ಚೊಚ್ಚಲ ಟೆಸ್ಟ್​ನಲ್ಲೇ ದ್ವಿಶತಕ ಬಾರಿಸಿ ಹಲವು ದಾಖಲೆಗಳನ್ನು ತನ್ನ ಹೆಸರಿಗೆ ಬರೆದುಕೊಂಡ ಡೆವನ್ ಕಾನ್ವೇ

ಲಾರ್ಡ್ಸ್(ಲಂಡನ್): ಪದಾರ್ಪಣೆಯ ಟೆಸ್ಟ್​ನಲ್ಲೇ ಅಮೋಘ ದ್ವಿಶತಕ ಬಾರಿಸಿರುವ ನ್ಯೂಜಿಲೆಂಡ್​ ಆರಂಭ ಆಟಗಾರ ಡೆವನ್ ಕಾನ್ವೇ ಹಲವು ದಾಖಲೆಗಳಿಗೆ ಪಾತ್ರರಾಗುವ ಜೊತೆಗೆ ಇದೇ ತಿಂಗಳು 18 ರಿಂದ ನಡೆಯಲಿರುವ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ನಲ್ಲಿ ಕಿವೀಸ್ ವಿರುದ್ಧ ಆಡುವ ಭಾರತದ ಬೌಲರ್​ಗಳಿಗೆ ತಮ್ಮ ಫಾರ್ಮ್​ ಬಗ್ಗೆ ಒಂದು ಸೂಚನೆಯನ್ನೂ ರವಾನಿಸಿದ್ದಾರೆ. ನ್ಯೂಜಿಲೆಂಡ್​ ಮತ್ತು ಇಂಗ್ಲೆಂಡ್ ನಡುವೆ ಲಾರ್ಡ್ಸ್ ಮೈದಾನದಲ್ಲಿ ನಡೆಯುತ್ತಿರುವ ಟೆಸ್ಟ್​ನ​ ಮೊದಲ ದಿನವಾಗಿದ್ದ ಮೊನ್ನೆ (ಮೇ 2, ಬುಧವಾರ) ಅಜೇಯ ಶತಕ ಬಾರಿಸಿದ್ದ ಕಾನ್ವೇ ನಿನ್ನೆ (ಮೇ 3, ಗುರುವಾರ) ಅದೇ ಫಾರ್ಮ್ ಮುಂದುವರೆಸಿ ದ್ವಿಶತಕವನ್ನು ಪೂರೈಸಿದರು. ಸಾಮಾನ್ಯವಾಗಿ ಕ್ರಿಕೆಟ್​ ಆಡುವ ಪ್ರತಿಯೊಂದು ದೇಶದ ಬ್ಯಾಟ್ಸ್​ಮನ್​ನ ಮಹದಾಸೆ ಕ್ರಿಕೆಟ್​ ಕಾಶಿ ಎಂದು ಕರೆಸಿಕೊಳ್ಳುವ ಲಾರ್ಡ್ಸ್ ಮೈದಾನದಲ್ಲಿ ಸೆಂಚುರಿ ಬಾರಿಸುವುದಾಗಿರುತ್ತದೆ. ಆದರೆ, ಕಾನ್ವೇ ತನ್ನ ಕೆರಿಯರ್​ನ ಮೊದಲ ಪಂದ್ಯದಲ್ಲೇ ಆ ಕನಸನ್ನು ಸಾಕಾರಗೊಳಿಸಿಕೊಂಡಿದ್ದಾರೆ.

ಕಾನ್ವೇ, ಪದಾರ್ಪಣೆ ಟೆಸ್ಟ್​ನಲ್ಲೇ ದ್ವಿಶತಕ ಬಾರಿಸಿದ ವಿಶ್ವದ 7ನೇ ಮತ್ತು ನ್ಯೂಜಿಲೆಂಡ್​ನ ಎರಡನೇ ಆಟಗಾರನಾಗಿದ್ದಾರೆ. ಕಾನ್ವೇಗಿಂತ ಮೊದಲು ಮಧ್ಯಮ ಕ್ರಮಾಂಕದ ಆಟಗಾರನಾಗಿದ್ದ ಮ್ಯಾಥ್ಯೂ ಸಿಂಕ್ಲೇರ್ 1999ರಲ್ಲಿ ವೆಸ್ಟ್​ ಇಂಡೀಸ್ ವಿರುದ್ಧ ತನ್ನ ವೃತ್ತಿಬದುಕಿನ ಮೊದಲ ಪಂದ್ಯದಲ್ಲೇ (ವೆಲ್ಲಿಂಗ್ಟನ್) 214 ರನ್ ಬಾರಿಸಿದ್ದರು. ಇವರಿಬ್ಬರಲ್ಲದೆ, ಲಾರೆನ್ಸ್ ರೋವ್ (ವೆಸ್ಟ್​ ಇಂಡೀಸ್), ಬ್ರೆಂಡನ್ ಕುರುಪ್ಪು (ಶ್ರೀಲಂಕಾ), ಜಾಕೆಸ್ ರುಡಾಲ್ಫ್ (ದಕ್ಷಿಣ ಆಫ್ರಿಕಾ), ಕೈಲ್ ಮೇಯರ್ಸ್ (ವೆಸ್ಟ್​ ಇಂಡೀಸ್) ತಮ್ಮ ಚೊಚ್ಚಲು ಪಂದ್ಯಗಳಲ್ಲೇ ದ್ವಿಶತಕ ಬಾರಿಸಿದ ಕೀರ್ತಿಗೆ ಪಾತ್ರರಾಗಿದ್ದಾರೆ.

ಅಂದಹಾಗೆ, ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಕ್ರಿಕೆಟ್​ ಪದಾರ್ಪಣೆ ಮಾಡಿದ ಆಟಗಾರರಲ್ಲಿ ಅತಿಹೆಚ್ಚು ರನ್ ಗಳಿಸಿದ ದಾಖಲೆಯನ್ನು ಕಾನ್ವೇ ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ. ಇದಕ್ಕೆ ಮೊದಲು ವೆಸ್ಟ್​ ಇಂಡೀಸ್​ನ ಜಾರ್ಜ್​ ಹೆಡ್ಲೀ ಅವರು 1930 ರಲ್ಲಿ ಬ್ರಿಜ್​ಟೌನ್ ಮೈದಾನದಲ್ಲಿ ಬಾರಿಸಿದ 176 ರನ್ ದಾಖಲೆಯಾಗಿತ್ತು. ನ್ಯೂಜಿಲೆಂಡ್​ನವರೇ ಆಗಿರುವ ಹಮೀಶ್ ರುದರ್​ಫೋರ್ಡ್​ ಡ್ಯುನೆಡಿನ್​ನಲ್ಲಿ ಇಂಗ್ಲೆಂಡ್​ ವಿರುದ್ಧ ಆಡಿದ ತಮ್ಮ ಕೆರಿಯರ್​ನ ಮೊದಲ ಪಂದ್ಯದಲ್ಲಿ 171 ರನ್ ಬಾರಿಸಿದ್ದರು. ಹಾಗೆಯೇ, ಇಂಗ್ಲೆಂಡ್​ನಲ್ಲಿ ಪದಾರ್ಪಣೆ ಮಾಡಿದ ಆಟಗಾರರ ಪೈಕಿಯೂ ಕಾನ್ವೇ ಅವೆ ಸ್ಕೋರ್ ಅತ್ಯಧಿಕವಾಗಿದೆ. ಇಂಗ್ಲೆಂಡ್​ನವರೇ ಆಗಿದ್ದ ಭಾರತದ ಕೆ.ಎಸ್ ರಣ್​ಜಿತ್​ ಸಿನ್ಹಜೀ ಅವರು 1896ರಲ್ಲಿ ಮ್ಯಾಂಚೆಸ್ಟರ್​ನಲ್ಲಿ ಬಾರಿಸಿದ ಅಜೇಯ 154 ರನ್ ಇದುವರೆಗಿನ ಅತ್ಯಧಿಕ ಸ್ಕೋರ್ ಆಗಿತ್ತು.

ಇಂಗ್ಲೆಂಡ್​ ವಿರುದ್ಧ ಡಬಲ್ ಸೆಂಚುರಿ ಬಾರಿಸಿದ ಕೇವಲ ನಾಲ್ಕನೇ ಆಟಗಾರ ಕಾನ್ವೇ ಆಗಿದ್ದಾರೆ ಮತ್ತು ಲಾರ್ಡ್ಸ್​ ಮೈದಾನದಲ್ಲಿ ಮಾರ್ಟಿನ್ ಡೊನ್ನೆಲ್ಲಿ (206) ನಂತರ ಆ ಸಾಧನೆ ಮಾಡಿರುವ ಎರಡನೇ ಬ್ಯಾಟ್ಸ್​ಮನ್​ ಆಗಿದ್ದಾರೆ. ನೇಥನ್ ಆಸ್ಲೆ ಮತ್ತು ಬಿಜೆ ವಾಟ್ಲಿಂಗ್ ದ್ವಿಶತಕ ಬಾರಿಸಿರುವ ಇನ್ನಿಬ್ಬರು ಕಿವೀಸ್ ಆಟಗಾರರಾಗಿದ್ದಾರೆ.

ಕಾನ್ವೇ ಅವರು ಮಾರ್ಕ್​ ವುಡ್​ ಅವರ ಎಸೆತವೊಂದನ್ನು ಸ್ಕ್ವೇರ್​ಲೆಗ್ ಮೇಲಿಂದ ಸಿಕ್ಸರ್​ ಬಾರಿಸಿ ತಮ್ಮ ದ್ವಿಶತಕವನ್ನು ಪೂರೈಸಿದರು. ಅವರಿಗಿಂತ ಮೊದಲು ಸಿಂಕ್ಲೇರ್ (ಕ್ರೈಸ್ಟ್​ಚರ್ಚ್​ನಲ್ಲಿ ಪಾಕಿಸ್ತಾನದ ವಿರುದ್ಧ, 2001) ಮತ್ತು ಬ್ರೆಂಡನ್ ಮೆಕಲ್ಲಮ್ (ಶಾರ್ಜಾ, 2014-15, ಪಾಕಿಸ್ತಾನದ ವಿರುದ್ಧ) ಸಿಕ್ಸ್ ಬಾರಿಸಿ ದ್ವಿಶತಕ ಪೂರೈಸಿದ್ದರು.

ಈ ಪಂದ್ಯದಲ್ಲಿ ನ್ಯೂಜಿಲೆಂಡ್ ಗಳಿಸಿದ ಮೊತ್ತ 378 ಮತ್ತು ಕಾನ್ವೇ ಅವರ ಕಾಣಿಕೆ 200. ಅಂದರೆ ಶೇಕಡಾ 52.91 ರಷ್ಟು ರನ್ ಅವರ ಬ್ಯಾಟ್​ನಿಂದ ಬಂದವು. ಪಾದಾರ್ಪಣೆಯ ಟೆಸ್ಟ್​ನಲ್ಲಿ ಟೀಮಿಗೆ ಅತ್ಯಧಿಕ ಕಾಣಿಗೆ ನೀಡಿದ ಆಟಗಾರರಲ್ಲಿ ಕಾನ್ವೇಗೆ ಎರಡನೇ ಸ್ಥಾನ. 1876-77 ಆಶಸ್​ ಸರಣಿಯ ಮೊದಲ ಟೆಸ್ಟ್​ನಲ್ಲಿ ಇಂಗ್ಲೆಂಡ್ 245 ರನ್ ಗಳಿಸಿತ್ತು ಮತ್ತು ಅದರಲ್ಲಿ ಚಾರ್ಲ್ಸ್ ಬ್ಯಾನರ್​ಮನ್ ಅವರು ಕಾಂಟ್ರಿಬ್ಯೂಶನ್ 165 (ಶೇಕಡಾ 67.35) ಆಗಿತ್ತು. ಇದು ಟೆಸ್ಟ್​ ಕ್ರಿಕೆಟ್ ಇತಿಹಾಸದ ಮೊಟ್ಟ ಮೊದಲ ಟೆಸ್ಟ್ ಆಗಿತ್ತು.

ಹೆನ್ರಿ ನಿಕೊಲಾಸ್​ ಜೊತೆ ಕಾನ್ವೇ ಸೇರಿಸಿದ 174ರನ್ ಇಂಗ್ಲೆಂಡ್ ವಿರುದ್ಧ ನ್ಯೂಜಿಲೆಂಡ್​ ಟೀಮಿನ ಅತ್ಯಧಿಕ ನಾಲ್ಕನೇ ವಿಕೆಟ್​ ಜತೆಗಾರಿಕೆಯಾಗಿದೆ. ಇದಕ್ಕೆ ಮೊದಲು, 1987-88ರಲ್ಲಿ ಮಾರ್ಕ್ ಗ್ರೇಟ್​ಬ್ಯಾಚ್​ ಮತ್ತು ಮಾರ್ಟಿನ್ ಕ್ರೋವ್ 155 ರನ್​ಗಳ ಜತೆಯಾಟದಲ್ಲಿ ಪಾಲ್ಗೊಂಡಿದ್ದರು.

ಅಂದಹಾಗೆ, ನ್ಯೂಜಿಲೆಂಡ್​ 378ರನ್​ಗಳ ಮೊತ್ತಕ್ಕೆ ಉತ್ತರವಾಗಿ ಎರಡನೇ ದಿನದಾಟ ಕೊನೆಗೊಂಡಾಗ ಇಂಗ್ಲೆಂಡ್ ​2 ವಿಕೆಟ್ ಕಳೆದುಕೊಂಡು 111 ರನ್ ಗಳಿಸಿತ್ತು. ಆರಂಭ ಆಟಗಾರ ರೋರಿ ಬರ್ನ್ಸ್ 59 ಮತ್ತು ನಾಯಕ ಜೋ ರೂಟ್​ 42 ರನ್ ಗಳಿಸಿ ಕ್ರೀಸ್​ ಮೇಲಿದ್ದರು.

ಇದನ್ನೂ ಓದಿ: ಮ್ಯಾಚ್ ಫಿಕ್ಸಿಂಗ್, ಪಾಕ್ ವಿರುದ್ಧದ ಸೋಲಿನೊಂದಿಗೆ ಅಂತ್ಯವಾಯ್ತು ಈ ಇಬ್ಬರು ಭಾರತೀಯರ ಕ್ರಿಕೆಟ್ ಬದುಕು