Mozilla Firefox: ಆ್ಯಂಡ್ರಾಯ್ಡ್ ಸ್ಮಾರ್ಟ್​ಫೋನ್​ನಲ್ಲಿ ಮೊಝಿಲ್ಲಾ ಫೈರ್​ಫಾಕ್ಸ್ ಬಳಸುತ್ತಿದ್ದೀರಾ? ಎಚ್ಚರಿಕೆ!

ಭಾರತೀಯ ಕಂಪ್ಯೂಟರ್ ತುರ್ತು ಸ್ಪಂದನಾ ತಂಡ (ಸರ್ಟ್​-ಇನ್) ಮೊಝಿಲ್ಲಾ ಫೈರ್​ಫಾಕ್ಸ್ ಬಳಕೆದಾರರಿಗೆ ಎಚ್ಚರಿಕೆ ನೀಡಿದ್ದು, ಕೂಡಲೇ ಆ್ಯಪ್​ ಅಪ್​ಡೇಟ್ ಮಾಡಿಕೊಳ್ಳುವಂತೆ ಎಚ್ಚರಿಕೆ ನೀಡಿದೆ. ಆ್ಯಂಡ್ರಾಯ್ಡ್ ಸ್ಮಾರ್ಟ್​ಫೋನ್​ನಲ್ಲಿರುವ ಮೊಝಿಲ್ಲಾ ಫೈರ್​ಫಾಕ್ಸ್(Mozilla Firefox) ಅಪ್ಲಿಕೇಶನ್​ನಲ್ಲಿ ದೋಷ ಕಾಣಿಸಿಕೊಂಡಿದೆ. ಹೀಗಾಗಿ, ಸೈಬರ್ ದಾಳಿಯನ್ನು ತಡೆಯಲು ಆ್ಯಪ್ ಅಪ್​ಡೇಟ್ ಮಾಡುವುದು ಕಡ್ಡಾಯವಾಗಿದೆ.

ಏನಾಯ್ತು ಮೊಝಿಲ್ಲಾ ಫೈರ್​ಫಾಕ್ಸ್​ಗೆ?

ಮೊಝಿಲ್ಲಾ ಫೈರ್​ಫಾಕ್ಸ್ ಬ್ರೌಸರ್​ನಲ್ಲಿ ಇರುವ ದೋಷವೊಂದು, ಹ್ಯಾಕರ್ಸ್ ನೇರವಾಗಿ ಆ್ಯಪ್ ಅನ್ನು ನಿಯಂತ್ರಣಕ್ಕೆ ತೆಗೆದುಕೊಂಡು, ಅದರ ಮೂಲಕ ಕುಳಿತಲ್ಲಿಂದಲೇ ನಿಮ್ಮ ಫೋನ್ ಅನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಬಹುದಾಗಿದೆ. ಜತೆಗೆ, ಸ್ಮಾರ್ಟ್​ಫೋನ್​ನಲ್ಲಿ ಇರುವ ವೈಯಕ್ತಿಕ, ಬ್ಯಾಂಕಿಂಗ್ ವಿವರವನ್ನು ಕದಿಯಬಹುದಾಗಿದೆ. ಹೀಗೆ, ಕಳ್ಳಮಾರ್ಗದ ಮೂಲಕ ಹ್ಯಾಕರ್ಸ್ ಆ್ಯಂಡ್ರಾಯ್ಡ್ ಸ್ಮಾರ್ಟ್​ಫೋನ್ (Android Smartphone) ಅನ್ನು ಪ್ರವೇಶಿಸಿ, ಅಲ್ಲಿ ಸಮಸ್ಯೆ ಸೃಷ್ಟಿಸಲು ಅನುವು ಮಾಡಿಕೊಡುತ್ತದೆ.

ಯಾವೆಲ್ಲಾ ಮೊಝಿಲ್ಲಾ ಫೈರ್​ಫಾಕ್ಸ್ ಆವೃತ್ತಿಗೆ ಸಮಸ್ಯೆ?

ಸರ್ಟ್-ಇನ್ ಸೂಚನೆಯ ಪ್ರಕಾರ, ಆ್ಯಂಡ್ರಾಯ್ಡ್ ಸ್ಮಾರ್ಟ್​ಫೋನ್​ನಲ್ಲಿನ ಮೊಝಿಲ್ಲಾ ಫೈರ್​ಫಾಕ್ಸ್ ಬಳಕೆದಾರರು ಮಾತ್ರ ಈ ಸಮಸ್ಯೆಗೆ ಸಿಲುಕಿದ್ದಾರೆ. ಹೀಗಾಗಿ, ಕೂಡಲೇ ಗೂಗಲ್ ಪ್ಲೇ ಸ್ಟೋರ್ ಮೂಲಕ ಪರಿಷ್ಕೃತ ಆವೃತ್ತಿ ಅಪ್​ಡೇಟ್ ಮಾಡಿಕೊಳ್ಳುವುದು ಕಡ್ಡಾಯವಾಗಿದೆ. ಉಳಿದಂತೆ, ಐಓಎಸ್, ವಿಂಡೋಸ್, ಮ್ಯಾಕ್ ಆವೃತ್ತಿಯ ಮೊಝಿಲ್ಲಾ ಫೈರ್​ಫಾಕ್ಸ್ ಯಾವುದೇ ಸಮಸ್ಯೆಗೆ ಸಿಲುಕಿಲ್ಲ.

ಆ್ಯಂಡ್ರಾಯ್ಡ್ ಬಳಕೆದಾರರು ಏನು ಮಾಡಬೇಕು?

ನಿಮ್ಮ ಸ್ಮಾರ್ಟ್​ಫೋನ್​ನಲ್ಲಿರುವ ಮೊಝಿಲ್ಲಾ ಫೈರ್​ಫಾಕ್ಸ್ ಆ್ಯಪ್ ಅನ್ನು ಗೂಗಲ್ ಪ್ಲೇ ಸ್ಟೋರ್​​ಗೆ ಹೋಗಿ, ಅಲ್ಲಿಂದ ಅಪ್​ಡೇಟ್ ಮಾಡಿಕೊಳ್ಳಿ. ಮೊಝಿಲ್ಲಾ ಫೈರ್​ಫಾಕ್ಸ್ 110.1.0 ಆ್ಯಂಡ್ರಾಯ್ಡ್ ಆವೃತ್ತಿಗಿಂತ ಮುಂಚಿನದ್ದಾಗಿದ್ದರೆ, ಕೂಡಲೇ ಅಪ್​ಡೇಟ್ ಮಾಡಿಕೊಳ್ಳುವುದು ಉತ್ತಮ ಮತ್ತು ಸುರಕ್ಷಿತ.

ಹೆಚ್ಚಿನ ಟೆಕ್ ಸ್ಟೋರಿ ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 12:41 pm, Wed, 15 March 23