The Hundred: ಜನ್ಮ ದಿನದಂದೇ ಹ್ಯಾಟ್ರಿಕ್ ವಿಕೆಟ್ ಪಡೆದು ಮಿಂಚಿದ ಆಂಗ್ಲ ವೇಗಿ..!

ಕ್ರಿಕೆಟ್​ನಲ್ಲಿ (Cricket) ಡೆತ್ ಓವರ್​ ಬೌಲರ್​ಗಳಿಗೆ ಬಹಳ ಮಹತ್ವವಿದೆ. ಏಕೆಂದರೆ ಒಂದು ತಂಡದ ಸೋಲು ಅಥವಾ ಗೆಲುವು ಇನ್ನಿಂಗ್ಸ್‌ನ ಕೊನೆಯ ಓವರ್​ಗಳನ್ನು ಬೌಲ್ ಮಾಡುವ ಬೌಲರ್​ಗಳ ತಂತ್ರದ ಮೇಲೆ ನಿಂತಿರುತ್ತದೆ. ಒಂದು ವೇಳೆ ಆ ಬೌಲರ್‌ ರನ್​ಗಳಿಗೆ ಕಡಿವಾಣ ಹಾಕಿದರೆ ತಂಡಕ್ಕೆ ಲಾಭ ಜಾಸ್ತಿ, ಇದಕ್ಕೆ ತದ್ವಿರುದ್ಧವಾಗಿ ಸರಾಗವಾಗಿ ರನ್ ಬಿಟ್ಟುಕೊಟ್ಟರೆ ತಂಡಕ್ಕೆ ಹಿನ್ನಡೆಯಾಗುವುದಂತು ಖಚಿತ. ಸಾಮಾನ್ಯವಾಗಿ ಡೆತ್ ಓವರ್​ಗಳಲ್ಲಿ ಹೆಚ್ಚಾಗಿ ಬ್ಯಾಟರ್​ಗಳ ಅಬ್ಬರವೇ ಹೆಚ್ಚಿರುತ್ತದೆ. ಅಪರೂಪಕ್ಕೊಮ್ಮೆ ಅದರಲ್ಲೂ ಕೆಲವೇ ಕೆಲವು ಅನಭವಿ ಬೌಲರ್​ಗಳು ಮಾತ್ರ ಡೆತ್ ಓವರ್​ಗಳಲ್ಲಿ ಮೇಲುಗೈ ಸಾಧಿಸುತ್ತಾರೆ. ಇದೀಗ ಅಂತಹದೆ ಘಟನೆಯೊಂದು ದಿ ಹಂಡ್ರೆಂಡ್ (The Hundred) ಲೀಗ್​ನಲ್ಲಿ ನಡೆದಿದೆ.

ಈ ಲೀಗ್​ನಲ್ಲಿ ಸದರ್ನ್ ಬ್ರೇವ್ ತಂಡದ ಪರ ಕಣಕ್ಕಿಳಿದಿದ್ದ ವೇಗಿ ಟೈಮಲ್ ಮಿಲ್ಸ್ ಡೆತ್ ಓವರ್​ನಲ್ಲಿ ಹ್ಯಾಟ್ರಿಕ್ ವಿಕೆಟ್ ಪಡೆದು ಮಿಂಚಿದ್ದಾರೆ. ಅದರಲ್ಲೂ ಈ ಹ್ಯಾಟ್ರಿಕ್​ ವಿಕೆಟ್​ನ ವಿಶೇತೆಯೆಂದರೆ ಮಿಲ್ಸ್, ತಮ್ಮ 31ನೇ ಜನ್ಮದಿನದಂದು ಈ ಸಾಧನೆ ಮಾಡಿದ್ದಾರೆ.

The Hundred: 23 ಎಸೆತಗಳಲ್ಲಿ 6 ಬೌಂಡರಿ, 5 ಸಿಕ್ಸರ್! 278ರ ಸ್ಟ್ರೈಕ್ ರೇಟ್‌ನಲ್ಲಿ ಬ್ಯಾಟಿಂಗ್ ಸುನಾಮಿ ಎಬ್ಬಿಸಿದ ರಸೆಲ್

87 ರನ್​ಗಳಿಗೆ ಆಲ್ ಔಟ್

ವೇಲ್ಸ್ ಫೈರ್ ಮತ್ತು ಸದರ್ನ್ ಬ್ರೇವ್ ನಡುವೆ ನಡೆದ ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ವೇಲ್ಸ್ ಫೈರ್ ತಂಡ 100 ಎಸೆತಗಳಲ್ಲಿ 87 ರನ್​ಗಳಿಗೆ ಆಲ್ ಔಟ್ ಆಯಿತು. ಈ ತಂಡವನ್ನು ಆಲ್ ಔಟ್ ಮಾಡುವಲ್ಲಿ ಸದರ್ನ್ ಬ್ರೇವ್ ಬೌಲರ್ ಟೈಮಲ್ ಮಿಲ್ಸ್ ಪ್ರಮುಖ ಪಾತ್ರ ವಹಿಸಿದ್ದಾರೆ.

ಹುಟ್ಟುಹಬ್ಬದಂದು 4 ವಿಕೆಟ್

ವೇಲ್ಸ್ ಫೈರ್ ವಿರುದ್ಧ ಟೈಮಲ್ ಮಿಲ್ಸ್ 20 ಎಸೆತಗಳನ್ನು ಬೌಲ್ ಮಾಡಿ ಕೇವಲ 13 ರನ್ ನೀಡಿ 4 ವಿಕೆಟ್ ಪಡೆದರು. ಈ ಪೈಕಿ, ಅವರು ವೆಲ್ಸ್ ಫೈರ್ ಇನ್ನಿಂಗ್ಸ್‌ನ ಕೊನೆಯ 3 ಎಸೆತಗಳಲ್ಲಿ ಅಂದರೆ, 98, 99 ಮತ್ತು 100 ನೇ ಎಸೆತದಲ್ಲಿ 3 ವಿಕೆಟ್ ಪಡೆದು ಹ್ಯಾಟ್ರಿಕ್ ಸಾಧನೆ ಮಾಡಿದರು. ಮಿಲ್ಸ್ ಅವರ ಹ್ಯಾಟ್ರಿಕ್‌ ವಿಕೆಟ್​ ಬಲಿಯಾದ ಬ್ಯಾಟ್ಸ್‌ಮನ್‌ಗಳಲ್ಲಿ ಬೆನ್ ಗ್ರೀನ್, ಹ್ಯಾರಿಸ್ ರೌಫ್ ಮತ್ತು ಡೇವಿಡ್ ಪೈನ್ ಸೇರಿದ್ದರು. ಈ ಮೂವರನ್ನು 3 ಎಸೆತಗಳಲ್ಲಿ ಬೇಟೆಯಾಡುವ ಮೂಲಕ ಮಿಲ್ಸ್ ತಮ್ಮ ಹುಟ್ಟುಹಬ್ಬದ ಸಂಭ್ರಮವನ್ನು ಇಮ್ಮಡಿಗೊಳಿಸಿದರು.

⛔️ STOP SCROLLING! ⛔️

Enjoy this Tymal Mills hat-trick! 🤩#TheHundred pic.twitter.com/ILMlsGZX5P

— The Hundred (@thehundred) August 12, 2023

ಇನ್ನು ವೆಲ್ಸ್ ಫೈರ್ ನೀಡಿದ 88 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಸದರ್ನ್ ಬ್ರೇವ್ ತಂಡ 41 ಎಸೆತಗಳು ಬಾಕಿ ಇರುವಂತೆಯೇ 9 ವಿಕೆಟ್‌ಗಳಿಂದ ಪಂದ್ಯವನ್ನು ಗೆದ್ದುಕೊಂಡಿತು.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 11:23 am, Sun, 13 August 23