ಪೆಗಾಸಸ್ ಮಾದರಿ ಸ್ಪೈವೇರ್ ದಾಳಿ ನಿಜ: ಭಾರತವೂ ಸೇರಿ 92 ದೇಶಗಳ ಐಫೋನ್ ಬಳಕೆದಾರರಿಗೆ ಸಂದೇಶ ಕಳುಹಿಸಿದ ಆ್ಯಪಲ್
Apple Alert Notification: ಆ್ಯಪಲ್ ಸಂಸ್ಥೆ ತನ್ನ ಐಫೋನ್ ಬಳಕೆದಾರರಿಗೆ ಹೊಸ ಅಲರ್ಟ್ ನೋಟಿಫಿಕೇಶನ್ ನೀಡಿದೆ. ಮರ್ಸನರಿ ಸ್ಪೈವೇರ್ ದಾಳಿಗೆ ಒಳಗಾಗಿರಬಹುದಾದ ಐಫೋನ್ ಬಳಕೆದಾರರಿಗೆ ಈ ಅಲರ್ಟ್ ಮೆಸೇಜ್ ಹೋಗಿದೆ. ವರದಿ ಪ್ರಕಾರ ಭಾರತವೂ ಸೇರಿದಂತೆ 92 ದೇಶಗಳಲ್ಲಿನ ತನ್ನ ಐಫೋನ್ ಯೂಸರ್ಸ್ಗೆ ಈ ನೋಟಿಫಿಕೇಶನ್ ಹೋಗಿದೆ. ಆ್ಯಪಲ್ ಪ್ರಕಾರ ಆಯ್ದ ಕೆಲವೇ ಮಂದಿಯನ್ನು ಸ್ಪೈವೇರ್ ದಾಳಿಗೆ ಗುರಿ ಮಾಡಲಾಗುತ್ತದೆ. ಸರ್ಕಾರ ಅಥವಾ ಸರ್ಕಾರೀ ಪ್ರಾಯೋಜಿತ ಸಂಸ್ಥೆಗಳು ಈ ದಾಳಿಯ ಹಿಂದಿರಬಹುದು ಎಂದಿದೆ.
Updated on: Apr 11, 2024 | 3:36 PM
ನವದೆಹಲಿ, ಏಪ್ರಿಲ್ 11: ಪೆಗಾಸಸ್ ಎಂಬ ಸ್ಪೈವೇರ್ ದಾಳಿ ಪ್ರಕರಣ ಇತ್ತೀಚೆಗೆ ಜಗತ್ತಿನಾದ್ಯಂತ ಸದ್ದು ಮಾಡಿದೆ. ಭಾರತದಲ್ಲೂ ಹಲವು ಐಫೋನ್ ಬಳಕೆದಾರರಿಗೆ ಸರ್ಕಾರಿ ಪ್ರಾಯೋಜಿತ ಸ್ಪೈವೇರ್ ದಾಳಿಯಾಗಿರುವ ಸಾಧ್ಯತೆ ಬಗ್ಗೆ ನೋಟಿಫಿಕೇಶನ್ ಬಂದಿತ್ತು. ಸರ್ಕಾರ ಇದನ್ನು ಬಲವಾಗಿ ನಿರಾಕರಿಸಿತ್ತು. ಆ್ಯಪಲ್ ಸಂಸ್ಥೆ ಕೂಡ ಈ ಅಲರ್ಟ್ನಲ್ಲಿರುವ ಅಂಶವನ್ನು ಖಚಿತಪಡಿಸಲು ವಿಫಲವಾಗಿತ್ತು. ಇದೀಗ ಆ್ಯಪಲ್ ಸಂಸ್ಥೆ ಭಾರತವನ್ನೂ ಸೇರಿದಂತೆ 92 ದೇಶಗಳಲ್ಲಿನ ತನ್ನ ಐಫೋನ್ ಬಳಕೆದಾರರಿಗೆ ಹೊಸ ಸ್ಪೈವೇರ್ ದಾಳಿ ನೋಟಿಫಿಕೇಶನ್ (Mercenary Spyware Attack) ಕಳುಹಿಸಿದೆ. ಯಾರ ಐಫೋನ್ ಮತ್ತಿತರ ಆ್ಯಪಲ್ ಉತ್ಪನ್ನಗಳ ಮೇಲೆ ಸ್ಪೈವೇರ್ ದಾಳಿ ಆಗಿರುವ ಸಾಧ್ಯತೆ ಇದೆಯೋ ಆ ವ್ಯಕ್ತಿಗಳ ಇಮೇಲ್ ಮತ್ತು ಮೊಬೈಲ್ ನಂಬರ್ಗೆ ಆ್ಯಪಲ್ ಅಲರ್ಟ್ ಮೆಸೇಜ್ ಕಳುಹಿಸಿದೆ. ಆದರೆ, ಭಾರತದಲ್ಲಿ ಎಷ್ಟು ಮಂದಿ ಐಫೋನ್ ಬಳಕೆದಾರರಿಗೆ ಈ ನೋಟಿಫಿಕೇಶನ್ ಹೋಗಿದೆ ಎಂಬುದು ಗೊತ್ತಾಗಿಲ್ಲ. ಸೋಷಿಯಲ್ ಮೀಡಿಯಾದಲ್ಲೂ ಯಾರೂ ಕೂಡ ತಮಗೆ ನೋಟಿಫಿಕೇಶನ್ ಬಂದಿರುವ ಬಗ್ಗೆ ಮಾಹಿತಿ ಹಂಚಿಕೊಂಡಿಲ್ಲ.
ಆ್ಯಪಲ್ ತನ್ನ ಸಪೋರ್ಟ್ ಪೇಜ್ನಲ್ಲಿ ಪ್ರಕಟಿಸಿರುವ ಮಾಹಿತಿ ಪ್ರಕಾರ, ಈ ಸ್ಪೈವೇರ್ ದಾಳಿಯನ್ನು ಮರ್ಸನರಿ ಸ್ಪೈವೇರ್ ಅಟ್ಯಾಕ್ ಎಂದು ಬಣ್ಣಿಸಿದೆ. ಇದು ಮಾಮೂಲಿಯ ಸೈಬರ್ ಕ್ರಿಮಿನಲ್ ಕೃತ್ಯ ಮತ್ತು ಕನ್ಸೂಮರ್ ಮಾಲ್ವೇರ್ಗಿಂತಲೂ ಬಹಳ ಸಂಕೀರ್ಣವಾಗಿದೆ. ಬಹಳ ಕಡಿಮೆ ಸಂಖ್ಯೆಯ ನಿರ್ದಿಷ್ಟ ವ್ಯಕ್ತಿಗಳನ್ನು ಮರ್ಸನರಿ ಸ್ಪೈವೇರ್ ದಾಳಿಗೆ ಗುರಿ ಮಾಡಲಾಗುತ್ತದೆ. ಬಹುತೇಕ ಐಫೋನ್ ಬಳಕೆದಾರರಿಗೆ ಯಾವ ತೊಂದರೆ ಇರುವುದಿಲ್ಲ. ಕೆಲವೇ ಆಯ್ದ ಮಂದಿಗೆ ಮಾತ್ರ ಸ್ಪೈವೇರ್ ದಾಳಿಯ ಅಪಾಯ ಇದೆ ಎಂದು ಗೂಗಲ್ ಸಪೋರ್ಟ್ ಪೇಜ್ನಲ್ಲಿ ತಿಳಿಸಲಾಗಿದೆ.
ಇದನ್ನೂ ಓದಿ: ಮೆಟ್ರೋದಲ್ಲಿ ಪ್ರಯಾಣಿಸಲು ರಿಸ್ಟ್ಬ್ಯಾಂಡ್ ಇದ್ರೆ ಸಾಕು, ಟಿಕೆಟ್ ಬೇಕಿಲ್ಲ: ಮುಂಬೈನಲ್ಲಿ ಹೊಸ ವಿಧಾನದ ಟಿಕೆಟಿಂಗ್
ಆ್ಯಪಲ್ ಕಳುಹಿಸಿದ ಈ ಅಲರ್ಟ್ ಮೆಸೇಜ್ನಲ್ಲಿ ಬಹಳ ಗಮನಾರ್ಹ ಸಂಗತಿ ಎಂದರೆ ಮರ್ಸನರಿ ಸ್ಪೈವೇರ್ ದಾಳಿಯ ಹಿಂದೆ ಸರ್ಕಾರ ಅಥವಾ ಸರ್ಕಾರದ ಪರವಾಗಿ ಕೆಲಸ ಮಾಡುವ ಸಂಸ್ಥೆಗಳ ಪಾತ್ರ ಇರುವುದನ್ನು ತೋರಿಸಿದೆ. ಇಸ್ರೇಲೀ ಕಂಪನಿ ಪೆಗಾಸಸ್ ಅನ್ನು ಇದು ಉದಾಹರಣೆಯಾಗಿ ನೀಡಿದೆ. ಪತ್ರಕರ್ತರು, ಆಕ್ಟಿವಿಸ್ಟ್ಗಳು, ರಾಜಕಾರಣಿಗಳು, ರಾಜತಾಂತ್ರಿಕರನ್ನು ಹೆಚ್ಚಾಗಿ ಗುರಿ ಮಾಡಲಾಗುತ್ತದೆ.
2021ರಿಂದೀಚೆ ಇಂಥ ಮರ್ಸನರಿ ಸ್ಪೈವೇರ್ ದಾಳಿಗೆ ತುತ್ತಾಗಿರುವ ಬಳಕೆದಾರರಿಗೆ ಆ್ಯಪಲ್ ಅಲರ್ಟ್ ಮೆಸೇಜ್ ಕಳುಹಿಸಿದೆ. ಒಟ್ಟು 150 ದೇಶಗಳಲ್ಲಿನ ಐಫೋನ್ ಬಳಕೆದಾರರಿಗೆ ಈ ಮೆಸೇಜ್ ಕಳುಹಿಸಿರುವುದಾಗಿ ಆ್ಯಪಲ್ ಹೇಳಿದೆ.
ಇದನ್ನೂ ಓದಿ: ಗೂಗಲ್ ಫೋಟೋಗಳ ಬಳಕೆದಾರರಿಗೆ ಸಿಹಿ ಸುದ್ದಿ, ಉಚಿತವಾಗಿ ಬರಲಿದೆ AI-ಚಾಲಿತ ಎಡಿಟಿಂಗ್ ಟೂಲ್
ದಾಳಿಗೆ ಒಳಗಾದವರು ಏನು ಮಾಡಬೇಕು?
ಒಂದು ವೇಳೆ ಐಫೋನ್ ಮೇಲೆ ಸ್ಪೈವೇರ್ ದಾಳಿಯಾಗಿದ್ದರೆ ಅದರ ಬಳಕೆದಾರರು ತಮ್ಮ ಐಫೋನ್ನಲ್ಲಿ ಕೂಡಲೇ ಲಾಕ್ಡೌನ್ ಮೋಡ್ ಎನೇಬಲ್ ಮಾಡಬೇಕು. ಐಒಎಸ್ನ ಇತ್ತೀಚಿನ ಆವೃತ್ತಿಗೆ ಅಪ್ಡೇಟ್ ಮಾಡಬೇಕು. ಅವರು ಬಳಸುವ ಎಲ್ಲಾ ಇತರ ಆ್ಯಪಲ್ ಸಾಧನವನ್ನೂ ಅಪ್ಡೇಟ್ ಮಾಡಬೇಕು ಎಂದು ಆ್ಯಪಲ್ ಸಲಹೆ ನೀಡಿದೆ.
ಇನ್ನಷ್ಟು ತಂತ್ರಜ್ಞಾನ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
