India vs England | ಗಾವಸ್ಕರ್ ಫೋನ್ ಮಾಡಿದರೆ ಇಲ್ಲವೇ ಮೆಸೇಜ್ ಕಳಿಸಿದರೆ ನಾನು ಪ್ರತಿಕ್ರಿಯಿಸಲು ಸಿದ್ಧನಿದ್ದೇನೆ: ಬೇರ್​ಸ್ಟೋ

ಪುಣೆ:  ಭಾರತ ಮತ್ತು ಇಂಗ್ಲೆಂಡ್ ನಡುವೆ ಪುಣೆಯಲ್ಲಿ ನಡೆದ ಎರಡನೇ ಒಂದು ದಿನದ ಆಂತರರಾಷ್ಟ್ರೀಯ ಪಂದ್ಯದಲ್ಲಿ ಅಮೋಘ ಶತಕ ಬಾರಿಸಿ ಪ್ರವಾಸಿ ತಂಡಕ್ಕೆ ಭರ್ಜರಿ ಗೆಲುವು ತಂದಿತ್ತ ಆರಂಭ ಆಟಗಾರ ಜಾನಿ ಬೇರ್​ಸ್ಟೋ ಅವರು, ಭಾರತದ ಲೆಜೆಂಡರಿ ಆರಂಭ ಆಟಗಾರ ಸುನಿಲ್ ಗಾವಸ್ಕರ್ ತನ್ನ ಬಗ್ಗೆ ಟೆಸ್ಟ್ ಕ್ರಿಕೆಟ್​ನಲ್ಲಿ ‘ಒಲ್ಲದ ಮನಸ್ಸಿನ ಬ್ಯಾಟ್ಸ್​ಮನ್’ ಅಂತ ಮಾಡಿರುವ ಕಾಮೆಂಟ್​ಗೆ ಪ್ರತಿಕ್ರಿಯೆ ನೀಡಿದ್ದಾರೆ. ಗಾವಸ್ಕರ್ ಅವರು ತನಗೆ ಕರೆ ಮಾಡಿದಲ್ಲಿ ಅಥವಾ ಮೆಸೇಜ್ ಕಳಿಸಿದಲ್ಲಿ ಅವರೊಂದಿಗೆ ಮಾತಾಡಲು ಅಥವಾ ಅವರ ಮಾಡಿರುವ ಕಾಮೆಂಟ್​ ಕುರಿತು ಚರ್ಚೆ ಮಾಡಲು ಸಿದ್ಧನಿರುವುದಾಗಿ ಆಂಗ್ಲ ಆಟಗಾರ ಹೇಳಿದ್ದಾರೆ. ಅವರು ತನ್ನ ಬಗ್ಗೆ ನಿಖರವಾಗಿ ಏನು ಹೇಳಿದ್ದಾರೆ ಅನ್ನುವುದನ್ನು ಕೇಳಿಸಿಕೊಂಡಿಲ್ಲ ಎಂದು ಬೇರ್​ಸ್ಟೋ ಹೇಳಿದ್ದಾರೆ.

‘ಮೊದಲನೆಯದಾಗಿ ನಾನು ಹೇಳುವುದಿಷ್ಟು, ಗಾವಸ್ಕರ್ ನನ್ನ ಬಗ್ಗೆ ಏನು ಹೇಳಿದ್ದಾರೆ ಅಂತ ನನಗೆ ಗೊತ್ತಿಲ್ಲ. ಎರಡನೇಯದಾಗಿ, ನಮ್ಮ ಮಧ್ಯೆ ಯಾವುದೇ ತೆರನಾದ ಸಂಪರ್ಕ, ಮಾತುಕತೆ ಇಲ್ಲದಿರುವಾಗ ಅವರು ನನ್ನ ಕುರಿತು ಕಾಮೆಂಟ್​ ಮಾಡುವುದು ಹೇಗೆ ಸಾಧ್ಯ ಎಂದು ತಿಳಿದುಕೊಳ್ಳಲು ಉತ್ಸುನಾಗಿದ್ದೇನೆ, ಎಂದು ಬೇರ್​ಸ್ಟೋ ಪುಣೆಯಲ್ಲಿ ಶುಕ್ರವಾರ ಹೇಳಿದರು.

‘ಈ ಹಿನ್ನೆಲೆಯಲ್ಲಿ ಅವರು ನನಗೆ ರಿಂಗ್ ಮಾಡಿದರೆ ಅದನ್ನು ನಾನು ಸ್ವಾಗತಿಸುತ್ತೇನೆ; ನನಗೆ ಟೆಸ್ಟ್​ ಕ್ರಿಕೆಟ್​ನಲ್ಲಿ ಅಡುವ ಆಸಕ್ತಿ ಸದಾ ಇದ್ದು ಆ ಫಾರ್ಮಟ್​ನಲ್ಲಿ ಅಡುವುದನ್ನು ನಾನು ಬಹಳ ಆನಂದಿಸುತ್ತೇನೆ ಅಂತ ಹೇಳಲು ಇಚ್ಛೆಯುಳ್ಳವನಾಗಿದ್ದೇನೆ. ನಾನು ಈಗಾಗಲೇ ಹೇಳಿರುವಂತೆ ನನ್ನ ಫೋನ್ ಆನ್ ಮೋಡ್​ನಲ್ಲಿರುತ್ತದೆ. ಅವರು ಬಯಸಿದಲ್ಲಿ ನನಗೆ ಕಾಲ್ ಇಲ್ಲವೇ ಮೆಸೇಜ್ ಮಾಡಬಹುದು,’ ಎಂದು ಬೇರ್​ಸ್ಟೋ ಹೇಳಿದರು.

ಒಂದು ದಿನದ ಪಂದ್ಯಗಳ ಸರಣಿಯ ಇದುವರೆಗೆ ನಡೆದಿರುವ ಎರಡು ಪಂದ್ಯಗಳಲ್ಲಿ 94 ಮತ್ತು 124 ರನ್​ಗಳ ಇನ್ನಿಂಗ್ಸ್​ಗಳನ್ನು ಆಡಿರುವ ಬೇರ್​ಸ್ಟೋ ನಿಸ್ಸಂಶಯವಾಗಿ ಅದ್ಭುತವಾದ ಫಾರ್ಮ್​ನಲ್ಲಿದ್ದಾರೆ. ಆದರೆ ಇದಕ್ಕೆ ಮೊದಲು ನಡೆದ ಟೆಸ್ಟ್​ಗಳಲ್ಲಿ ಅವರು ಬ್ಯಾಟಿಂಗ್ ಗೊತ್ತಿಲ್ಲದವರ ರೀತಿಯಲ್ಲಿ ಆಡಿದರು. ತಾವಾಡಿದ ನಾಲ್ಕು ಇನ್ನಿಂಗ್ಸ್​ಗಳಲ್ಲಿ ಅವರು ಮೂರು ಬಾರಿ ಸೊನ್ನೆಗೆ ಔಟಾದರು. ಭಾರತದ ಸ್ಪಿನ್ನರ್​ಗಳ ಎದುರು ಅವರು ಪರದಾಡಿದ್ದು ಸುಳ್ಳಲ್ಲ.

ಸುನಿಲ್ ಗವಾಸ್ಕರ್

ಅಹಮದಾಬಾದನಲ್ಲ್ಲಿ ನಡೆದ ನಾಲ್ಕನೇ ಟೆಸ್ಟ್​ನಲ್ಲಿ ಬೇರ್​ಸ್ಟೋ ಔಟಾದ ನಂತರ ಕಾಮೆಂಟರಿ ಬಾಕ್ಸ್​ನಲ್ಲಿದ್ದ ಗಾವಸ್ಕರ್, ಬೇರ್​ಸ್ಟೋ ಅವರನ್ನು ಕುರಿತು ‘ಒಲ್ಲದ ಮನಸ್ಸಿನ ಟೆಸ್ಟ್​ ಬ್ಯಾಟ್ಸ್​ಮನ್,’ ಅಂತ ಕಾಮೆಂಟ್​ ಮಾಡಿದ್ದು ಇಂಗ್ಲೆಂಡ್​ ಮಾಧ್ಯಮಗಳಲ್ಲಿ ತೀವ್ರ ಸ್ವರೂಪದ ಚರ್ಚೆಗೊಳಗಾಯಿತು. ಟೆಸ್ಟ್​ ಕ್ರಿಕೆಟ್​ನಲ್ಲಿ ಬೇರ್​ಸ್ಟೋ ಅವರ ಭವಿಷ್ಯದ ಬಗ್ಗೆಯೂ ಅಪಸ್ವರಗಳು ಕೇಳಿಬಂದವು.

ಪುಣೆಯ ಮಹಾರಾಷ್ಟ್ರ ಕ್ರಿಕೆಟ್​ ಅಸೋಸಿಯೇಷನ್ ಮೈದಾನದಲ್ಲಿ ಶುಕ್ರವಾರದಂದು ನಡೆದ ಎರಡನೆ ಒಂದು ದಿನದ ಅಂತರರಾಷ್ಟ್ರೀಯ ಪಂದ್ಯದಲ್ಲಿ ಬೇರ್​ಸ್ಟೋ ಭಾರತದ ಬೌಲರ್​ಗಳನ್ನು ಮನಸಾರೆ ದಂಡಿಸಿ ಕೇವಲ 112 ಎಸೆತಗಳಲ್ಲಿ 124 ರನ್ ಬಾರಿಸಿದರು. ಅವರ ಸ್ಕೋರಿನಲ್ಲಿ 7 ಸಿಕ್ಸ್ ಮತ್ತು 11 ಫೋರ್​ಗಳಿದ್ದವು. ಬೇರ್​ಸ್ಟೋ ಮತ್ತು ಕೇವಲ 1 ರನ್ನಿಂದ ಶತಕ ತಪ್ಪಿಸಿಕೊಂಡ ಬೆನ್ ಸ್ಟೋಕ್ಸ್ ಭಾರತದ 337 ರನ್​ಗಳು ಬೃಹತ್ ಮೊತ್ತವನ್ನು ನೀರು ಕುಡಿದಷ್ಟು ಸುಲಭವಾಗಿ ದಾಟಲು ತಮ್ಮ ತಂಡಕ್ಕೆ ನೆರವಾದರು.

ಎರಡನೇ ಪಂದ್ಯವನ್ನು ಗೆದ್ದೇ ತೀರಬೇಕೆಂಬ ಛಲದೊಂದಿಗೆ ಭಾರತದ ಮೊತ್ತ ಚೇಸ್ ಮಾಡಿದ ಬೇರ್​ಸ್ಟೋ ಮತ್ತು ಜೇಸನ್ ರಾಯ್ ಅವರ ಆರಂಬಿಕ ಜೋಡಿ ಮೊದಲ 19 ಓವರ್​ಗಳಲ್ಲಿ 110 ರನ್ ಸೇರಿಸಿತು. ಅದಾದ ಮೇಲೆ ಬೇರ್​ಸ್ಟೋ ಜೊತೆಗೂಡಿದ ಸ್ಟೋಕ್ಸ್ ಕೇವಲ 19 ಓವರ್​ಗಳಲ್ಲಿ175 ರನ್ ಸೇರಿಸಿದರು. ತಾನು ಪ್ರದರ್ಶಿಸಿದ ನಿರ್ಭೀತಿಯ ಸ್ಟ್ರೋಕ್​ಪ್ಲೇಗೆ ತಂಡದ ಬ್ಯಾಟಿಂಗ್ ಆಳ ಕಾರಣವೆಂದು ಬೇರ್​ಸ್ಟೋ ಪಂದ್ಯ ಮುಗಿದ ನಂತರ ನಡೆದ ವರ್ಚ್ಯುಯಲ್ ಸುದ್ದಿಗೋಷ್ಠಿಯಲ್ಲಿ ಹೇಳಿದರು.

‘10 ಇಲ್ಲವೇ 11 ನೇ ಕ್ರಮಾಂಕದಲ್ಲಿ ಆದಿಲ್ ರಾಶಿದ್ ಆಡುತ್ತಾರೆ. ರಾಶಿದ್ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 10 ಶತಕಗಳನ್ನು ಬಾರಿಸಿದ್ದಾರೆ. ಬ್ಯಾಟಿಂಗ್​ನಲ್ಲಿ ಈ ಮಟ್ಟಿನ ಆಳ ಬೇರೆ ಯಾವುದೇ ತಂಡದಲ್ಲಿ ಕಾಣಸಿಗದು. ನಾವು ನಿರ್ಭಯದಿಂದ ಹೊಡೆತಗಳನ್ನು ಬಾರಿಸುವುದಕ್ಕೆ ಇದೇ ಕಾರಣ,’ ಎಂದು ಬೇರ್​ಸ್ಟೋ ಹೇಳಿದರು.

‘ಮೊಯೀನ್ ಅಲಿ ಮತ್ತು ಕರನ್​ ಸಹೋದರರು ನಮ್ಮ ತಂಡದ ಪವರ್-ಹಿಟ್ಟರ್​ಗಳು. ಈ ಪಟ್ಟಿ ಹೀಗೆ ಮುಂದುವರಿಯುತ್ತಲೇ ಹೊಗುತ್ತದೆ. ಹೌದು, ಈ ಬಗೆಯ ಬ್ಯಾಟಿಂಗ್ ಲೈನಪ್ ನಿಮ್ಮ ಆತ್ಮವಿಶ್ವಾಸವನ್ನು ನೂರುಪಟ್ಟು ಹೆಚ್ಚಿಸುತ್ತದೆ,’ ಎಂದು ಬೇರ್​ಸ್ಟೋ ಹೇಳಿದರು.

ಇದನ್ನೂ ಓದಿ: India vs England | ಕ್ರಿಕೆಟನ್ನೇ ವೃತ್ತಿಬದುಕು ಮಾಡಿಕೊಳ್ಳುವಂತೆ ಯಾರೂ ನನಗೆ ಸಲಹೆ ನೀಡಲಿಲ್ಲ: ಪ್ರಸಿಧ್ ಕ್ರಿಷ್ಣ

Published On - 6:17 pm, Sat, 27 March 21