Andrew Symonds death: ದಾಖಲೆಗಳ ಸರದಾರ ಈ ಆಸೀಸ್ ಆಟಗಾರ; ಆಂಡ್ರ್ಯೂ ಸೈಮಂಡ್ಸ್ ವಿಶೇಷ ರೆಕಾರ್ಡ್ಗಳು ಇಲ್ಲಿವೆ
Andrew Symonds : ಆಸ್ಟ್ರೇಲಿಯಾ ವಿಶ್ವಕಪ್ನಲ್ಲಿ ಗೆಲುವಿನ ದಾಖಲೆ ಬರೆಯುವುದಕ್ಕೆ ಸೈಮಂಡ್ಸ್ ಕೊಡುಗೆ ದೊಡ್ಡದಿದೆ. ಇದೇ ಕಾರಣಕ್ಕೆ ಕಾಂಗರೂ ನಾಡಿನ ಈ ಆಟಗಾರನಿಗೆ ವಿಶ್ವಾದ್ಯಂತ ಅಭಿಮಾನಿ ವೃಂದವಿದೆ. ಸೈಮಂಡ್ಸ್ ವೃತ್ತಿ ಜೀವನದ ದಾಖಲೆಗಳ ಪಟ್ಟಿ ಇಲ್ಲಿದೆ.
Updated on:May 15, 2022 | 2:02 PM
ಆಸೀಸ್ ಕ್ರಿಕೆಟ್ ತಾರೆ 46 ವರ್ಷದ ಆಂಡ್ರ್ಯೂ ಸೈಮಂಡ್ಸ್ (Andrew Symonds) ಶನಿವಾರ ರಾತ್ರಿ ನಡೆದ ಕಾರು ಅಪಘಾತದಲ್ಲಿ ಮೃತಪಟ್ಟಿದ್ದಾರೆ. ಇದನ್ನು ಕ್ರಿಕೆಟ್ ಆಸ್ಟ್ರೇಲಿಯಾ ಪೊಲೀಸ್ ಮೂಲಗಳನ್ನು ಉಲ್ಲೇಖಿಸಿ ವರದಿ ಮಾಡಿದೆ. ಮತ್ತೋರ್ವ ತಾರಾ ಆಟಗಾರನ ನಿಧನಕ್ಕೆ ಕ್ರಿಕೆಟ್ ಲೋಕ ಕಂಬನಿ ಮಿಡಿದಿದೆ. ಅಂತಾರಾಷ್ರೀಯ ಕ್ರಿಕೆಟ್ನಲ್ಲಿ ಅತ್ಯುತ್ತಮ ಆಲ್ರೌಂಡರ್ಗಳ ಪಟ್ಟಿಯಲ್ಲಿ ಸೈಮಂಡ್ಸ್ ಅವರದ್ದು ದೊಡ್ಡ ಹೆಸರು. ಅಂತಾರಾಷ್ಟ್ರೀಯ ಕ್ರಿಕೆಟ್ ಜತೆಗೆ ಐಪಿಎಲ್ನಲ್ಲೂ ಸೈಮಂಡ್ಸ್ ಹಲವು ದಾಖಲೆ ಬರೆದಿದ್ದಾರೆ. ಬೇಡದ ಕಾರಣಗಳಿಗೂ ಅವರು ಸುದ್ದಿಯಾಗಿದ್ದಿದೆ. ಅದಾಗ್ಯೂ ಸೈಮಂಡ್ಸ್ ವರ್ಣರಂಜಿತ ವ್ಯಕ್ತಿತ್ವ, ವಿಭಿನ್ನ ಶೈಲಿ, ಆಕ್ರಮಣಕಾರಿ ಆಟ ಕ್ರಿಕೆಟ್ಗೆ ಹೊಸ ಮೆರುಗನ್ನು ತಂದಿದ್ದು ಸುಳ್ಳಲ್ಲ. ಆಸ್ಟ್ರೇಲಿಯಾ ವಿಶ್ವಕಪ್ನಲ್ಲಿ ಗೆಲುವಿನ ದಾಖಲೆ ಬರೆಯುವುದಕ್ಕೆ ಸೈಮಂಡ್ಸ್ ಕೊಡುಗೆ ದೊಡ್ಡದಿದೆ. ಇದೇ ಕಾರಣಕ್ಕೆ ಕಾಂಗರೂ ನಾಡಿನ ಈ ಆಟಗಾರನಿಗೆ ವಿಶ್ವಾದ್ಯಂತ ಅಭಿಮಾನಿ ವೃಂದವಿದೆ. ಸೈಮಂಡ್ಸ್ ವೃತ್ತಿ ಜೀವನದ ದಾಖಲೆಗಳ ಪಟ್ಟಿ ಇಲ್ಲಿದೆ.
ಏಕದಿನ ಕ್ರಿಕೆಟ್ನಲ್ಲಿ 5,000 ರನ್+ 100 ವಿಕೆಟ್:
ಏಕದಿನ ಕ್ರಿಕೆಟ್ನಲ್ಲಿ 5,000ಕ್ಕೂ ಹೆಚ್ಚು ರನ್ ಹಾಗೂ 100 ವಿಕೆಟ್ ಕಬಳಿಸಿದ ಕೆಲವೇ ಆಟಗಾರರಲ್ಲಿ ಸೈಮಂಡ್ಸ್ ಒಬ್ಬರು. ಅವರು 5,088 ರನ್ ಬಾರಿಸಿದ್ದು, 133 ವಿಕೆಟ್ ಪಡೆದಿದ್ದಾರೆ. ಆಸ್ಟ್ರೇಲಿಯಾ ತಂಡವನ್ನು 198 ಏಕದಿನ ಪಂದ್ಯಗಳಲ್ಲಿ ಪ್ರತಿನಿಧಿಸಿದ್ದ ಸೈಮಂಡ್ಸ್ 1998-2009ರವರೆಗೆ 11 ವರ್ಷಗಳ ಕಾಲ ಒಡಿಐ ಪಂದ್ಯಗಳನ್ನಾಡಿದ್ದರು.
ಎರಡು ಬಾರಿ ವಿಶ್ವಕಪ್ ವಿಜೇತ ಆಲ್ರೌಂಡರ್:
2003ರ ವಿಶ್ವಕಪ್ಗೆ ಆಂಡ್ರ್ಯೂ ಸೈಮಂಡ್ಸ್ ಆಯ್ಕೆಯಾದಾಗ ಮೂಗು ಮುರಿದವರೇ ಹೆಚ್ಚು. ಇದಕ್ಕೆ ಕಾರಣಗಳೂ ಇಲ್ಲದಿಲ್ಲ. ಅದುವರೆಗೆ ಸೈಮಂಡ್ಸ್ರಿಂದ ಸತತವಾಗಿ ಉತ್ತಮ ಪ್ರದರ್ಶನ ಬಂದಿರಲಿಲ್ಲ. ಹೀಗಾಗಿ ವಿಶ್ವಕಪ್ಗೆ ಇಂತಹ ಆಟಗಾರನನ್ನು ಆಯ್ಕೆ ಮಾಡಿದ್ದರ ಬಗ್ಗೆ ಹಲವರಿಗೆ ಅನುಮಾನ ಇದ್ದೇ ಇತ್ತು. ಜತೆಗೆ ಅವರ ಆಯ್ಕೆ ಬಹಳ ಅನಿರೀಕ್ಷಿತವಾಗಿತ್ತು. ಆದರೆ ವಿಶ್ವಕಪ್ನಲ್ಲಿ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ 126 ಎಸೆತಗಳಲ್ಲಿ 143 ರನ್ ಚಚ್ಚಿದ ಸೈಮಂಡ್ಸ್ ವಿಶ್ವ ಕ್ರಿಕೆಟ್ಗೆ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು.
ಆಸ್ಟ್ರೇಲಿಯಾ ತಂಡದ 2003 ಹಾಗೂ 2007ರ ವಿಶ್ವಕಪ್ ಗೆಲುವಿನಲ್ಲಿ ಸೈಮಂಡ್ಸ್ ಕೊಡುಗೆ ದೊಡ್ಡದಿದೆ. ತಮ್ಮ ಬ್ಯಾಟಿಂಗ್ ಹಾಗೂ ಬೌಲಿಂಗ್ ಜತೆಗೆ ಮಿಂಚಿನ ಫೀಲ್ಡಿಂಗ್ ಮೂಲಕ ಸೈಮಂಡ್ಸ್ ತಂಡಕ್ಕೆ ಆಸರೆಯಾಗುತ್ತಿದ್ದರು.
ವಿಶ್ವ XIರ ಬಳಗದಲ್ಲಿ ಮೂರು ಬಾರಿ ಸ್ಥಾನ ಪಡೆದ ಸೈಮಂಡ್ಸ್:
ಆಂಡ್ರ್ಯೂ ಸೈಮಂಡ್ಸ್ ಐಸಿಸಿ ಪ್ರಕಟಿಸುವ ಏಕದಿನ ವಿಶ್ವ XIರ ಬಳಗದಲ್ಲಿ ಸೈಮಂಡ್ಸ್ ಮೂರು ಬಾರಿ ಸ್ಥಾನ ಪಡೆದಿದ್ದರು. 2005ರಲ್ಲಿ ಮೊದಲ ಬಾರಿಗೆ ಈ ಪಟ್ಟಿಯಲ್ಲಿ ಆಯ್ಕೆಯಾಗಿದ್ದ ಸೈಮಂಡ್ಸ್ 2006ರಲ್ಲಿ 12ನೇ ಆಟಗಾರನಾಗಿ ವಿಶ್ವ 11 ಪಟ್ಟಿಯಲ್ಲಿ ಕಾಣಿಸಿಕೊಂಡಿದ್ದರು. 2008ರಲ್ಲಿ ಮತ್ತೆ ವಿಶ್ವ XI ಬಳಗದಲ್ಲಿ ಅವರು ಕಾಣಿಸಿಕೊಂಡರು.
20 ವರ್ಷಗಳಿಗೂ ಅಧಿಕ ಕಾಲ ಯಾರಿಂದಲೂ ಮುರಿಯಲು ಸಾಧ್ಯವಾಗದಿದ್ದ ಸೈಮಂಡ್ಸ್ ದಾಖಲೆ:
ಅಂತಾರಾಷ್ಟ್ರೀಯ ಕ್ರಿಕೆಟ್ ಜತೆಗೆ ದೇಶಿ ಕ್ರಿಕೆಟ್ಗಳಲ್ಲೂ ಸೈಮಂಡ್ಸ್ ಹಲವು ದಾಖಲೆ ರಚಿಸಿದ್ದರು. ಆಸ್ಟ್ರೇಲಿಯಾದಲ್ಲಿ ದೇಶಿ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದ ಸೈಮಂಡ್ಸ್, ವಿಶ್ವದಾಖಲೆ ಬರೆದಿದ್ದು ಇಂಗ್ಲೆಂಡ್ನಲ್ಲಿ. 1995ರಲ್ಲಿ ಗ್ಲೌಸೆಸ್ಟರ್‌ಶೈರ್ ಪರ ಆಡಿದ್ದ ಸೈಮಂಡ್ಸ್ ಒಂದು ಇನ್ನಿಂಗ್ಸ್ನಲ್ಲಿ 16 ಸಿಕ್ಸರ್ಗಳೊಂದಿಗೆ 254 ರನ್ ಚಚ್ಚಿದ್ದರು. ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಒಂದೇ ಇನ್ನಿಂಗ್ಸ್ನಲ್ಲಿ ಯಾಔ ಆಟಗಾರನೂ ಅಷ್ಟು ಸಿಕ್ಸರ್ ಸಿಡಿಸಿರಲಿಲ್ಲ. 2015ರವರೆಗೆ ಈ ದಾಖಲೆಯನ್ನು ಮುರಿಯಲು ಯಾರಿಂದಲೂ ಸಾಧ್ಯವಾಗಿರಲಿಲ್ಲ. ನ್ಯೂಜಿಲ್ಯಾಂಡ್ನ ಕಾಲಿನ್ ಮನ್ರೋ ಆಕ್ಲಂಡ್ ಹಾಗೂ ಸೆಂಟ್ರಲ್ ಡಿಸ್ಟ್ರಿಕ್ಟ್ಸ್ ನಡುವಿನ ಪಂದ್ಯದಲ್ಲಿ 23 ಸಿಕ್ಸರ್ ಸಿಡಿಸಿ ಸೈಮಂಡ್ಸ್ ದಾಖಲೆ ಮುರಿದರು.
ಚೊಚ್ಚಲ ಐಪಿಎಲ್ ಪಂದ್ಯಾವಳಿಯಲ್ಲಿ ಅತ್ಯಂತ ದುಬಾರಿ ವಿದೇಶಿ ಆಟಗಾರ:
2008ರ ಚೊಚ್ಚಲ ಐಪಿಎಲ್ ಪಂದ್ಯಾವಳಿಯಲ್ಲಿ ಅತ್ಯಂತ ದುಬಾರಿ ವಿದೇಶಿ ಆಟಗಾರರಾಗಿ ಹರಾಜಾಗಿದ್ದರು ಸೈಮಂಡ್ಸ್. 1.35 ಮಿಲಿಯನ್ ಡಾಲರ್ ನೀಡಿ ಡೆಕ್ಕನ್ ಚಾರ್ಜರ್ಸ್ ಸೈಮಂಡ್ಸ್ರನ್ನು ಖರೀದಿಸಿತ್ತು. 2009ರ ಡೆಕ್ಕನ್ ಚಾರ್ಜರ್ಸ್ ಐಪಿಎಲ್ ಗೆಲುವಿನಲ್ಲಿ ಸೈಮಂಡ್ಸ್ ಮಹತ್ವದ ಕೊಡುಗೆ ನೀಡಿದ್ದರು. 2011ರ ಸೀಸನ್ನಲ್ಲಿ ಮುಂಬೈ ಇಂಡಿಯನ್ಸ್ ಪರ ಸೈಮಂಡ್ಸ್ ಕಣಕ್ಕಿಳಿದಿದ್ದರು. ಅದೇ ಅವರ ಕೊನೆಯ ಐಪಿಎಲ್ ಸರಣಿಯಾಗಿತ್ತು. ತಮ್ಮ ಐಪಿಎಲ್ ವೃತ್ತಿ ಜೀವನದ 39 ಪಂದ್ಯಗಳಲ್ಲಿ 974 ರನ್ ಹಾಗೂ 20 ವಿಕೆಟ್ಗಳನ್ನು ಸೈಮಂಡ್ಸ್ ಪಡೆದಿದ್ದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 9:13 am, Sun, 15 May 22
