ಶೂ ಕಾರಣಕ್ಕೆ ನಿಷೇಧಕ್ಕೊಳಗಾದ ಮೂವರು ಆಟಗಾರರು..!

ಕ್ರಿಕೆಟ್ ಇತಿಹಾಸದಲ್ಲಿ ಅನೇಕ ಆಟಗಾರರು ಹಲವು ಕಾರಣಗಳಿಂದಾಗಿ ನಿಷೇಧಕ್ಕೊಳಗಾಗಿದ್ದಾರೆ. ಇದರಲ್ಲಿ ಮೂವರು ಆಟಗಾರರು ಶೂ ಕಾರಣದಿಂದ ನಿಷೇಧಕ್ಕೊಳಗಾಗಿರುವುದು ವಿಶೇಷ. ಶೂ ಕೂಡ ಆಟಗಾರನನ್ನು ನಿಷೇಧಿಸಬಹುದೇ? ಎಂದು ಕೇಳಿದ್ರೆ ಖಂಡಿತವಾಗಿಯೂ ಇಲ್ಲ. ಆದರೆ ಶೂ ಮೇಲಿನ ಬರಹ ಹಾಗೂ ಅಶಿಸ್ತುಗಳಿಂದ ಈ ಮೂವರು ಆಟಗಾರರ ಮೇಲೆ ನಿಷೇಧ ಹೇರಲಾಗಿತ್ತು. ಇವರಲ್ಲಿ ಇಬ್ಬರು ಆಸ್ಟ್ರೇಲಿಯನ್ನರಾದರೆ, ಒಬ್ಬರು ಇಂಗ್ಲೆಂಡ್​ನ ಕ್ರಿಕೆಟಿಗ. ಹೀಗೆ ಶೂ ಕಾರಣದಿಂದ ನಿಷೇಧಕ್ಕೊಳಗಾದ ಮೂವರು ಆಟಗಾರರ ಕಿರು ಪರಿಚಯ ಇಲ್ಲಿದೆ…

ಜಾನ್ ಬೆನಾಡ್: ಶೂ ಸಮಸ್ಯೆಯಿಂದಾಗಿ ನಿಷೇಧ ಎದುರಿಸಿದ ಆಟಗಾರರಲ್ಲಿ ಆಸ್ಟ್ರೇಲಿಯಾದ ಜಾನ್ ಬೆನಾಡ್ ಮೊದಲಿಗರು. ಅವರು ಪ್ರಸಿದ್ಧ ಆಸ್ಟ್ರೇಲಿಯಾದ ಕ್ರಿಕೆಟಿಗ ರಿಚಿ ಬೆನಾಡ್ ಅವರ ಕಿರಿಯ ಸಹೋದರ. 1970 ರಲ್ಲಿ  ಆಸ್ಟ್ರೇಲಿಯಾ ಪರ ಕಣಕ್ಕಿಳಿದಾಗ ವಿಭಿನ್ನ ಶೂ ಧರಿಸಿದ್ದಕ್ಕಾಗಿ ಜಾನ್ ಅವರನ್ನು 2 ಪಂದ್ಯಗಳಿಂದ ನಿಷೇಧಿಸಲಾಗಿತ್ತು.

ಉಸ್ಮಾನ್ ಖ್ವಾಜಾ: ಡಿಸೆಂಬರ್ 2023 ರಲ್ಲಿ, ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ ಉಸ್ಮಾನ್ ಖ್ವಾಜಾ ಕೂಡ ಶೂಗಳ ಕಾರಣದಿಂದಾಗಿ ನಿಷೇಧಕ್ಕೊಳಗಾಗಿದ್ದರು. ಪಾಕಿಸ್ತಾನ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ಸಮಯದಲ್ಲಿ ಅವರು ತಮ್ಮ ಶೂಗಳ ಮೇಲೆ ‘ಎಲ್ಲಾ ಜೀವಗಳು ಸಮಾನ’ ಹಾಗೂ ಸ್ವಾತಂತ್ರ್ಯ ಮಾನವ ಹಕ್ಕು ಎಂದು ಗಾಝ ಹೋರಾಟವನ್ನು ಬೆಂಬಲಿಸಿ ಬರಹಗಳನ್ನು ಬರೆದುಕೊಂಡಿದ್ದರು. ಹೀಗಾಗಿ ಉಸ್ಮಾನ್ ಖ್ವಾಜಾ ಅವರನ್ನು ಒಂದು ಪಂದ್ಯದಿಂದ ನಿಷೇಧಿಸಲಾಗಿತ್ತು.

ಮೊಯೀನ್ ಅಲಿ: ಆಸ್ಟ್ರೇಲಿಯಾದ ಉಸ್ಮಾನ್ ಖವಾಜಾ ಅವರಿಗೂ ಮೊದಲು, ಇಂಗ್ಲೆಂಡ್‌ನ ಮೊಯೀನ್ ಅಲಿ ಕೂಡ ತಮ್ಮ ಶೂಗಳ ಮೇಲೆ ಇದೇ ರೀತಿಯ ಘೋಷಣೆಯೊಂದಿಗೆ ಮೈದಾನಕ್ಕಿಳಿದಿದ್ದರು. 2014 ರಲ್ಲಿ ಭಾರತ ವಿರುದ್ಧದ ಟೆಸ್ಟ್ ಪಂದ್ಯದ ಸಮಯದಲ್ಲಿ, ಅವರು ತಮ್ಮ ಶೂಗಳ ಮೇಲೆ ‘ಸೇವ್ ಗಾಝ’ ಮತ್ತು ‘ಫ್ರೀ ಪ್ಯಾಲೆಸ್ಟೈನ್’ ಎಂದು ಬರೆದುಕೊಂಡು ಮೈದಾನಕ್ಕೆ ಪ್ರವೇಶಿಸಿದ್ದರು. ಹೀಗಾಗಿ ಅವರ ಮೇಲೆ ನಿಷೇಧ ಹೇರಲಾಗಿತ್ತು.

ಇದನ್ನೂ ಓದಿ: IPL 2025: ಮುಂದಿನ ಪಂದ್ಯಕ್ಕೆ RCB ನಾಯಕನೇ ಅಲಭ್ಯ..!

ಮೂವರು ಆಟಗಾರರ ಕ್ರಿಕೆಟ್ ವೃತ್ತಿಜೀವನ:

ಶೂ ಕಾರಣದಿಂದ ನಿಷೇಧಕ್ಕೊಳಗಾಗಿರುವ ಈ ಮೂವರು ಆಟಗಾರರ ವೃತ್ತಿಜೀವನದ ಬಗ್ಗೆ ಹೇಳುವುದಾದರೆ, ಜಾನ್ ಬೆನಾಡ್ ಆಸ್ಟ್ರೇಲಿಯಾ ಪರ 3 ಟೆಸ್ಟ್ ಪಂದ್ಯಗಳನ್ನು ಆಡಿದ್ದಾರೆ. ಇನ್ನು ಉಸ್ಮಾನ್ ಖ್ವಾಜಾ ಆಸ್ಟ್ರೇಲಿಯಾ ಪರ ಇದುವರೆಗೆ 80 ಟೆಸ್ಟ್, 40 ಏಕದಿನ ಮತ್ತು 9 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಹಾಗೆಯೇ ಮೊಯೀನ್ ಅಲಿ ಇಂಗ್ಲೆಂಡ್ ಪರ 68 ಟೆಸ್ಟ್, 138 ಏಕದಿನ ಮತ್ತು 92 ಟಿ20 ಪಂದ್ಯಗಳನ್ನು ಆಡಿದ್ದಾರೆ.

Published On - 12:42 pm, Sun, 11 May 25