AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

ಈ ವರ್ಷ ಕಾರ್ತಿಕ ಹುಣ್ಣಿಮೆ ಯಾವಾಗ? ಪೂರ್ಣಿಮೆಯ ಶುಭ ಸಮಯ ಮತ್ತು ಆಚರಣೆಯ ಮಹತ್ವ ತಿಳಿಯಿರಿ

ಕಾರ್ತಿಕ ಮಾಸದ ಅತ್ಯಂತ ಶ್ರೇಷ್ಠ ದಿನವಾದ 'ಕಾರ್ತಿಕ ಹುಣ್ಣಿಮೆ'ಯನ್ನು ಈ ಬಾರಿ ನವೆಂಬರ್ 24 ರಂದು ಆಚರಿಸಲಾಗುತ್ತಿದೆ. ಇದು ಶಿವ ಮತ್ತು ವಿಷ್ಣುವಿನ ಆರಾಧನೆಗೆ ಅತ್ಯಂತ ಪ್ರಶಸ್ತವಾದ ಈ ದಿನ. ಆದ್ದರಿಂದ ಪಂಚಾಂಗದ ಪ್ರಕಾರ ಕಾರ್ತಿಕ ಹುಣ್ಣಿಮೆಯ ತಿಥಿ, ಶುಭ ಮುಹೂರ್ತ ಯಾವುದು ಮತ್ತು ಪವಿತ್ರ ಸ್ನಾನದ ಜೊತೆಗೆ ದೀಪದಾನದ ಮಹತ್ವವನ್ನು ಇಲ್ಲಿ ತಿಳಿದುಕೊಳ್ಳಿ.

ಈ ವರ್ಷ ಕಾರ್ತಿಕ ಹುಣ್ಣಿಮೆ ಯಾವಾಗ? ಪೂರ್ಣಿಮೆಯ ಶುಭ ಸಮಯ ಮತ್ತು ಆಚರಣೆಯ ಮಹತ್ವ ತಿಳಿಯಿರಿ
ಕಾರ್ತಿಕ ಹುಣ್ಣಿಮೆ
ಅಕ್ಷತಾ ವರ್ಕಾಡಿ
|

Updated on: Nov 22, 2026 | 9:28 AM

Share

ಹಿಂದೂ ಪಂಚಾಂಗದ ಅತ್ಯಂತ ಪವಿತ್ರ ಮಾಸಗಳಲ್ಲಿ ಒಂದಾದ ಕಾರ್ತಿಕ ಮಾಸದ ‘ಕಾರ್ತಿಕ ಹುಣ್ಣಿಮೆ‘ಗೆ ವಿಶೇಷ ಮಹತ್ವವಿದೆ. ಈ ವರ್ಷ ಅಧಿಕ ಮಾಸವಿದ್ದ ಕಾರಣ, ಕಾರ್ತಿಕ ಹುಣ್ಣಿಮೆಯು ನವೆಂಬರ್ 24 ರಂದು (ಮಂಗಳವಾರ) ಆಚರಿಸಲ್ಪಡುತ್ತಿದೆ. ಶಿವ ಮತ್ತು ವಿಷ್ಣುವಿನ ಆರಾಧನೆಗೆ ಅತ್ಯಂತ ಪ್ರಶಸ್ತವಾದ ಈ ದಿನವನ್ನು ‘ತ್ರಿಪುರಾರಿ ಪೂರ್ಣಿಮೆ’ ಎಂದೂ ಕರೆಯಲಾಗುತ್ತದೆ.

2026ರ ಕಾರ್ತಿಕ ಹುಣ್ಣಿಮೆಯ ತಿಥಿ ಮತ್ತು ಶುಭ ಮುಹೂರ್ತ:

ಪಂಚಾಂಗದ ಪ್ರಕಾರ, ಈ ವರ್ಷ ಹುಣ್ಣಿಮೆ ತಿಥಿಯು ನವೆಂಬರ್ 23 ರಂದು ರಾತ್ರಿ 11:42 ಕ್ಕೆ ಆರಂಭವಾಗಿ, ನವೆಂಬರ್ 24 ರಂದು ರಾತ್ರಿ 8:23 ಕ್ಕೆ ಮುಕ್ತಾಯವಾಗಲಿದೆ. ಸೂರ್ಯೋದಯದ ತಿಥಿಯ ಆಧಾರದ ಮೇಲೆ ನವೆಂಬರ್ 24 ರಂದೇ ಕಾರ್ತಿಕ ಹುಣ್ಣಿಮೆಯನ್ನು ಆಚರಿಸಲಾಗುತ್ತದೆ. ಈ ದಿನ ಸಂಜೆಯ ಪ್ರದೋಷ ಕಾಲದಲ್ಲಿ ಅಂದರೆ ಸಂಜೆ 5:08 ರಿಂದ ರಾತ್ರಿ 7:47 ರವರೆಗೆ ದೀಪದಾನ ಮತ್ತು ವಿಶೇಷ ಪೂಜೆಗಳನ್ನು ನೆರವೇರಿಸಲು ಅತ್ಯಂತ ಶುಭ ಸಮಯವಾಗಿದೆ.

ತ್ರಿಪುರಾಸುರನ ಸಂಹಾರ ಹಿನ್ನೆಲೆ:

ಪುರಾಣಗಳ ಪ್ರಕಾರ, ತಾರಕಾಸುರನ ಮೂವರು ಪುತ್ರರಾದ ‘ತ್ರಿಪುರಾಸುರರು’ ಮೂರು ಲೋಕಗಳಲ್ಲಿ ಅಟ್ಟಹಾಸ ಮೆರೆಯುತ್ತಿದ್ದರು. ಕಾರ್ತಿಕ ಹುಣ್ಣಿಮೆಯ ದಿನದಂದು ಪರಮೇಶ್ವರನು ಒಂದೇ ಬಾಣದಿಂದ ಆ ಮೂರು ಪಟ್ಟಣಗಳನ್ನು (ತ್ರಿಪುರ) ನಾಶಪಡಿಸಿ ದೇವತೆಗಳನ್ನು ರಕ್ಷಿಸಿದನು. ಈ ವಿಜಯದ ಸಂಕೇತವಾಗಿ ಶಿವನನ್ನು ‘ತ್ರಿಪುರಾರಿ’ ಎಂದು ಪೂಜಿಸಲಾಗುತ್ತದೆ. ತ್ರಿಪುರಾಸುರನ ವಧೆಯಾದ ಸಂತೋಷದಲ್ಲಿ ದೇವತೆಗಳೆಲ್ಲರೂ ಭೂಲೋಕಕ್ಕೆ ಇಳಿದು, ಕಾಶಿಯ ಗಂಗಾ ತೀರದಲ್ಲಿ ಲಕ್ಷಾಂತರ ದೀಪಗಳನ್ನು ಬೆಳಗಿ ಸಂಭ್ರಮಿಸಿದರು. ಹೀಗಾಗಿ ಇಂದಿಗೂ ವಾರಾಣಸಿಯ ಘಾಟ್‌ಗಳಲ್ಲಿ ಈ ದಿನವನ್ನು ‘ದೇವ ದೀಪಾವಳಿ’ಯಾಗಿ ವಿಜೃಂಭಣೆಯಿಂದ ಆಚರಿಸಲಾಗುತ್ತದೆ.

ಇದನ್ನೂ ಓದಿ: ನೀವು ಕಾಲಿಗೆ ಕಪ್ಪು ದಾರ ಕಟ್ಟುತ್ತೀರಾ? ಹಾಗಾದರೆ ಈ 9 ಗಂಟುಗಳ ನಿಯಮ ಮತ್ತು ಶುಭ ಸಮಯದ ಬಗ್ಗೆ ತಪ್ಪದೇ ತಿಳಿದುಕೊಳ್ಳಿ

ಪವಿತ್ರ ಸ್ನಾನ ಮತ್ತು ದೀಪದಾನದ ಮಹತ್ವ:

ಕಾರ್ತಿಕ ಹುಣ್ಣಿಮೆಯಂದು ಬ್ರಾಹ್ಮೀ ಮುಹೂರ್ತದಲ್ಲಿ ಅಂದರೆ ಸೂರ್ಯೋದಯಕ್ಕೆ ಮುನ್ನ ಗಂಗಾ, ಕಾವೇರಿ, ತುಂಗಭದ್ರಾ ಸೇರಿದಂತೆ ಪವಿತ್ರ ನದಿಗಳಲ್ಲಿ ಸ್ನಾನ ಮಾಡುವುದರಿಂದ ಸಕಲ ಪಾಪಗಳು ನಿವಾರಣೆಯಾಗುತ್ತವೆ ಎಂಬ ನಂಬಿಕೆಯಿದೆ. ನದಿ ಸ್ನಾನ ಸಾಧ್ಯವಾಗದವರು ಮನೆಯಲ್ಲಿಯೇ ಸ್ನಾನದ ನೀರಿಗೆ ಸ್ವಲ್ಪ ಗಂಗಾಜಲವನ್ನು ಬೆರೆಸಿ ಸ್ನಾನ ಮಾಡಬಹುದು. ಸಂಜೆಯ ವೇಳೆ ಶಿವ ಮತ್ತು ವಿಷ್ಣು ದೇವಾಲಯಗಳಲ್ಲಿ, ತುಳಸಿ ಕಟ್ಟೆಯ ಮುಂದೆ ಹಾಗೂ ಮನೆಯ ಹೊಸ್ತಿಲಿನಲ್ಲಿ ತುಪ್ಪ ಅಥವಾ ಎಣ್ಣೆಯ ದೀಪಗಳನ್ನು ಬೆಳಗಬೇಕು. ವರ್ಷದ 365 ದಿನಗಳ ಸಂಕೇತವಾಗಿ 365 ಬತ್ತಿಗಳ ದೀಪವನ್ನು ಹಚ್ಚುವುದು ವಿಶೇಷ ಪುಣ್ಯ ಫಲವನ್ನು ನೀಡುತ್ತದೆ.

ಸತ್ಯನಾರಾಯಣ ಪೂಜೆ ಮತ್ತು ದಾನಧರ್ಮದ ಫಲ:

ಈ ಪವಿತ್ರ ದಿನದಂದು ಮನೆಯಲ್ಲಿ ಶ್ರೀ ಸತ್ಯನಾರಾಯಣ ಸ್ವಾಮಿ ವ್ರತ ಅಥವಾ ಕಥೆಯನ್ನು ಶ್ರವಣ ಮಾಡುವುದರಿಂದ ಕುಟುಂಬದಲ್ಲಿ ಸುಖ, ಶಾಂತಿ ಮತ್ತು ಸಮೃದ್ಧಿ ನೆಲೆಸುತ್ತದೆ. ಕಾರ್ತಿಕ ಮಾಸದ ಅಂತ್ಯದ ವೇಳೆಗೆ ಚಳಿಗಾಲ ಆರಂಭವಾಗುವುದರಿಂದ ಈ ದಿನ ಬಡವರಿಗೆ ಮತ್ತು ನಿರ್ಗತಿಕರಿಗೆ ಬೆಚ್ಚಗಿನ ಬಟ್ಟೆ, ಆಹಾರ, ಎಳ್ಳು ಹಾಗೂ ದೀಪದಾನ ಮಾಡುವುದು ಅತ್ಯಂತ ಶ್ರೇಷ್ಠ ಕಾರ್ಯವೆಂದು ಶಾಸ್ತ್ರಗಳು ಹೇಳುತ್ತವೆ. ಈ ದಿನ ಮಾಡುವ ದಾನಧರ್ಮಗಳಿಗೆ ಅಕ್ಷಯ ಪುಣ್ಯ ಲಭಿಸುತ್ತದೆ ಎಂಬುದು ಭಕ್ತರ ದೃಢ ನಂಬಿಕೆಯಾಗಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Follow Us
ಅಕ್ಷತಾ ವರ್ಕಾಡಿ
ಅಕ್ಷತಾ ವರ್ಕಾಡಿ

ಅಕ್ಷತಾ ವರ್ಕಾಡಿ – ಮೂಲತಃ ಕಾಸರಗೋಡು ಜಿಲ್ಲೆಯ ಮಂಜೇಶ್ವರದ ವರ್ಕಾಡಿಯವರು. ಪತ್ರಿಕೋದ್ಯಮ ಮತ್ತು ಸಮೂಹ ಸಂವಹನದಲ್ಲಿ (M.C.J) ಎಂ.ಎ ಮಾಡಿದ್ದು, ಟಿವಿ9 ಡಿಜಿಟಲ್​ ಮೂಲಕ ವೃತ್ತಿ ಜೀವನವನ್ನು ಆರಂಭಿಸಿದ್ದಾರೆ. ಸುದ್ದಿ ಮಾಧ್ಯಮದಲ್ಲಿ​ 3 ವರ್ಷಗಳ ಅನುಭವ ಇವರಿಗಿದೆ. ಸದ್ಯ ಆಧ್ಯಾತ್ಮ, ಶಿಕ್ಷಣ, ಉದ್ಯೋಗವಕಾಶ, ರಾಜಕೀಯ, ಕ್ರೈಂ ಸುದ್ದಿಗಳನ್ನು ಬರೆಯುತ್ತಿದ್ದು, ಇವರು ಓದುಗರಿಗೆ ಉತ್ತಮ ಹಾಗೂ ಆಸಕ್ತಿದಾಯಕ ಲೇಖನಗಳನ್ನು ಒದಗಿಸುತ್ತಿದ್ದಾರೆ.

Read More