ಭಾರತದ ವಿರುದ್ಧ ಅತಿರೇಕ ತೋರಿದ್ದ ಪಾಕ್ ನಾಯಕಿ ವಿರುದ್ಧ ಐಸಿಸಿ ಕ್ರಮ
ಭಾರತ-ಪಾಕಿಸ್ತಾನ ಮಹಿಳಾ ಏಷ್ಯಾಕಪ್ ಪಂದ್ಯದ ನಂತರ, ಪಾಕ್ ನಾಯಕಿ ಫಾತಿಮಾ ಸನಾಗೆ ICC ದಂಡ ವಿಧಿಸಿದೆ. ಶಫಾಲಿ ವರ್ಮಾ ಔಟ್ ಆದಾಗ ಆಕ್ರಮಣಕಾರಿಯಾಗಿ ಸಂಭ್ರಮಿಸಿದ್ದಕ್ಕಾಗಿ, ಫಾತಿಮಾ ಐಸಿಸಿ ನೀತಿ ಸಂಹಿತೆ ಆರ್ಟಿಕಲ್ 2.5 ಅನ್ನು ಉಲ್ಲಂಘಿಸಿದ್ದಾರೆ. ಅವರ ಪಂದ್ಯ ಶುಲ್ಕದ 10% ದಂಡ ಮತ್ತು ಒಂದು ಡಿಮೆರಿಟ್ ಪಾಯಿಂಟ್ ನೀಡಲಾಗಿದೆ. ಇದು ಅವರ ಎರಡನೇ ಅಪರಾಧವಾಗಿದೆ.
ಮಹಿಳಾ ಟಿ20 ಏಷ್ಯಾಕಪ್ನ 9ನೇ ಪಂದ್ಯದಲ್ಲಿ ಭಾರತ ಹಾಗೂ ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಭಾರತ, ಪಾಕಿಸ್ತಾನವನ್ನು ಏಕಪಕ್ಷೀಯವಾಗಿ ಮಣಿಸಿತ್ತು. ಇನ್ನು ಇದೇ ಪಂದ್ಯದಲ್ಲಿ ಐಸಿಸಿ ನಿಯಮಗಳಿಗೆ ವಿರುದ್ಧವಾಗಿ ನಡೆದುಕೊಂಡಿದ್ದ ಪಾಕಿಸ್ತಾನ ತಂಡದ ನಾಯಕಿ ಫಾತಿಮಾ ಸನಾ ವಿರುದ್ಧ ಐಸಿಸಿ ಕ್ರಮ ಕೈಗೊಂಡಿದೆ(PC-PTI).
ಟೀಂ ಇಂಡಿಯಾದ ಆರಂಭಿಕ ಆಟಗಾರ್ತಿ ಶಫಾಲಿ ವರ್ಮಾರನ್ನು ಔಟ್ ಮಾಡಿದ ಬಳಿಕ ಫಾತಿಮಾ ಸನಾ ಆಕ್ರಮಣಕಾರಿಯಾಗಿ ಸಂಭ್ರಮಿಸಿದ್ದರು. ಅಲ್ಲದೆ ಪೆವಿಲಿಯನ್ಗೆ ಹೋಗುವಂತೆ ಶಫಾಲಿ ಕಡೆಗೆ ಕೈ ಸನ್ನೆ ಮಾಡಿದ್ದರು. ಇದು ಐಸಿಸಿ ನಿಯಮದ ಸ್ಪಷ್ಟ ಉಲ್ಲಂಘನೆಯಾಗಿದ್ದು, ಫಾತಿಮಾ ಸನಾ ಅವರ ಪಂದ್ಯ ಶುಲ್ಕದ ಶೇಕಡಾ 10 ರಷ್ಟು ಮೊತ್ತವನ್ನು ದಂಡವಾಗಿ ವಿಧಿಸಲಾಗಿದೆ. ಹಾಗೆಯೇ ಅವರಿಗೆ ಒಂದು ಡಿಮೆರಿಟ್ ಪಾಯಿಂಟ್ ಕೂಡ ನೀಡಲಾಗಿದೆ(PC-PTI).
ಈ ಬಗ್ಗೆ ಮಾಹಿತಿ ನೀಡಿರುವ ಐಸಿಸಿ, ಫಾತಿಮಾ ಸನಾ ಐಸಿಸಿ ನೀತಿ ಸಂಹಿತೆಯ ಆರ್ಟಿಕಲ್ 2.5 ರ ಉಲ್ಲಂಘನೆ ಮಾಡಿದ್ದಾರೆ. ಈ ನಿಯಮವು ಔಟ್ ಆದ ಬ್ಯಾಟ್ಸ್ಮನ್ ಎದುರು ಅವಮಾನಕರ ಅಥವಾ ಆಕ್ರಮಣಕಾರಿಯಾಗಿ ವರ್ತಿಸುವುದು ಮತ್ತು ಪ್ರಚೋದಿಸುವ ಪದಗಳು, ಕ್ರಿಯೆಗಳು ಅಥವಾ ಸನ್ನೆಗಳನ್ನು ಮಾಡುವುದನ್ನು ಸೂಚಿಸುತ್ತದೆ. ಫಾತಿಮಾ ಸನಾ ಈ ನಿಯಮವನ್ನು ಉಲ್ಲಂಘಿಸಿದ್ದು ಅವರ ವಿರುದ್ಧ ಕ್ರಮಕೈಗೊಳ್ಳಲಾಗಿದೆ ಎಂದಿದೆ(PC-PTI).
ಕಳೆದ 24 ತಿಂಗಳಲ್ಲಿ ಫಾತಿಮಾ ಮಾಡಿದ ಎರಡನೇ ಅಪರಾಧ ಇದು. ಇದರೊಂದಿಗೆ ಅವರ ಡಿಮೆರಿಟ್ ಪಾಯಿಂಟ್ಗಳ ಸಂಖ್ಯೆ ಎರಡಕ್ಕೆ ತಲುಪಿದೆ. ಆಗಸ್ಟ್ 6, 2025 ರಂದು ಡಬ್ಲಿನ್ನಲ್ಲಿ ಐರ್ಲೆಂಡ್ ವಿರುದ್ಧದ ಟಿ20 ಪಂದ್ಯದಲ್ಲಿಯೂ ಅವರು ಈ ಹಿಂದೆ ಒಂದು ಡಿಮೆರಿಟ್ ಪಾಯಿಂಟ್ ಪಡೆದಿದ್ದರು(PC-PTI).
ಕುತೂಹಲಕಾರಿಯಾಗಿ, ಭಾರತದ ವಿರುದ್ಧದ ಪಂದ್ಯದಲ್ಲಿ ಪಾಕಿಸ್ತಾನ ಹೀನಾಯ ಸೋಲನ್ನು ಅನುಭವಿಸಿದರೂ, ಫಾತಿಮಾ ಅವರ ಪ್ರದರ್ಶನ ಅದ್ಭುತವಾಗಿತ್ತು. ಅವರು ಮೂರು ವಿಕೆಟ್ಗಳನ್ನು ಪಡೆದರಾದರೂ ತಂಡವನ್ನು ಸೋಲಿನಿಂದ ಪಾರು ಮಾಡಲು ಸಾಧ್ಯವಾಗಲಿಲ್ಲ. ಇದೀಗ ಹೀನಾಯ ಸೋಲಿನ ಆಘಾತದಲ್ಲಿದ್ದ ಫಾತಿಮಾಗೆ ದಂಡದ ಶಾಕ್ ಕೂಡ ಎದುರಾಗಿದೆ(PC-PTI).
ಫಾತಿಮಾ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದು, ಪಂದ್ಯದ ರೆಫ್ರಿ ಸುಪ್ರಿಯಾ ದಾಸ್ ವಿಧಿಸಿರುವ ಶಿಕ್ಷೆಯನ್ನು ಒಪ್ಪಿಕೊಂಡಿದ್ದಾರೆ. ಆದ್ದರಿಂದ, ಔಪಚಾರಿಕ ವಿಚಾರಣೆಯ ಅಗತ್ಯವಿಲ್ಲ ಎಂದು ಐಸಿಸಿ ತಿಳಿಸಿದೆ. ಲೆವೆಲ್ 1 ಅಪರಾಧಗಳಿಗೆ ಅಧಿಕೃತ ಎಚ್ಚರಿಕೆ, ಆಟಗಾರ ಪಂದ್ಯ ಶುಲ್ಕದ 50 ಪ್ರತಿಶತದವರೆಗೆ ದಂಡ ಮತ್ತು ಒಂದು ಅಥವಾ ಎರಡು ಡಿಮೆರಿಟ್ ಅಂಕಗಳನ್ನು ವಿಧಿಸಲಾಗುತ್ತದೆ(PC-PTI).