ದ್ವಿಶತಕ ಬಾರಿಸಿ ವಿಶ್ವ ದಾಖಲೆ ನಿರ್ಮಿಸಿದ ಫಾನ್ ಸ್ಕಾಲ್ಕ್​ವೇಕ್

ಹರಾರೆಯಲ್ಲಿ ನಡೆದ ಯೂತ್ ಒಡಿಐ ಪಂದ್ಯದಲ್ಲಿ ಸೌತ್ ಆಫ್ರಿಕಾ ಅಂಡರ್ 19 ತಂಡದ ಆರಂಭಿಕ ದಾಂಡಿಗ ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ ದ್ವಿಶತಕ ಸಿಡಿಸಿದ್ದಾರೆ. ಈ ಡಬಲ್ ಸೆಂಚುರಿಯೊಂದಿಗೆ ಅಂಡರ್-19 ಏಕದಿನ ಪಂದ್ಯದಲ್ಲಿ ದ್ವಿಶತಕ ಬಾರಿಸಿದ ವಿಶ್ವದ ಮೊದಲ ಬ್ಯಾಟರ್ ಎನಿಸಿಕೊಂಡಿದ್ದಾರೆ. ಝಿಂಬಾಬ್ವೆ ಅಂಡರ್-19 ತಂಡದ ವಿರುದ್ಧದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಸೌತ್ ಆಫ್ರಿಕಾ ತಂಡವು ಬ್ಯಾಟಿಂಗ್ ಆಯ್ದುಕೊಂಡಿದ್ದರು.

ಅದರಂತೆ ಮೊದಲು ಬ್ಯಾಟ್ ಮಾಡಿದ ಸೌತ್ ಆಫ್ರಿಕಾ ಪರ ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ ಹಾಗೂ ಅದ್ನಾನ್ ಆರಂಭಿಕರಾಗಿ ಕಣಕ್ಕಿಳಿದಿದ್ದರು. ಅದ್ನಾನ್ ಕೇವಲ 3 ರನ್​ಗಳಿಸಿ ಔಟಾದರೆ, ಆ ಬಳಿಕ ಬಂದ ನಾಯಕ ಮೊಹಮ್ಮದ್ ಬುಲ್ಬುಲಿಯಾ ಕೇವಲ 13 ರನ್​ಗಳಿಸಿ ವಿಕೆಟ್ ಒಪ್ಪಿಸಿದರು.

ಈ ಹಂತದಲ್ಲಿ ಜೊತೆಗೂಡಿದ ಜೋರಿಚ್ ಹಾಗೂ ಜೇಸನ್ ರೌಲ್ಸ್ ಭರ್ಜರಿ ಜೊತೆಯಾಟ ಪ್ರದರ್ಶಿಸಿದರು. ಅತ್ತ ರೌಲ್ಸ್ 76 ಎಸೆತಗಳಲ್ಲಿ 76 ರನ್ ಕಲೆಹಾಕಿದರೆ, ಅತ್ತ ಜೋರಿಚ್ ಆಕರ್ಷಕ ಬ್ಯಾಟಿಂಗ್​ನೊಂದಿಗೆ ಶತಕ ಪೂರೈಸಿದರು.

ಶತಕ ಬಳಿಕ ಕೂಡ ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ ಆರ್ಭಟ ಮುಂದುವರೆಸಿದ್ದರು. ಈ ಮೂಲಕ ದ್ವಿಶತಕವನ್ನು ಪೂರೈಸಿದರು. ಈ ಡಬಲ್​ ಸೆಂಚುರಿಯೊಂದಿಗೆ ಕಿರಿಯರ ಏಕದಿನ ಕ್ರಿಕೆಟ್​ನಲ್ಲಿ ದ್ವಿಶತಕ ಬಾರಿಸಿದ ವಿಶ್ವದ ಮೊದಲ ಬ್ಯಾಟರ್ ಎಂಬ ವಿಶ್ವ ದಾಖಲೆಯನ್ನು ತಮ್ಮದಾಗಿಸಿಕೊಂಡರು.

ಅಂತಿಮವಾಗಿ 153 ಎಸೆತಗಳನ್ನು ಎದುರಿಸಿದ ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ 6 ಸಿಕ್ಸ್ ಹಾಗೂ 19 ಫೋರ್​ಗಳೊಂದಿಗೆ 215 ರನ್ ಕಲೆಹಾಕಿದರು. ಈ ಡಬಲ್ ಸೆಂಚುರಿ ನೆರವಿನೊಂದಿಗೆ ಸೌತ್ ಆಫ್ರಿಕಾ ಅಂಡರ್ 19 ತಂಡವು 49.5 ಓವರ್​ಗಳಲ್ಲಿ 385 ರನ್ ಕಲೆಹಾಕಿತು.

386 ರನ್​ಗಳ ಕಠಿಣ ಗುರಿ ಬೆನ್ನತ್ತಿದ ಝಿಂಬಾಬ್ವೆ ಅಂಡರ್-19 ತಂಡವು ಮೊದಲ ವಿಕೆಟ್​ಗೆ 53 ರನ್​ ಕಲೆಹಾಕಿತು. ಈ ಆ ಬಳಿಕ ದಿಢೀರ್ ಕುಸಿತಕ್ಕೊಳಗಾದ ಝಿಂಬಾಬ್ವೆ ತಂಡ 107 ರನ್​ಗಳಿಸಿ ಸರ್ವಪತನ ಕಂಡಿತು. ಈ ಮೂಲಕ ಸೌತ್ ಆಫ್ರಿಕಾ ಅಂಡರ್-19 ತಂಡವು ಬರೋಬ್ಬರಿ 278 ರನ್​ಗಳ ಭರ್ಜರಿ ಜಯ ಸಾಧಿಸಿದೆ.

ಇದನ್ನೂ ಓದಿ: 11 ಭರ್ಜರಿ ಸಿಕ್ಸ್, 6 ಫೋರ್​: ಶರವೇಗದ ಶತಕ ಸಿಡಿಸಿ ಭರ್ಜರಿ ದಾಖಲೆ ಬರೆದ ಟಿಮ್ ಡೇವಿಡ್

ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ ವಿಶ್ವ ದಾಖಲೆ:

ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ ಬಾರಿಸಿದ 215 ರನ್​ಗಳು ಯೂತ್ ಒಡಿಐ ಕ್ರಿಕೆಟ್​ನಲ್ಲಿ ಮೂಡಿಬಂದ ಗರಿಷ್ಠ ವೈಯುಕ್ತಿಕ ಸ್ಕೋರ್. ಇದಕ್ಕೂ ಮುನ್ನ ಈ ದಾಖಲೆ ಶ್ರೀಲಂಕಾದ ಹಸಿತಾ ಬೊಯಗೋಡ ಹೆಸರಿನಲ್ಲಿತ್ತು. 2018 ರಲ್ಲಿ ಕೀನ್ಯಾ ವಿರುದ್ಧ ಹಸಿತಾ ಬೊಯಗೋಡ 191 ರನ್​ ಬಾರಿಸಿ ದಾಖಲೆ ನಿರ್ಮಿಸಿದ್ದರು. ಇದೀಗ ಈ ದಾಖಲೆಯನ್ನು ಅಳಿಸಿ ಹಾಕಿ ಜೋರಿಚ್ ಫಾನ್ ಸ್ಕಾಲ್ಕ್​ವೇಕ್ ಹೊಸ ವಿಶ್ವ ದಾಖಲೆ ನಿರ್ಮಿಸಿದ್ದಾರೆ.