IPL 2022 Eliminator: ಪ್ಲೇ ಆಫ್ ಪಂದ್ಯಗಳಲ್ಲಿ ಕೊಹ್ಲಿಯೇ ಕಿಂಗ್! ಲಕ್ನೋ ಎದುರು ಮತ್ತೆ ಅಬ್ಬರಿಸ್ತಾರಾ ವಿರಾಟ್?
IPL 2022 Eliminator: ವಿರಾಟ್ ಕೊಹ್ಲಿ ಐಪಿಎಲ್ ಪ್ಲೇಆಫ್ ಇತಿಹಾಸದಲ್ಲಿ ಬೆಂಗಳೂರು ಪರ ಗರಿಷ್ಠ 276 ರನ್ ಗಳಿಸಿದ್ದಾರೆ. ಈ ವಿಚಾರದಲ್ಲಿ ಅವರು ಬೆಂಗಳೂರಿನ ಇನ್ನಿಬ್ಬರು ದೊಡ್ಡ ದಿಗ್ಗಜರಾದ ಎಬಿ ಡಿವಿಲಿಯರ್ಸ್ ಮತ್ತು ಕ್ರಿಸ್ ಗೇಲ್ ಅವರನ್ನು ಹಿಂದಿಕ್ಕಿದ್ದಾರೆ.
Updated on:May 25, 2022 | 6:16 PM
14 ಸೀಸನ್‌ಗಳು ಕಳೆದಿವೆ. 15ನೇ ಸೀಸನ್ ಕೂಡ ಇನ್ನೇನೂ ಮುಗಿಯಲಿದೆ, ಆದರೆ ಅದೊಂದು ಬೇಡಿಕೆ ಮಾತ್ರ ಇನ್ನೂ ಮುಗಿದಿಲ್ಲ. ಆ ಬೇಡಿಕೆ ಈಡೇರಿಕೆಗಾಗಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (Royal Challengers Bangalore) ತಂಡ ಕಾಯುತ್ತಿದೆ. ಐಪಿಎಲ್‌ನ ಅತ್ಯಂತ ಪ್ರಸಿದ್ಧ ತಂಡಗಳಲ್ಲಿ ಒಂದಾಗಿರುವ ಬೆಂಗಳೂರು ಒಮ್ಮೆಯೂ ಐಪಿಎಲ್ ಪ್ರಶಸ್ತಿ ಗೆದ್ದಿಲ್ಲ. ಈ ಬಾರಿಯಾದರೂ ಕಪ್ ಗೆಲ್ಲುವ ಬಯಕೆ ಆರ್ಸಿಬಿ ಪಾಳಯದಲ್ಲಿದೆ. ಐಪಿಎಲ್ 2022 (IPL 2022) ರಲ್ಲಿ ಆರ್ಸಿಬಿ ಪ್ಲೇಆಫ್ ತಲುಪುತ್ತೆ ಎಂದು ಯಾರು ಕೂಡ ಬಾವಿಸಿರಲಿಲ್ಲ. ಜೊತೆಗೆ ಅದನ್ನು ದೊಡ್ಡ ಸ್ಪರ್ಧಿ ಎಂದು ಪರಿಗಣಿಸಲಾಗಿರಲಿಲ್ಲ. ಆದಾಗ್ಯೂ, ಆರ್ಸಿಬಿ ಅದ್ಭುತ ಪ್ರದರ್ಶನ ನೀಡಿ ಪ್ಲೇ ಆಫ್ಗೇರಿದೆ. ಮೇ 25 ರ ಬುಧವಾರದಂದು ಎಲಿಮಿನೇಟರ್ ಪಂದ್ಯದಲ್ಲಿ ಬೆಂಗಳೂರು ಲಕ್ನೋ ಸೂಪರ್ ಜೈಂಟ್ಸ್ ತಂಡವನ್ನು ಎದುರಿಸಲಿದ್ದು, ಈ ಪಂದ್ಯದಲ್ಲಿ ಎಲ್ಲರ ಕಣ್ಣು ಕಿಂಗ್ ಕೊಹ್ಲಿ ಮೇಲಿರಲಿದೆ. ಏಕೆಂದರೆ ಕೊಹ್ಲಿ (Virat Kohli) ಪ್ಲೇಆಫ್‌ನಲ್ಲಿ ಬೆಂಗಳೂರಿನ ಅತ್ಯಂತ ಯಶಸ್ವಿ ಬ್ಯಾಟ್ಸ್‌ಮನ್ ಆಗಿದ್ದಾರೆ.
2008 ರಲ್ಲಿ ಐಪಿಎಲ್ ಆರಂಭವಾದಾಗಿನಿಂದ ವಿರಾಟ್ ಕೊಹ್ಲಿ ಬೆಂಗಳೂರಿನ ಭಾಗವಾಗಿದ್ದಾರೆ. ತಂಡದ ಪರ ಎಲ್ಲಾ ಮೂರು ಫೈನಲ್‌ಗಳ ಜೊತೆಗೆ ಪ್ರತಿ ಪ್ಲೇಆಫ್ ಪಂದ್ಯವನ್ನು ಆಡಿದ್ದಾರೆ. ಅವರು ಯಶಸ್ಸನ್ನು ಪಡೆಯದಿದ್ದರೂ, ಬ್ಯಾಟ್‌ನೊಂದಿಗೆ ಅವರ ಪ್ರದರ್ಶನ ಇನ್ನೂ ಉತ್ತಮವಾಗಿದೆ. ಐಪಿಎಲ್ ಪ್ಲೇಆಫ್ ಪಂದ್ಯಗಳಲ್ಲಿ ಬೆಂಗಳೂರು ಪರ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರ ಎಂಬ ಹೆಗ್ಗಳಿಕೆಗೆ ಇದೇ ಕಾರಣ.
ಪ್ಲೇ ಆಫ್‌ನಲ್ಲಿ ಕೊಹ್ಲಿಯ ಪ್ರದರ್ಶನವೇ ಅಂಥದ್ದು ವಿರಾಟ್ ಕೊಹ್ಲಿ ಐಪಿಎಲ್ ಪ್ಲೇಆಫ್ ಇತಿಹಾಸದಲ್ಲಿ ಬೆಂಗಳೂರು ಪರ ಗರಿಷ್ಠ 276 ರನ್ ಗಳಿಸಿದ್ದಾರೆ. ಈ ವಿಚಾರದಲ್ಲಿ ಅವರು ಬೆಂಗಳೂರಿನ ಇನ್ನಿಬ್ಬರು ದೊಡ್ಡ ದಿಗ್ಗಜರಾದ ಎಬಿ ಡಿವಿಲಿಯರ್ಸ್ ಮತ್ತು ಕ್ರಿಸ್ ಗೇಲ್ ಅವರನ್ನು ಹಿಂದಿಕ್ಕಿದ್ದಾರೆ. ಡಿವಿಲಿಯರ್ಸ್ 268 ರನ್ ಗಳಿಸಿದ್ದರೆ, ಗೇಲ್ 250 ರನ್ ಗಳಿಸಿದ್ದಾರೆ. ಆದರೆ, ಕಳೆದ ಎರಡು ಪ್ಲೇಆಫ್ ಪಂದ್ಯಗಳಲ್ಲಿ ಕೊಹ್ಲಿ ಕೂಡ ಅಷ್ಟೇನೂ ಯಶಸ್ಸು ಕಂಡಿರಲಿಲ್ಲ. 2020 ರ ಎಲಿಮಿನೇಟರ್‌ನಲ್ಲಿ, ಅವರು ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ಕೇವಲ 6 ರನ್ ಗಳಿಸಿದ್ದರೆ, 2021 ರ ಎಲಿಮಿನೇಟರ್‌ನಲ್ಲಿ ಅವರು ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ 39 ರನ್ ಗಳಿಸಿದರು.
ಕೊಹ್ಲಿಯ ಲಯ ಹಾಗೇ ಇರುತ್ತದೆಯೇ? ಕಳೆದ ಎರಡು ಸತತ ಸೀಸನ್‌ಗಳಲ್ಲಿ ಎಲಿಮಿನೇಟರ್ ಹರ್ಡಲ್ ಅನ್ನು ದಾಟಲು ಬೆಂಗಳೂರು ತಂಡಕ್ಕೆ ಸಾಧ್ಯವಾಗಲಿಲ್ಲ. ಎರಡೂ ಸಂದರ್ಭಗಳಲ್ಲಿ ಸಣ್ಣ ಸ್ಕೋರ್‌ ಕಲೆ ಹಾಕಿ ಸೋಲನುಭವಿಸಿತ್ತು. ಈ ಬಾರಿ ಬೆಂಗಳೂರು ಅದನ್ನು ತಪ್ಪಿಸಬೇಕಾಗಿದ್ದು, ತಂಡದ ಬ್ಯಾಟ್ಸ್ಮನ್ಗಳು ಉತ್ತಮ ಪ್ರದರ್ಶನ ನೀಡಬೇಕಿದೆ. ಇದಕ್ಕಾಗಿ ವಿರಾಟ್ ಕೊಹ್ಲಿ ಕೂಡ ಓಪನಿಂಗ್ನಲ್ಲಿ ದೊಡ್ಡ ಜವಾಬ್ದಾರಿ ಹೊರಲಿದ್ದಾರೆ. ಈ ಋತುವಿನಲ್ಲಿ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲವಾದ ಕೊಹ್ಲಿ ಅವರ ಬ್ಯಾಟ್ ಕೇವಲ 306 ರನ್ ಗಳಿಸಿದ್ದರೂ, ಲೀಗ್ ಹಂತದ ಕೊನೆಯ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧ 73 ರನ್‌ಗಳ ಉತ್ತಮ ಇನ್ನಿಂಗ್ಸ್ ಆಡಿದರು. ಇಂದಿನ ಪಂದ್ಯದಲ್ಲಿ ಕೊಹ್ಲಿ ಈ ಲಯವನ್ನು ಮುಂದುವರಿಸಿದರೆ, ಆರ್ಸಿಬಿ ಮುಂದಿನ ಹಂತ ತಲುಪುವುದಂತ್ತೂ ಖಚಿತ.
Published On - 6:16 pm, Wed, 25 May 22
