Edgbaston Pitch Report: ಬ್ಯಾಟ್ಸ್‌ಮನ್‌ಗಳಿಗೆ ಮಾತ್ರವಲ್ಲ, ಬೌಲರ್‌ಗಳಿಗೂ ಇದು ಸ್ಮಶಾನ: ಭಾರತ vs ಇಂಗ್ಲೆಂಡ್ 2ನೇ ಟೆಸ್ಟ್ನ ಪಿಚ್ ನೋಡಿ

ಬೆಂಗಳೂರು (ಜು. 01): ಭಾರತೀಯ ತಂಡವು (Indian Cricket Team) ಈಗ ಲೀಡ್ಸ್ ನಿಂದ ಎಡ್ಜ್‌ಬಾಸ್ಟನ್ ತಲುಪಿದೆ. ಈ ಮೈದಾನಕ್ಕೂ ಶುಭ್​ಮನ್ ಗಿಲ್ ಪಡೆ ಮಾನಸಿಕವಾಗಿ ಸಿದ್ಧರಾಗಿರಬೇಕು, ಏಕೆಂದರೆ ಇಲ್ಲಿ ಭಾರತೀಯ ತಂಡದ ದಾಖಲೆ ತುಂಬಾ ಕಳಪೆಯಾಗಿದೆ. ಟೀಮ್ ಇಂಡಿಯಾ ಒಂದೇ ಒಂದು ಪಂದ್ಯವನ್ನು ಇಲ್ಲಿ ಗೆದ್ದಿಲ್ಲ. ಮತ್ತೊಂದೆಡೆ, ಲೀಡ್ಸ್‌ನಲ್ಲಿನ ಗೆಲುವಿನ ನಂತರ ಇಂಗ್ಲೆಂಡ್ ಆತ್ಮವಿಶ್ವಾಸದೊಂದಿಗೆ ಎಡ್ಜ್‌ಬಾಸ್ಟನ್‌ಗೆ ಬಂದಿದೆ, ಜೊತೆಗೆ ಅನುಭವಿ ಆಟಗಾರರು ಮತ್ತು ತವರು ಮೈದಾನದ ಪ್ರಯೋಜನ ಪಡೆದುಕೊಳ್ಳುವ ಪ್ಲ್ಯಾನ್​ನಲ್ಲಿದೆ. ಸದ್ಯ ನಾಯಕ ಶುಭ್​ಮನ್ ಗಿಲ್ ಮತ್ತು ಮುಖ್ಯ ಕೋಚ್ ಗೌತಮ್ ಗಂಭೀರ್ ದ್ವಿತೀಯ ಟೆಸ್ಟ್​ಗೆ ಪ್ಲೇಯಿಂಗ್-11 ಅನ್ನು ಯೋಜಿಸಬೇಕಾಗಿರುವುದು ಮಾತ್ರವಲ್ಲದೆ, ಪಿಚ್‌ಗೆ ಅನುಗುಣವಾಗಿ ತಂತ್ರವನ್ನು ಸಿದ್ಧಪಡಿಸಬೇಕಾಗುತ್ತದೆ.

ಭಾರತ vs ಇಂಗ್ಲೆಂಡ್ ಎಡ್ಜ್‌ಬಾಸ್ಟನ್ ಪಿಚ್ ವರದಿ

ವೇಗದ ಬೌಲರ್‌ಗಳಿಗೆ ಆರಂಭಿಕ ನೆರವು: ಎಡ್ಜ್‌ಬಾಸ್ಟನ್ ಪಿಚ್ ಆರಂಭದಲ್ಲಿ ವೇಗದ ಬೌಲರ್‌ಗಳಿಗೆ ಸಹಾಯಕವಾಗಲಿದೆ. ಡ್ಯೂಕ್ಸ್ ಚೆಂಡು ಗಾಳಿಯಲ್ಲಿ ಸ್ವಿಂಗ್ ಮತ್ತು ಸೀಮ್ ಆಗಬಹುದು, ಇದು ಆರಂಭಿಕ ಓವರ್‌ಗಳಲ್ಲಿ ಬ್ಯಾಟ್ಸ್‌ಮನ್‌ಗಳಿಗೆ ತೊಂದರೆ ಉಂಟುಮಾಡಬಹುದು. ವಿಶೇಷವಾಗಿ ಆಕಾಶವು ಮೋಡ ಕವಿದಿದ್ದರೆ, ವೇಗದ ಬೌಲರ್‌ಗಳು ಇನ್ನೂ ಹೆಚ್ಚಿನ ಪ್ರಯೋಜನವನ್ನು ಪಡೆಯುತ್ತಾರೆ. ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ವೇಗದ ಬೌಲರ್‌ಗಳ ಸೀಮ್ ಚಲನೆಯನ್ನು ನಿಭಾಯಿಸುವುದು ಕಷ್ಟಕರವಾಗಬಹುದು, ಇದು ಆರಂಭಿಕ ವಿಕೆಟ್‌ಗಳು ಬೇಗನೆ ಬೀಳುವ ಸಾಧ್ಯತೆಗಳನ್ನು ಹೆಚ್ಚಿಸುತ್ತದೆ.

ನಂತರ ಬ್ಯಾಟ್ಸ್‌ಮನ್‌ಗಳಿಗೆ ಅನುಕೂಲಕರ: ಪಂದ್ಯ ಮುಂದುವರೆದಂತೆ, ಪಿಚ್ ಬ್ಯಾಟ್ಸ್‌ಮನ್‌ಗಳಿಗೆ ಹೆಚ್ಚು ಅನುಕೂಲಕರವಾಗಬಹುದು. ಸೂರ್ಯನ ದರ್ಶನವಾದರೆ, ಬ್ಯಾಟಿಂಗ್ ಸುಲಭವಾಗುತ್ತದೆ ಮತ್ತು ದೊಡ್ಡ ಸ್ಕೋರ್‌ಗಳನ್ನು ಕಾಣಬಹುದು.

ಸ್ಪಿನ್ನರ್‌ಗಳ ಪಾತ್ರ: ಪಂದ್ಯದ ನಾಲ್ಕನೇ ಮತ್ತು ಐದನೇ ದಿನದಂದು ಸ್ಪಿನ್ನರ್‌ಗಳಿಗೆ ಸ್ವಲ್ಪ ಸಹಾಯ ಸಿಗಬಹುದು, ವಿಶೇಷವಾಗಿ ಪಿಚ್ ಒಣಗಿ ಬಿರುಕು ಬಿಡಲು ಪ್ರಾರಂಭಿಸಿದರೆ ಸ್ಪಿನ್ನರ್ಸ್ ಯಶಸ್ಸು ಸಾಧಿಸುತ್ತಾರೆ. ಇದು ಸಂಭವಿಸಿದಲ್ಲಿ, ಭಾರತ ತಂಡವು ಕುಲದೀಪ್ ಯಾದವ್ ಮೇಲೆ ಪಣತೊಡಬಹುದು.

IND vs BAN Series: ಇನ್ನೂ ಫೈನಲ್ ಆಗಿಲ್ಲ ಭಾರತ-ಬಾಂಗ್ಲಾದೇಶ ಸರಣಿ: ಕೇಂದ್ರ ಸರ್ಕಾರದ ಒಪ್ಪಿಗೆಗೆ ಕಾಯುತ್ತಿದೆ ಬಿಸಿಸಿಐ

ಎಡ್ಜ್‌ಬಾಸ್ಟನ್ ಮೈದಾನದಲ್ಲಿ ಭಾರತ ತಂಡದ ಟೆಸ್ಟ್ ದಾಖಲೆ

ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತ ತಂಡಕ್ಕೆ ಈ ಮೈದಾನ ಅದೃಷ್ಟವನ್ನು ತಂದುಕೊಟ್ಟಿಲ್ಲ. ಇಲ್ಲಿ ಭಾರತ ತಂಡದ ದಾಖಲೆ ನಿರಾಶಾದಾಯಕವಾಗಿದೆ.

ಒಟ್ಟು ಪಂದ್ಯಗಳು: ಭಾರತ ಇದುವರೆಗೆ ಎಡ್ಜ್‌ಬಾಸ್ಟನ್‌ನಲ್ಲಿ ಒಟ್ಟು 8 ಟೆಸ್ಟ್ ಪಂದ್ಯಗಳನ್ನು ಆಡಿದೆ.

ಗೆಲುವುಗಳು: ಎಡ್ಜ್‌ಬಾಸ್ಟನ್‌ನಲ್ಲಿ ಭಾರತ ಇದುವರೆಗೆ ಟೆಸ್ಟ್ ಪಂದ್ಯವನ್ನು ಗೆದ್ದಿಲ್ಲ.

ಸೋಲು: ಈ 8 ಪಂದ್ಯಗಳಲ್ಲಿ ಭಾರತ 7 ಪಂದ್ಯಗಳಲ್ಲಿ ಸೋಲನ್ನು ಎದುರಿಸಿದೆ. ಈ ಪೈಕಿ ಮೂರು ಪಂದ್ಯಗಳು ಇನ್ನಿಂಗ್ಸ್ ಅಂತರದಿಂದ ಸೋತಿವೆ.

ಡ್ರಾ: 1986 ರಲ್ಲಿ ನಡೆದ ಒಂದೇ ಒಂದು ಟೆಸ್ಟ್ ಪಂದ್ಯ ಡ್ರಾ ಆಗಿದೆ.

ಅತ್ಯಧಿಕ ಸ್ಕೋರ್: ಎಡ್ಜ್‌ಬಾಸ್ಟನ್‌ನಲ್ಲಿ ಭಾರತದ ಅತ್ಯಧಿಕ ಸ್ಕೋರ್ 416, ಇದು 2022 ರಲ್ಲಿ ದಾಖಲಾಗಿದೆ. ಭಾರತ ಇಲ್ಲಿ 300 ರನ್‌ಗಳ ಗಡಿಯನ್ನು ಎರಡು ಬಾರಿ ಮಾತ್ರ ದಾಟಿದೆ (1986 ರಲ್ಲಿ 390 ಮತ್ತು 2022 ರಲ್ಲಿ 416).

ಕನಿಷ್ಠ ಸ್ಕೋರ್: ಈ ಮೈದಾನದಲ್ಲಿ ಭಾರತದ ಅತ್ಯಂತ ಕಡಿಮೆ ಟೆಸ್ಟ್ ಸ್ಕೋರ್ 190 ರನ್‌ಗಳು.

ಏಕಪಕ್ಷೀಯ ಸೋಲುಗಳು: 1974 ರಲ್ಲಿ ಭಾರತ ಇನ್ನಿಂಗ್ಸ್ ಮತ್ತು 78 ರನ್‌ಗಳ ದೊಡ್ಡ ಅಂತರದಿಂದ ಮತ್ತು 1979 ರಲ್ಲಿ ಎಡ್ಜ್‌ಬಾಸ್ಟನ್‌ನಲ್ಲಿ ಇನ್ನಿಂಗ್ಸ್ ಮತ್ತು 83 ರನ್‌ಗಳಿಂದ ಸೋತಿತ್ತು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ