ಯಶಸ್ವಿ ಜೈಸ್ವಾಲ್ ಔಟಾ ಅಥವಾ ನಾಟೌಟಾ? ವಿವಾದಕ್ಕೆ ಕಾರಣವಾದ ಅಂಪೈರ್ ತೀರ್ಪು..!

ಮೆಲ್ಬೋರ್ನ್​​ನಲ್ಲಿ ನಡೆದ ಆಸ್ಟ್ರೇಲಿಯಾ-ಭಾರತ ನಡುವಣ 4ನೇ ಟೆಸ್ಟ್ ಪಂದ್ಯದಲ್ಲಿ ಮೂರನೇ ಅಂಪೈರ್ ನೀಡಿದ ತೀರ್ಪುವೊಂದು ವಿವಾದಕ್ಕೀಡಾಗಿದೆ. ಈ ಪಂದ್ಯದ ದ್ವಿತೀಯ ಇನಿಂಗ್ಸ್​ನಲ್ಲಿ 71ನೇ ಓವರ್​ನಲ್ಲಿ ಯಶಸ್ವಿ ಜೈಸ್ವಾಲ್ ಅವರ ಔಟ್​ಗಾಗಿ ಆಸ್ಟ್ರೇಲಿಯಾ ಫೀಲ್ಡರ್​ಗಳು ಮನವಿ ಮಾಡಿದ್ದರು.

ಪ್ಯಾಟ್ ಕಮಿನ್ಸ್ ಎಸೆದ ಈ ಓವರ್​ನ 5ನೇ ಎಸೆತದಲ್ಲಿ ಜೈಸ್ವಾಲ್ ಭರ್ಜರಿ ಹೊಡೆತಕ್ಕೆ ಮುಂದಾಗಿದ್ದರು. ಆದರೆ ಚೆಂಡು ಬ್ಯಾಟ್ ಬಳಿಯಿಂದ ಸಾಗಿ ವಿಕೆಟ್ ಕೀಪರ್ ಕೈ ಸೇರಿದೆ. ಇದರ ಬೆನ್ನಲ್ಲೇ ವಿಕೆಟ್ ಕೀಪರ್ ಅಲೆಕ್ಸ್ ಕ್ಯಾರಿ ಸೇರಿದಂತೆ ಎಲ್ಲರೂ ಕ್ಯಾಚ್​ಗಾಗಿ ಮನವಿ ಮಾಡಿದ್ದಾರೆ.

ಆದರೆ ಫೀಲ್ಡ್ ಅಂಪೈರ್ ನಾಟೌಟ್ ಎಂದಿದ್ದಾರೆ. ಇದರ ಬೆನ್ನಲ್ಲೇ ಆಸ್ಟ್ರೇಲಿಯಾ ನಾಯಕ ಪ್ಯಾಟ್ ಕಮಿನ್ಸ್ ಡಿಆರ್​ಎಸ್ ಮೊರೆ ಹೋದರು. ಮೂರನೇ ಅಂಪೈರ್ ಪರಿಶೀಲನೆ ವೇಳೆ ಚೆಂಡು ಬ್ಯಾಟ್ ಬಳಿಯಿಂದ ಸಾಗುತ್ತಿರುವುದು ಕಂಡು ಬಂದರೂ, ಸ್ನೀಕೊ ಮೀಟರ್​ನಲ್ಲಿ ಯಾವುದೇ ಸ್ಪೈಕ್ ಕಾಣಿಸಿರಲಿಲ್ಲ.

ಆದರೆ ಚೆಂಡಿನ ಚಲನೆಯನ್ನು ಹಲವು ಬಾರಿ ಪರಿಶೀಲಿಸಿದ ಬಳಿಕ ಮೂರನೇ ಅಂಪೈರ್ ಔಟ್ ನೀಡಿದ್ದಾರೆ. ಚೆಂಡು ಬ್ಯಾಟ್​ ಅನ್ನು ಸವರಿ ತನ್ನ ಚಲನೆ ಬದಲಿಸಿರುವ ಸಾಧ್ಯತೆಯನ್ನು ಪರಿಗಣಿಸಿ ಮೂರನೇ ಅಂಪೈರ್ ಔಟ್ ಎಂದು ತೀರ್ಪು ನೀಡಿದರು.

ಆದರೆ ಸ್ನೀಕೊ ಮೀಟರ್​ನಲ್ಲಿ ಯಾವುದೇ ಏರಿಳಿತ ಕಂಡು ಬರದ ಕಾರಣ ಅಂಪೈರ್ ತೀರ್ಪಿಗೆ ಯಶಸ್ವಿ ಜೈಸ್ವಾಲ್ ಅಸಮಾಧಾನ ಹೊರಹಾಕಿದರು. ಇದಾಗ್ಯೂ ಅವರನ್ನು ಪೆವಿಲಿಯನ್​ ಕಡೆ ಹೋಗುವಂತೆ ಫೀಲ್ಡ್ ಅಂಪೈರ್ ಮನವೊಲಿಸಲು ಯಶಸ್ವಿಯಾದರು.

ಇದೀಗ ಮೂರನೇ ಅಂಪೈರ್ ನೀಡಿದ ತೀರ್ಪಿನ ಬಗ್ಗೆ ಪರ-ವಿರೋಧ ಚರ್ಚೆಗಳು ಶುರುವಾಗಿದ್ದು, ಈ ಮೇಲಿನ ವಿಡಿಯೋ ನೋಡಿ ಯಶಸ್ವಿ ಜೈಸ್ವಾಲ್ ಔಟಾ ಅಥವಾ ನಾಟೌಟಾ ಎಂಬುದನ್ನು ನೀವೇ ನಿರ್ಧರಿಸಿ.