Aditya Vision: ಮೂರೇ ವರ್ಷದಲ್ಲಿ 1ಲಕ್ಷ ರೂ 83 ಲಕ್ಷ ಆಯ್ತು; ಕೋಟ್ಯಾಧಿಪತಿಗಳಾದರು ಆದಿತ್ಯ ವಿಶನ್ ಷೇರುದಾರರು

ಷೇರುಪೇಟೆಯ ವ್ಯವಹಾರವೇ ಸೋಜಿಗದ ಸಂಗತಿ. ಜಾಗತಿಕ ವಿದ್ಯಮಾನಗಳೊಂದಿಗೆ ಅನೇಕ ವ್ಯವಹಾರಗಳು ತಳುಕುಹಾಕಿಕೊಂಡಿರುವುದರಿಂದ ಸಂಸ್ಥೆಗಳ ಆದಾಯ, ನಷ್ಟ ಇವೆಲ್ಲವೂ ದಿಢೀರನೇ ಬದಲಾಗಬಹುದು. ಅಂತೆಯೇ, ಷೇರುಪೇಟೆಯಲ್ಲಿ (Stock Markets) ಅದರ ಷೇರುಗಳ ಬೆಲೆಯಲ್ಲೂ ಭಾರೀ ವ್ಯತ್ಯಯಗಳಾಗಬಹುದು. ಸರ್ವಕಾಲದಲ್ಲೂ ಬೇಡಿಕೆ ಇರುವ ಕ್ಷೇತ್ರಗಳ ಪ್ರಮುಖ ಸಂಸ್ಥೆಗಳ ಮೇಲೆ ಮ್ಯೂಚುವಲ್ ಫಂಡ್​ಗಳು ಹೂಡಿಕೆ ಮಾಡಿ ಸೇಫ್ ಆಗುತ್ತವೆ. ಅದೇ ದೊಡ್ಡ ಮಟ್ಟಿಗೆ ಹೆಸರು ಮಾಡದಿದ್ದರೂ ಷೇರುಪೇಟೆಯಲ್ಲಿ ಮಿಂಚಿನ ಸಂಚಾರ ಮಾಡುವ ಸ್ಟಾಕ್​ಗಳು (Multibagger stocks) ಹಲವಿವೆ. ಅವರನ್ನು ಗುರುತಿಸಿ ಹಿಂದೆಬಿದ್ದವರು ಕೋಟ್ಯಾಧಿಪತಿಗಳಾಗುವ ಸುಯೋಗ ಸಿಗುತ್ತದೆ. ಅಂಥ ಲಾಭದ ಕುದುರೆಗಳಾಗಿರುವ ಷೇರುಗಳಲ್ಲಿ ಆದಿತ್ಯ ವಿಶನ್ ಒಂದು.

ದೇಶದ ವಿವಿಧೆಡೆ, ಅದರಲ್ಲೂ ಪೂರ್ವ ಮತ್ತು ಈಶಾನ್ಯ ರಾಜ್ಯಗಳಲ್ಲಿ ಎಲೆಕ್ಟ್ರಾನಿಕ್ ವಸ್ತುಗಳ ರೀಟೇಲ್ ಮಳಿಗೆಗಳನ್ನು ಹೊಂದಿರುವ ಬಿಹಾರ ಮೂಲದ ಆದಿತ್ಯ ವಿಶನ್ ಸಂಸ್ಥೆ (Aditya Vision) ಷೇರುಪೇಟೆಯಲ್ಲಿ ಕಳೆದ 3 ವರ್ಷಗಳಲ್ಲಿ ಧೂಳೆಬ್ಬಿಸುತ್ತಿದೆ. ಕಳೆದ ಒಂದು ವರ್ಷದಲ್ಲಿ ಇದರ ಷೇರುಬೆಲೆ ಎರಡು ಪಟ್ಟು ಅಧಿಕಗೊಂಡಿದೆ. 3 ವರ್ಷಗಳ ಹಿಂದೆ ಕೋವಿಡ್ ಬಿಕ್ಕಟ್ಟು ಸಂದರ್ಭ ಇದರ ಷೇರು ಬೆಲೆ ಕೇವಲ 18 ರುಪಾಯಿ ಇತ್ತು. ಇದೀಗ ಬರೋಬ್ಬರಿ 1,500 ರುಪಾಯಿ ಬೆಲೆಯ ಷೇರಾಗಿ ಬೆಳೆದುಹೋಗಿದೆ. 3 ವರ್ಷಗಳ ಹಿಂದೆ ಇದರ ಷೇರುಗಳ ಮೇಲೆ ಹಣ ಹೂಡಿಕೆ ಮಾಡಿದ್ದವರಿಗೆ ಅದೃಷ್ಟವೋ ಅದೃಷ್ಟ. 83 ಪಟ್ಟು ಹೆಚ್ಚು ಹಣ ಮಾಡಿಕೊಂಡಿದ್ದಾರೆ.

ಇದನ್ನೂ ಓದಿ: Adani Shares: ತಿರುಗಿ ನಿಂತ ಅದಾನಿ ಷೇರುಗಳು; ಮಾರದೇ ಬಿಟ್ಟವರಿಗೆ ಹೊಡೆಯುತ್ತಾ ಜಾಕ್​ಪಾಟ್?

ಕೋವಿಡ್ ಬಿಕ್ಕಟ್ಟಿನ ಬಳಿಕ ಒಂದು ವರ್ಷದಲ್ಲಿ ಆದಿತ್ಯ ವಿಶನ್ ಷೇರು ಬೆಲೆ 18 ರುನಿಂದ 190 ರುಪಾಯಿಗೆ ಏರಿತು. ಅಂದರೆ ಒಂದೇ ವರ್ಷದಲ್ಲಿ 10 ಪಟ್ಟು ಬೆಲೆ ದ್ವಿಗುಣಗೊಂಡಿತು. ನಂತರದ ಒಂದು ವರ್ಷದಲ್ಲಿ ಅದರ ಬೆಲೆ 190ರಿಂದ 700 ರುಪಾಯಿಗೆ ಏರಿದೆ. ಕಳೆದ ಒಂದು ವರ್ಷದಲ್ಲಿ ಆದಿತ್ಯ ವಿಶನ್ ಷೇರುಬೆಲೆ 1,500 ರು ಮುಟ್ಟಿದೆ. ಅಂದರೆ ಕಳೆದ ಒಂದು ವರ್ಷದಲ್ಲಿ ಅದರ ಷೇರುಬೆಲೆ ಎರಡು ಪಟ್ಟು ಹೆಚ್ಚಾಗಿದೆ. ಕಳೆದ ಆರು ತಿಂಗಳಿಂದೀಚೆ ಇದರ ವೇಗ ತುಸು ಕಡಿಮೆ ಆಗಿರುವುದು ಹೌದು. ಕಳೆದ ಕೆಲ ತಿಂಗಳಲ್ಲಿ ತುಸು ಮಟ್ಟಿಗೆ ಬೆಲೆ ಇಳಿದಿದೆ ಎನ್ನುವುದು ಬಿಟ್ಟರೆ ಮೂರು ವರ್ಷಗಳಲ್ಲಿ ಆದಿತ್ಯ ವಿಶನ್​ನದ್ದು ಷೇರುಪೇಟೆಯಲ್ಲಿ ಅಕ್ಷರಶಃ ಮಿಂಚಿನ ಸಂಚಾರ.

ಆದಿತ್ಯ ವಿಶನ್ ಕಂಪನಿಯ ಷೇರುಗಳ ಮೇಲೆ ಹಣ ಹಾಕಿದವರಿಗೆ ಸಿಕ್ಕಿದ್ದೆಷ್ಟು?

ಅದಿತ್ಯ ವಿಶನ್ ಕಂಪನಿ ಷೇರುಪೇಟೆಯಲ್ಲಿ ವಿವಿಧ ಅವಧಿಯಲ್ಲಿ ವಿವಿಧ ರೀತಿಯ ವೇಗದಲ್ಲಿ ಬೆಳೆದಿದೆ. ಹೀಗಾಗಿ, ವಿವಿಧ ಹಂತಗಳಲ್ಲಿ ಹೂಡಿಕೆ ಮಾಡಿದವರಿಗೆ ವಿಭಿನ್ನ ರೀತಿಯಲ್ಲಿ ರಿಟರ್ನ್ಸ್ ಸಿಕ್ಕಿದೆ.

3 ವರ್ಷಗಳ ಹಿಂದೆ ಇದರ ಷೇರುಬೆಲೆ 18 ರೂ ಇದ್ದಾಗ ಹಣ ಹೂಡಿಕೆ ಮಾಡಿದವರಿಗೆ 83 ಪಟ್ಟು ಹೆಚ್ಚು ಲಾಭ ಸಿಕ್ಕಿದೆ. ಉದಾಹರಣೆಗೆ ಆ ಸಮಯದಲ್ಲಿ 1 ಲಕ್ಷ ರೂ ಹೂಡಿಕೆ ಮಾಡಿದವರು ಈಗ 83.50 ಲಕ್ಷ ರೂ ರಿಟರ್ನ್ಸ್ ಪಡೆದಿದ್ದಾರೆ.

ಇದನ್ನೂ ಓದಿ: PPF Account: ಪಿಪಿಎಫ್​ ಖಾತೆಯಲ್ಲಿ ಹೂಡಿಕೆ ಮಾಡಿ 1 ಕೋಟಿ ರೂ. ಗಳಿಸುವುದು ಹೇಗೆ?

ಎರಡು ವರ್ಷಗಳ ಹಿಂದೆ ಆದಿತ್ಯ ವಿಶನ್ ಷೇರಿನ ಮೇಲೆ 1 ಲಕ್ಷ ರೂ ಹೂಡಿಕೆ ಮಾಡಿದವರಿಗೆ ಈಗ 8 ಲಕ್ಷ ರೂ ಮಾಡಿಕೊಳ್ಳಬಹುದು. ಅಂತೆಯೇ, ಒಂದು ವರ್ಷದ ಹಿಂದೆ 1 ಲಕ್ಷ ರೂನಷ್ಟು ಆದಿತ್ಯ ವಿಶನ್​ನ ಷೇರು ಖರೀದಿಸಿದವರಿಗೆ ಈಗ 2.10 ಲಕ್ಷ ಸಿಗುತ್ತದೆ. ಕಳೆದ ಆರು ತಿಂಗಳಿಂದ ಆದಿತ್ಯ ವಿಶನ್​ನ ಷೇರುಗಳಲ್ಲಿ ಏರಿಳಿತಗಳಾಗುತ್ತಿರುವುದು ಹೌದು. ಕಳೆದ ಒಂದು ತಿಂಗಳಿಂದ ಈ ಕಂಪನಿಯ ಷೇರು ಮತ್ತೆ ಲಾಭದ ಹಳಿಗೆ ಬಂದಿರುವುದೂ ನಿಜ.

ಷೇರುಪೇಟೆಯಲ್ಲಿ ಸದ್ಯ ಇರುವ ಕೆಲವು ಮಲ್ಟಿಬ್ಯಾಗರ್ ಷೇರುಗಳಲ್ಲಿ ಆದಿತ್ಯ ವಿಶನ್ ಕೂಡ ಒಂದು. ಮಲ್ಟಿಬ್ಯಾಗರ್ ಎಂದರೆ ಬಹಳ ಲಾಭ ತಂದುಕೊಡುವ ಲೋಪ್ರೊಫೈಲ್ ಷೇರುಗಳು. ಇಂಥ ಮಲ್ಟಿಬ್ಯಾಗರ್ ಸ್ಟಾಕ್​ಗಳನ್ನು ಬಹಳ ಬೇಗ ಗುರುತಿಸಿಬಿಟ್ಟವರೇ ಜಾಣ.

ಇನ್ನಷ್ಟು ಷೇರುಪೇಟೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ