ಬೆಂಗಳೂರಲ್ಲಿ ‘ಅಂಬಾರಿ’ ದರ್ಬಾರ್: ಬಿಸಿಲಲ್ಲೂ ಡಬಲ್ ಡೆಕ್ಕರ್ ಬಸ್ ಏರಿ ಸಿಟಿ ಬ್ಯೂಟಿ ನೋಡಲು ಜನವೋ ಜನ!
ಸೂರ್ಯನ ತಾಪ ಹೆಚ್ಚಿದ್ದರೂ ಬೆಂಗಳೂರಿನ ಅಂಬಾರಿ ಡಬಲ್ ಡೆಕ್ಕರ್ ಬಸ್‌ಗೆ ಬೇಡಿಕೆ ಕುಗ್ಗಿಲ್ಲ. KSTDC ಪರಿಚಯಿಸಿರುವ ಈ 'ಹಾಪ್ ಆನ್ ಹಾಪ್ ಆಫ್' ಸೇವೆ ಮೂಲಕ ನಗರದ ಸೌಂದರ್ಯವನ್ನು ಎತ್ತರದಿಂದ ಸವಿಯಲು ಪ್ರವಾಸಿಗರು ಮುಗಿಬೀಳುತ್ತಿದ್ದಾರೆ. ವಿಶೇಷವಾಗಿ ಮೇಲಿನ ಓಪನ್ ಟಾಪ್ ಸೀಟುಗಳಿಗೆ ಉತ್ತಮ ಸ್ಪಂದನೆ ಸಿಕ್ಕಿದ್ದು, ಬೆಂಗಳೂರು ಪ್ರವಾಸೋದ್ಯಮಕ್ಕೆ ಹೊಸ ಕಾಯಕಲ್ಪ ನೀಡಿದೆ.
ಸಿಲಿಕಾನ್ ಸಿಟಿಯಲ್ಲಿ ಸೂರ್ಯನ ಪ್ರತಾಪ ಜೋರಾಗಿದ್ದರೂ, ಬೆಂಗಳೂರಿಗರ ಉತ್ಸಾಹ ಮಾತ್ರ ಕುಗ್ಗಿಲ್ಲ. ಬಿಸಿಲ ಬೇಗೆಯ ನಡುವೆಯೂ ಪ್ರವಾಸೋದ್ಯಮ ಇಲಾಖೆ ಪರಿಚಯಿಸಿರುವ 'ಅಂಬಾರಿ' (Ambari) ಡಬಲ್ ಡೆಕ್ಕರ್ ಬಸ್ ಏರಿ ನಗರದ ಸೌಂದರ್ಯ ಸವಿಯಲು ಪ್ರವಾಸಿಗರು ಮುಗಿಬೀಳುತ್ತಿದ್ದಾರೆ.
ಜನವರಿ ತಿಂಗಳಲ್ಲಿ ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ (KSTDC) ಆರಂಭಿಸಿದ ಈ ಡಬಲ್ ಡೆಕ್ಕರ್ ಬಸ್‌ಗೆ ಈಗ ಎಲ್ಲಿಲ್ಲದ ಬೇಡಿಕೆ ಬಂದಿದೆ. ಈ ಬಸ್‌ನಲ್ಲಿ ಒಟ್ಟು 44 ಆಸನಗಳಿದ್ದು, ಬಸ್‌ನ ಮೇಲ್ಭಾಗದಲ್ಲಿ (Top Deck) 20 ಆಸನಗಳಿವೆ.
ಬಿಸಿಲು ನೆತ್ತಿ ಸುಡುತ್ತಿದ್ದರೂ ಜನ ಕೆಳಗಿನ ಎಸಿ ಸೀಟುಗಳಿಗಿಂತ ಮೇಲಿನ ಓಪನ್ ಟಾಪ್ ಸೀಟುಗಳನ್ನೇ ಹೆಚ್ಚು ಇಷ್ಟಪಡುತ್ತಿದ್ದಾರೆ. ತಲೆಗೆ ಕ್ಯಾಪ್, ಕಣ್ಣಿಗೆ ಕೂಲಿಂಗ್ ಗ್ಲಾಸ್ ಹಾಕಿಕೊಂಡು ಹೈಟೆಕ್ ಆಗಿ ಸಿಟಿ ರೌಂಡ್ಸ್ ಹೊಡೆಯುತ್ತಿದ್ದಾರೆ.
ವಾರಾಂತ್ಯ ಬಂತೆಂದರೆ ಅಂಬಾರಿ ಬಸ್ ಏರಲು ಜನ ಸಾಲು ನಿಲ್ಲುತ್ತಿದ್ದಾರೆ. 'ಹಾಪ್ ಆನ್ ಹಾಪ್ ಆಫ್' (Hop-on Hop-off) ಮಾದರಿಯ ಈ ಬಸ್, ಸುಮಾರು 45 ನಿಮಿಷಗಳ ಕಾಲ ನಗರದ ಪ್ರಮುಖ ಪ್ರವಾಸಿ ತಾಣಗಳ ದರ್ಶನ ಮಾಡಿಸುತ್ತದೆ.
ಬಿಸಿಲಿದ್ದರೂ ಪರವಾಗಿಲ್ಲ, ಬೆಂಗಳೂರಿನ ಹಸಿರು ಮತ್ತು ಸುಂದರ ಕಟ್ಟಡಗಳನ್ನು ಎತ್ತರದಿಂದ ನೋಡುವ ಮಜವೇ ಬೇರೆ ಎಂಬುದು ಪ್ರವಾಸಿಗರ ಅಭಿಪ್ರಾಯ.