ಏಕದಿನ ವಿಶ್ವಕಪ್​​ನಲ್ಲಿ ‘ಸ್ಟಾಪ್ ಕ್ಲಾಕ್’ ನಿಯಮ!

ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಪಂದ್ಯಗಳು ನಿಗದಿತ ಸಮಯಕ್ಕಿಂತ ಹೆಚ್ಚು ಕಾಲ ಎಳೆಯುವುದನ್ನು ತಡೆಯಲು ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಜಾರಿಗೆ ತಂದಿರುವ ಅತ್ಯಂತ ಕ್ರಾಂತಿಕಾರಕ ನಿಯಮವೇ ‘ಸ್ಟಾಪ್ ಕ್ಲಾಕ್ ನಿಯಮ’ . ಮುಂಬರುವ 2027ರ ಏಕದಿನ ವಿಶ್ವಕಪ್ ಸೇರಿದಂತೆ ಎಲ್ಲಾ ಐಸಿಸಿ ಟೂರ್ನಿಗಳಲ್ಲಿ ಈ ನಿಯಮವನ್ನು ಶಾಶ್ವತವಾಗಿ ಕಡ್ಡಾಯಗೊಳಿಸಲಾಗಿದ್ದು, ಇದು ಬೌಲಿಂಗ್ ತಂಡಗಳ ನಾಯಕರಿಗೆ ಹೊಸ ತಲೆನೋವಾಗಿ ಪರಿಣಮಿಸಿದೆ.

ಟಿ20 ಯುಗದಲ್ಲಿ ಸುದೀರ್ಘಾವಧಿಯ ಏಕದಿನ ಪಂದ್ಯಗಳು ಅಭಿಮಾನಿಗಳಿಗೆ ಬೇಸರ ತರಿಸದಂತೆ ಮತ್ತು ನಿಗದಿತ ಸಮಯದೊಳಗೆ ಮುಕ್ತಾಯಗೊಳ್ಳುವಂತೆ ಮಾಡಲು ಐಸಿಸಿ ಈ ಬಿಗಿಯಾದ ನಿಯಮವನ್ನು ಅಖಾಡಕ್ಕಿಳಿಸಿದೆ.

ಏನಿದು ಸ್ಟಾಪ್ ಕ್ಲಾಕ್ ನಿಯಮ?

ಪಂದ್ಯದ ವೇಗವನ್ನು ಹೆಚ್ಚಿಸಲು ಮೈದಾನದಲ್ಲಿನ ಎಲೆಕ್ಟ್ರಾನಿಕ್ ಸ್ಕ್ರೀನ್ ಮೇಲೆ ಈ ಗಡಿಯಾರ ಚಾಲನೆಗೊಳ್ಳುತ್ತದೆ.

60 ಸೆಕೆಂಡುಗಳ ಕೌಂಟ್‌ಡೌನ್: ಒಂದು ಓವರ್ ಮುಗಿದ ತಕ್ಷಣ, ಮುಂದಿನ ಓವರ್‌ನ ಮೊದಲ ಎಸೆತವನ್ನು ಎಸೆಯಲು ಬೌಲಿಂಗ್ ತಂಡಕ್ಕೆ ಕೇವಲ 60 ಸೆಕೆಂಡುಗಳ (1 ನಿಮಿಷ) ಕಾಲಾವಕಾಶ ಇರುತ್ತದೆ.

ಅಂಪೈರ್ ನಿಗಾ: ಮೂರನೇ ಅಂಪೈರ್ ಓವರ್ ಮುಗಿದ ತಕ್ಷಣ ಗಡಿಯಾರವನ್ನು ಚಾಲನೆ ಮಾಡುತ್ತಾರೆ. ಬೌಲರ್ ಆ 60 ಸೆಕೆಂಡುಗಳು ಮುಗಿಯುವ ಮುನ್ನ ರನ್-ಅಪ್ ಪಡೆದು ಬೌಲಿಂಗ್ ಮಾಡಲು ಸಿದ್ಧರಿರಬೇಕು.

ನಿಯಮ ಮೀರಿದರೆ ಸಿಗಲಿದೆ ಭಾರಿ ದಂಡ!

ಸಮಯ ವ್ಯರ್ಥ ಮಾಡುವ ತಂಡಗಳಿಗೆ ಐಸಿಸಿ ಕಠಿಣ ಶಿಕ್ಷೆಯನ್ನು ರೂಪಿಸಿದೆ. ಫೀಲ್ಡಿಂಗ್ ತಂಡವು ಒಂದು ಇನ್ನಿಂಗ್ಸ್‌ನಲ್ಲಿ 60 ಸೆಕೆಂಡುಗಳ ಗಡುವನ್ನು ಮೀರಿದರೆ ಈ ಕೆಳಗಿನ ಕ್ರಮ ಜರುಗುತ್ತದೆ…

• ಮೊದಲ ಮತ್ತು ಎರಡನೇ ತಪ್ಪು: ಅಂಪೈರ್‌ಗಳು ಬೌಲಿಂಗ್ ತಂಡದ ನಾಯಕನಿಗೆ ಎರಡು ಬಾರಿ ಅಧಿಕೃತ ಎಚ್ಚರಿಕೆ ನೀಡುತ್ತಾರೆ.
• ಮೂರನೇ ತಪ್ಪು (ಪೆನಾಲ್ಟಿ): ತಂಡವು ಮೂರನೇ ಬಾರಿಯೂ ತಡ ಮಾಡಿದರೆ, ಬ್ಯಾಟಿಂಗ್ ಮಾಡುತ್ತಿರುವ ಎದುರಾಳಿ ತಂಡಕ್ಕೆ ನೇರವಾಗಿ 5 ಪೆನಾಲ್ಟಿ ರನ್‌ಗಳನ್ನು ಉಡುಗೊರೆಯಾಗಿ ನೀಡಲಾಗುತ್ತದೆ. ಆ ಬಳಿಕ ಮಾಡುವ ಪ್ರತಿ ತಪ್ಪುಗಳಿಗೂ ತಲಾ 5 ರನ್‌ಗಳನ್ನು ದಂಡವಾಗಿ ಕಡಿತಗೊಳಿಸಲಾಗುತ್ತದೆ.

ವಿನಾಯಿತಿಗಳು ಯಾವಾಗ ಇರುತ್ತವೆ?

ಕೆಲವು ಅನಿವಾರ್ಯ ಸಂದರ್ಭಗಳಲ್ಲಿ ಈ ಗಡಿಯಾರವನ್ನು ಸ್ಥಗಿತಗೊಳಿಸಲಾಗುತ್ತದೆ:

• ವಿಕೆಟ್ ಬಿದ್ದಾಗ ಹೊಸ ಬ್ಯಾಟರ್ ಕ್ರೀಸ್‌ಗೆ ಬರಲು ತಡವಾದರೆ.
• ಆಟಗಾರರಿಗೆ ಗಾಯವಾಗಿ ಮೈದಾನಕ್ಕೆ ಫಿಸಿಯೋ ಬಂದರೆ.
• ಬ್ಯಾಟರ್‌ನ ಕಡೆಯಿಂದ ಆಟ ವಿಳಂಬವಾದರೆ ಬೌಲಿಂಗ್ ತಂಡಕ್ಕೆ ದಂಡ ಇರುವುದಿಲ್ಲ.

ಇದನ್ನೂ ಓದಿ: ಏಕದಿನ ಕ್ರಿಕೆಟ್​​​ನಲ್ಲಿ ‘ಹೊಸ ಬಾಲ್ ನಿಯಮ’ ಜಾರಿ

ಒಟ್ಟಾರೆಯಾಗಿ, ಸ್ಟಾಪ್ ಕ್ಲಾಕ್ ನಿಯಮ ಜಾರಿಗೆ ಬಂದಿರುವುದರಿಂದ ಏಕದಿನ ಪಂದ್ಯಗಳು ಈಗ ಸರಾಸರಿ 20 ರಿಂದ 25 ನಿಮಿಷಗಳಷ್ಟು ಬೇಗ ಮುಕ್ತಾಯಗೊಳ್ಳುತ್ತಿವೆ. ಇದು ಕೇವಲ ಸಮಯದ ಉಳಿತಾಯವಷ್ಟೇ ಅಲ್ಲದೆ, ನಾಯಕರ ಹಾಗೂ ಬೌಲರ್‌ಗಳ ಕಾರ್ಯತತ್ಪರತೆಗೆ ಒಡ್ಡಿರುವ ದೊಡ್ಡ ಸವಾಲಾಗಿದೆ. ಮುಂಬರುವ ಏಕದಿನ ವಿಶ್ವಕಪ್‌ನಲ್ಲಿ ಈ 5 ರನ್‌ಗಳ ಪೆನಾಲ್ಟಿ ನಿಯಮವು ಪಂದ್ಯದ ಗೆಲುವು-ಸೋಲನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರೂ ಅಚ್ಚರಿಯಿಲ್ಲ.