ದೀಪಾವಳಿ ಹಬ್ಬದಲ್ಲಿ ಹನುಮಂತನ ಪೂಜೆ ಏಕೆ ಮಾಡಬೇಕು? ಇದರ ಹಿಂದಿದೆ ಪೌರಾಣಿಕ ನಂಬಿಕೆ!

ದೀಪಾವಳಿಯು ಅತ್ಯಂತ ಸಡಗರದಿಂದ ಆಚರಿಸಲ್ಪಡುವ ಬೆಳಕಿನ ಮಹಾಪರ್ವ. ಪಂಚಾಂಗದ ಪ್ರಕಾರ, ಕಾರ್ತಿಕ ಮಾಸದ ಕೃಷ್ಣ ಪಕ್ಷದ ಚತುರ್ದಶಿ (ನರಕ ಚತುರ್ದಶಿ) ಮತ್ತು ಅಮಾವಾಸ್ಯೆಯ ದಿನಗಳು ದೀಪಾವಳಿ ಆಚರಣೆಯ ಪ್ರಮುಖ ಘಟ್ಟಗಳಾಗಿವೆ. ದಕ್ಷಿಣ ಭಾರತೀಯ ಸಂಪ್ರದಾಯದಲ್ಲಿ ನರಕ ಚತುರ್ದಶಿಯ ದಿನ ಮುಂಜಾನೆ ಮಾಡುವ ಅಭ್ಯಂಜನ ಸ್ನಾನಕ್ಕೆ (ಎಣ್ಣೆ ಸ್ನಾನ) ವಿಶೇಷ ಧಾರ್ಮಿಕ ಪ್ರಾಮುಖ್ಯತೆಯಿದೆ. ಈ ಶುಭ ದಿನದಂದು ಲಕ್ಷ್ಮಿ ಪೂಜೆಯ ಜೊತೆಗೆ ಸಂಕಟಮೋಚನ ಹನುಮಂತನನ್ನೂ ಆರಾಧಿಸುವ ವಿಶಿಷ್ಟ ಸಂಪ್ರದಾಯ ಪ್ರಚಲಿತದಲ್ಲಿದೆ.

ದೀಪಾವಳಿ ಸಮಯದಲ್ಲಿ ಹನುಮಂತನ ಪೂಜೆ ಏಕೆ?

ಪೌರಾಣಿಕ ಕಥೆಗಳ ಪ್ರಕಾರ, ಭಗವಾನ್ ಶ್ರೀರಾಮನು ರಾವಣಾಸುರನನ್ನು ಸಂಹರಿಸಿ 14 ವರ್ಷಗಳ ವನವಾಸದ ನಂತರ ಅಯೋಧ್ಯೆಗೆ ಮರಳಿದಾಗ ಇಡೀ ನಗರವನ್ನು ದೀಪಗಳಿಂದ ಶೃಂಗರಿಸಲಾಗಿತ್ತು. ಹನುಮಂತನ ನಿಸ್ವಾರ್ಥ ಸೇವೆ ಮತ್ತು ಅಚಲ ಭಕ್ತಿಗೆ ಮೆಚ್ಚಿದ ಶ್ರೀರಾಮನು, “ದೀಪಾವಳಿಯ ಶುಭ ಸಂದರ್ಭದಲ್ಲಿ ನನಗಿಂತ ಮುಂಚಿತವಾಗಿ ನಿನಗೆ ಪೂಜೆ ಸಲ್ಲಲಿದೆ” ಎಂದು ವರ ನೀಡಿದನು. ಆ ಕಾರಣದಿಂದಾಗಿ ದೀಪಾವಳಿಯ ಪರ್ವಕಾಲದಲ್ಲಿ ಹನುಮಂತನ ಪೂಜೆ ನಡೆಯುತ್ತದೆ.

ದುಷ್ಟಶಕ್ತಿ ಹಾಗೂ ನಕಾರಾತ್ಮಕ ಶಕ್ತಿಗಳಿಂದ ರಕ್ಷಣೆ:

ನರಕ ಚತುರ್ದಶಿ ದಿನದಂದು ನಕಾರಾತ್ಮಕ ಶಕ್ತಿಗಳ ಪ್ರಭಾವ ಹೆಚ್ಚಿರುತ್ತದೆ ಎಂಬ ನಂಬಿಕೆಯಿದೆ. ಸಂಕಟಹರ ಹನುಮಂತನು ಸಕಲ ದುಷ್ಟಶಕ್ತಿಗಳನ್ನು ಸಂಹರಿಸುವ ಅಭಯದಾತ. ಆದ್ದರಿಂದ ಈ ದಿನ ಬಜರಂಗಬಲಿಯನ್ನು ಪೂಜಿಸುವುದರಿಂದ ಮನೆಯಲ್ಲಿ ಶಾಂತಿ, ನೆಮ್ಮದಿ ನೆಲೆಸಿ ಆಧಿ-ವ್ಯಾಧಿಗಳು ದೂರವಾಗುತ್ತವೆ.

ಇದನ್ನೂ ಓದಿ: ಶನಿ ಸಾಡೇ ಸಾತಿ ಮುಗಿದ ತಕ್ಷಣ ಜೀವನದಲ್ಲಿ ನಡೆಯುವ 5 ಪ್ರಮುಖ ಬದಲಾವಣೆಗಳಿವು!

ಹನುಮಾನ್ ಜನ್ಮೋತ್ಸವದ ವಿಶೇಷ ಆಚರಣೆ:

ದಕ್ಷಿಣ ಭಾರತದ ಕೆಲವು ಕಡೆಗಳಲ್ಲಿ ಹಾಗೂ ಉತ್ತರ ಭಾರತದ ಪ್ರಸಿದ್ಧ ಹನುಮಾನ್‌ಗಢಿ ದೇವಾಲಯಗಳಲ್ಲಿ ನರಕ ಚತುರ್ದಶಿಯ ದಿನದಂದೇ ಹನುಮಾನ್ ಜನ್ಮೋತ್ಸವವನ್ನು ವಿಶೇಷವಾಗಿ ಆಚರಿಸುವ ಸಂಪ್ರದಾಯವಿದೆ. ಆದ್ದರಿಂದ ಹನುಮದ್ಭಕ್ತರಿಗೆ ಈ ದಿನ ಅತ್ಯಂತ ಪವಿತ್ರವಾಗಿದೆ.

ಶಿವ ಮತ್ತು ಹನುಮಂತನ ಪೌರಾಣಿಕ ಬಾಂಧವ್ಯ:

ದಕ್ಷಿಣ ಭಾರತದ ಶೈವ ಮತ್ತು ವೈಷ್ಣವ ಸಂಪ್ರದಾಯಗಳೆರಡರಲ್ಲೂ ಹನುಮಂತನಿಗೆ ವಿಶೇಷ ಸ್ಥಾನವಿದೆ. ಹನುಮಂತನನ್ನು ಸಾಕ್ಷಾತ್ ಭಗವಾನ್ ಶಿವನ 11 ನೇ ರುದ್ರ ಅವತಾರವೆಂದು ಪರಿಗಣಿಸಲಾಗುತ್ತದೆ. ವಿಷ್ಣುವಿನ ಅವತಾರವಾದ ಶ್ರೀರಾಮನ ಸೇವೆಗಾಗಿಯೇ ಶಿವನು ಹನುಮಂತನ ರೂಪ ತಾಳಿದನು. ಹೀಗಾಗಿ, ದೀಪಾವಳಿಯ ಸಮಯದಲ್ಲಿ ಹನುಮಂತನನ್ನು ಪೂಜಿಸುವುದರಿಂದ ಶಿವ ಮತ್ತು ವಿಷ್ಣು ಇಬ್ಬರ ಪೂರ್ಣ ಅನುಗ್ರಹವೂ ಪ್ರಾಪ್ತಿಯಾಗುತ್ತದೆ ಎಂಬ ನಂಬಿಕೆಯಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ