IND vs ZIM: ಭಾರತಕ್ಕೆ ಸುಲಭ ತುತ್ತಾದ ಜಿಂಬಾಬ್ವೆ; ಸೆಮಿಫೈನಲ್​ನಲ್ಲಿ ರೋಹಿತ್​ ಪಡೆಗೆ ಇಂಗ್ಲೆಂಡ್ ಎದುರಾಳಿ

ಟಿ20 ವಿಶ್ವಕಪ್‌ನ (T20 World Cup 2022) 2ನೇ ಗುಂಪಿನ ಕೊನೆಯ ಪಂದ್ಯದಲ್ಲಿ ಭಾರತ 71 ರನ್‌ಗಳಿಂದ ಜಿಂಬಾಬ್ವೆಯನ್ನು (India defeated Zimbabwe) ಸೋಲಿಸುವುದರೊಂದಿಗೆ ಗ್ರೂಪ್ 2ರಲ್ಲಿ ಅಗ್ರಸ್ಥಾನಕ್ಕೇರಿದೆ. ಸೆಮಿಫೈನಲ್‌ನಲ್ಲಿ ಇದೀಗ ಗ್ರೂಪ್ 1ರ ಎರಡನೇ ನಂಬರ್ ತಂಡವಾದ ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ.ಭಾರತದ ಗೆಲುವಿನೊಂದಿಗೆ ಪಾಕಿಸ್ತಾನ ತಂಡ 2ನೇ ಗುಂಪಿನಲ್ಲಿ ಎರಡನೇ ಸ್ಥಾನಕ್ಕೆ ಕುಸಿದಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಭಾರತ 20 ಓವರ್​ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 186 ರನ್ ಗಳಿಸಿತು. ತಂಡದ ಪರ ಸೂರ್ಯ (Suryakumar Yadav) ಮತ್ತು ಕೆಎಲ್ ರಾಹುಲ್ (KL Rahul) ಇಬ್ಬರೂ ತಲಾ ಅರ್ಧಶತಕ ಸಿಡಿಸಿ ಮಿಂಚಿದರು.

187 ರನ್​ಗಳ ಗುರಿ ಬೆನ್ನತ್ತಿದ ಜಿಂಬಾಬ್ವೆ ತಂಡ ಭಾರತದ ದಾಳಿಯನ್ನು ಎದುರಿಸಲಾಗದೆ ಇಡೀ ತಂಡ ರನ್​ಗಳಿಗೆ ಪರದಾಡಿತು. ಸೆಮಿಫೈನಲ್‌ಗೂ ಮುನ್ನ ನಡೆದ ಕೊನೆಯ ಗುಂಪಿನ ಪಂದ್ಯದಲ್ಲಿ ಭಾರತದ ಬೌಲರ್​ಗಳು ತಮ್ಮ ಪರಾಕ್ರಮ ತೋರಿ ಜಿಂಬಾಬ್ವೆ ತಂಡವನ್ನು ಸುಲಭ ತುತ್ತಾಗಿ ಮಾಡಿಕೊಂಡರು. ಇಡೀ ಪಂದ್ಯದಲ್ಲಿ ಜಿಂಬಾಬ್ವೆ ತಂಡ ಎಲ್ಲೂ ಸಹ ಗೆಲುವಿಗಾಗಿ ಹೋರಾಡಿದ್ದು ಕಂಡುಬರಲಿಲ್ಲ.

ಆರಂಭಿಕರು ಮತ್ತೆ ವಿಫಲ

ಭಾರತಕ್ಕೆ ಮತ್ತೊಮ್ಮೆ ಬಲಿಷ್ಠ ಆರಂಭ ನೀಡಲು ಸಾಧ್ಯವಾಗಲಿಲ್ಲ. ಟೀಂ ಇಂಡಿಯಾ 27 ರನ್‌ಗಳಿಸಿದ್ದಾಗ ರೋಹಿತ್ ಶರ್ಮಾ ರೂಪದಲ್ಲಿ ಮೊದಲ ಹೊಡೆತ ತಿಂದಿತು. ರೋಹಿತ್ ಕೇವಲ 15 ರನ್ ಗಳಿಸಲಷ್ಟೇ ಶಕ್ತರಾದರು. ಆದರೆ, ಕೆಎಲ್ ರಾಹುಲ್ ಫಾರ್ಮ್‌ಗೆ ಮರಳಿದ್ದು, 35 ಎಸೆತಗಳಲ್ಲಿ 51 ರನ್ ಗಳಿಸಿ ಭಾರತಕ್ಕೆ ಪ್ರಬಲ ಆರಂಭ ನೀಡಿದರು. ಜಿಂಬಾಬ್ವೆ ವಿರುದ್ಧ, ಕೊಹ್ಲಿ ಕೂಡ ರಾಹುಲ್‌ಗೆ ಹೆಚ್ಚು ಕಾಲ ಬೆಂಬಲಿಸಲು ಸಾಧ್ಯವಾಗಲಿಲ್ಲ. ಅವರು 26 ರನ್ ಗಳಿಸಿ ಬ್ಯಾಟ್ ಎತ್ತಿಟ್ಟರು. ಇದಾದ ಕೆಲವೇ ಎಸೆತಗಳಲ್ಲಿ ರಾಹುಲ್ ರೂಪದಲ್ಲಿ ಭಾರತಕ್ಕೆ ಮೂರನೇ ಪೆಟ್ಟು ಬಿದ್ದಿತು.

ಅವಕಾಶ ಬಳಸಿಕೊಳ್ಳದ ಪಂತ್

ರಾಹುಲ್ ಪೆವಿಲಿಯನ್​ಗೆ ಮರಳಿದ ಸ್ವಲ್ಪ ಹೊತ್ತಿನಲ್ಲೇ ರಿಷಬ್ ಪಂತ್ ಕೂಡ 3 ರನ್ ಗಳಿಸಿ ಔಟಾದರು. ಈ ಟೂರ್ನಿಯಲ್ಲಿ ದಿನೇಶ್ ಕಾರ್ತಿಕ್ ಬದಲಿಗೆ ಪಂತ್ ಅವರಿಗೆ ಮೊದಲ ಬಾರಿಗೆ ಈ ಪಂದ್ಯದಲ್ಲಿ ಅವಕಾಶ ನೀಡಲಾಗಿತ್ತು. ಆದರೆ ಪಂತ್ ಈ ಅವಕಾಶವನ್ನು ಬಳಸಿಕೊಳ್ಳಲು ಸಾಧ್ಯವಾಗದೆ ಪೆವಿಲಿಯನ್ ಸೇರಿದರು.

ಸೂರ್ಯ ಬಿರುಗಾಳಿ ಬ್ಯಾಟಿಂಗ್

ಪಂತ್ ಪೆವಿಲಿಯನ್​ಗೆ ಮರಳಿದ ನಂತರ ಸೂರ್ಯಕುಮಾರ್ ಯಾದವ್​ಗೆ ಕ್ರೀಸ್​ನಲ್ಲಿದ್ದ ಹಾರ್ದಿಕ್ ಪಾಂಡ್ಯ ಬೆಂಬಲ ಸಿಕ್ಕಿತ್ತು. ಆ ಬಳಿಕ ಮೈದಾನದಲ್ಲಿ ಬಿರುಗಾಳಿ ಎಬ್ಬಿಸಿದ ಸೂರ್ಯ ಕೇವಲ 25 ಎಸೆತಗಳಲ್ಲಿ 61 ರನ್‌ಗಳ ಅಜೇಯ ಇನ್ನಿಂಗ್ಸ್‌ ಆಡಿದರು. ಕೊನೆಯ ಓವರ್‌ನ ಎರಡನೇ ಎಸೆತದಲ್ಲಿ ಪಾಂಡ್ಯ 18 ರನ್ ಗಳಿಸಿ ಔಟಾದರು.