Australia Tour of New Zealand: ಎರಡನೇ ಟಿ-20ಐ ಪಂದ್ಯದಲ್ಲಿ ನ್ಯೂಜಿಲೆಂಡ್​ಗೆ 4 ರನ್​ಗಳ ರೋಚಕ ಜಯ

Australia Tour of New Zealand: ಎರಡನೇ ಟಿ-20ಐ ಪಂದ್ಯದಲ್ಲಿ ನ್ಯೂಜಿಲೆಂಡ್​ಗೆ 4 ರನ್​ಗಳ ರೋಚಕ ಜಯ
ಮಾರ್ಟಿನ್ ಗಪ್ಟಿಲ್

ಬಹಳ ದಿನಗಳಿಂದ ಗಪ್ಟಿಲ್ ಸುದ್ದಿಯಲ್ಲಿ ಇರಲಿಲ್ಲ. ಇಂದು ಅಕ್ರಮಣಕಾರಿ ಆಟಕ್ಕೆ ಅತ್ಯುತ್ತಮ ಉದಾಹರಣೆ ಎನಿಸುವ ಬ್ಯಾಟಿಂಗ್​ ಪ್ರದರ್ಶನ ನೀಡಿದರು. 50 ಎಸೆತಗಳಲ್ಲಿ 97 ರನ್ ಬಾರಿಸಿದ ಅವರು ತಮ್ಮ ಇನ್ನಿಂಗ್ಸ್​ನಲ್ಲಿ 6 ಬೌಂಡರಿ ಮತ್ತು 8 ಸಿಕ್ಸರ್​ಗಳನ್ನು ಬಾರಿಸಿದರು.

Arun Belly

|

Feb 25, 2021 | 8:39 PM

ಡ್ಯುನೆಡಿನ್: ಆರನ್ ಫಿಂಚ್ ನೇತೃತ್ವದ ಅಸ್ಟ್ರೇಲಿಯಾ ತಂಡ ಸೀಮಿತ ಓವರ್​ಗಳ ಕ್ರಿಕೆಟ್​ನಲ್ಲಿ ಕಳಪೆ ಪ್ರದರ್ಶನ ನೀಡುವುದನ್ನು ಮುಂದುವರೆಸಿದ್ದು ಕ್ರಿಕೆಟ್ ಆಸ್ಟ್ರೇಲಿಯಾಗೆ ದೊಡ್ಡ ತಲೆನೋವಿನ ಸಂಗತಿಯಾಗಿದೆ. ಪ್ರಸ್ತುತವಾಗಿ ನ್ಯೂಜಿಲೆಂಡ್ ಪ್ರವಾಸದಲ್ಲಿರುವ ಕಾಂಗರೂಗಳ ಪಡೆ 5-ಟಿ20ಐ ಪಂದ್ಯಗಳ ಸರಣಿಯ ಎರಡನೇ ಪಂದ್ಯದಲ್ಲೂ ಅತಿಥೇಯರಿಂದ ಪರಾಭವಗೊಂಡಿದೆ. ಡ್ಯುನೆಡಿನ್​ನ ಯೂನಿವರ್ಸಿಟಿ ಮೈದಾನದಲ್ಲಿ ಗುರುವಾರದಂದು ನಡೆದ ಪಂದ್ಯದಲ್ಲಿ ಆಲ್​-ರೌಂಡರ್ ಮಾರ್ಕಸ್ ಸ್ಟಾಯ್ನಿಸ್ ಮತ್ತು ಬೌಲಿಂಗ್ ಆಲ್​-ರೌಂಡರ್ ಡೇನಿಯಲ್ ಸ್ಯಾಮ್ಸ್ ಅವರ ಬಿರುಗಾಳಿ ವೇಗದ ಜೊತೆಯಾಟದ ನೆರವಿನಿಂದ ಆಸ್ಟ್ರೇಲಿಯಾ ಗೆಲುವಿನ ಸನಿಹಕ್ಕೆ ಬಂದಿತ್ತಾದರೂ ಅಂತಿಮವಾಗಿ 4 ರನ್​ಗಳ ಅಪಜಯ ಅನುಭವಿಸಿತು. ಅತಿಥೇಯರ ಪರ ಫಾರ್ಮ್​ಗೆ ಮರಳಿದ ಆರಂಭ ಆಟಗಾರ ಮಾರ್ಟಿನ್ ಗಪ್ಟಿಲ್ (97) ಅಸ್ಸೀ ಬೌಲರ್​ಗಳನ್ನು ಮನಬಂದಂತೆ ಚಚ್ಚಿ, ಪಂದ್ಯದ ವ್ಯಕ್ತಿ ಪ್ರಶಸ್ತಿಗೆ ಪಾತ್ರರಾದರು.

ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡ ಫಿಂಚ್ ನಾಲ್ಕನೆ ಓವರಿನಲ್ಲಿ ವಿಕೆಟ್ ಪಡೆಯುವಲ್ಲಿ ಸಫಲರಾದರೂ ಎರಡನೇ ವಿಕೆಟ್​ಗೆ ಗಪ್ಟಿಲ್ ಮತ್ತು ನಾಯಕ ಕೇನ್ ವಿಲಿಯಮ್ಸನ್ ಅವರ ನಡುವೆ ಬಂದ 131 ರನ್​ಗಳ ಜೊತೆಯಾಟ ಅವರ ನಿರ್ಧಾರ ತಪ್ಪೆನಿಸುವಂತೆ ಮಾಡಿತು. ಬಹಳ ದಿನಗಳಿಂದ ಸುದ್ದಿಯಲ್ಲಿರದ ಗಪ್ಟಿಲ್ ಇಂದು ಅಕ್ರಮಣಕಾರಿ ಆಟಕ್ಕೆ ಅತ್ಯುತ್ತಮ ಉದಾಹರಣೆ ಎನಿಸುವ ಬ್ಯಾಟಿಂಗ್​ ಪ್ರದರ್ಶನ ನೀಡಿದರು. 50 ಎಸೆತಗಳಲ್ಲಿ 97ರನ್ ಬಾರಿಸಿದ ಅವರು ತಮ್ಮ ಇನ್ನಿಂಗ್ಸ್​ನಲ್ಲಿ 6 ಬೌಂಡರಿ ಮತ್ತು 8 ಸಿಕ್ಸರ್​ಗಳನ್ನು ಬಾರಿಸಿದರು. ಅವರಿಗೆ ಪರಿಪಕ್ವ ಜೊತೆಗಾರನ ಪಾತ್ರ ನಿರ್ವಹಿಸಿದ ವಿಲಿಯಮ್ಸನ್ 53 ರನ್ (35 ಎಸೆತ, 2ಬೌಂಡರಿ 3 ಸಿಕ್ಸರ್) ಬಾರಿಸಿದರು. ಕೇವಲ 11.3 ಓವರ್​ಗಳಲ್ಲಿ ಇವರಿಬ್ಬರು 131 ರನ್ ಸೇರಿದರು.

ಗಪ್ಟಿಲ್ ಔಟಾದ ನಂತರ ಬಡ್ತಿ ಪಡೆದು 5ನೇ ಕ್ರಮಾಂಕದಲಲ್ಲಿ ಆಡಲು ಬಂದ ಅಲ್-ರೌಂಡರ್ ಜೇಮ್ಸ್ ನೀಷಮ್ ಕೇವಲ 16 ಎಸೆತಗಳಲ್ಲಿ ಅಜೇಯ 45 ರನ್ ಬಾರಿಸಿದರು. ಅವರ ಸ್ಕೋರಿನಲ್ಲಿ 1ಬೌಂಡರಿ ಮತ್ತು 6 ಸಿಕ್ಸರ್​ಗಳಿದ್ದವು. ಗಪ್ಟಿಲ್-ವಿಲಿಯಮ್ಸನ್ ಜೊತೆಯಾಟ ಮತ್ತು ನೀಷಮ್ ಅವರ ನಿರ್ದಯಿ ಹೊಡೆತಗಳ ಬ್ಯಾಟಿಂಗ್ ನೆರವಿನಿಂದ ಅತಿಥೇಯರು 200 ರನ್​ ಗಡಿ (219/7) ದಾಟಿದರು.

Mitchell Santner

ಮಿಚೆಲ್ ಸ್ಯಾಂಟ್ನರ್

ಆಸ್ಟ್ರೇಲಿಯಾ ಪರ ವೇಗದ ಬೌಲರ್ ಕೇನ್ ರಿಚರ್ಡ್ಸನ್ 43 ರನ್​ಗಳಿಗೆ 3 ವಿಕೆಟ್ ಪಡೆದು ಯಶಸ್ವೀ ಬೌಲರ್ ಎನಿಸಿದರು. ಆಡಂ ಜಂಪಾ, ಜಾಯ್ ರಿಚರ್ಡ್ಸನ್ ಮತ್ತು ಡೇನಿಯಲ್ ಸ್ಯಾಮ್ಸ್ ತಲಾ ಒಂದು ವಿಕೆಟ್ ಪಡೆದರು.

ಇದಕ್ಕೆ ಉತ್ತರವಾಗಿ ಆಸ್ಟ್ರೇಲಿಯಾದ ಆರಂಭ ಉತ್ತಮವಾಗೇ ಇತ್ತು. ಮೊದಲ 7 ಓವರ್​ಗಳಲ್ಲಿ 70 ರನ್​ ಬಂದವು. ಫಿಂಚ್ 24 ರನ್ ಬಾರಿಸಿದರೆ ವಿಕೆಟ್​ಕೀಪರ್ ಬ್ಯಾಟ್ಸ್​ಮನ್ ಜೊಷ್ ಫಿಲಿಪ್ 45 ರನ್ (32 ಎಸೆತ 2ಬೌಂಡರಿ, 3 ಸಿಕ್ಸರ್) ಬಾರಿಸಿದರು. ಒಂದು ಹಂತದಲ್ಲಿ 73/2 ಆಗಿದ್ದ ಆಸ್ಟ್ರೇಲಿಯಾದ ಸ್ಕೋರ್ ನಂತರ ಕುಸಿತ ಕಂಡಿತು.

ಫಿಂಚ್ ಮತ್ತು ಫಿಲಿಪ್ ಔಟಾದ ನಂತರ ಆಸ್ಟ್ರೇಲಿಯಾದ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳಿಂದ ಉಲ್ಲೇಖಾರ್ಹ ಕಾಣಿಕೆ ಸಿಗಲಿಲ್ಲ. ಇಂಡಿಯನ್ ಪ್ರಿಮೀಯರ್​ ಲೀಗ್​ನಲ್ಲಿ ಮತ್ತೊಮ್ಮೆ ಭಾರೀ ಮೊತ್ತಕ್ಕೆ ಬಿಕರಿಯಾಗಿರುವ ಗ್ಲೆನ್ ಮ್ಯಾಕ್ಸ್​ವೆಲ್ ಕೇವಲ 3 ರನ್ ಗಳಿಸಿ ಔಟಾದರು. ಆಷ್ಟನ್ ಅಗರ್ ಮತ್ತು ಮಿಚೆಲ್ ಮಾರ್ಷ್ ಖಾತೆ ತೆರೆಯಲು ವಿಫಲರಾಗಿ ಪೆವಿಲಿಯನ್​ಗೆ ಮರಳಿದರು. ಆ ಹಂತದಲ್ಲಿ ಆಸ್ಟ್ರೇಲಿಯಾದ ಸ್ಕೋರ್ 13 ನೇ ಓವರಿನಲ್ಲಿ 113/6 ಆಗಿತ್ತು ಮತ್ತು ಪ್ರವಾಸಿಗರ ಶಿಬಿರದಲ್ಲಿ ಗೆಲ್ಲುವ ಆಸೆಯೂ ಕಮರಿತ್ತು.

ಆದರೆ ನಂತರ ನಡೆದಿದ್ದು ಮಾತ್ರ ಪವಾಡಕ್ಕಿಂತ ಕಮ್ಮಿಯಾಗಿರಲಿಲ್ಲ. 7ನೇ ವಿಕೆಟ್​ಗೆ ಜೊತೆಗೂಡಿದ ಸ್ಟಾಯ್ನಿಸ್ ಮತ್ತು ಸ್ಯಾಮ್ಸ್ ಕೇವಲ ಮೂರು ಓವರ್​ಗಳ ಆಟದಲ್ಲಿ ಪಂದ್ಯದ ಸ್ವರೂಪವನ್ನೇ ಬದಲಿಸಿದರು. ಕೊನೆಯ 6 ಓವರ್​ಗಳಲ್ಲಿ ಆಸ್ಸೀಗಳಿಗೆ ಗೆಲ್ಲಲು 98 ರನ್ ಬೇಕಿತ್ತು. ಇಶ್ ಸೋಧಿ ಎಸೆದ ಇನ್ನಿಂಗ್ಸ್​ನ 15ನೇ ಓವರಿನಲ್ಲಿ ಸ್ಟಾಯ್ನಿಸ್ 20 ರನ್ ಚಚ್ಚಿದರು. ನಂತರ ಬೌಲ್ ಮಾಡಿದ ಟಿಮ್ ಸೌಥೀ ತಮ್ಮ ಓವರ್​ನಲ್ಲಿ 25 ರನ್ ನೀಡಿದರು. ಕೇವಲ 12 ಎಸೆತಗಳಲ್ಲಿ ಇವರಿಬ್ಬರ ಬ್ಯಾಟ್​ಗಳಿಂದ 45 ರನ್ ಸಿಡಿದವು.

ಏತನ್ಮಧ್ಯೆ, ಸ್ಟಾಯ್ನಿಸ್ ಕೇವಲ 22 ಎಸೆತಗಳಲ್ಲಿ ತಮ್ಮ ಅರ್ಧ ಶತಕ ಪೂರೈಸಿದರು. 17ನೇ ಓವರಿನಲ್ಲಿ ಅವರು ಮತ್ತು ಸ್ಯಾಮ್ಸ್ 17 ರನ್ ಗಳಿಸಿದ ನಂತರ ಕೊನೆಯ 3 ಓವರಿನಲ್ಲಿ ಗೆಲ್ಲಲು 36 ರನ್ ಬೇಕಾಗಿತ್ತು. ಆ ಹಂತದಲ್ಲಿ ಅತಂಕಕ್ಕೊಳಗಾಗದೆ 18ನೇ ಓವರ್ ಬೌಲ್ ಮಾಡಿದ ಟ್ರೆಂಟ್ ಬೌಲ್ಟ್ ಕೇವಲ 6 ರನ್ ನೀಡಿದರು. ಅಂದರೆ ಪಂದ್ಯ ಗೆಲ್ಲಲು ಆಸ್ಟ್ರೇಲಿಯಾಗೆ ಕೊನೆಯ 12 ಎಸೆತಗಳಲ್ಲಿ 30 ರನ್ ಬೇಕಿದ್ದವು.

19ನೇ ಓವರ್ ಬೌಲ್ ಮಾಡಿದ ಸೌಥೀ 15ರನ್ ನೀಡಿದರು. ಕೊನೆಯ ಓವರ್ ಎಸೆಯಲು ವಿಲಿಯಮ್ಸನ್ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದ ನೀಷಮ್ ಅವರನ್ನು ಕರೆದರು. ನಾಯಕನ ವಿಶ್ವಾಸವನ್ನು ಸಂಫೂರ್ಣವಾಗಿ ಉಳಿಸಿಕೊಂಡ ಅವರು ಆ ಓವರ್​ನಲ್ಲಿ ಕೇವಲ 10 ರನ್ ನೀಡಿ ಸ್ಟಾಯ್ನಿಸ್ (78, 37 ಎಸೆತ, 7 ಬೌಂಡರಿ, 5 ಸಿಕ್ಸರ್) ಮತ್ತು ಸ್ಯಾಮ್ಸ್ (41,  15 ಎಸೆತ 2 ಬೌಂಡರಿ, 4 ಸಿಕ್ಸರ್) ಅವರ ವಿಕೆಟ್​ಗಳನ್ನೂ ಪಡೆದು, ತಮ್ಮ ತಂಡಕ್ಕೆ 4 ರನ್​ಗಳ ರೋಚಕ ಗೆಲುವು ದೊರಕಿಸಿದರು.

ಅಂತಿಮ ಸ್ಕೋರ್​ಗಳು: ನ್ಯೂಜಿಲೆಂಡ್ 20 ಓವರ್​ಗಳಲ್ಲಿ 219/7 (ಮಾರ್ಟಿನ್ ಗಪ್ಟಿಲ್ 97, ಕೇನ್ ವಿಲಿಯಮ್ಸನ್ 53, ಜೇಮ್ಸ್ ನೀಷಮ್ 45*, ಕೇನ್ ರಿಚರ್ಡ್ಸನ್ 3/43)

ಆಸ್ಟ್ರೇಲಿಯಾ 20ಓವರ್​ಗಳಲ್ಲಿ 215/8 (ಮಾರ್ಕಸ್ ಸ್ಟಾಯ್ನಿಸ್ 78, ಡೇನಿಯಲ್ ಸ್ಯಾಮ್ಸ್ 41, ಮಿಚೆಲ್ ಸ್ಯಾಂಟ್ನರ್ 4/31)

ಫಲಿತಾಂಶ: ನ್ಯೂಜಿಲೆಂಡ್​ಗೆ 4 ರನ್​ಗಳ ಗೆಲುವು, ಸರಣಿಯಲ್ಲಿ 2-0 ಮುನ್ನಡೆ

ಇದನ್ನೂ ಓದಿAustralia vs New Zealand: ಕಾನ್ವೆ ಬ್ಯಾಟಿಂಗ್​ಗೆ ತತ್ತರಿಸಿದ ಆಸ್ಟ್ರೇಲಿಯಾ: ಟಿ-20 ಮೊದಲ ಪಂದ್ಯದಲ್ಲಿ 53 ರನ್ ಸೋಲು

Follow us on

Related Stories

Most Read Stories

Click on your DTH Provider to Add TV9 Kannada