Ramadan Eid Moon Sight: ರಂಜಾನ್ ಹಬ್ಬದಲ್ಲಿ ಚಂದ್ರನ ದರ್ಶನಕ್ಕಿದೆ ವಿಶೇಷ ಮಹತ್ವ

ಇಸ್ಲಾಮಿಕ್ ಕ್ಯಾಲೆಂಡರ್ ಪ್ರಕಾರ ರಂಜಾನ್ 9ನೇ ತಿಂಗಳು. ಇದನ್ನು ಪವಿತ್ರ ತಿಂಗಳೆಂದು ಪರಿಗಣಿಸಲಾಗಿದೆ. ಹೀಗಾಗಿ ಉಪವಾಸ, ಪ್ರಾರ್ಥನೆ, ದಾನ ಧರ್ಮವೆಂದು ಹೆಚ್ಚಾಗಿ ದೇವರಿಗೆ ಹತ್ತಿರವಾಗಲು ಮುಸ್ಲಿಮರು ಅನೇಕ ಆಚರಣೆಗಳನ್ನು ಮಾಡುತ್ತಾರೆ. ಪವಿತ್ರ ರಂಜಾನ್ ತಿಂಗಳಲ್ಲಿ ಮುಸ್ಲಿಮರು 30 ದಿನಗಳ ಕಾಲ ಶ್ರದ್ಧೆ ಭಕ್ತಿಯಿಂದ ಉಪವಾಸ ಆಚರಿಸುತ್ತಾರೆ. ರಂಜಾನ್ ತಿಂಗಳ ಕೊನೆಯ ದಿನ ಅಥವಾ ಉಪವಾಸ ಆಚರಣೆಯ ಅಂತ್ಯವನ್ನೇ ಈದ್-ಉಲ್-ಫಿತರ್ ಆಗಿ ಆಚರಿಸಲಾಗುತ್ತೆ. ಈ ವರ್ಷ ಮೇ 2 ರಂದು ರಂಜಾನ್ ಹಬ್ಬ ಆಚರಿಸಲಾಗುತ್ತಿದೆ.

ಈ ಪವಿತ್ರ ಸಮಯದಲ್ಲಿ, ಮುಸ್ಲಿಮರು ರೋಜಾವನ್ನು ಆಚರಿಸುತ್ತಾರೆ, ಅಂದರೆ ಅವರು ಸೂರ್ಯೋದಯದಿಂದ ಸೂರ್ಯಾಸ್ತದವರೆಗೆ ಆಹಾರ ಅಥವಾ ನೀರನ್ನು ಸೇವಿಸುವುದಿಲ್ಲ. ಸೂರ್ಯೋದಯಕ್ಕೆ ಮುಂಚಿನ ತಿಂಡಿಯನ್ನು ಸೆಹ್ರಿ ಅಥವಾ ಸೋಹರ್ ಎಂದು ಕರೆಯಲಾಗುತ್ತದೆ ಮತ್ತು ಸೂರ್ಯಾಸ್ತದ ನಂತರ ಉಪವಾಸವನ್ನು ಮುಕ್ತಾಯಗೊಳಿಸುವ ಪ್ರಕ್ರಿಯೆಯನ್ನು ಇಫ್ತಾರ್ ಎಂದು ಕರೆಯಲಾಗುತ್ತದೆ. ಮಗ್ರಿಬ್ ಅಝಾನ್, ಸಂಜೆಯ ಪ್ರಾರ್ಥನೆಯ ಕರೆ ಆದ ನಂತರ ಉಪವಾಸವನ್ನು ಮುರಿಯಲಾಗುತ್ತದೆ. ಈ ವರ್ಷದ, ಪವಿತ್ರ ತಿಂಗಳ ಮೊದಲ ಚಂದ್ರನ ದರ್ಶನವನ್ನು ಮೇ 1 ರಂದು ನಿರೀಕ್ಷಿಸಲಾಗಿದೆ. ಅಂದ್ರೆ ಚಂದ್ರ ದರ್ಶನದ ಚಾಂದ್ ಕೀ ರಾತ್, ಚಂದ್ರನನ್ನು ನೋಡಿದ ನಂತರವೇ ರಂಜಾನ್ ಹಬ್ಬವನ್ನು ಆಚರಿಸಲಾಗುತ್ತದೆ. ಬೆಳದಿಂಗಳು ತಿಂಗಳ ಆರಂಭವನ್ನು ಗುರುತಿಸುವುದರಿಂದ, ಚಂದ್ ರಾತ್ ಅಥವಾ ಚಂದ್ರನ ದರ್ಶನವು ಈ ತಿಂಗಳು ಬಹಳಷ್ಟು ಮಹತ್ವವನ್ನು ಹೊಂದಿದೆ.

ಇನ್ನಷ್ಟು ರಂಜಾನ್ ಹಬ್ಬದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

ಇಸ್ಲಾಂ ಧರ್ಮದಲ್ಲಿ ಚಂದ್ರನ ದರ್ಶನಕ್ಕಿದೆ ವಿಶೇಷ ಮಹತ್ವ ಇಸ್ಲಾಂ ಧರ್ಮದಲ್ಲಿ ಚಂದ್ರ, ಅರ್ಧ ಚಂದ್ರ, ನಕ್ಷತ್ರಕ್ಕೆ ಹೆಚ್ಚಿನ ಮಹತ್ವವಿದೆ. ಮಸೀದಿ, ದರ್ಗ ಸೇರಿದಂತೆ ಅನೇಕ ಕಡೆ ಮುಸ್ಲಿಮರು ಅರ್ಧ ಚಂದ್ರ, ನಕ್ಷತ್ರವನ್ನು ಬಳಸುತ್ತಾರೆ. ಇಸ್ಲಾಮಿಕ್ ಕ್ಯಾಲೆಂಡರಿನ ಪ್ರಕಾರ 9 ನೇ ತಿಂಗಳಲ್ಲಿ ಅರ್ಧ ಚಂದ್ರನ ಗೋಚರ ಉಪವಾಸದ ಅವಧಿಯ ಪ್ರಾರಂಭ ಮತ್ತು ಮುಕ್ತಾಯವನ್ನು ಸೂಚಿಸುತ್ತದೆ. ರಂಜಾನ್ ಬರುವ ಸಂದರ್ಭದಲ್ಲಿ ಮುಂಚಿತವಾಗಿಯೇ ಇಸ್ಲಾಂ ಧರ್ಮದ ಮಹತ್ವದ ಸ್ಥಾನಗಳಾದ ಮಧ್ಯ ಪ್ರಾಚ್ಯ ರಾಷ್ಟ್ರಗಳು ಮತ್ತು ಇತರ ದೇಶಗಳಲ್ಲಿ ಧರ್ಮದ ಧಾರ್ಮಿಕ ಪ್ರಧಾನ ಅರ್ಧ ಚಂದ್ರ ಕಾಣಿಸುವುದನ್ನು ಖಚಿತಪಡಿಸಿಕೊಳ್ಳಲು ರಾತ್ರಿಯಲ್ಲಿ ಆಗಸವನ್ನು ಗಮನಿಸಲು ಪ್ರಾರಂಭಿಸುತ್ತಾರೆ.

ರಂಜಾನ್ ಪ್ರಾರಂಭವಾಗುವ ಮೊದಲು, ಪ್ರಪಂಚದಾದ್ಯಂತ ಧಾರ್ಮಿಕ ಮುಖಂಡರು, ಮೌಲ್ವಿ ಇತರೆ ಹಿರಿಯರು ಪವಿತ್ರ ತಿಂಗಳ ಆರಂಭವನ್ನು ಸರಿಯಾಗಿ ಗುರುತಿಸಲು ಚಂದ್ರನ ಸ್ಥಾನವನ್ನು ಟ್ರ್ಯಾಕ್ ಮಾಡುತ್ತಾರೆ. ಇದರಿಂದ ಚಂದ್ರನನ್ನು ನೋಡಿ ಹಬ್ಬದ ದಿನಾಂಕವನ್ನು ಗುರುತಿಸಲಾಗುತ್ತೆ. ಮೊದಲೇ ಹೇಳಿದಂತೆ, ಚಂದ್ರನ ದರ್ಶನವು ದಿನಾಂಕವನ್ನು ನಿರ್ಧರಿಸುತ್ತದೆ. ಇಸ್ಲಾಂ ಧರ್ಮವು ಚಂದ್ರನ ಕ್ಯಾಲೆಂಡರ್ ಅನ್ನು ಅನುಸರಿಸುತ್ತದೆ ಮತ್ತು ಚಂದ್ರನ ಬೆಳೆಯುತ್ತಿರುವ ಮತ್ತು ಕ್ಷೀಣಿಸುತ್ತಿರುವ ಹಂತಗಳನ್ನು ಅವಲಂಬಿಸಿದೆ. ಈದ್ ಸಮೀಪಿಸುತ್ತಿದ್ದಂತೆ, ಜನರು ಸ್ಪಷ್ಟವಾದ ಆಕಾಶವನ್ನು ಬಯಸುತ್ತಾರೆ, ಏಕೆಂದರೆ ಅರ್ಧಚಂದ್ರನ ದರ್ಶನವು ಹಬ್ಬವು ಅಧಿಕೃತವಾಗಿ ಪ್ರಾರಂಭವಾಗಿದೆ ಎಂದು ಸೂಚಿಸುತ್ತದೆ. ಚಂದ್ರನ ವೀಕ್ಷಣೆಯು ದೇಶದಿಂದ ದೇಶಕ್ಕೆ ಬದಲಾಗುತ್ತದೆ. ಹೀಗಾಗಿ ರಂಜಾನ್ ಹಬ್ಬ ಆಚರಣೆಯೂ ದೇಶದಿಂದ ದೇಶಕ್ಕೆ ಬದಲಾಗುತ್ತದೆ.

ಇಸ್ಲಾಮಿಕ್ ಕ್ಯಾಲೆಂಡರಿನ ಪ್ರಕಾರ, ರಂಜಾನ್ ತಿಂಗಳಿನ ಮುಂಚೆ ಸಂಭವಿಸಿದ ತಿಂಗಳು ಶಬಾನ್ ಆಗಿದ್ದು ಇದರ ಅಂತ್ಯದ ವೇಳೆಗೆ ಅರ್ಧಚಂದ್ರದ ಪ್ರಥಮ ಗೋಚರತೆಯನ್ನು ಗಮನಿಸುವ ಅಧಿಕೃತ ಧಾರ್ಮಿಕ ಸಮಿತಿಗಳು ಆ ದಿನವನ್ನು ತಿಳಿದಿರುವ ಜನರಿಗೆ ಉಪವಾಸದ ದಿನದ ಬಗ್ಗೆ ತಿಳಿಸುತ್ತವೆ ಮತ್ತು ಆ ನಿಗದಿತ ದಿನದಿಂದ ಮುಸ್ಲಿಮರು ತಮ್ಮ ಪವಿತ್ರ ಉಪವಾಸ ಆಚರಣೆಯನ್ನು ಪ್ರಾರಂಭಿಸುತ್ತಾರೆ. ಇದು ಸಾವಿರಾರು ವರ್ಷಗಳಿಂದ ಇದೇ ರೀತಿಯಲ್ಲಿ ನಡೆದುಕೊಂಡು ಬಂದ ಪದ್ಧತಿ.

ಇನ್ನು ರಂಜಾನ್ ಹಬ್ಬಕ್ಕೂ ಒಂದು ದಿನ ಮುನ್ನ ಗೋಚರಿಸುವ ಚಂದ್ರನ ರಾತ್ರಿ ಅಂದ್ರೆ ಚಾಂದ್ ಕಿ ರಾತ್ನಂದು ಮುಸ್ಲಿಮರು ಚಂದ್ರನನ್ನು ನೋಡಿ ಸಂಭ್ರಮಿಸುತ್ತಾರೆ. ಆ ರಾತ್ರಿ ಬಹುತೇಕ ಶಾಪಿಂಗ್ ಮಾಲ್ಗಳು ತೆರೆದಿದ್ದು ಮುಸ್ಲಿಮರು ಹಬ್ಬದ ತಯಾರಿಗಾಗಿ, ಬಟ್ಟೆ ಖರೀದಿಗಾಗಿ ಶಾಪಿಂಗ್ ಮಾಡುತ್ತಾರೆ.

ಪ್ರವಾದಿ ಮುಹಮ್ಮದ್ ಪೈಗಂಬರ್ ಅವರು ಮುಸ್ಲಿಮರ ಪವಿತ್ರ ಗ್ರಂಥ ಕುರಾನ್ನ ಮೊದಲ ಪದ್ಯಗಳನ್ನು ಬಹಿರಂಗಪಡಿಸಿದ ತಿಂಗಳು ರಂಜಾನ್ ಎಂದು ಮುಸ್ಲಿಮರು ನಂಬುತ್ತಾರೆ. ರಂಜಾನ್ ಸಮಯದಲ್ಲಿ ಜನರು ತಮ್ಮ ದುರ್ಗುಣಗಳನ್ನು ಮತ್ತು ನ್ಯೂನತೆಗಳನ್ನು ತೊಡೆದುಹಾಕುವ ಗುರಿಯನ್ನು ಹೊಂದಿರುವುದರಿಂದ ಈ ತಿಂಗಳನ್ನು ಒಬ್ಬರ ಸಂಯಮ ಮತ್ತು ಸ್ವಯಂ-ಶಿಸ್ತಿನ ಪರೀಕ್ಷೆ ಎಂದು ಪರಿಗಣಿಸಲಾಗುತ್ತದೆ.