SMAT 2021: ಸೈಯದ್ ಮುಷ್ತಾಕ್ ಅಲಿ ಟೂರ್ನಿಯಲ್ಲಿ ಅತ್ಯುತ್ತಮ ಬ್ಯಾಟಿಂಗ್-ಬೌಲಿಂಗ್ ಪ್ರದರ್ಶನ ನೀಡಿದ್ದು ಯಾರು ಗೊತ್ತಾ?

Syed Mushtaq Ali Trophy 2021-22: ಟಾಪ್ ರನ್ ಸ್ಕೋರರ್ ಪಟ್ಟಿಯಲ್ಲಿ 2ನೇ ಸ್ಥಾನವನ್ನು ರಾಜಸ್ಥಾನ್ ತಂಡದ ಆಟಗಾರ ದೀಪಕ್ ಹೂಡಾ ಅಲಂಕರಿಸಿದ್ದಾರೆ. 6 ಪಂದ್ಯಗಳನ್ನು ಆಡಿದ್ದ ಹೂಡಾ 4 ಅರ್ಧಶತಕಗಳೊಂದಿಗೆ 294 ರನ್​ ಬಾರಿಸಿದ್ದರು.

SMAT 2021: ಸೈಯದ್ ಮುಷ್ತಾಕ್ ಅಲಿ ಟೂರ್ನಿಯಲ್ಲಿ ಅತ್ಯುತ್ತಮ ಬ್ಯಾಟಿಂಗ್-ಬೌಲಿಂಗ್ ಪ್ರದರ್ಶನ ನೀಡಿದ್ದು ಯಾರು ಗೊತ್ತಾ?
Syed Mushtaq Ali Trophy 2021-22

ದೇಶೀಯ ಅಂಗಳದ ಚುಟುಕು ಕದನ ಸೈಯದ್ ಮುಷ್ತಾಕ್ ಅಲಿ ಟೂರ್ನಿಗೆ ತೆರೆಬಿದ್ದಿದೆ. ಫೈನಲ್​ನಲ್ಲಿ ಕರ್ನಾಟಕ ತಂಡವನ್ನು ಮಣಿಸಿ ತಮಿಳುನಾಡು ತಂಡ ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಟೂರ್ನಿಯುದ್ದಕ್ಕೂ ಭರ್ಜರಿ ಪ್ರದರ್ಶನ ನೀಡಿದ್ದ ಉಭಯ ತಂಡಗಳು ಅಂತಿಮ ಹಣಾಹಣಿಯಲ್ಲೂ ರೋಚಕತೆ ಸೃಷ್ಟಿಸಿದ್ದು ವಿಶೇಷ. ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಕರ್ನಾಟಕ ತಂಡವು ನಿಗದಿತ 20 ಓವರ್​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 151 ರನ್​ ಕಲೆಹಾಕಿತ್ತು. ಈ ಮೊತ್ತವನ್ನು ಬೆನ್ನತ್ತಿದ ತಮಿಳುನಾಡು ತಂಡಕ್ಕೆ 20ನೇ ಓವರ್​ನ ಎಸೆತದಲ್ಲಿ 5 ರನ್​ಗಳ ಅವಶ್ಯಕತೆಯಿತ್ತು. ಈ ವೇಳೆ ತಮಿಳುನಾಡು ತಂಡದ ಸ್ಪೋಟಕ ಬ್ಯಾಟರ್ ಶಾರೂಖ್ ಖಾನ್ ಪ್ರತೀಕ್ ಜೈನ್ ಎಸೆತದಲ್ಲಿ ಸಿಕ್ಸ್ ಸಿಡಿಸಿ 4 ವಿಕೆಟ್​ಗಳ ರೋಚಕ ಜಯ ತಂದುಕೊಟ್ಟರು. ಈ ರೋಚಕ ಗೆಲುವಿನೊಂದಿಗೆ ತಮಿಳುನಾಡು ತಂಡ ಸತತ ಎರಡನೇ ವರ್ಷ ಕೂಡ ಚಾಂಪಿಯನ್​ ಪಟ್ಟಕ್ಕೇರಿತು.

ಇನ್ನು ಈ ಬಾರಿ ಟೂರ್ನಿಯಲ್ಲಿ ಬ್ಯಾಟ್ ಮೂಲಕ ಭರ್ಜರಿ ಪ್ರದರ್ಶನ ನೀಡಿದ್ದು ತನ್ಮಯ್ ಅಗರ್ವಾಲ್. ಹೈದರಾಬಾದ್ ಪರ ಆಡಿದ್ದ ತನ್ಮಯ್ 7 ಪಂದ್ಯಗಳಿಂದ 334 ರನ್​ ಬಾರಿಸಿದ್ದರು. ಇದರಲ್ಲಿ 4 ಅರ್ಧಶತಕಗಳು ಸೇರಿವೆ. ಹಾಗೆಯೇ 35 ಫೋರ್ ಹಾಗೂ 12 ಸಿಕ್ಸ್ ಸಿಡಿಸಿದ್ದರು. ಹಾಗೆಯೇ ಟಾಪ್ ರನ್ ಸ್ಕೋರರ್ ಪಟ್ಟಿಯಲ್ಲಿ 2ನೇ ಸ್ಥಾನವನ್ನು ರಾಜಸ್ಥಾನ್ ತಂಡದ ಆಟಗಾರ ದೀಪಕ್ ಹೂಡಾ ಅಲಂಕರಿಸಿದ್ದಾರೆ. 6 ಪಂದ್ಯಗಳನ್ನು ಆಡಿದ್ದ ಹೂಡಾ 4 ಅರ್ಧಶತಕಗಳೊಂದಿಗೆ 294 ರನ್​ ಬಾರಿಸಿದ್ದರು. ಇನ್ನು ಈ ಇನಿಂಗ್ಸ್​ಗಳ ವೇಳೆ ಹೂಡಾ ಬ್ಯಾಟ್​ನಿಂದ 23 ಫೋರ್ ಹಾಗೂ 17 ಸಿಕ್ಸ್​ಗಳು ಸಿಡಿದ್ದವು. ಮೂರನೇ ಸ್ಥಾನದಲ್ಲಿ ಮುಂಬೈ ತಂಡ ಅಜಿಂಕ್ಯ ರಹಾನೆ ಇದ್ದಾರೆ. ರಹಾನೆ 4 ಅರ್ಧಶತಕಗಳೊಂದಿಗೆ 5 ಪಂದ್ಯಗಳಿಂದ 286 ರನ್​ ಕಲೆಹಾಕಿದ್ದಾರೆ. ಈ ವೇಳೆ 26 ಬೌಂಡರಿ ಹಾಗೂ 11 ಸಿಕ್ಸ್ ಬಾರಿಸಿದ್ದರು. ಇನ್ನು ಕರ್ನಾಟಕ ಪರ ಅತೀ ಹೆಚ್ಚು ರನ್ ಕಲೆಹಾಕಿದ್ದು ನಾಯಕ ಮನೀಷ್ ಪಾಂಡೆ. 9 ಪಂದ್ಯಗಳನ್ನಾಡಿದ ಪಾಂಡೆ 272 ರನ್ ಕಲೆಹಾಕಿದ್ದಾರೆ. ಈ ಇನಿಂಗ್ಸ್​ನಲ್ಲಿ 3 ಅರ್ಧಶತಕ ಹಾಗೂ 20 ಫೋರ್ ಹಾಗೂ 8 ಸಿಕ್ಸ್ ಬಾರಿಸಿದ್ದರು.

ಟೂರ್ನಿಯುದ್ದಕ್ಕೂ ಅತ್ಯುತ್ತಮ ಬೌಲಿಂಗ್ ಪ್ರದರ್ಶನ ನೀಡಿದ್ದು ಹೈದರಾಬಾದ್ ತಂಡದ ಸಿವಿ ಮಿಲಿಂದ್. 7 ಪಂದ್ಯಗಳನ್ನಾಡಿದ್ದ ಮಿಲಿಂದ್ 209 ರನ್​ ನೀಡಿ 18 ವಿಕೆಟ್ ಕಬಳಿಸಿದ್ದಾರೆ. ಈ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿ ಆಂಧ್ರಪ್ರದೇಶ ತಂಡ ಸಿವಿ ಸ್ಟೀಫನ್ ಇದ್ದು, 5 ಪಂದ್ಯಗಳಲ್ಲಿ 120 ರನ್​ ನೀಡಿ 14 ವಿಕೆಟ್ ಪಡೆದಿದ್ದಾರೆ. ಹಾಗೆಯೇ 3ನೇ ಸ್ಥಾನದಲ್ಲಿ ಹಿಮಾಚಲ ಪ್ರದೇಶದ ರಿಷಿ ಧವನ್ ಇದ್ದಾರೆ. 6 ಪಂದ್ಯಗಳನ್ನಾಡಿರುವ ರಿಷಿ 156 ರನ್​ ನೀಡಿ 14 ವಿಕೆಟ್ ಉರುಳಿಸಿದ್ದಾರೆ. ಇನ್ನು ಈ ಬಾರಿ ಕರ್ನಾಟಕದ ಪರ ಅತೀ ಹೆಚ್ಚು ವಿಕೆಟ್ ಪಡೆದಿರುವುದು ಕೆಸಿ ಕಾರ್ಯಪ್ಪ. 9 ಪಂದ್ಯಗಳನ್ನಾಡಿರುವ ಕಾರ್ಯಪ್ಪ 203 ರನ್​ ನೀಡಿ 12 ವಿಕೆಟ್ ಕಬಳಿಸಿದ್ದಾರೆ.

ಇದನ್ನೂ ಓದಿ: IPL 2022: 20 ಕೋಟಿ ಪಕ್ಕಾ…ಐಪಿಎಲ್ ದುಬಾರಿ ಆಟಗಾರ ಯಾರೆಂದು ತಿಳಿಸಿದ ಮಾಜಿ ಕ್ರಿಕೆಟಿಗ

ಇದನ್ನೂ ಓದಿ: Rohit Sharma: ಶಾಹಿದ್ ಅಫ್ರಿದಿ ವಿಶ್ವ ದಾಖಲೆ ಮುರಿದ ಹಿಟ್​ಮ್ಯಾನ್ ರೋಹಿತ್ ಶರ್ಮಾ

ಇದನ್ನೂ ಓದಿ: Martin Guptill: ವಿರಾಟ್ ಕೊಹ್ಲಿಯನ್ನು ಹಿಂದಿಕ್ಕಿದ ಮಾರ್ಟಿನ್ ಗಪ್ಟಿಲ್

Click on your DTH Provider to Add TV9 Kannada