ್ಮ ಜೀವನದಲ್ಲಿ ಬದಲಾವಣೆಯನ್ನು ತರಲು ಸಹಾಯ ಮಾಡಿದೆ. “ಕೋವಿಡ್ ಸಮಯದಲ್ಲಿ 14-15 ವರ್ಷ ವಯಸ್ಸಿನವರಾಗಿದ್ದು, ಈಗ ಮೊದಲ ಬಾರಿಗೆ ಮತದಾರರು ಆಗಿರುವ ಯುವಕರ ಜೀವನದ ಬಗ್ಗೆ ನಾನು ಚಿಂತಿತನಾಗಿದ್ದೆ. ಆದ್ದರಿಂದ ನಾವು ಡೇಟಾವನ್ನು ತುಂಬಾ ಅಗ್ಗವಾಗಿ ಮಾಡಿದ್ದೇವೆ. ಅವರು ತಮ್ಮ ಮನೆಯ ನಾಲ್ಕು ಗೋಡೆಗಳೊಳಗೆ ಸಿಲುಕಿಕೊಂಡರೆ, ಅದು ಅವರ ಬಾಲ್ಯ ಮುಗಿದೇ ಹೋಗುತ್ತದೆ ಎಂದು ನಾನು ಚಿಂತೆ ಮಾಡಿದ್ದೆ ಎಂದು ಪ್ರಧಾನಿ ಹೇಳಿದರು.

ಡೇಟಾವನ್ನು ಅಗ್ಗವಾಗಿಸುವ ಹಿಂದಿನ ತರ್ಕವೆಂದರೆ “ಅವರು ಇಂಟರ್ನೆಟ್ ಅನ್ನು ಬಳಸಬೇಕು. ಅವರು ಹೊಸ ಜಗತ್ತನ್ನು ನೋಡಬೇಕೆಂದು ನಾನು ಬಯಸಿದ್ದೆ, ಅದು ಸಂಭವಿಸಿದೆ. ನಾವು ಅದರಿಂದ ಪ್ರಯೋಜನ ಪಡೆದಿದ್ದೇವೆ” ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ.

ದೂರಸಂಪರ್ಕ ಇಲಾಖೆ (DoT) ಯ ಮಾಹಿತಿಯ ಪ್ರಕಾರ, 2020 ರಲ್ಲಿ ಇಂಟರ್ನೆಟ್ ಡೇಟಾದ ವೆಚ್ಚವನ್ನು ಪ್ರತಿ GB ಗೆ 10.55 ರೂ.ಗೆ ಇಳಿಸಲಾಯಿತು. ಇದು ಲಕ್ಷಾಂತರ ನಾಗರಿಕರಿಗೆ ಕೈಗೆಟುಕುವ ಇಂಟರ್ನೆಟ್ ಪ್ರವೇಶವನ್ನು ಸಕ್ರಿಯಗೊಳಿಸುತ್ತದೆ. ಪ್ರಧಾನಿಯವರ ಪ್ರಕಾರ, ಅಗ್ಗದ ಡೇಟಾವು ದೇಶಕ್ಕೆ ವಿಶ್ವ ದರ್ಜೆಯ ಪರಿಹಾರಗಳನ್ನು ರಚಿಸಲು ಸಹಾಯ ಮಾಡಿದೆ. ಈ ಕ್ರಮಗಳು “ಕೋವಿಡ್‌ನ ಸಮಸ್ಯೆಗಳನ್ನು ಅವಕಾಶವಾಗಿ ಪರಿವರ್ತಿಸುವಲ್ಲಿ ಭಾರತವು ದೊಡ್ಡ ಪಾತ್ರವನ್ನು ವಹಿಸಲು ಸಹಾಯ ಮಾಡಿದೆ” ಎಂದಿದ್ದಾರೆ ಮೋದಿ.

ತಾಜ್ ಮಹಲ್ ದೇಶದ ಏಕೈಕ ಪ್ರವಾಸೋದ್ಯಮ ತಾಣವಲ್ಲ

ವಿಶ್ವದ ಏಳು ಅದ್ಭುತಗಳಲ್ಲಿ ಒಂದಾದ ತಾಜ್ ಮಹಲ್ ದೇಶದ ಏಕೈಕ ಪ್ರವಾಸೋದ್ಯಮ ತಾಣವಲ್ಲ, ವಿದೇಶಿಯರು ಹೇರಳವಾಗಿ ಭೇಟಿ ನೀಡುತ್ತಾರೆ. ಇತರ ಪ್ರಶಾಂತ ಮತ್ತು ಸುಂದರವಾದ ಸ್ಥಳಗಳು ಸಾಕಷ್ಟು ಇವೆ. ಅವುಗಳನ್ನು ಅನ್ವೇಷಿಸಬೇಕಿದೆ ಎಂದು ಮೋದಿ ಹೇಳಿದ್ದಾರೆ. ಆರೋಗ್ಯಕರ ಅನುಭವ ಮತ್ತು ದೇಶದ 360 ಡಿಗ್ರಿ ವೀಕ್ಷಣೆಗಾಗಿ ಇಂಥಾ ಸ್ಥಳಗಳಿಗೆ ಭೇಟಿ ನೀಡುವಂತೆ ಮೋದಿ ಪ್ರವಾಸಿಗರನ್ನು ಒತ್ತಾಯಿಸಿದರು.

ಭಾರತದಾದ್ಯಂತ ಜಿ-20 ಶೃಂಗಸಭೆಗಳ ಸರಣಿಯೊಂದಿಗೆ ಭಾರತ ಮತ್ತು ಅದರ ವೈವಿಧ್ಯತೆಯ ಬಗ್ಗೆ ಜಾಗತಿಕ ಶಕ್ತಿಗಳನ್ನು ‘ಕುತೂಹಲ’ ಮೂಡಿಸಲು ಮತ್ತು ಭಾರತದ ಹೊಸ ಇಮೇಜ್ ಮತ್ತು ಬ್ರ್ಯಾಂಡ್ ಅನ್ನು ರಚಿಸಲು ತನ್ನ ಸರ್ಕಾರವು ತನ್ನ ಪ್ರಯತ್ನಗಳಲ್ಲಿ ಯಶಸ್ವಿಯಾಗಿದೆ ಎಂದು ಪ್ರಧಾನಿ ಹೇಳಿದರು.

“ನಾವು ಜಿ-20 ಶೃಂಗಸಭೆಗಳನ್ನು ದೇಶದ ಉದ್ದಗಲಕ್ಕೂ ಆಯೋಜಿಸಿದ್ದೇವೆ. ಅದನ್ನು ದೆಹಲಿಗೆ ಮಾತ್ರ ಸೀಮಿತಗೊಳಿಸಲಿಲ್ಲ. ದೆಹಲಿ ಮಾತ್ರ ದೇಶವನ್ನು ಪ್ರತಿನಿಧಿಸುವುದಿಲ್ಲ ಎಂದು ಜಗತ್ತಿಗೆ ಅರಿವು ಮೂಡಿಸುವುದು ಇದರ ಹಿಂದಿನ ಉದ್ದೇಶ ಮತ್ತು ಚಿಂತನೆಯಾಗಿದೆ, ಆ ಎಲ್ಲಾ ವೈವಿಧ್ಯಮಯ ಸ್ಥಳಗಳಿಗೆ ಭೇಟಿ ನೀಡುವ ಮೂಲಕ ದೇಶದ ವೈವಿಧ್ಯತೆಯನ್ನು ಉತ್ತಮವಾಗಿ ಅನ್ವೇಷಿಸಬಹುದು. ತಾಜ್ ಮಹಲ್‌ಗೆ ಭೇಟಿ ನೀಡಿದ ಮಾತ್ರಕ್ಕೆ, ನೀವು ಇಡೀ ಭಾರತವನ್ನು ನೋಡಿದ್ದೀರಿ ಎಂದು ಭಾವಿಸಲು ಸಾಧ್ಯವಿಲ್ಲ. ದೇಶದಲ್ಲಿ ದೊಡ್ಡ ಸಾಮರ್ಥ್ಯವಿದೆ ಮತ್ತು ಅನ್ವೇಷಿಸಲು ಹಲವಾರು ಸ್ಥಳಗಳಿವೆ.

ಇದನ್ನೂ ಓದಿ: ಪಾಕಿಸ್ತಾನದಿಂದ ರಾಹುಲ್ ಗಾಂಧಿ, ಕೇಜ್ರಿವಾಲ್​ಗೆ ಬೆಂಬಲ; ಮೋದಿ ಹೇಳಿದ್ದೇನು?

ಜಿ 20 ಶೃಂಗಸಭೆಯ ನಂತರ ದೇಶದಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗಿದೆ ಎಂದು ಹೇಳಿಕೊಂಡ ಪ್ರಧಾನಿ ಮೋದಿ, ಇದು ದೇಶದ ಪ್ರವಾಸೋದ್ಯಮ ಭವಿಷ್ಯವನ್ನು ಹೇಗೆ ಹೆಚ್ಚಿಸಿತು ಎಂಬುದನ್ನು ವಿವರಿಸಿದರು. “ಜಿ20 ಅಡಿಯಲ್ಲಿ ದೇಶದ ವಿವಿಧ ಭಾಗಗಳಲ್ಲಿ ನಡೆದ 200 ಕ್ಕೂ ಹೆಚ್ಚು ಶೃಂಗಸಭೆಗಳಲ್ಲಿ ಜಗತ್ತಿನಾದ್ಯಂತದ 1 ಲಕ್ಷಕ್ಕೂ ಹೆಚ್ಚು ನೀತಿ ನಿರೂಪಕರು ಭಾಗವಹಿಸಿದ್ದಾರೆ. ಅವರು ಆ ಸ್ಥಳಗಳನ್ನು ಪರಿಶೋಧಿಸಿದ್ದು ಮಾತ್ರವಲ್ಲದೆ ಆಯಾ ದೇಶಗಳಲ್ಲಿರುವ ಅವರ ಕುಟುಂಬಗಳು ಮತ್ತು ಪರಿಚಯಸ್ಥರಿಗೆ ಭಾರತದ ಸೌಂದರ್ಯದ ಬಗ್ಗೆ ಮಾಹಿತಿ ನೀಡಿದರು” ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ