ಬರಿದಾಗಿದ್ದ ಹಲಸೂರು ಕೆರೆಗೆ ಸಿಕ್ತು ಹೊಸ ಸ್ಪರ್ಶ: ಸ್ವಚ್ಛ ನೀರು, ಪಕ್ಷಿಗಳ ಕಲರವ; ಇಲ್ಲಿವೆ ಫೋಟೋಸ್
ಎರಡು ತಿಂಗಳ ಹಿಂದೆ ಬರಿದಾಗಿದ್ದ ಬೆಂಗಳೂರಿನ ಐತಿಹಾಸಿಕ ಹಲಸೂರು ಕೆರೆ, ಹೂಳು ತೆರವು ಕಾಮಗಾರಿಯ ಬಳಿಕ ಮರುಜೀವ ಪಡೆದಿದೆ. ಸೂರ್ಯೋದಯದಿಂದ ಸಂಜೆಯವರೆಗೆ ಪಕ್ಷಿಗಳ ಕಲರವ, ಸ್ವಚ್ಛ ನೀರು ಮತ್ತು ಹಸಿರು ಪರಿಸರದಿಂದ ಕೆರೆ ಕಂಗೊಳಿಸುತ್ತಿದೆ. ನೀರು ಸಂಗ್ರಹ ಸಾಮರ್ಥ್ಯ ಹೆಚ್ಚಾಗಿ, ಜೀವಸಂಕುಲ ಮತ್ತೆ ನೆಲೆ ಕಂಡುಕೊಂಡಿದೆ. ಇಲ್ಲಿವೆ ನೋಡಿ ಫೋಟೋಸ್.
ಎರಡು ತಿಂಗಳ ಹಿಂದೆ ಹೂಳು ಮತ್ತು ನೀರಿಲ್ಲದೆ ಸಂಪೂರ್ಣ ಬರಿದಾಗಿದ್ದ ಬೆಂಗಳೂರಿನ ಐತಿಹಾಸಿಕ ಹಲಸೂರು ಕೆರೆ, ಇಂದು ಮತ್ತೆ ನೀರು ತುಂಬಿಕೊಂಡು ಪ್ರಕೃತಿಯ ಸೊಬಗಿನಿಂದ ಕಂಗೊಳಿಸುತ್ತಿದೆ.
ಬೆಳಗಿನ ಜಾವ ಸೂರ್ಯೋದಯದ ಕಿರಣಗಳು ತಿಳಿನೀರಿನ ಮೇಲೆ ಬೀಳುತ್ತಿದ್ದಂತೆ, ನೂರಾರು ಪಕ್ಷಿಗಳ ಹಿಂಡು ನೀರಿನಲ್ಲಿ ವಿಹರಿಸುವ ದೃಶ್ಯ ಮನಮೋಹಕ ಹಾಗೂ ವಿಹಂಗಮ ಆಗಿದೆ.
ಸ್ವಚ್ಛ ನೀರು, ಪಕ್ಷಿಗಳ ಚಿಲಿಪಿಲಿ ಮತ್ತು ಸುತ್ತಮುತ್ತಲಿನ ಹಸಿರು ವಾತಾವರಣವು ಇದೀಗ ಪ್ರಕೃತಿ ಪ್ರಿಯರನ್ನು ತನ್ನತ್ತ ಸೆಳೆಯುತ್ತಿದೆ.
ಕೆರೆಯಲ್ಲಿದ್ದ ಹೂಳನ್ನು ಯಶಸ್ವಿಯಾಗಿ ತೆರವುಗೊಳಿಸಿದ ಕಾರಣ, ನೀರಿನ ಸಂಗ್ರಹ ಸಾಮರ್ಥ್ಯ ಮತ್ತು ನೀರಿನ ಗುಣಮಟ್ಟ ಗಣನೀಯವಾಗಿ ಉತ್ತಮಗೊಂಡು ಜಲಚರಗಳಿಗೆ ಸೂಕ್ತ ಆವಾಸಸ್ಥಾನವಾಗಿ ಮಾರ್ಪಟ್ಟಿದೆ.
ವೇಗವಾಗಿ ಬೆಳೆಯುತ್ತಿರುವ ಕಾಂಕ್ರೀಟ್ ಸಿಟಿಯಲ್ಲಿ ಅಂತರ್ಜಲ ಹೆಚ್ಚಿಸಲು ಮತ್ತು ಜೀವ ವೈವಿಧ್ಯ ಕಾಪಾಡಲು ಕೆರೆಗಳ ಪುನಶ್ಚೇತನ ಎಷ್ಟು ಅಗತ್ಯ ಎಂಬುದಕ್ಕೆ ಈ ಹಲಸೂರು ಕೆರೆಯೇ ಅತ್ಯುತ್ತಮ ಉದಾಹರಣೆಯಾಗಿದೆ.
ಇಂತಹ ಐತಿಹಾಸಿಕ ಕೆರೆಗಳ ನಿರಂತರ ನಿರ್ವಹಣೆ ಮತ್ತು ಸಂರಕ್ಷಣೆ ಮುಂದಿನ ಪೀಳಿಗೆಗೂ ಬೆಂಗಳೂರಿನ ಸಮೃದ್ಧ ಪರಿಸರದ ಅಮೂಲ್ಯ ಕೊಡುಗೆ ನೀಡಬಹುದು ಎಂಬ ಆಶಾಭಾವನೆ ಸಾರ್ವಜನಿಕರಲ್ಲಿ ಮೂಡಿದೆ.