Pak Vs Aus: ಮಿಸ್ಫೀಲ್ಡಿಂಗ್ ಮಾಡಿದ ಪಾಕ್ ಆಟಗಾರ; ಆದರೂ ರನ್ ಔಟ್ ಆದ ಆಸ್ಟ್ರೇಲಿಯಾ ಬ್ಯಾಟರ್- ಹೇಗೆ? ವಿಡಿಯೋ ಇಲ್ಲಿದೆ
Ben McDermott: ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಬಂದಿದ್ದ ಆಸ್ಟ್ರೇಲಿಯಾದ ಬೆನ್ ಮೆಕ್ಡರ್ಮಾಟ್ ಉತ್ತಮವಾಗಿ ಆಡುತ್ತಿದ್ದರು. ಆದರೆ ಅನಿರೀಕ್ಷಿತ ರೀತಿಯಲ್ಲಿ ರನ್ಔಟ್ ಆದರು. ಈ ಸಂದರ್ಭದ ವಿಡಿಯೋ ಈಗ ವೈರಲ್ ಆಗಿದೆ.
ಪಾಕಿಸ್ತಾನದಲ್ಲಿ ನಡೆಯುತ್ತಿರುವ ಪಾಕ್ ಹಾಗೂ ಆಸ್ಟ್ರೇಲಿಯಾ ನಡುವಿನ ಏಕದಿನ (Pak vs Aus) ಸರಣಿಯಲ್ಲಿ ಅಚ್ಚರಿಯ ರೀತಿಯಲ್ಲಿ ರನ್ಔಟ್ ಒಂದು ಸಂಭವಿಸಿದೆ. ಲಾಹೋರ್ನ ಗಡಾಫಿ ಸ್ಟೇಡಿಯಂನಲ್ಲಿ ಮೊದಲ ಪಂದ್ಯ ನಡೆಯಿತು. ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ಭರ್ಜರಿ ಪ್ರದರ್ಶನ ನೀಡಿ ಉತ್ತಮ ಮೊತ್ತ ಪೇರಿಸಿತು. ಆರಂಭಿಕರಾಗಿ ಕಣಕ್ಕಿಳಿದ ಆರನ್ ಫಿಂಚ್ ಹಾಗೂ ಟ್ರೇವಿಸ್ ಹೆಡ್ ಮೊದಲ 15 ಓವರ್ಗಳಲ್ಲೇ ತಂಡದ ಮೊತ್ತವನ್ನು ನೂರರ ಗಡಿ ದಾಟಿಸಿದರು. ಆಸ್ಟ್ರೇಲಿಯಾ ತಂಡದ ಬ್ಯಾಟರ್ಗಳು ಉತ್ತಮ ಪ್ರದರ್ಶನ ನೀಡಿದ್ದರಿಂದ ತಂಡವು 313 ರನ್ಗಳ ಸವಾಲಿನ ಗುರಿ ಪೇರಿಸಲು ಸಾಧ್ಯವಾಯಿತು. ಟ್ರೇವಿಸ್ ಹೆಡ್ 101 ರನ್ಗಳ ಭರ್ಜರಿ ಶತಕ ಬಾರಿಸಿದರು. ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಬಂದಿದ್ದ ಬೆನ್ ಮೆಕ್ಡರ್ಮಾಟ್ ಉತ್ತಮವಾಗಿ ಆಡುತ್ತಿದ್ದರು. ಆದರೆ ಅನಿರೀಕ್ಷಿತ ರೀತಿಯಲ್ಲಿ ರನ್ಔಟ್ ಆದರು. ಈ ಸಂದರ್ಭದ ವಿಡಿಯೋ ಈಗ ವೈರಲ್ ಆಗಿದೆ.
33ನೇ ಓವರ್ನ ಕೊನೆಯ ಎಸೆತದಲ್ಲಿ ಬೆನ್ ಮೆಕ್ಡರ್ಮಾಟ್ ಥರ್ಡ್ ಮ್ಯಾನ್ ಕಡೆಗೆ ಚೆಂಡನ್ನು ಬಾರಿಸಿದರು. ಅಲ್ಲಿ ಫೀಲ್ಡಿಂಗ್ನಲ್ಲಿದ್ದ ವಾಸಿಂ ಜೂ. ಚೆಂಡನ್ನು ಡೈವ್ ಮಾಡಿ ತಡೆದರು. ಅದರೆ ಅದು ಅವರ ಹಿಡಿತಕ್ಕೆ ಸಿಕ್ಕಲಿಲ್ಲ. ಮಿಸ್ಫೀಲ್ಡ್ ಆದ ಚೆಂಡು ಬೌಂಡರಿ ಗೆರೆಯತ್ತ ನುಗ್ಗಿತು. ಅದನ್ನು ಬೆನ್ನಟ್ಟಿದ ವಾಸಿಂ ಚೆಂಡನ್ನು ಬೌಂಡರಿ ಗೆರೆ ಬಳಿ ತಡೆದು ಕೀಪರ್ ಮೊಹಮ್ಮದ್ ರಿಜ್ವಾನ್ಗೆ ತಲುಪಿಸಿದರು.
ಆದರೆ ಈ ಸಂದರ್ಭದಲ್ಲಿ ನಿಧಾನವಾಗಿ ರನ್ ಓಡುತ್ತಿದ್ದ ಬೆನ್ ಇನ್ನೂ ಕ್ರೀಸ್ ತಲುಪಿರಲಿಲ್ಲ. ಅನಿರೀಕ್ಷಿತ ರೀತಿಯಲ್ಲಿ ಅವರು ಔಟ್ ಆದರು. ಡೈವ್ ಮಾಡಿದರೂ ಕೂಡ ಅವರ ಯತ್ನ ಫಲಿಸಲಿಲ್ಲ. ಹೀಗೆ ವಿಕೆಟ್ಗೆ ಪರದಾಡುತ್ತಿದ್ದ ಪಾಕಿಸ್ತಾನಕ್ಕೆ ಮಿಸ್ಫೈಲ್ಡ್ನಿಂದ ಅನಿರೀಕ್ಷಿತವಾಗಿ ರನ್ಔಟ್ ಸಿಕ್ಕಂತಾಯಿತು. 70 ಎಸೆತಗಳಲ್ಲಿ 55 ರನ್ ಗಳಿಸಿದ್ದ ಬೆನ್ ಪೆವಿಲಿಯನ್ಗೆ ಮರಳಿದರು. ಇದರ ನಂತರ ಪಾಕ್ ಕೆಲವೇ ರನ್ಗಳ ಅಂತರದಲ್ಲಿ ಮತ್ತೆರಡು ವಿಕೆಟ್ ಪಡೆಯಿತು.
ಬೆನ್ ಮೆಕ್ಡರ್ಮಾಟ್ ರನ್ ಔಟ್ ವಿಡಿಯೋ ಇಲ್ಲಿದೆ:
McDermott falls short! #BoysReadyHain I #PAKvAUS pic.twitter.com/Bw4tLPEiJl
— Pakistan Cricket (@TheRealPCB) March 29, 2022
225ಕ್ಕೆ ಸರ್ವಪತನ ಕಂಡ ಪಾಕ್:
ಆಸ್ಟ್ರೇಲಿಯಾ ನೀಡಿದ 313 ರನ್ಗಳ ಗುರಿ ಬೆನ್ನಟ್ಟಿದ ಪಾಕ್ಗೆ ನಿರೀಕ್ಷಿತ ಆರಂಭ ದೊರೆಯಲಿಲ್ಲ. ಆರಂಭಿಕ ಆಟಗಾರ ಇಮಾಮ್ ಉಲ್ ಹಕ್ 96 ಎಸೆತಗಳಲ್ಲಿ 103 ರನ್ಗಳಿಸಿದರು. ಕಪ್ತಾನ ಬಾಬರ್ ಅಜಂ 72 ಎಸೆತಗಳಲ್ಲಿ 57 ರನ್ ಬಾರಿಸಿದರು. ಆದರೆ ತಂಡದ ಇತರ ಆಟಗಾರರಿಂದ ಯಾವುದೇ ಸಹಾಯ ಲಭ್ಯವಾಗಲಿಲ್ಲ. ಇದರಿಂದ ಪಾಕ್ 45.2 ಓವರ್ಗಳಲ್ಲಿ 225 ರನ್ಗೆ ಆಲ್ಔಟ್ ಆಯಿತು.
ಆಡಂ ಜಂಪಾ 4 ವಿಕೆಟ್ ಪಡೆದರೆ, ಬೌಲಿಂಗ್ನಲ್ಲೂ ಮಿಂಚಿದ ಟ್ರೇವಿಸ್ ಹೆಡ್ 2 ವಿಕೆಟ್ ಪಡೆದರು. ಅರ್ಹವಾಗಿಯೇ ಟ್ರೇವಿಸ್ಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಲಭಿಸಿತು. ಈ ಮೂಲಕ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಆಸ್ಟ್ರೇಲಿಯಾ 1-0ಯಿಂದ ಮುನ್ನಡೆ ಸಾಧಿಸಿದೆ. ಮುಂದಿನ ಪಂದ್ಯ ಮಾರ್ಚ್ 31ರ ಗುರುವಾರ ನಡೆಯಲಿದೆ.
ಇದನ್ನೂ ಓದಿ:
IPL 2022 Points Table: ಪಾಯಿಂಟ್ಸ್ ಪಟ್ಟಿಯಲ್ಲಿ ನಂಬರ್ 1 ಯಾರು? ಆರೆಂಜ್ ಕ್ಯಾಪ್, ಪರ್ಪಲ್ ಕ್ಯಾಪ್ ಯಾರ ಬಳಿ ಇದೆ?
Devon Conway: ‘ನಿಮ್ಮ ನಾಯಕತ್ವದಲ್ಲಿ ನಾನು ಆಡಬೇಕು’; ಕಿವೀಸ್ ಆಟಗಾರನ ಕೋರಿಕೆಗೆ ಧೋನಿ ಉತ್ತರ ಏನಿತ್ತು?