ಕಿವೀಸ್ ಕ್ರಿಕೆಟಿಗನ ಸಾರ್ಥಕ ಸೇವೆ; ಕ್ಯಾನ್ಸರ್ ಪೀಡಿತ ಮಗುವಿನ ಜೀವ ಉಳಿಸಲು ಜೆರ್ಸಿ ಹರಾಜಿಗಿಟ್ಟ ಟಿಮ್ ಸೌಥಿ
Tim Southee: ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಧರಿಸಿದ್ದ ನನ್ನ ಜರ್ಸಿಯನ್ನು ನಾನು ಹರಾಜು ಹಾಕುತ್ತಿದ್ದೇನೆ. ಹಾಲಿಗೆ ಸಹಾಯ ಮಾಡಲು ನಾನು ಈ ಹೆಜ್ಜೆ ಇಡುತ್ತಿದ್ದೇನೆ.
Updated on: Jun 30, 2021 | 5:14 PM
ನ್ಯೂಜಿಲೆಂಡ್ ವೇಗದ ಬೌಲರ್ ಟಿಮ್ ಸೌಥಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ತಂಡದ ಗೆಲುವಿಗೆ ಪ್ರಮುಖ ಪಾತ್ರವಹಿಸಿ ನ್ಯೂಜಿಲೆಂಡಿಗರ ಹೃದಯ ಗೆದ್ದಿದ್ದರು. ಆದರೆ ಈಗ ತಮ್ಮ ಸಮಾಜ ಸೇವೆಯಿಂದ ಇಡೀ ಮನುಕುಲವೇ ಮೆಚ್ಚುವಂತಹ ಕೆಲಸ ಮಾಡಿದ್ದಾರೆ. ಕ್ಯಾನ್ಸರ್ ವಿರುದ್ಧ ಹೋರಾಡುತ್ತಿರುವ ಎಂಟು ವರ್ಷದ ಬಾಲಕಿಯ ಚಿಕಿತ್ಸೆಗಾಗಿ ಹಣವನ್ನು ಸಂಗ್ರಹಿಸಲು ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಧರಿಸಿದ್ದ ತನ್ನ ಜರ್ಸಿಯನ್ನು ಹರಾಜು ಹಾಕುತ್ತಿದ್ದಾರೆ. ಈ ಜರ್ಸಿಯಲ್ಲಿ ನ್ಯೂಜಿಲೆಂಡ್‌ನ ಎಲ್ಲ ಆಟಗಾರರು ಸಹಿ ಹಾಕಿದ್ದಾರೆ. ಟಿಮ್ ಸೌಥಿಯ ಜರ್ಸಿಯ ಹರಾಜಿನಿಂದ ಬರುವ ಆದಾಯವನ್ನು ಎಂಟು ವರ್ಷದ ಹಾಲಿ ಬೆಟ್ಟಿ ಚಿಕಿತ್ಸೆಗಾಗಿ ಖರ್ಚು ಮಾಡಲಾಗುವುದು. ಬೆಟ್ಟಿ ರೋಗನಿರೋಧಕ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುವ ಮೂತ್ರಜನಕಾಂಗದ ಗ್ರಂಥಿಯ ಕ್ಯಾನ್ಸರ್ ನ್ಯೂರೋಬ್ಲಾಸ್ಟೊಮಾದೊಂದಿಗೆ ಹೋರಾಡುತ್ತಿದ್ದಾಳೆ.
2018 ರಲ್ಲಿ ಈ ಕ್ಯಾನ್ಸರ್ ಇರುವುದು ಖಚಿತವಾಗಿತ್ತು. 32 ವರ್ಷದ ಸೌದಿಗೆ ಈ ವಿಚಾರ ಎರಡು ವರ್ಷಗಳ ಹಿಂದೆ ತಿಳಿದುಕೊಂಡರಂತೆ. ಅಂದಿನಿಂದ ಅವರು ಹಾಲಿ ಬೆಟ್ಟಿಗೆ ಸಹಾಯ ಮಾಡುವಲ್ಲಿ ನಿರತರಾಗಿದ್ದಾರೆ. ಬೆಟ್ಟಿ ಎರಡು ವರ್ಷಗಳಿಂದ ಚಿಕಿತ್ಸೆ ಪಡೆಯುತ್ತಿದ್ದಾಳೆ ಆದರೆ ಆಕೆ ಇನ್ನೂ ಕಾಯಿಲೆಯಿಂದ ಚೇತರಿಸಿಕೊಂಡಿಲ್ಲ. ಪ್ರಸ್ತುತ ಅವರು ಸ್ಪೇನ್‌ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ.
ಹಾಲಿಗೆ ಹೆಚ್ಚಿನ ಚಿಕಿತ್ಸೆ ಬೇಕು ಟಿಮ್ ಸೌಥಿ ತಮ್ಮ ಇನ್ಸ್ಟಾಗ್ರಾಮ್ ಪುಟದಲ್ಲಿ ಇಡೀ ಘಟನೆಯ ಬಗ್ಗೆ ವಿವರಿಸಿದ್ದು ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಧರಿಸಿದ್ದ ನನ್ನ ಜರ್ಸಿಯನ್ನು ನಾನು ಹರಾಜು ಹಾಕುತ್ತಿದ್ದೇನೆ. ಹಾಲಿಗೆ ಸಹಾಯ ಮಾಡಲು ನಾನು ಈ ಹೆಜ್ಜೆ ಇಡುತ್ತಿದ್ದೇನೆ. ಹರಾಜಿನಿಂದ ಬರುವ ಎಲ್ಲಾ ಹಣವು ಬೆಟ್ಟಿಯ ಕುಟುಂಬಕ್ಕೆ ಹೋಗುತ್ತದೆ. ನನ್ನ ಕುಟುಂಬವು ಎರಡು ವರ್ಷಗಳ ಹಿಂದೆ ಕ್ರಿಕೆಟ್ ಸಮುದಾಯದ ಮೂಲಕ ಹಾಲಿಯ ಕಥೆಯ ಬಗ್ಗೆ ತಿಳಿದುಕೊಂಡೆ. ಅಂದಿನಿಂದ ನಾನು ಹಾಲಿಯ ಕುಟುಂಬದ ಧೈರ್ಯ, ಸಕಾರಾತ್ಮಕತೆ ಮತ್ತು ಪರಿಶ್ರಮವನ್ನು ಮೆಚ್ಚಿದ್ದೇನೆ. ಹಾಲಿಗೆ ಹೆಚ್ಚಿನ ಚಿಕಿತ್ಸೆ ಬೇಕು ಎಂದು ನಾನು ಕೇಳಿದಾಗಿನಿಂದ, ನಾನು ಅವಳಿಗೆ ಸಹಾಯ ಮಾಡಲು ಪ್ರಯತ್ನಿಸುತ್ತಿದ್ದೇನೆ. ಈ ಜರ್ಸಿ ಮಾರಾಟದಿಂದ ಬರುವ ಹಣ ಬೆಟ್ಟಿಯ ಕುಟುಂಬಕ್ಕೆ ಒಂದು ರೀತಿಯಲ್ಲಿ ಸಹಾಯ ಮಾಡುತ್ತದೆ ಎಂದು ನಾನು ಭಾವಿಸುತ್ತೇನೆ. ತಂದೆಯಾಗಿ, ಅವರ ಹೋರಾಟವನ್ನು ನೋಡಿದಾಗ ನನ್ನ ಹೃದಯ ತುಂಬಿ ಬರುತ್ತದೆ ಎಂದು ಬರೆದುಕೊಂಡಿದ್ದಾರೆ.
ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ನಲ್ಲಿ ನ್ಯೂಜಿಲೆಂಡ್ ಗೆಲುವಿಗೆ ಟಿಮ್ ಸೌಥಿ ಗಮನಾರ್ಹ ಕೊಡುಗೆ ನೀಡಿದರು. ಪಂದ್ಯದಲ್ಲಿ ಅವರು ಒಟ್ಟು ನಾಲ್ಕು ವಿಕೆಟ್ ಪಡೆದರು. ಬ್ಯಾಟಿಂಗ್‌ನಲ್ಲಿ 30 ರನ್ ಗಳಿಸಿದರು. ಅಂತಿಮ ಪಂದ್ಯವನ್ನು ನ್ಯೂಜಿಲೆಂಡ್ ಎಂಟು ವಿಕೆಟ್‌ಗಳಿಂದ ಗೆದ್ದುಕೊಂಡಿತು ಮತ್ತು ಟೆಸ್ಟ್ ಚಾಂಪಿಯನ್‌ಶಿಪ್‌ನ ಮೊದಲ ಆವೃತ್ತಿಯನ್ನು ಗೆದ್ದುಕೊಂಡಿತು.
