SMAT 2025: ಬ್ಯಾಟಿಂಗ್ ಜೊತೆಗೆ ಬೌಲಿಂಗ್ನಲ್ಲೂ ಮಿಂಚಿದ ಅಭಿಷೇಕ್; ಪಂಜಾಬ್ಗೆ ಗೆಲುವು
Abhishek Sharma: ದಕ್ಷಿಣ ಆಫ್ರಿಕಾ ಸರಣಿ ಪೂರ್ವದಲ್ಲಿ ಅಭಿಷೇಕ್ ಶರ್ಮಾ ಮುಷ್ತಾಕ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಪಂಜಾಬ್ ಪರ ಆಲ್ರೌಂಡರ್ ಪ್ರದರ್ಶನದ ಮೂಲಕ ಮಿಂಚಿದ್ದಾರೆ. ಕೇವಲ 9 ಎಸೆತಗಳಲ್ಲಿ 34 ರನ್ ಗಳಿಸಿ, ನಂತರ 23 ರನ್ಗಳಿಗೆ 3 ವಿಕೆಟ್ ಪಡೆದು ತಂಡಕ್ಕೆ 54 ರನ್ಗಳ ಗೆಲುವು ತಂದಿದ್ದಾರೆ. ಈ ಸ್ಫೋಟಕ ಬ್ಯಾಟಿಂಗ್ ಮತ್ತು ಬೌಲಿಂಗ್ ಪ್ರದರ್ಶನ ಪಂಜಾಬ್ಗೆ ಟೂರ್ನಿಯಲ್ಲಿ ಮಹತ್ವದ ಗೆಲುವು ತಂದುಕೊಟ್ಟಿದೆ.

ಡಿಸೆಂಬರ್ 9 ರಿಂದ ಆರಂಭವಾಗಲಿರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ20 ಸರಣಿಗೂ ಮುನ್ನ ಅಭಿಷೇಕ್ ಶರ್ಮಾ ( Abhishek Sharma) ದೇಶೀಯ ಕ್ರಿಕೆಟ್ನಲ್ಲಿ ತಮ್ಮ ಅಮೋಘ ಪ್ರದರ್ಶನವನ್ನು ಮುಂದುವರೆಸಿದ್ದಾರೆ. ದೇಶೀಯ ಟಿ20 ಟೂರ್ನಮೆಂಟ್ ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಪಂಜಾಬ್ ತಂಡದ ಪರ ಆಡುತ್ತಿರುವ ಅಭಿಷೇಕ್ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಸಂಚಲನ ಮೂಡಿಸಿದ್ದಾರೆ. ಇದೀಗ ಪುದುಚೇರಿ ವಿರುದ್ಧದ ಪಂದ್ಯದಲ್ಲಿ ಅಭಿಷೇಕ್ ಬ್ಯಾಟಿಂಗ್ ಜೊತೆಗೆ ಬೌಲಿಂಗ್ನಲ್ಲೂ ಕಮಾಲ್ ಮಾಡಿದ್ದಾರೆ. ಅಭಿಷೇಕ್ ಅವರ ಈ ಆಲ್ರೌಂಡ್ ಪ್ರದರ್ಶನದಿಂದ ಪಂಜಾಬ್ ತಂಡ 54 ರನ್ಗಳ ಗೆಲುವು ಸಾಧಿಸಿದೆ.
ಕೇವಲ 9 ಎಸೆತಗಳಲ್ಲಿ 34 ರನ್
ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಪಂಜಾಬ್ ಪರ ಆರಂಭಿಕರಾಗಿ ಕಣಕ್ಕಿಳಿದಿದ್ದ ನಾಯಕರಾಗಿದ್ದ ಅಭಿಷೇಕ್ ಬೌಂಡರಿ ಮತ್ತು ಸಿಕ್ಸರ್ಗಳ ಮಳೆಗರೆದರು. ಅಭಿಷೇಕ್ ಕೇವಲ ಒಂಬತ್ತು ಎಸೆತಗಳಲ್ಲಿ ನಾಲ್ಕು ಬೌಂಡರಿ ಮತ್ತು ಮೂರು ಸಿಕ್ಸರ್ಗಳ ಸಹಿತ ಒಟ್ಟು 34 ರನ್ ಗಳಿಸಿದರು. ವಿಶೇಷತೆಯೆಂದರೆ ಅಭಿಷೇಕ್ ಕಲೆಹಾಕಿದ ಎಲ್ಲಾ 34 ರನ್ಗಳು ಕೇವಲ ಬೌಂಡರಿಗಳಿಂದ ಬಂದವು.
ಬೌಲಿಂಗ್ನಲ್ಲೂ ಮಿಂಚಿದ ಅಭಿಷೇಕ್
ಅಭಿಷೇಕ್ ನಂತರ, ಪಂಜಾಬ್ನ ಉಳಿದ ಬ್ಯಾಟ್ಸ್ಮನ್ಗಳು ಸಹ ಉತ್ತಮ ಇನ್ನಿಂಗ್ಸ್ ಆಡಿದರು. ಇದರ ಫಲವಾಗಿ ತಂಡವು 20 ಓವರ್ಗಳಲ್ಲಿ 192 ರನ್ ಕಲೆಹಾಕಿತು. ಇದಾದ ನಂತರ ಬೌಲಿಂಗ್ನಲ್ಲೂ ಮಿಂಚಿನ ಪ್ರದರ್ಶನ ತೋರಿದ ಅಭಿಷೇಕ್ ನಾಲ್ಕನೇ ಓವರ್ನಲ್ಲಿ ತಮ್ಮ ಮೊದಲ ವಿಕೆಟ್ ಪಡೆದರು. ಮುಂದಿನ ಓವರ್ನಲ್ಲಿ, ಆಯುಷ್ ಗೋಯಲ್ ಎರಡು ವಿಕೆಟ್ ಪಡೆದರೆ, ಮೂರನೇ ಓವರ್ನಲ್ಲಿ ಮತ್ತೆ ದಾಳಿಗಿಳಿದ ಅಭಿಷೇಕ್ ಎರಡನೇ ವಿಕೆಟ್ ಪಡೆದರು. ಅಲ್ಲಿಗೆ ನಿಲ್ಲದ ಅಭಿಷೇಕ್ ಮುಂದಿನ ಓವರ್ನಲ್ಲಿ ಪುದುಚೇರಿ ನಾಯಕ ಅಮನ್ ಖಾನ್ ಅವರನ್ನು ಔಟ್ ಮಾಡಿದರು.
ಪಂಜಾಬ್ಗೆ ಮೂರನೇ ಗೆಲುವು
ಒಟ್ಟಾರೆಯಾಗಿ, ಅಭಿಷೇಕ್ ಪಂದ್ಯದಲ್ಲಿ ನಾಲ್ಕು ಓವರ್ ಬೌಲಿಂಗ್ ಮಾಡಿ ಕೇವಲ 23 ರನ್ಗಳಿಗೆ ಮೂರು ವಿಕೆಟ್ ಕಬಳಿಸಿದರು. ಆಯುಷ್ ಗೋಯಲ್ ಕೂಡ ಮೂರು ವಿಕೆಟ್ ಕಬಳಿಸಿದರು, ಎಡಗೈ ಸ್ಪಿನ್ನರ್ ಹರ್ಪ್ರೀತ್ ಬ್ರಾರ್ ಕೂಡ ಎರಡು ವಿಕೆಟ್ ಪಡೆದರು ಹೀಗಾಗಿ ಪುದುಚೇರಿ ಕೇವಲ 138 ರನ್ಗಳಿಗೆ ಆಲೌಟ್ ಆಯಿತು. ಟೂರ್ನಿಯ ಗುಂಪು ಹಂತದಲ್ಲಿ ಐದು ಪಂದ್ಯಗಳಲ್ಲಿ ಪಂಜಾಬ್ ಗಳಿಸಿದ ಮೂರನೇ ಗೆಲುವು ಇದಾಗಿದ್ದು, ಎರಡರಲ್ಲಿ ಸೋತಿದೆ. ಪ್ರಸ್ತುತ, ತಂಡವು ಎಲೈಟ್ ಗ್ರೂಪ್ ಸಿ ನಲ್ಲಿ ಬಂಗಾಳದ ನಂತರ ಎರಡನೇ ಸ್ಥಾನದಲ್ಲಿದೆ.
