Jofra Archer IPL 2021 RR Team Player: ವಿಂಡೀಸ್ನಿಂದ ಇಂಗ್ಲೆಂಡ್ಗೆ ಹೋಗಿ ವೇಗದ ಬೌಲರ್ಗಳ ಅಧಿಪತಿಯಾಗಿರುವ ಆರ್ಚರ್ಗೆ ರಾಜಸ್ತಾನ್ ರಾಯಲ್ಸ್ನಲ್ಲೂ ರಾಜಮರ್ಯಾದೆ!
Jofra Archer Profile: 2018ರ ಐಪಿಎಲ್ ಟೂರ್ನಿಯಲ್ಲಿ ಆರ್ಚರ್ 10 ಪಂದ್ಯಗಳನ್ನಾಡಿ 15 ವಿಕೆಟ್ ಪಡೆದರು, ಮರುವರ್ಷದ ಸೀಸನಲ್ಲಿ ಅವರು 11 ಪಂದ್ಯಗಳಲ್ಲಿ ಕಾಣಿಸಿಕೊಂಡು 11 ವಿಕೆಟ್ ಪಡೆದರು.
Updated on:Apr 14, 2021 | 1:49 PM
ಇಂಗ್ಲೆಂಡ್ನ ವೇಗದ ಬೌಲರ್ ಜೊಫ್ರಾ ಆರ್ಚರ್ ಅವರ ದೇಹದಾರ್ಢ್ಯತೆ ಮತ್ತು ಬೌಲಿಂಗ್ ಶೈಲಿಯನ್ನು ಗಮನಿಸಿದರೆ ಈ ನೀಳಕಾಯದ ಮನುಷ್ಯ ಗಂಟೆಗೆ 150 ಕಿ.ಮೀ ವೇಗದಲ್ಲಿ ಬೌಲ್ ಮಾಡಬಲ್ಲನೇ ಎಂಬ ಸಂಶಯ ಹುಟ್ಟುತ್ತದೆ. ಅದರೆ, ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟೀವ್ ಸ್ಮಿತ್ ಮತ್ತು ಮಧ್ಯಮ ಕ್ರಮಾಂಕದ ಆಟಗಾರ ಮಾರ್ನಸ್ ಲಬುಶೇನ್ ಅವರನ್ನೊಮ್ಮೆ ಕೇಳಿದರೆ, ಆರ್ಚರ್ ಯಾವ ವೇಗದಲ್ಲಿ ಮಾಡುತ್ತಾರೆ ಮತ್ತು ಅವರ ಎಸೆತ ಪಿಚ್ ಆದ ಮೇಲೆ ಹೇಗೆ ವಿಕೆಟ್ ಮತ್ತು ಬ್ಯಾಟ್ಸ್ಮನ್ ದೇಹದೆಡೆ ಚಿಮ್ಮುತ್ತದೆ ಎನ್ನುವುದನ್ನು ಹೇಳುತ್ತಾರೆ. 2019ರ ಆ್ಯಶಸ್ನಲ್ಲಿ ಇವರಿಬ್ಬರ ಹೆಲ್ಮೆಟ್ಗಳಿಗೆ ಆರ್ಚರ್ ಬೌನ್ಸರ್ಗಳು ಅಪ್ಪಳಿಸಿದ್ದವು. ಸ್ಮಿತ್ ಪೆಟ್ಟು ತಿಂದು ನೆಲಕ್ಕುರುಳಿದಾಗ ತನಗೆ ಆಸ್ಟ್ರೇಲಿಯಾದ ಆರಂಭ ಆಟಗಾರ ಫಿಲ್ ಹ್ಯೂಸ್ ಅವರ ನೆನಪಾಯಿತು ಎಂದು ಖುದ್ದು ಆರ್ಚರ್ ಹೇಳಿದ್ದರು. 2014 ರಲ್ಲಿ ಶೆಫೀಲ್ಡ್ ಷೀಲ್ಡ್ ಪಂದ್ಯವೊಂದನ್ನು ಆಡುತ್ತಿದ್ದಾಗ ಬೌನ್ಸರೊಂದು ಹ್ಯೂಸ್ ತಲೆಗೆ ಅಪ್ಪಳಿಸಿ ಅವರನ್ನು ಬಲಿತೆಗೆದುಕೊಂಡಿತ್ತು.
ಕೇವಲ ಮೂರು ವರ್ಷಗಳ ಅವಧಿಯಲ್ಲಿ ಅರ್ಚರ್ ವಿಶ್ವದ ಅಗ್ರಮಾನ್ಯ ಬೌಲರ್ಗಳಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದಾರೆ. ಅಸಲಿಗೆ ಅವರನ್ನು ಆಲ್ರೌಂಡರ್ಗಳ ಪಟ್ಟಿಗೆ ಸೇರಿಸಲಾಗಿದೆ. ಹಾಗೆ ನೋಡಿದರೆ, ಬ್ಯಾಟಿಂಗ್ ಮಾಡಲು ಕ್ರೀಸಿಗೆ ಆಗಮಿಸಿದಾಗ ಅವರು ಲಾಂಗ್ ಹ್ಯಾಂಡಲ್ ಉಪಯೋಗಿಸಿ ಒಂದಷ್ಟು ಭರ್ಜರಿ ಹೊಡೆತಗಳನ್ನು ಬಾರಿಸುವುದು ಬಿಟ್ಟರೆ ಹೇಳಿಕೊಳ್ಳುವ ಸಾಧನೆಯೇನೂ ಮಾಡಿಲ್ಲ. ಅವರ ಬ್ಯಾಟಿಂಗ್ ಅಂಕಿ-ಅಂಶಗಳು ಇದನ್ನು ಸಾಬೀತು ಮಾಡುತ್ತವೆ. ಇದುವರೆಗೆ ಆಡಿರುವ 13 ಟೆಸ್ಟ್ಗಳಲ್ಲಿ ಅವರ ಗರಿಷ್ಠ ಸ್ಕೋರ್ 30 ಆಗಿದೆ, 17 ಒಡಿಐಗಳಲ್ಲಿ ಅಜೇಯ 8 ಮತ್ತು 12 ಟಿ20ಐ ಪಂದ್ಯಗಳಲ್ಲಿ 18 ಅವರ ಅತ್ಯಧಿಕ ಸ್ಕೋರ್ಗಳಾಗಿವೆ. ಪ್ರಥಮ ದರ್ಜೆ ಪಂದ್ಯಗಳಲ್ಲಿ ಅವರ ಗರಿಷ್ಠ ಸ್ಕೋರ್ ಅಜೇಯ 81 ಆಗಿದೆ.
ಆರ್ಚರ್ ಅಸಲಿಗೆ ಬ್ರಿಟಿಷ್ ಪ್ರಜೆಯೇ ಅಲ್ಲ, ಮೂಲತಃ ವೆಸ್ಟ್ ಇಂಡೀಸ್ನ ಬಾರ್ಬೊಡಾಸ್ನವರು. ಅವರ ತಂದೆ ಇಂಗ್ಲಿಷ್ ಮತ್ತು ತಾಯಿ ಬಾಜನ್ (ಬಾರ್ಬೊಡಾಸ್) ಮೂಲದವರು. 2014 ರಲ್ಲಿ ಆರ್ಚರ್ ವೆಸ್ಟ್ ಇಂಡೀಸ್ ಪರ ಅಂಡರ್-19 ತಂಡದಲ್ಲಿ ಆಡಿದ್ದರು. ಆದರೆ ಇಂಗ್ಲೆಂಡ್ ತಂಡಕ್ಕೆ ಆಡುವುದು ಅವರ ಒಲವು ಮತ್ತು ಕನಸಾಗಿತ್ತು. ಹಾಗಾಗಿ ಇಂಗ್ಲೆಂಡ್ಗೆ ತೆರಳಿ ಸಸ್ಸೆಕ್ಸ್ ಕೌಂಟಿ ಕ್ಲಬ್ ಪರ ಆಡಲಾರಂಭಿಸಿದ್ದರು. ಅವರ ಪ್ರತಿಭೆಯನ್ನು ಗಮನಿಸಿದ್ದ ಈಸಿಬಿ (ಇಂಗ್ಲಿಷ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ) ಅವರು 2019 ರ ವಿಶ್ವಕಪ್ನಲ್ಲಿ ಆಡುವಂತೆ ಮಾಡಲು ಅರ್ಹತೆಯ ನಿಯಮಗಳನ್ನು ಬದಲಿಸಿ ಟೀಮಿನಲ್ಲಿ ಅವಕಾಶ ಕಲ್ಪಿಸಿತು. ಅಲ್ಲಿಂದ ಅರ್ಚರ್ ಹಿಂತಿರುಗಿ ನೋಡಿಲ್ಲ. ಈಗ ಎಲ್ಲ ಫಾರ್ಮಾಟ್ಗಳಲ್ಲೂ ಅವರು ಇಂಗ್ಲೆಂಡ್ ಟೀಮಿನ ಭಾಗವಾಗಿದ್ದಾರೆ.
ಆರ್ಚರ್ ಬೌಲಿಂಗ್ನಲ್ಲಿ ತಲೆಗೆ ಪೆಟ್ಟು ತಿಂದಿರುವ ಸ್ಟೀವ್ ಸ್ಮಿತ್
ಗಮನಿಸಬೇಕಾದ ಸಂಗತಿಯೆಂದರೆ, ಈಸಿಬಿ ಆರ್ಚರ್ ಅವರ ಪ್ರತಿಭೆಯನ್ನು ಗಮನಿಸುವ ಮೊದಲೇ ಇಂಡಿಯನ್ ಪ್ರಿಮೀಯರ್ ಲೀಗ್ನ ಫ್ರಾಂಚೈಸಿಗಳು ಅವರ ಬೆಳವಣಿಗೆಗಳ ಮೇಲೆ ಹದ್ದಿನ ಕಣ್ಣಿಟ್ಟಿದ್ದವು. ಆದರೆ, ಅವರನ್ನು 2018ರಲ್ಲಿ 7.20 ಕೋಟಿ ರೂಪಾಯಿ ಕೊಟ್ಟು ಖರೀದಿಸಿದ್ದು ರಾಜಸ್ತಾನ ರಾಯಲ್ಸ್. ಟಿ20 ಕ್ರಿಕೆಟ್ನಲ್ಲಿ ಆರ್ಚರ್ ಯುಟಿಲಿಟಿ ಆಟಗಾರ ಎನ್ನುವುದರಲ್ಲಿ ಸಂದೇಹವೇ ಇಲ್ಲ. ಚೆಂಡನ್ನು ತಮ್ಮ ಅತ್ಯದ್ಭುತ ಶಕ್ತಿ ಮೂಲಕ ಮೈದಾನದಾಚೆ ಕಳಿಸಬಲ್ಲರು ಮತ್ತು ಅದೇ ಚೆಂಡು ಬೌಲಿಂಗ್ ಮಾಡುವಾಗ ಕೈಗೆ ಬಂದರೆ ಅದನ್ನು ಬಿರುಗಾಳಿ ವೇಗದಲ್ಲಿ ಎಸೆಯಬಲ್ಲರು. ಗಂಟೆಗೆ 150ಕಿ.ಮೀ ವೇಗದಲ್ಲಿ ನುಗ್ಗುವ ಅವರ ಎಸೆತಗಳು ನಿಜಕ್ಕೂ ಬೆಂಕಿಯುಗಳುತ್ತವೆ!
ಟಿ20 ಕ್ರಿಕೆಟ್, ಕೆರಿಬೀಯನ್ ದ್ವೀಪಗಳ ಆಟಗಾರರಿಗೆ ಹೆಚ್ಚು ಸೂಕ್ತವಾಗುತ್ತದೆ ಅಂತ ಕ್ರಿಕೆಟ್ ಪ್ರೇಮಿಗಳು ಹೇಳುತ್ತಾರೆ. ಮೊದಲೆಲ್ಲ ಸೀಮಿತ ಓವರ್ಗಳ ಕ್ರಿಕೆಟ್ನಲ್ಲಿ ಅವರದ್ದೇ ದರ್ಬಾರು ನಡೆಯುತ್ತಿತ್ತು. ನಿಮಗೆ ನೆನಪಿದೆ ತಾನೆ, ಕ್ಲೈವ್ ಲಾಯ್ಡ್ ನೇತೃತ್ವದ ವೆಸ್ಟ್ ಇಂಡೀಸ್ ತಂಡ 1975 ಮತ್ತು 1979 ರ ವಿಶ್ವಕಪ್ ಗೆದ್ದಿತ್ತು. ಆರ್ಚರ್ ವಿಂಡೀಸ್ ಮೂಲದವರಾಗಿರುವುದರಿಂದ ಅವರು ಟಿ20 ಕ್ರಿಕೆಟ್ನಲ್ಲಿ ಉತ್ಕೃಷ್ಟ ಪ್ರದರ್ಶನಗಳನ್ನು ನೀಡುತ್ತಿರುವುದು ಆಶ್ಚರ್ಯ ಹುಟ್ಟಿಸದು.
ತಮ್ಮ ಚೊಚ್ಚಲ ಐಪಿಎಲ್ ಸೀಸನ್ನಲ್ಲಿ (2018) ಆರ್ಚರ್ ಬ್ಯಾಟಿಂಗ್ನಲ್ಲಿ ಹೇಳಿಕೊಳ್ಳುವಂಥ ಪರಾಕ್ರಮವೇನೂ ಮೆರೆಯಲಿಲ್ಲ. ಆದರೆ ಅವರ ಬೌಲಿಂಗ್ ದಾಳಿಗಳು ಎದುರಾಳಿ ಆಟಗಾರರನ್ನು ದಿಗಿಲುಗೊಳಿಸಿದವು. ಒಬ್ಬ ವೇಗದ ಬೌಲರ್ನಲ್ಲಿರಬೇಕಾದ ಎಲ್ಲ ಅಸ್ತ್ರಗಳು ಅವರಲ್ಲಿವೆ; ಬೌನ್ಸರ್, ಸ್ಲೋ ಬೌನ್ಸರ್, ಹೆಬ್ಬೆಟ್ಟನ್ನು ಜಜ್ಜಿ ಬಿಡುವ ಯಾರ್ಕರ್, ನಿಧಾನ ಗತಿಯ ಎಸೆತ ಮೊದಲಾದವುಗಳೆಲ್ಲ ಅವರ ಬತ್ತಳಿಕೆಯಲ್ಲಿವೆ.
2019ರ ವಿಶ್ವಕಪ್ ಗೆದ್ದ ಇಂಗ್ಲೆಂಡ್ ತಂಡದ ನಾಯಕ ಅಯಾನ ಮೋರ್ಗನ್ ಅವರಿಗೆ ಆರ್ಚರ್ ಅವರ ಬೌಲಿಂಗ್ ಸಾಮರ್ಥ್ಯದ ಮೇಲೆ ಎಲ್ಲಿಲ್ಲದ ವಿಶ್ವಾಸ. ನಿಮಗೆ ನೆನಪಿರಬಹುದು, ಆ ಟೂರ್ನಿಯ ಫೈನಲ್ ಪಂದ್ಯದ ಸೂಪರ್ ಓವರ್ ಎಸೆಯಲು ಮೊರ್ಗನ್ ಚೆಂಡನ್ನು ಆರ್ಚರ್ ಅವರತ್ತ ಎಸೆದರು. ಆಗವರು ತಂಡಕ್ಕೆ ಇನ್ನೂ ಹೊಸಬ. ನಾಯಕನ ವಿಶ್ವಾಸವನ್ನು ಉಳಿಸಿಕೊಂಡು ಅವರು ಅದ್ಭುತವಾಗಿ ಆ ಓವರನ್ನು ಬೌಲ್ ಮಾಡಿದರು. ಸೂಪರ್ ಓವರ್ ನಂತರವೂ ಅ ಪಂದ್ಯ ಟೈ ಆಗಿದ್ದರಿಂದ ಪಂದ್ಯದಲ್ಲಿ ಹೆಚ್ಚು ಬೌಂಡರಿಗಳನ್ನು ಬಾರಿಸಿದ ತಂಡಕ್ಕೆ (ಇಂಗ್ಲೆಂಡ್) ಚಾಂಪಿಯನ್ ಪಟ್ಟ ನೀಡಲಾಯಿತು.
2018ರ ಐಪಿಎಲ್ ಟೂರ್ನಿಯಲ್ಲಿ ಆರ್ಚರ್ 10 ಪಂದ್ಯಗಳನ್ನಾಡಿ 15 ವಿಕೆಟ್ ಪಡೆದರು, ಮರುವರ್ಷದ ಸೀಸನಲ್ಲಿ ಅವರು 11 ಪಂದ್ಯಗಳಲ್ಲಿ ಕಾಣಿಸಿಕೊಂಡು 11 ವಿಕೆಟ್ ಪಡೆದರು. ಯುಏಈಯಲ್ಲಿ ನಡೆದ 2020ರ ಐಪಿಎಲ್ನಲ್ಲಿ ಅವರು 20ವಿಕೆಟ್ಗಳನ್ನು 14 ಪಂದ್ಯಗಳಲ್ಲಿ ಪಡೆದರು. ಇದುವರೆಗೆ ಅವರು 35 ಪಂದ್ಯಗಳನ್ನಾಡಿ 46 ವಿಕೆಟ್ ಪಡೆದಿದ್ದಾರೆ.
ಇದನ್ನೆಲ್ಲಾ ಗಮನಿಸಿದರೆ 2021 ರ ಸೀಸನ್ ಅವರು ರಾಜಸ್ತಾನ ರಾಯಲ್ಸ್ ಟ್ರಂಪ್ಕಾರ್ಡ್ ಅಗಲಿದ್ದಾರೆ ಎಂದು ಕ್ರಿಕೆಟ್ ಪರಿಣಿತರು ಹೇಳುತ್ತಿದ್ದರೂ, ಇಂಜೂರಿಯಿಂದ ಬಳಲುತ್ತಿರುವ ಆರ್ಚರ್ ಈ ಬಾರಿಯ ಐಪಿಎಲ್ ಟೂರ್ನಿಯಲ್ಲಿ ಆಟವಾಡುತ್ತಿಲ್ಲ.
ಇದನ್ನೂ ಓದಿ: IPL: ಮಿಲಿಯನ್ ಡಾಲರ್ ಟೂರ್ನಿಗೆ 2 ಹೊಸ ತಂಡಗಳ ಸೇರ್ಪಡೆ.. ಈ ವರ್ಷದ ಮೇ ತಿಂಗಳಲ್ಲಿ ಹರಾಜು ಪ್ರಕ್ರಿಯೆ!
Published On - 8:24 am, Mon, 12 April 21
