ವೆಸ್ಟ್ ಇಂಡೀಸ್ ತಂಡದಲ್ಲಿ ಒಡಕು: ಟೀಮ್ ಇಂಡಿಯಾ ಸರಣಿಗೂ ಮುನ್ನ ಹೊಸ ಚಿಂತೆ ಶುರು

ವೆಸ್ಟ್ ಇಂಡೀಸ್ ತಂಡದಲ್ಲಿ ಒಡಕು: ಟೀಮ್ ಇಂಡಿಯಾ ಸರಣಿಗೂ ಮುನ್ನ ಹೊಸ ಚಿಂತೆ ಶುರು
West Indies

Kieron Pollard: ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ 5 ಪಂದ್ಯಗಳ ಟಿ20 ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ಓಡಿಯನ್ ಸ್ಮಿತ್ ಪ್ಲೇಯಿಂಗ್ -11 ರ ಭಾಗವಾಗಿದ್ದರು.

TV9kannada Web Team

| Edited By: Zahir PY

Jan 29, 2022 | 2:32 PM

ಮುಂದಿನ ತಿಂಗಳು ವೆಸ್ಟ್ ಇಂಡೀಸ್ (India vs West Indies) ತಂಡವು ಭಾರತ ಪ್ರವಾಸ ಕೈಗೊಳ್ಳಲಿದೆ. ಫೆಬ್ರವರಿ 6 ರಿಂದ ಶುರುವಾಗಲಿರುವ ಈ ಸರಣಿಗೂ ಮುನ್ನ ಇದೀಗ ವೆಸ್ಟ್ ಇಂಡೀಸ್​ ತಂಡಕ್ಕೆ ಹೊಸ ಚಿಂತೆ ಶುರುವಾಗಿದೆ. ಸರಣಿ ಆರಂಭಕ್ಕೆ ಕೇವಲ ವಾರ ಮಾತ್ರ ಬಾಕಿ ಇರುವಾಗ ಕೆರಿಬಿಯನ್ ತಂಡದಲ್ಲಿ ಬಿರುಕು ಮೂಡಿದೆ ಎಂದು ವರದಿಯಾಗಿದೆ. ಕೆರಿಬಿಯನ್ ಮಾಧ್ಯಮಗಳ ವರದಿ ಪ್ರಕಾರ ವೆಸ್ಟ್ ಇಂಡೀಸ್ ಕ್ರಿಕೆಟ್‌ನಲ್ಲಿ ಒಡಕುಂಟಾಗಿದ್ದು, ಇದಕ್ಕೆ ಮುಖ್ಯ ಕಾರಣ ತಂಡದ ನಾಯಕ ಕೀರನ್ ಪೊಲಾರ್ಡ್ (Kieron Pollard) ಎಂದು ಹೇಳಲಾಗಿದೆ. ಪೊಲಾರ್ಡ್ ಉದ್ದೇಶಪೂರ್ವಕವಾಗಿ ಆಲ್ ರೌಂಡರ್ ಓಡಿಯನ್ ಸ್ಮಿತ್ ಅವರನ್ನು ಕಡೆಗಣಿಸುತ್ತಿದ್ದಾರೆ. ಹೀಗಾಗಿಯೇ ಅವರನ್ನು ಇಂಗ್ಲೆಂಡ್ ವಿರುದ್ಧದ ಟಿ20 ಸರಣಿಯಲ್ಲಿ ಆಡಿಸುತ್ತಿಲ್ಲ ಎಂದು ವರದಿಗಳಲ್ಲಿ ಹೇಳಲಾಗಿದೆ.

ಇದರಿಂದ ಇತರೆ ಆಟಗಾರರಲ್ಲೂ ಅಸಮಾಧಾನವಿದ್ದು, ಹೀಗಾಗಿ ತಂಡದಲ್ಲಿ ಉದ್ಭವಿಸಿರುವ ವಿವಾದವನ್ನು ಬಗೆಹರಿಸಲು ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿ ಕೂಡ ಉನ್ನತ ಮಟ್ಟದ ಸಭೆಯನ್ನು ಕರೆದಿದೆ ಎಂದು ಹೇಳಲಾಗಿದೆ. ಆದಾಗ್ಯೂ, ಈ ವಿಚಾರಗಳನ್ನು ಕೋಚ್ ಫಿಲ್ ಸಿಮನ್ಸ್ ತಳ್ಳಿಹಾಕಿದ್ದು, ತಂಡದಲ್ಲಿ ಯಾವುದೇ ಒಡಕುಂಟಾಗಿಲ್ಲ ಎಂದು ತಿಳಿಸಿದ್ದಾರೆ.

ನನ್ನ ಅವಧಿಯಲ್ಲಿ ವೆಸ್ಟ್ ಇಂಡೀಸ್ ತಂಡದಲ್ಲಿ ಇಂಥದ್ದೇನೂ ಆಗಲು ಸಾಧ್ಯವಿಲ್ಲ. ಇಲ್ಲಿ ಯಾರೂ ಯಾರನ್ನೂ ಗುರಿಯಾಗಿಸಿಕೊಂಡಿಲ್ಲ. ಯಾರೂ ಯಾರನ್ನೂ ಕೆಳಗೆ ಎಳೆಯಲು ಪ್ರಯತ್ನಿಸುತ್ತಿಲ್ಲ. ನಾವು ಮೊದಲು ಒಬ್ಬ ಆಟಗಾರನನ್ನು ಉತ್ತಮ ವ್ಯಕ್ತಿಯನ್ನಾಗಿ ಮಾಡುತ್ತೇವೆ. ನಂತರ ನಾವು ಅವನನ್ನು ಉತ್ತಮ ಕ್ರಿಕೆಟಿಗನನ್ನಾಗಿ ಮಾಡುತ್ತೇವೆ. ವೆಸ್ಟ್ ಇಂಡೀಸ್ ತಂಡದ ಪ್ರತಿಯೊಬ್ಬ ಆಟಗಾರನೂ ಒಗ್ಗಟ್ಟಾಗಿ ಮತ್ತು ಒಗ್ಗಟ್ಟಿನಿಂದ ನಿಂತಿದ್ದಾರೆ. ನನ್ನ ಕೋಚಿಂಗ್ ವೃತ್ತಿಜೀವನದಲ್ಲಿ ಮತ್ತು ನನ್ನ ಆಟದ ವೃತ್ತಿಜೀವನದಲ್ಲಿ, ನಾನು ಯಾವಾಗಲೂ ಆಟಗಾರರಿಗೆ ಸಹಾಯ ಮಾಡಲು ಪ್ರಯತ್ನಿಸಿದ್ದೇನೆ ಎಂದು ಫಿಲ್ ಸಿಮನ್ಸ್ ತಿಳಿಸಿದ್ದಾರೆ.

ಆದರೆ ಒಡಿಯನ್ ಸ್ಮಿತ್​ಗೆ ಸತತ ಅವಕಾಶ ಕೈ ತಪ್ಪಿರುವ ಬಗ್ಗೆ ಸಿಮನ್ಸ್ ಯಾವುದೇ ಸ್ಪಷ್ಟನೆ ನೀಡದಿರುವುದು ಅಚ್ಚರಿಗೆ ಕಾರಣವಾಗಿದೆ. ಇತ್ತ ಸ್ಮಿತ್ ಹಾಗು ಪೊಲಾರ್ಡ್ ನಡುವೆ ವೈಮನಸ್ಸು ಇದ್ದು, ಇದೇ ಕಾರಣದಿಂದ ತಂಡದಲ್ಲಿ ಬಿರುಕುಂಟಾಗುತ್ತಿದೆ ಎಂದು ವರದಿಯಾಗಿದೆ. ಆದರೆ ಈ ಬಗ್ಗೆ ಯಾವುದೇ ಸ್ಪಷ್ಟನೆ ನೀಡಲು ಸಿಮನ್ಸ್ ನಿರಾಕರಿಸಿದ್ದು, ಹೊಸ ಅನುಮಾನಗಳಿಗೆ ಎಡೆ ಮಾಡಿಕೊಟ್ಟಿದೆ.

ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ 5 ಪಂದ್ಯಗಳ ಟಿ20 ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ಓಡಿಯನ್ ಸ್ಮಿತ್ ಪ್ಲೇಯಿಂಗ್ -11 ರ ಭಾಗವಾಗಿದ್ದರು. ಮೊದಲ ಪಂದ್ಯದಲ್ಲಿ ಕೇವಲ 1 ಓವರ್ ಬೌಲ್ ಮಾಡಿದ್ದರು. ಇದಾದ ಬಳಿಕ ಎರಡನೇ ಟಿ20 ಯಲ್ಲೂ ಬೌಲಿಂಗ್​ ನೀಡಿರಲಿಲ್ಲ. ಮೂರನೇ ಟಿ20 ಯಿಂದ ಓಡಿಯನ್ ಸ್ಮಿತ್ ಅವರನ್ನು ತಂಡದಿಂದ ಕೈಬಿಡಲಾಯಿತು. ಅವರ ಬದಲಿಗೆ ರೋವ್‌ಮನ್ ಪೊವೆಲ್ ಅವರನ್ನು ಪ್ಲೇಯಿಂಗ್-11 ನಲ್ಲಿ ಆಡಿಸಲಾಯಿತು. ಈ ಪಂದ್ಯದಲ್ಲಿ ಪೊವೆಲ್ 53 ಎಸೆತಗಳಲ್ಲಿ 107 ರನ್ ಗಳಿಸಿ ಮಿಂಚಿದರು.

ಇದರ ಬೆನ್ನಲ್ಲೇ ತಂಡಕ್ಕೆ ಆಯ್ಕೆ ಮಾಡಿ ಬೌಲಿಂಗ್​ಗೆ ಅವಕಾಶ ನೀಡದಿರುವ ಕೀರನ್ ಪೊಲಾರ್ಡ್ ಅವರ ನಡೆಯ ಬಗ್ಗೆ ಅನೇಕ ಮಾಜಿ ಆಟಗಾರರು ಅಪಸ್ವರ ಎತ್ತಿದ್ದರು. ಅಷ್ಟೇ ಅಲ್ಲದೆ ಎರಡು ಪಂದ್ಯಗಳಲ್ಲಿ ಉದ್ದೇಶಪೂರ್ವಕವಾಗಿ ಸ್ಮಿತ್ ಅವರನ್ನು ಬೌಲಿಂಗ್ ನೀಡಿರಲಿಲ್ಲ ಎಂಬ ವಾದಗಳು ಕೇಳಿ ಬಂದಿತ್ತು. ಇದರ ಬೆನ್ನಲ್ಲೇ ಮೂರನೇ ಪಂದ್ಯದಿಂದ ಕೈ ಬಿಡುವ ಮೂಲಕ ಕೀರನ್ ಪೊಲಾರ್ಡ್ ಹಾಗೂ​ ಒಡಿಯನ್ ಸ್ಮಿತ್ ನಡುವೆ ಮುಸುಕಿನ ಗುದ್ದಾಟ ಇರುವುದು ಬಹಿರಂಗವಾಗಿತ್ತು. ಸದ್ಯ ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿ ಉನ್ನತ ಮಟ್ಟದ ಸಭೆಯನ್ನು ಕರೆದಿದ್ದು, ಈ ಮೂಲಕ ಭಾರತದ ವಿರುದ್ದದ ಸರಣಿಗೂ ಮುನ್ನ ತಂಡದಲ್ಲಿ ಉದ್ಭವಿಸಿರುವ ವಿವಾದವನ್ನು ಬಗೆಹರಿಸಲು ಮುಂದಾಗಿದೆ ಎಂದು ವರದಿಯಾಗಿದೆ.

ಇದನ್ನೂ ಓದಿ:  IND vs WI: ದಕ್ಷಿಣ ಆಫ್ರಿಕಾ ವಿರುದ್ದದ ಸರಣಿಯಲ್ಲಿದ್ದ 5 ಆಟಗಾರರು ಟೀಮ್ ಇಂಡಿಯಾದಿಂದ ಔಟ್..!

ಇದನ್ನೂ ಓದಿ: ICC ODI Rankings: ಐಸಿಸಿ ಏಕದಿನ ರ‍್ಯಾಕಿಂಗ್ ಪಟ್ಟಿ ಪ್ರಕಟ: ಕೊಹ್ಲಿ-ರೋಹಿತ್ ನಡುವೆ ಪೈಪೋಟಿ

ಇದನ್ನೂ ಓದಿ: IPL 2022 Auction: ಲಕ್ನೋ ತಂಡದ ಮೊದಲ ಟಾರ್ಗೆಟ್ ಯಾರು ಎಂಬುದನ್ನು ಬಹಿರಂಗಪಡಿಸಿದ ರಾಹುಲ್

(rift in West Indies team involving captain Kieron Pollard ahead of India tour)

Follow us on

Related Stories

Most Read Stories

Click on your DTH Provider to Add TV9 Kannada