ಐಪಿಎಲ್ ಫೈನಲ್ ಸೋಲಿನ ಆಘಾತದಿಂದ ಹೊರಬಂದಿಲ್ವ ಶ್ರೇಯಸ್ ಅಯ್ಯರ್?

18ನೇ ಆವೃತ್ತಿಯಲ್ಲೂ ಟ್ರೋಫಿ ಎತ್ತಿಹಿಡಿಯುವ ಪಂಜಾಬ್ ಕಿಂಗ್ಸ್ (PBKS) ಕನಸು ಕೊನೆಗೂ ನನಸಾಗಲಿಲ್ಲ. ಆರ್​ಸಿಬಿ (RCB) ವಿರುದ್ಧ ನಡೆದ ಫೈನಲ್ ಪಂದ್ಯದಲ್ಲಿ ಶ್ರೇಯಸ್ ಅಯ್ಯರ್ (Shreyas Iyer) ನಾಯಕತ್ವದ ಪಂಜಾಬ್ ತಂಡ 6 ರನ್​ಗಳಿಂದ ಸೋತು ಟ್ರೋಫಿಯಿಂದ ವಂಚಿತವಾಯಿತು. ಆದಾಗ್ಯೂ ತಂಡವನ್ನು ಅಗ್ರಸ್ಥಾನಕ್ಕೇರಿಸಿ 14 ವರ್ಷಗಳ ನಂತರ ಫೈನಲ್​ಗೆ ಕೊಂಡೊಯ್ದ ಶ್ರೇಯ ನಾಯಕ ಶ್ರೇಯಸ್​ಗೆ ಸಲ್ಲುತ್ತದೆ. ಅದರಲ್ಲೂ ಮುಂಬೈ ಇಂಡಿಯನ್ಸ್ ವಿರುದ್ಧದ ಎರಡನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ಶ್ರೇಯಸ್ ಆಡಿದ ಇನ್ನಿಂಗ್ಸ್ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿತು. ಆದರೆ ಅದೇ ಪ್ರದರ್ಶನವನ್ನು ಫೈನಲ್ ಪಂದ್ಯದಲ್ಲಿ ನೀಡಲು ಸಾಧ್ಯವಾಗಲಿಲ್ಲ. ತಂಡದ ಸೋಲಿಗೆ ಇದು ಒಂದು ಕಾರಣವಾಯಿತು. ಈ ನಿರ್ಣಾಯಕ ಪಂದ್ಯದಲ್ಲಿ ಶ್ರೇಯಸ್ ಕೇವಲ 1 ರನ್​ಗೆ ಸುಸ್ತಾಗಿದ್ದರು.

ಮುಂಬೈ ಟಿ20 ಲೀಗ್​ನಲ್ಲಿ ಶ್ರೇಯಸ್ ಫೇಲ್

ಪ್ರಸ್ತುತ ಐಪಿಎಲ್ ಮುಗಿಸಿರುವ ಶ್ರೇಯಸ್, ಭಾರತ ಟೆಸ್ಟ್ ತಂಡದಲ್ಲಿ ಆಯ್ಕೆಯಾಗಿಲ್ಲ. ಹೀಗಾಗಿ ಅವರು ದೇಶೀ ಟಿ20 ಲೀಗ್ ಮುಂಬೈ ಟಿ20 ಲೀಗ್​ನಲ್ಲಿ ಸೋಬೊ ಮುಂಬೈ ಫಾಲ್ಕನ್ಸ್ ತಂಡದ ನಾಯಕರಾಗಿ ಆಡುತ್ತಿದ್ದಾರೆ. ಜೂನ್ 6 ರ ಶುಕ್ರವಾರದಂದು ನಡೆದ ಟ್ರಯಂಫ್ಸ್ ನೈಟ್ಸ್ ವಿರುದ್ಧದ ಪಂದ್ಯದಲ್ಲಿ ಅಯ್ಯರ್ ತಂಡ ಕಣಕ್ಕಿಳಿದಿತ್ತು. ಈ ಪಂದ್ಯದಲ್ಲಿ ಅಯ್ಯರ್ ಅವರಿಂದ ಸಾಕಷ್ಟು ನಿರೀಕ್ಷೆಗಳಿದ್ದವು. ಆದರೆ ಐಪಿಎಲ್ ಫೈನಲ್‌ನಂತೆಯೇ ಈ ಲೀಗ್​ನಲ್ಲೂ ಅಯ್ಯರ್ ರನ್​ ಗಳಿಸಲು ಇಲ್ಲಿಯೂ ವಿಫಲರಾಗಿ 19 ಎಸೆತಗಳಲ್ಲಿ ಕೇವಲ 13 ರನ್ ಗಳಿಸಿ ಔಟಾದರು.

IPL 2025 Final: ಶ್ರೇಯಸ್ ಅಯ್ಯರ್ ವಿರುದ್ಧ ಸೇಡು ತೀರಿಸಿಕೊಳ್ಳುವ ತವಕದಲ್ಲಿ ರಜತ್ ಪಟಿದಾರ್

ಆದಾಗ್ಯೂ ಗೆದ್ದ ತಂಡ

10 ನೇ ಓವರ್‌ನ ಕೊನೆಯ ಎಸೆತದಲ್ಲಿ ಅಯ್ಯರ್ ಔಟಾದಾಗ, ತಂಡದ ಸ್ಕೋರ್ ಕೇವಲ 75 ರನ್‌ಗಳಾಗಿದ್ದು, 4 ವಿಕೆಟ್‌ಗಳು ಬಿದ್ದಿದ್ದವು. ಆದರೆ ಇದರ ಹೊರತಾಗಿಯೂ, ತಂಡವು ಪಂದ್ಯವನ್ನು 4 ವಿಕೆಟ್‌ಗಳಿಂದ ಗೆದ್ದಿತು. ಇದಕ್ಕೆ ಕಾರಣ ಯುವ ಬ್ಯಾಟ್ಸ್‌ಮನ್ ಅಂಗ್‌ಕ್ರಿಶ್ ರಘುವಂಶಿ, ಅವರು ಕೇವಲ 25 ಎಸೆತಗಳಲ್ಲಿ 42 ರನ್ ಗಳಿಸಿದರು. ವಿನಾಯಕ್ ನಾರಾಯಣ್ ಕೂಡ 21 ಎಸೆತಗಳಲ್ಲಿ 33 ರನ್​ಗಳ ಇನ್ನಿಂಗ್ಸ್ ಆಡಿದರೆ, ಆಕಾಶ್ ಪ್ರವೀಣ್ ಕೂಡ ಅಜೇಯ 30 ರನ್ ಗಳಿಸಿ ತಂಡವನ್ನು 146 ರನ್‌ಗಳ ಗುರಿ ಮುಟ್ಟಿಸಿದರು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ