ಸೌರವ್ ಗಂಗೂಲಿ ಔಟ್: ಬಿಸಿಸಿಐ ಹೊಸ ಟೀಮ್ನಲ್ಲಿ ಇರುವವರು ಯಾರೆಲ್ಲಾ ಗೊತ್ತಾ?
BCCI New TEAM: ಅಕ್ಟೋಬರ್ 18 ರಂದು ಔಪಚಾರಿಕ ಚುನಾವಣೆ ನಡೆಯಲಿದ್ದು, ಆ ಬಳಿಕ ನೂತನ ಪದಾಧಿಕಾರಿಗಳು ಅಧಿಕಾರವಹಿಸಿಕೊಳ್ಳಲಿದ್ದಾರೆ.
Updated on: Oct 12, 2022 | 9:59 PM
ಭಾರತೀಯ ಕ್ರಿಕೆಟ್ ಮಂಡಳಿಯ (BCCI) ನೂತನ ಅಧ್ಯಕ್ಷರಾಗಿ ಮಾಜಿ ಕ್ರಿಕೆಟಿಗ ರೋಜರ್ ಬಿನ್ನಿ (Roger Binny) ಆಯ್ಕೆಯಾಗುವುದು ಬಹುತೇಕ ಖಚಿತವಾಗಿದೆ. ಅಕ್ಟೋಬರ್ 18 ರಂದು ಹಾಲಿ ಅಧ್ಯಕ್ಷ ಸೌರವ್ ಗಂಗೂಲಿ (Sourav Ganguly) ಅವರ ಕಾರ್ಯಾವಧಿ ಕೊನೆಗೊಳ್ಳಲಿದ್ದು, ಅಂದೇ ನೂತನ ಅಧ್ಯಕ್ಷರ ಹೆಸರು ಘೋಷಣೆಯಾಗಲಿದೆ. ಇದಾಗ್ಯೂ ಕಾರ್ಯದರ್ಶಿಯಾಗಿ ಜಯ್ ಶಾ ಅವರೇ ಮುಂದುವರೆಯಲಿದ್ದಾರೆ. ಇನ್ನುಳಿದ ಸ್ಥಾನಗಳಿಗೂ ಅಭ್ಯರ್ಥಿಗಳು ಆಯ್ಕೆಯಾಗಿದ್ದು, ಇವರೆಲ್ಲರೂ ಬಿಸಿಸಿಐನ ನೂತನ ಪದಾಧಿಕಾರಿಗಳಾಗಿ ಆಯ್ಕೆಯಾಗುವುದು ಖಚಿತ ಎಂದು ವರದಿಯಾಗಿದೆ.
ಅದರಂತೆ ಭಾರತೀಯ ಕ್ರಿಕೆಟ್ ಮಂಡಳಿಯ ಅಧ್ಯಕ್ಷರಾಗಿ ಕರ್ನಾಕಟದವರಾಗಿರುವ ರೋಜರ್ ಬಿನ್ನಿ ಕಾಣಿಸಿಕೊಳ್ಳಲಿದ್ದಾರೆ. ಹಾಗೆಯೇ ಉಪಾಧ್ಯಕ್ಷರಾಗಿ ರಾಜೀವ್ ಶುಕ್ಲಾ ನೇಮಕವಾಗಲಿದ್ದಾರೆ. ಇನ್ನು ಹಾಲಿ ಕಾರ್ಯದರ್ಶಿಯಾಗಿರುವ ಗೃಹ ಸಚಿವ ಅಮಿತ್ ಶಾ ಅವರ ಪುತ್ರ ಜಯ್ ಶಾ ಅವರೇ ಮುಂದುವರೆಯಲಿದ್ದಾರೆ. ಜಂಟಿ ಕಾರ್ಯದರ್ಶಿಯಾಗಿ ದೇವಜಿತ್ ಸೈಕಿಯಾ ಅಧಿಕಾರವಹಿಸಿಕೊಳ್ಳಲಿದ್ದಾರೆ. ಅದೇ ರೀತಿ ಖಜಾಂಚಿ ಸ್ಥಾನವು ಈ ಬಾರಿ ಆಶಿಶ್ ಸೇಲಾರ್ ಪಾಲಾಗಲಿದೆ.
ಇನ್ನು ಇಂಡಿಯನ್ ಪ್ರೀಮಿಯರ್ ಲೀಗ್ನ ಅಧ್ಯಕ್ಷ ಸ್ಥಾನಕ್ಕೆ ಸೌರವ್ ಗಂಗೂಲಿ ಅವರನ್ನು ಪರಿಗಣಿಸಲಾಗಿತ್ತು ಎಂದು ವರದಿಯಾಗಿದೆ. ಇದಾಗ್ಯೂ ಐಪಿಎಲ್ ಚೇರ್ಮನ್ ಹುದ್ದೆಯನ್ನು ಗಂಗೂಲಿ ನಿರಾಕರಿಸಿದ್ದಾರೆ. ಅಷ್ಟೇ ಅಲ್ಲದೆ ಐಸಿಸಿ ಅಥವಾ ಬಿಸಿಸಿಐ ಅಧ್ಯಕ್ಷ ಸ್ಥಾನಕ್ಕಾಗಿ ಮನವಿ ಮಾಡಿದ್ದರಂತೆ. ಆದರೆ ಗಂಗೂಲಿಯ ಬೇಡಿಕೆಯನ್ನು ಬಿಸಿಸಿಐನ ಇತರೆ ಸದಸ್ಯರು ಸರಾಸಗಟಾಗಿ ತಿರಸ್ಕರಿಸಿದ್ದಾರೆ.
ಅಷ್ಟೇ ಅಲ್ಲದೆ ಐಸಿಸಿ ಅಧ್ಯಕ್ಷರಾಗುವ ಗಂಗೂಲಿಯ ಕನಸಿಗೂ ತಣ್ಣೀರೆರಚಿದ್ದಾರೆ. ಕೆಲ ಮೂಲಗಳ ಮಾಹಿತಿ ಪ್ರಕಾರ ಗಂಗೂಲಿ ಐಸಿಸಿ ಅಧ್ಯಕ್ಷ ಸ್ಥಾನಕ್ಕಾಗಿ ನಡೆಯಲಿರುವ ಚುನಾವಣೆಯಲ್ಲಿ ಗಂಗೂಲಿಯನ್ನು ಬೆಂಬಲಿಸುವುದಿಲ್ಲ ಎಂಬುದನ್ನು ಬಿಸಿಸಿಐ ಸ್ಪಷ್ಟಪಡಿಸಿದೆ. ಹೀಗಾಗಿ ಕ್ರಿಕೆಟ್ ವಲಯದ ಎಲ್ಲಾ ಹುದ್ದೆಗಳು ಕೂಡ ಸೌರವ್ ಗಂಗೂಲಿ ಅವರ ಕೈಜಾರಿದೆ ಎಂದೇ ಹೇಳಬಹುದು.
ಇನ್ನು ನೂತನ ಐಪಿಎಲ್ ಅಧ್ಯಕ್ಷರಾಗಿ ಅರುಣ್ ಧುಮಾಲ್ ಆಯ್ಕೆಯಾಗಿದ್ದು, ಅಕ್ಟೋಬರ್ 18 ರಂದು ಔಪಚಾರಿಕ ಚುನಾವಣೆ ನಡೆಯಲಿದೆ ಎಂದು ಹೇಳಲಾಗಿದೆ. ಅದರಂತೆ ಮುಂದಿನ ವಾರದಲ್ಲಿ ನೂತನ ಪದಾಧಿಕಾರಿಗಳು ಅಧಿಕಾರವಹಿಸಿಕೊಳ್ಳಲಿದ್ದಾರೆ.
ಬಿಸಿಸಿಐ ನೂತನ ಪದಾಧಿಕಾರಿಗಳು:
- ಅಧ್ಯಕ್ಷರು: ರೋಜರ್ ಬಿನ್ನಿ (ಕರ್ನಾಟಕ)
- ಕಾರ್ಯದರ್ಶಿ: ಜಯ್ ಶಾ (ಗುಜರಾತ್)
- ಉಪಾಧ್ಯಕ್ಷ: ರಾಜೀವ್ ಶುಕ್ಲಾ (ಯುಪಿ)
- ಖಜಾಂಚಿ: ಆಶಿಶ್ ಶೇಲಾರ್ (ಮಹಾರಾಷ್ಟ್ರ)
- ಜಂಟಿ ಕಾರ್ಯದರ್ಶಿ: ದೇವಜಿತ್ ಸೈಕಿಯಾ (ಅಸ್ಸಾಂ)
- ಐಪಿಎಲ್ ಅಧ್ಯಕ್ಷ: ಅರುಣ್ ಧುಮಾಲ್ (ಹಿಮಾಚಲ ಪ್ರದೇಶ)
