Health Tips: ಚಳಿಗಾಲದಲ್ಲಿ ನಿಮ್ಮ ಆರೋಗ್ಯ ಕಾಪಾಡುವ 5 ನೈಸರ್ಗಿಕ ಪದಾರ್ಥಗಳಿವು
ಚಳಿಗಾಲ ಸಮೀಪಿಸುತ್ತಿದ್ದಂತೆ ಮುಂಜಾನೆ ಮತ್ತು ಸಂಜೆಯ ವೇಳೆ ವಿಪರೀತ ಚಳಿಯಾಗಲು ಪ್ರಾರಂಭಿಸುತ್ತದೆ. ಚಳಿಗಾಲದ ಬದಲಾವಣೆಗಳು ದೇಹದ ಮೇಲೆ ವಿವಿಧ ರೀತಿಯಲ್ಲಿ ಪರಿಣಾಮ ಬೀರಬಹುದು. ಅದರಿಂದ ಶೀತ ಅಥವಾ ಕೆಮ್ಮು ಇತ್ಯಾದಿ ತೊಂದರೆಗಳು ಉದ್ಭವಿಸಬಹುದು. ಶುಷ್ಕ, ಸಿಪ್ಪೆ ಸುಲಿಯುವ ಚರ್ಮ ಕಾಣಿಸಿಕೊಳ್ಳಬಹುದು. ಹವಾಮಾನ ಬದಲಾದಂತೆ ನಿಮ್ಮ ದೇಹವನ್ನು ನೋಡಿಕೊಳ್ಳುವುದು ಬಹಳ ಮುಖ್ಯ. ನಿಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಲು ನೀವು ಹಲವಾರು ನೈಸರ್ಗಿಕ ಪರಿಹಾರಗಳನ್ನು ಪ್ರಯತ್ನಿಸಬಹುದು. ಚಳಿಗಾಲದುದ್ದಕ್ಕೂ ನಿಮ್ಮನ್ನು ಆರೋಗ್ಯವಾಗಿಡುವ ಕೆಲವು ಅದ್ಭುತ ಆಹಾರ ಪದಾರ್ಥಗಳು ಇಲ್ಲಿವೆ.
ತುಪ್ಪ: ಹಸುವಿನ ಹಾಲಿನಿಂದ ತಯಾರಿಸಲಾದ ತುಪ್ಪ ರುಚಿಕರವೂ ಹೌದು, ಆರೋಗ್ಯಕರವೂ ಹೌದು. ಆಯುರ್ವೇದದಲ್ಲಿ ಇದನ್ನು ಎಲ್ಲಾ ಕಾಯಿಲೆಗಳಿಗೆ ಚಿಕಿತ್ಸೆ ನೀಡುವ ಔಷಧೀಯ ಗುಣಗಳನ್ನು ಹೊಂದಿರುವ ಆಹಾರವೆಂದು ಪರಿಗಣಿಸಲಾಗಿದೆ. ಪ್ರತಿ ದಿನವೂ ಈ ತುಪ್ಪವನ್ನು ಒಂದು ಚಮಚ ಸೇವಿಸಿದರೆ ಬಹಳ ಒಳ್ಳೆಯದು. ಇದು ನಿಮ್ಮ ರೋಗನಿರೋಧಕ ಮತ್ತು ಜೀರ್ಣಕಾರಿ ವ್ಯವಸ್ಥೆಯನ್ನು ಹೆಚ್ಚಿಸುತ್ತದೆ.
ಡ್ರೈ ಫ್ರೂಟ್ಸ್: ಒಣಗಿದ ಹಣ್ಣುಗಳಲ್ಲಿ ಒಂದೊಂದು ಒಂದೊಂದು ರೀತಿಯ ಪ್ರಯೋಜನಗಳನ್ನು ಹೊಂದಿವೆ. ನಿಮ್ಮ ತಿಂಡಿಯಲ್ಲಿ ಗೋಡಂಬಿ, ಬಾದಾಮಿ ಮತ್ತು ಪಿಸ್ತಾಗಳಂತಹ ಡ್ರೈ ಫ್ರೂಟ್ಗಳನ್ನು ಸೇರಿಸಿ. ಒಣ ಹಣ್ಣುಗಳು ಹೆಚ್ಚಿನ ಫೈಬರ್ ಅನ್ನು ಹೊಂದಿರುತ್ತವೆ. ಇದು ನಿಮಗೆ ಶಕ್ತಿ ನೀಡುವುದು ಮಾತ್ರವಲ್ಲದೆ ನಿಮ್ಮ ದೇಹವನ್ನು ಬೆಚ್ಚಗಾಗಿಸುತ್ತದೆ.
ತುಳಸಿ: ತುಳಸಿಯನ್ನು ಆಯುರ್ವೇದದಲ್ಲಿ ಪವಿತ್ರ ಸಸ್ಯವೆಂದು ಪರಿಗಣಿಸಲಾಗುತ್ತದೆ. ಎಲ್ಲೆಡೆ ಲಭ್ಯವಿರುವ, ಕಡಿಮೆ ವೆಚ್ಚದ ಈ ಸಸ್ಯವು ಹಲವಾರು ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ. ಇದನ್ನು ಬೆಳೆಸುವುದು ಕೂಡ ಬಹಳ ಸುಲಭ. ತುಳಸಿ ಗಿಡ ನಮಗೆ ವಿಶೇಷವಾಗಿ ಚಳಿಗಾಲದಲ್ಲಿ ಬ್ಯಾಕ್ಟೀರಿಯಾ ಮತ್ತು ವೈರಲ್ ಕಾಯಿಲೆಗಳನ್ನು ತಡೆಗಟ್ಟುವ ಮೂಲಕ ಮತ್ತು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಮೂಲಕ ಸಾಕಷ್ಟು ಸಹಾಯಕವಾಗಿದೆ. ತುಳಸಿ ಟೀಯನ್ನು ತಯಾರಿಸುವ ಮೂಲಕ ಇದನ್ನು ಸೇವಿಸಬಹುದು. ಹಾಗೇ ದಿನಕ್ಕೊಂದು ತುಳಸಿ ಎಲೆಯನ್ನು ತಿಂದರೂ ಒಳ್ಳೆಯದೇ.
ಶುಂಠಿ: ಶುಂಠಿ ಬಹಳಷ್ಟು ಔಷಧಿ ಗುಣವುಳ್ಳ ವಸ್ತುವಾಗಿದೆ. ಚಳಿಗಾಲದಲ್ಲಿ ಶೀತ ಅಥವಾ ನೋಯುತ್ತಿರುವ ಗಂಟಲಿಗೆ ಶುಂಠಿ ರಾಮಬಾಣವಾಗಿದೆ. ಶುಂಠಿಯನ್ನು ವಾಕರಿಕೆ ಮತ್ತು ನೋಯುತ್ತಿರುವ ಗಂಟಲುಗಳಿಗೆ ಚಿಕಿತ್ಸೆ ನೀಡಲು ಮತ್ತು ಒತ್ತಡವನ್ನು ಕಡಿಮೆ ಮಾಡಲು ಸೇರಿದಂತೆ ವಿವಿಧ ರೀತಿಯಲ್ಲಿ ಬಳಸಬಹುದು. ಉತ್ತಮವಾದ ನಿಂಬೆ ಮತ್ತು ಶುಂಠಿ ಚಹಾವು ಬಹಳಷ್ಟು ಪ್ರಯೋಜನಗಳನ್ನು ಹೊಂದಿದೆ. ದಿನವೂ ಚಳಿಗಾಲದಲ್ಲಿ ಶುಂಠಿ ಟೀ ಕುಡಿಯುವುದರಿಂದ ಶೀತ, ಕೆಮ್ಮು, ಉಸಿರಾಟದ ತೊಂದರೆಯಿಂದ ಮುಕ್ತಿ ಪಡೆಯಬಹುದು.
ಎಳ್ಳುಂಡೆ: ಚಳಿಗಾಲದಲ್ಲಿ ತಿನ್ನಲು ಆರೋಗ್ಯಕರ ತಿಂಡಿ ಈ ಎಳ್ಳಿನ ಉಂಡೆ. ಎಳ್ಳು ಚಳಿಗಾಲದ ಋತುವಿನಲ್ಲಿ ತಿನ್ನಲು ಸೂಕ್ತವಾದ ಆಹಾರವಾಗಿದೆ. ಏಕೆಂದರೆ ಇದು ಆರೋಗ್ಯಕರ ಕೊಬ್ಬುಗಳನ್ನು ಹೊಂದಿರುತ್ತವೆ. ಇದರ ಅನೇಕ ಆರೋಗ್ಯ ಪ್ರಯೋಜನಗಳ ಪೈಕಿ, ಇದು ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತದೆ ಮತ್ತು ನಿಮಗೆ ಹೆಚ್ಚಿನ ಶಕ್ತಿಯನ್ನು ನೀಡುತ್ತದೆ. ಎಳ್ಳಿನ ಜೊತೆ ಹಾಕುವ ಬೆಲ್ಲವು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ ಮತ್ತು ನಿಮ್ಮ ದೇಹವನ್ನು ಬಿಸಿ ಮಾಡುತ್ತದೆ.