TV9kannada Web Team | Edited By: shivaprasad.hs
May 11, 2022 | 9:39 AM
Google I/O 2022: ಅಮೇರಿಕಾ ಮೂಲದ ಟೆಕ್ ದೈತ್ಯ ಗೂಗಲ್ನ (Google) ವಾರ್ಷಿಕ ಡೆವಲಪರ್ ಕಾನ್ಫರೆನ್ಸ್ ಇಂದಿನಿಂದ ಅಂದರೆ ಮೇ 11ರಿಂದ ಪ್ರಾರಂಭವಾಗಲಿದ್ದು, ನಾಳೆ ಅಂದರೆ ಮೇ 12ರಂದು ಮುಕ್ತಾಯವಾಗಲಿದೆ. ಕಂಪನಿ ತಿಳಿಸಿರುವ ಮಾಹಿತಿಯಂತೆ ಮೇ 11 ರ 10 AM PDT (ಭಾರತೀಯ ಕಾಲಮಾನ 10:30PM)ಕ್ಕೆ ಆಲ್ಫಾಬೆಟ್ ಇಂಕ್ ಸಿಇಒ ಸುಂದರ್ ಪಿಚೈ (Sundar Pichai) ಅವರ ಮುಖ್ಯ ಭಾಷಣದೊಂದಿಗೆ ಸಂಕಿರಣ ಆರಂಭವಾಗಲಿದೆ. ನೀವು ಈವೆಂಟ್ನಲ್ಲಿ ಭಾಗಿಯಾಗಲು ಬಯಸಿದ್ದರೆ io.google/2022 ನಲ್ಲಿ ನೋಂದಾಯಿಸಿಕೊಳ್ಳಬಹುದು. ಏನಿದು ಸಮ್ಮೇಳನ? ಇದರಲ್ಲಿ ಏನೆಲ್ಲಾ ಘೋಷಣೆಗಳು ಆಗಲಿವೆ? ಈ ಕುರಿತ ಮಾಹಿತಿ ಇಲ್ಲಿದೆ. ಎರಡು ದಿನಗಳ ಸಮ್ಮೇಳನದಲ್ಲಿ ಗೂಗಲ್ ತನ್ನ ಕ್ಲೌಡ್ ಮೂಲಸೌಕರ್ಯಗಳು, ಇತರ ಪ್ಲ್ಯಾಟ್‌ಫಾರ್ಮ್‌ಗಳು ಹಾಗೂ ತನ್ನ ಸಾಧನಗಳಿಗೆ ಹೊಸ ಅಪ್ಡೇಟ್ಗಳನ್ನು ಘೋಷಿಸುತ್ತದೆ. ಜತೆಗೆ ಗ್ರಾಹಕರಿಗೆ ಹೊಸ ತನ್ನ ಹೊಸ ತಂತ್ರಜ್ಞಾನವನ್ನು ಪರಿಚಯಿಸುತ್ತದೆ. ಇದರಲ್ಲಿ ಆಂಡ್ರಾಯ್ಡ್ ಓಎಸ್, ಕ್ರೋಮ್ ಓಎಸ್, ಗೂಗಲ್ ಪ್ಲೇ ಮತ್ತು ಮ್ಯಾಪ್ಗಳಿಗೆ ವಿಶೇಷ ಫೀಚರ್ಗಳು ಕೂಡ ಸೇರಿವೆ.
ಗೂಗಲ್ ತನ್ನ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ‘ಮೇ 11-12 ರಂದು ಯಾವ ಅಪ್ಡೇಟ್ಗಳನ್ನು ನೀವು ನೋಡಲು ಕಾತರರಾಗಿದ್ದೀರಿ?’ ಎಂದು ಗ್ರಾಹಕರಿಗೆ ಪ್ರಶ್ನೆ ಕೇಳಿದೆ. ಈ ಮೂಲಕ ತನ್ನ ಹೊಸ ಅಪ್ಡೇಟ್ಗಳ ಬಗ್ಗೆ ಕುತೂಹಲ ಹೆಚ್ಚಿಸಿದೆ. ಪ್ರೈವಸಿ ಪಾಲಿಸಿ, ಸೆಕ್ಯುರಿಟಿ ಅಪ್ಡೇಟ್ಸ್, ಸಂದೇಶ ಕಳುಹಿಸುವಿಕೆಯಲ್ಲಿ ಅಪ್ಡೇಟ್ಗಳು, ಗೂಗಲ್ನ ಹೊಸ ಪಾಲುದಾರಿಕೆ ಸೇರಿದಂತೆ ಹಲವು ವಿಭಾಗಗಳಲ್ಲಿ ಹೊಸತನ್ನು ನಿರೀಕ್ಷಿಸಲಾಗುತ್ತಿದೆ.
ಗೂಗಲ್ ಈಗಾಗಲೇ ತನ್ನ ಮುಂಬರುವ ಆಂಡ್ರಾಯ್ಡ್ 13 ಮೊಬೈಲ್ ಆಪರೇಟಿಂಗ್ ಸಿಸ್ಟಮ್‌ಗಾಗಿ ಬಿಡುಗಡೆಯ ತಾತ್ಕಾಲಿಕ ಟೈಮ್‌ಲೈನ್ ಹಂಚಿಕೊಂಡಿದೆ. ಕಂಪನಿಯು ಕಳೆದ ತಿಂಗಳು Android 13 OSನ ಮೊದಲ ಬೀಟಾ ಪ್ರಿವ್ಯೂ ಹಂಚಿಕೊಂಡಿತ್ತು. ಓಎಸ್‌ನ ಎರಡನೇ ಬೀಟಾ ಆವೃತ್ತಿಯ ಬಿಡುಗಡೆ ಮತ್ತು ಅದರ ಪ್ರಮುಖ ವೈಶಿಷ್ಟ್ಯಗಳ ಬಗ್ಗೆ ಸಮ್ಮೇಳನದಲ್ಲಿ ಗೂಗಲ್ ತಿಳಿಸುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ.
ಗೂಗಲ್ ಸಾಮಾನ್ಯವಾಗಿ ತನ್ನ ಮಧ್ಯಮ ಬಜೆಟ್ನ ಸ್ಮಾರ್ಟ್ಫೋನ್ ಅನ್ನು ಜನರಿಗೆ ಪರಿಚಯಿಸಲು ಹಾಗೂ ಬಿಡುಗಡೆ ಮಾಡಲು Google I/O ಕಾರ್ಯಕ್ರಮವನ್ನು ಉಪಯೋಗಿಸಿಕೊಳ್ಳುತ್ತದೆ. ಈ ವರ್ಷ ‘ಪಿಕ್ಸೆಲ್ 6A’ ಸ್ಮಾರ್ಟ್ಫೋನ್ ಬಿಡುಗಡೆಯೊಂದಿಗೆ ಈ ಪ್ರವೃತ್ತಿಯನ್ನು ಮುಂದುವರಿಸುವ ನಿರೀಕ್ಷೆ ಇದೆ. ವರದಿಗಳ ಪ್ರಕಾರ, ಗೂಗಲ್ನ ಪಿಕ್ಸೆಲ್ ವಾಚ್ ಸಹ ರಿಲೀಸ್ ಆಗುವ ನಿರೀಕ್ಷೆಯಿದೆ. ಈ ಸ್ಮಾರ್ಟ್ ವಾಚ್ನಲ್ಲಿ ಹತ್ತುಹಲವು ಹೊಸ ವೈಶಿಷ್ಟ್ಯಗಳು ಇರುವ ನಿರೀಕ್ಷೆಗಳಿವೆ.
ಇದರ ಜೊತೆಗೆ, ಗೂಗಲ್ ಕಾರ್ಯಕ್ರಮದಲ್ಲಿ ತನ್ನ ಗೂಗಲ್ ಅಸಿಸ್ಟೆಂಟ್, ಕ್ರೋಮ್ ಓಎಸ್, ಗೂಗಲ್ ಪ್ಲೇ ಸ್ಟೋರ್ ಮತ್ತು ಗೂಗಲ್ ಮ್ಯಾಪ್ಗಳಿಗೆ ನೂತನ ನವೀಕರಣಗಳನ್ನು ಬಳಕೆದಾರರಿಗೆ ಪರಿಚಯಿಸುವ ನಿರೀಕ್ಷೆಯಿದೆ. ಈ ಹಿನ್ನೆಲೆಯಲ್ಲಿ ಇಂದಿನ ಕಾರ್ಯಕ್ರಮ ತೀವ್ರ ಕುತೂಹಲ ಸೃಷ್ಟಿಸಿದೆ.
ಅಂದಹಾಗೆ ಐ/ಒ ಅಂದರೆ ಏನು ಎಂಬ ಕುತೂಹಲ ನಿಮ್ಮಲ್ಲಿರಬಹುದು. ಸಾಮಾನ್ಯವಾಗಿ ಐ/ಒ ಎಂದರೆ ಇನ್ಪುಟ್ ಹಾಗೂ ಔಟ್ಪುಟ್. ಹಾಗೆಯೇ ಗೂಗಲ್ನ ಸ್ಲೋಗನ್ ಆದ ‘ಇನ್ನೋವೇಶನ್ ಇನ್ ದಿ ಓಪನ್’ ಎನ್ನುವುದನ್ನೂ ಐ/ಒ ಸೂಚಿಸುತ್ತದೆ.
ಮತ್ತಷ್ಟು ತಂತ್ರಜ್ಞಾನ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
ಪ್ರಮುಖ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
