Sikandar Raza: 6 ಸಿಕ್ಸ್, 5 ಫೋರ್: ಸ್ಪೋಟಕ ಅರ್ಧಶತಕ ಸಿಡಿಸಿ ದಾಖಲೆ ಬರೆದ ರಾಝ

Zim Afro T10 2023: ಝಿಂಬಾಬ್ವೆಯಲ್ಲಿ ನಡೆಯುತ್ತಿರುವ ಝಿಮ್ ಆಫ್ರೊ ಟಿ10 ಲೀಗ್​ನಲ್ಲಿ ಸ್ಪೋಟಕ ಅರ್ಧಶತಕ ಬಾರಿಸಿದ ಸಿಕಂದರ್ ರಾಝ ದಾಖಲೆ ನಿರ್ಮಿಸಿದ್ದಾರೆ. ಹರಾರೆ ಹರಿಕೇನ್ಸ್ ವಿರುದ್ಧದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಬುಲವಾಯೊ ಬ್ರೇವ್ಸ್ ತಂಡದ ನಾಯಕ ರಾಝ ಮೊದಲು ಬೌಲಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿದ್ದರು. ಅತ್ತ ಇನಿಂಗ್ಸ್ ಆರಂಭಿಸಿದ ಬುಲವಾಯೊ ಹರಾರೆ ಹರಿಕೇನ್ಸ್ ತಂಡಕ್ಕೆ ರಾಬಿನ್ ಉತ್ತಪ್ಪ ಹಾಗೂ ಎವಿನ್ ಲೂಯಿಸ್ ಸ್ಪೋಟಕ ಆರಂಭ ಒದಗಿಸಿದ್ದರು. 5 ಓವರ್​ಗಳಲ್ಲಿ 76 ರನ್​ ಬಾರಿಸಿದ ಈ ಜೋಡಿ ಬುಲವಾಯೊ ಬೌಲರ್​ಗಳ ಬೆಂಡೆತ್ತಿದರು.

ಈ ಹಂತದಲ್ಲಿ ದಾಳಿಗಿಳಿದ ರಾಝ 19 ಎಸೆತಗಳಲ್ಲಿ 6 ಭರ್ಜರಿ ಸಿಕ್ಸ್ ಹಾಗೂ 2 ಫೋರ್​ನೊಂದಿಗೆ 49 ರನ್ ಬಾರಿಸಿದ ಎವಿನ್ ಲೂಯಿಸ್ ವಿಕೆಟ್ ಪಡೆದರು. ಮತ್ತೊಂದೆಡೆ 15 ಎಸೆತಗಳಲ್ಲಿ 32 ರನ್ ಬಾರಿಸಿದ್ದ ರಾಬಿನ್ ಉತ್ತಪ್ಪ ಪ್ಯಾಟ್ರಿಕ್ ಎಸೆತದಲ್ಲಿ ಔಟಾದರು.

ಇನ್ನು 6ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಇರ್ಫಾನ್ ಪಠಾಣ್ 9 ಎಸೆತಗಳಲ್ಲಿ 4 ಫೋರ್​ಗಳೊಂದಿಗೆ ಅಜೇಯ 18 ರನ್ ಸಿಡಿಸಿದರು. ಪರಿಣಾಮ 10 ಓವರ್​ಗಳಲ್ಲಿ ಹರಾರೆ ಹರಿಕೇನ್ಸ್ ತಂಡದ ಮೊತ್ತವು 134 ಕ್ಕೆ ಬಂದು ನಿಂತಿತು.

60 ಎಸೆತಗಳಲ್ಲಿ 135 ರನ್​ಗಳ ಕಠಿಣ ಗುರಿ ಪಡೆದ ಬುಲವಾಯೊ ಬ್ರೇವ್ಸ್ ತಂಡಕ್ಕೆ ಕೋಬ್ ಹರ್ಫ್ಟ್ ಸ್ಪೋಟಕ ಆರಂಭ ಒದಗಿಸಿದ್ದರು. ಕೇವಲ 23 ಎಸೆತಗಳನ್ನು ಎದುರಿಸಿದ ಕೋಬ್ 3 ಸಿಕ್ಸ್ ಹಾಗೂ 3 ಫೋರ್​ಗಳೊಂದಿಗೆ 41 ರನ್ ಬಾರಿಸಿದರು.

ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಸಿಕಂದರ್ ರಾಝ ಅಕ್ಷರಶಃ ಅಬ್ಬರಿಸಿದರು. ಕ್ರೀಸ್​ಗೆ ಆಗಮಿಸುತ್ತಿದ್ದಂತೆ ಬಿರುಸಿನ ಬ್ಯಾಟಿಂಗ್​ಗೆ ಒತ್ತು ನೀಡಿದ ರಾಝ ಹರಾರೆ ಹರಿಕೇನ್ಸ್ ಬೌಲರ್​ಗಳನ್ನು ಚೆಂಡಾಡಿದರು. ಪರಿಣಾಮ ಕೇವಲ 15 ಎಸೆತಗಳಲ್ಲಿ ರಾಝ ಬ್ಯಾಟ್​ನಿಂದ ಅರ್ಧಶತಕ ಮೂಡಿಬಂತು.

ಅರ್ಧಶತಕದ ಬಳಿಕ ಸಿಡಿಲಬ್ಬರ ಮುಂದುವರೆಸಿದ ಸಿಕಂದರ್ ರಾಝ ಕೇವಲ 21 ಎಸೆತಗಳಲ್ಲಿ 6 ಭರ್ಜರಿ ಸಿಕ್ಸ್ ಹಾಗೂ 5 ಫೋರ್​ಗಳೊಂದಿಗೆ 70 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಅಷ್ಟರಲ್ಲಾಗಲೇ ಬುಲವಾಯೊ ಬ್ರೇವ್ಸ್ ತಂಡವು 9 ಓವರ್​ಗಳಲ್ಲಿ 133 ರನ್ ಕಲೆಹಾಕಿತ್ತು. ಅಂತಿಮ ಓವರ್​ನಲ್ಲಿ 3 ರನ್​ ಕಲೆಹಾಕುವ ಮೂಲಕ ಬುಲವಾಯೊ ಬ್ರೇವ್ಸ್ ತಂಡವು 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು.

ರಾಕಿಂಗ್ ರಾಝ ದಾಖಲೆ:

ಈ ಪಂದ್ಯದಲ್ಲಿ ಕೇವಲ 15 ಎಸೆತಗಳಲ್ಲಿ ಅರ್ಧಶತಕ ಪೂರೈಸುವ ಮೂಲಕ ಸಿಕಂದರ್ ರಾಝ ಝಿಮ್ ಆಫ್ರೊ ಟಿ10 ಲೀಗ್​ನಲ್ಲಿ ಅತೀ ವೇಗದ ಅರ್ಧಶತಕ ಸಿಡಿಸಿದ ದಾಖಲೆ ನಿರ್ಮಿಸಿದ್ದಾರೆ.

ಬುಲವಾಯೊ ಬ್ರೇವ್ಸ್ ಪ್ಲೇಯಿಂಗ್ 11: ಬೆನ್ ಮೆಕ್‌ಡರ್ಮಾಟ್ (ವಿಕೆಟ್ ಕೀಪರ್) , ಬ್ಯೂ ವೆಬ್‌ಸ್ಟರ್ , ಸಿಕಂದರ್ ರಾಝ (ನಾಯಕ) , ರಿಯಾನ್ ಬರ್ಲ್ , ಟಿಮಿಸೆನ್ ಮರುಮಾ , ತಿಸಾರಾ ಪೆರೆರಾ , ಪ್ಯಾಟ್ರಿಕ್ ಡೂಲಿ , ಜ್ಯಾಕ್ ಪ್ರೆಸ್‌ವಿಡ್ಜ್ , ಟೈಮಲ್ ಮಿಲ್ಸ್ , ಟಾಸ್ಕಿನ್ ಅಹ್ಮದ್ , ಫರಾಜ್ ಅಕ್ರಮ್.

ಇದನ್ನೂ ಓದಿ: Saud Shakeel: ಸಚಿನ್, ಸೆಹ್ವಾಗ್ ದಾಖಲೆ ಸರಿಗಟ್ಟಿದ ಸೌದ್ ಶಕೀಲ್

ಹರಾರೆ ಹರಿಕೇನ್ಸ್ ಪ್ಲೇಯಿಂಗ್ 11: ರಾಬಿನ್ ಉತ್ತಪ್ಪ (ವಿಕೆಟ್ ಕೀಪರ್) , ಎವಿನ್ ಲೂಯಿಸ್, ರೆಗಿಸ್ ಚಕಬ್ವಾ , ಡೊನಾವನ್ ಫೆರೇರಾ , ಇಯಾನ್ ಮೊರ್ಗನ್ (ನಾಯಕ) , ಮೊಹಮ್ಮದ್ ನಬಿ , ಇರ್ಫಾನ್ ಪಠಾಣ್ , ಸಮಿತ್ ಪಟೇಲ್ , ಬ್ರ್ಯಾಂಡನ್ ಮಾವುಟಾ , ನಂದ್ರೆ ಬರ್ಗರ್ , ಲ್ಯೂಕ್ ಜೊಂಗ್ವೆ.