ದೆಹಲಿಯ ನೂತನ ಸಿಎಂ ಅತಿಶಿ ತಮ್ಮ ಸರ್​​ನೇಮ್ ಮಾರ್ಲೆನಾ ಕೈಬಿಟ್ಟಿದ್ದೇಕೆ?

ದೆಹಲಿ ಸೆಪ್ಟೆಂಬರ್ 17: ಆಮ್ ಆದ್ಮಿ ಪಕ್ಷದ ಹಿರಿಯ ನಾಯಕಿ ಅತಿಶಿ (Atishi)ದೆಹಲಿಯ ಹೊಸ ಮುಖ್ಯಮಂತ್ರಿಯಾಗಲಿದ್ದಾರೆ. ಪಕ್ಷದ ಶಾಸಕರ ಸಭೆಯಲ್ಲಿ ಅರವಿಂದ್ ಕೇಜ್ರಿವಾಲ್ (Arvind Kejriwal) ಅವರ ಉತ್ತರಾಧಿಕಾರಿಯಾಗಿ ಅವರ ಹೆಸರನ್ನು ಪ್ರಸ್ತಾಪಿಸಿದ ನಂತರ ಪಕ್ಷವು ಮಂಗಳವಾರ ಸರ್ವಾನುಮತದಿಂದ ಒಪ್ಪಿಗೆ ನೀಡಿದೆ. ಹಣಕಾಸು, ಶಿಕ್ಷಣ ಮತ್ತು ಕಂದಾಯ ಸೇರಿದಂತೆ 14 ಖಾತೆಗಳನ್ನು ಹೊಂದಿರುವ 43 ವರ್ಷದ ಅತಿಶಿ, ಅರವಿಂದ್ ಕೇಜ್ರಿವಾಲ್ ಜೈಲಿನಲ್ಲಿದ್ದಾಗ ದೆಹಲಿ ಸರ್ಕಾರವನ್ನು ಸಂಭಾಳಿಸಿದವರು. ಅಂದಹಾಗೆ ಕಾಂಗ್ರೆಸ್‌ನ ಶೀಲಾ ದೀಕ್ಷಿತ್ ಮತ್ತು ಬಿಜೆಪಿಯ ಸುಷ್ಮಾ ಸ್ವರಾಜ್ ನಂತರ ದೆಹಲಿಯ ಮೂರನೇ ಮಹಿಳಾ ಮುಖ್ಯಮಂತ್ರಿಯಾಗಲಿದ್ದಾರೆ ಈ ಅತಿಶಿ.

ಅರವಿಂದ್ ಕೇಜ್ರಿವಾಲ್ ಅವರು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಲು ಸಂಜೆ 4.30 ಕ್ಕೆ ರಾಜ್ ನಿವಾಸ್‌ನಲ್ಲಿ ಲೆಫ್ಟಿನೆಂಟ್ ಗವರ್ನರ್ ವಿಕೆ ಸಕ್ಸೇನಾ ಅವರನ್ನು ಭೇಟಿಯಾಗಲಿದ್ದಾರೆ.

ಶಿಕ್ಷಣ ಕ್ಷೇತ್ರದಲ್ಲಿ ಎಎಪಿ ಸರ್ಕಾರದ ಹಲವು ಸಾಧನೆಗಳಿಗೆ ಮನ್ನಣೆ ನೀಡಿದ ಅತಿಶಿ, ಮಾರ್ಚ್ 2023 ರಲ್ಲಿ ದೆಹಲಿ ಕ್ಯಾಬಿನೆಟ್‌ಗೆ ಸೇರ್ಪಡೆಗೊಂಡರು. ಮಾರ್ಚ್‌ನಲ್ಲಿ ಎಎಪಿ ಸಂಚಾಲಕ ಅರವಿಂದ್ ಕೇಜ್ರಿವಾಲ್ ಅವರನ್ನು ಬಂಧಿಸಿದಾಗ ಸರ್ಕಾರ ಮತ್ತು ಪಕ್ಷದಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತಿದ್ದಾರೆ.

ದೆಹಲಿ ವಿಶ್ವವಿದ್ಯಾನಿಲಯದ ಪ್ರಾಧ್ಯಾಪಕರಾದ ವಿಜಯ್ ಸಿಂಗ್ ಮತ್ತು ತ್ರಿಪ್ತಾ ವಾಹಿ ಅವರ ಮಗಳು, ಅತಿಶಿ ಸ್ಪ್ರಿಂಗ್ಡೇಲ್ಸ್ ಶಾಲೆಯಲ್ಲಿ ತನ್ನ ಶಾಲಾ ಶಿಕ್ಷಣ ಮತ್ತು ಸೇಂಟ್ ಸ್ಟೀಫನ್ಸ್ ಕಾಲೇಜಿನಲ್ಲಿ ಪದವಿ ಪಡೆದರು. ಅವರು ಆಕ್ಸ್‌ಫರ್ಡ್ ವಿಶ್ವವಿದ್ಯಾಲಯದಿಂದ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ.

ಸರ್​​ನೇಮ್ ಮಾರ್ಲೆನಾ ಕೈಬಿಟ್ಟಿದ್ದೇಕೆ?

ರಾಜಕೀಯ ಕಾರಣಗಳು ಮತ್ತು ತಪ್ಪು ತಿಳುವಳಿಕೆಯಿಂದಾಗಿ ಅತಿಶಿ 2018 ರಲ್ಲಿ ‘ಮಾರ್ಲೆನಾ’ ಎಂಬ ಸರ್​​ನೇಮ್ ಕೈಬಿಟ್ಟರು. ಮರ್ಲೆನಾ ಅಥವಾ ಮಾರ್ಲೆನಾ ಎಂಬ ಹೆಸರು ಮಾರ್ಕ್ಸ್ ಮತ್ತು ಲೆನಿನ್ ಎಂಬ ಹೆಸರಿನ ಸಂಯೋಜನೆಯಾಗಿದ್ದು, ಆಕೆಯ ಪೋಷಕರ ಎಡಪಂಥೀಯ ಸಿದ್ಧಾಂತಗಳನ್ನು ಪ್ರತಿಬಿಂಬಿಸುತ್ತದೆ. ಆದಾಗ್ಯೂ, ರಾಜಕೀಯದಲ್ಲಿ ಆಕೆ ಮೇಲಕ್ಕೇರುತ್ತಿದ್ದಂತೆ ವಿಶೇಷವಾಗಿ 2019 ರ ಲೋಕಸಭಾ ಚುನಾವಣೆಗೆ ಮುಂಚಿತವಾಗಿ, ಅತಿಶಿಯವರ ಸರ್​​ನೇಮ್ ಆಕೆಯನ್ನು ಕಮ್ಯುನಿಸ್ಟ್ ಸಿದ್ಧಾಂತದೊಂದಿಗೆ ಜೋಡಿಸಿದೆ ಎಂಬ ವದಂತಿಗೆ ಕಾರಣವಾಗಿತ್ತು.

ಇದನ್ನೂ ಓದಿ: Atishi Net Worth: ತನ್ನ ಹೆಸರಲ್ಲಿ ಜಮೀನು, ಒಡವೆ ಇಲ್ಲದೇ ಇದ್ದರೂ ಕೋಟ್ಯಾಧಿಪತಿ ಈ ಅತಿಶಿ

ಭಾರತದಲ್ಲಿನ ರಾಜಕೀಯ ಸಂಬಂಧಗಳ ಸುತ್ತಲಿನ ಸೂಕ್ಷ್ಮತೆಯನ್ನು ಗಮನಿಸಿ, ಅವರು ಮಾರ್ಲೆನಾ ಎಂಬ ಸರ್ ನೇಮ್ ಕೈಬಿಡಲು ನಿರ್ಧರಿಸಿ, ಬರೀ ಅತಿಶಿ ಎಂದ ಬರೆಯಲು ಶುರುಮಾಡಿದರು. “ಮಾರ್ಲೆನಾ ನನ್ನ ಸರ್​​​ನೇಮ್ ಅಲ್ಲ. ನಾನು ಎಂದಿಗೂ ಬಳಸದ ನನ್ನ ಸರ್ ನೇಮ್ ಸಿಂಗ್. ಎರಡನೆಯ ಹೆಸರನ್ನು ನನ್ನ ಪೋಷಕರು ನೀಡಿದರು. ನನ್ನ ಚುನಾವಣಾ ಪ್ರಚಾರಕ್ಕಾಗಿ ಅತಿಶಿಯನ್ನು ಬಳಸಲು ನಾನು ನಿರ್ಧರಿಸಿದ್ದೇನೆ, ”ಎಂದು ಅವರು ಆಗಸ್ಟ್ 2018 ರಲ್ಲಿ ಹೇಳಿದ್ದರು.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ