ಮೊಬಿಕ್ವಿಕ್​​ನ 35 ಲಕ್ಷ ಬಳಕೆದಾರರ ಸೂಕ್ಷ್ಮ ಮಾಹಿತಿ ಕಳುವಾಗಿದೆ ಎಂದ ಸಂಶೋಧಕ; ಅಂಥದ್ದೇನೂ ಆಗಿಲ್ಲ ಎಂದ ಕಂಪೆನಿ

ಗುರುಗಾಂವ್ ಮೂಲದ ಪಾವತಿ (ಪೇಮೆಂಟ್) ಸ್ಟಾರ್ಟ್ ಅಪ್ ಮೊಬಿಕ್ವಿಕ್​​ನ (MobiKwik) 35 ಲಕ್ಷ ಬಳಕೆದಾರರ ಸೂಕ್ಷ್ಮ ಮಾಹಿತಿಯುಳ್ಳ ಭಾರೀ ಪ್ರಮಾಣದ ಡೇಟಾಬೇಸ್ ಅನ್ನು ಮಾರ್ಚ್ 29ನೇ ತಾರೀಕಿನ ಸೋಮವಾರದಂದು ಹ್ಯಾಕರ್ ಫೋರಂನಿಂದ ಆನ್​ಲೈನ್​ನಲ್ಲಿ ಮಾರಾಟಕ್ಕೆ ಇಡಲಾಗಿದೆ.ಈ ದೊಡ್ಡ ಮಟ್ಟದ ಡೇಟಾ ಕಳುವಿನಲ್ಲಿ 3,60,99,759 ಫೈಲ್​ಗಳು ಒಳಗೊಂಡಿವೆ ಎಂದು ವರದಿ ಆಗಿದೆ. ಇದನ್ನು ಹೊರತುಪಡಿಸಿದಂತೆ 8.2 ಟಿಬಿ (ಟೆರಾಬೈಟ್) ಡೇಟಾ ಸಹ ಇತ್ತು. ಅದರಲ್ಲಿ 9,92,24,559 ಬಳಕೆದಾರರ ಫೋನ್​​ನಂಬರ್​ಗಳು, ಇಮೇಲ್ ವಿಳಾಸ, ಹ್ಯಾಶ್ಡ್ ಪಾಸ್​ವರ್ಡ್​​ಗಳು, ವಿಳಾಸಗಳು, ಬ್ಯಾಂಕ್ ಖಾತೆಗಳು ಮತ್ತು ಕಾರ್ಡ್​ಗಳ ಮಾಹಿತಿಗಳಿವೆ.

ಹ್ಯಾಕರ್​ನಿಂದ ಡಾರ್ಕ್ ವೆಬ್ ಕೂಡ ಸ್ಥಾಪಿಸಲಾಗಿದೆ. ಅಲ್ಲಿಂದ ಫೋನ್ ನಂಬರ್ ಅಥವಾ ಇಮೇಲ್ ಐಡಿ ಹುಡುಕಾಡಬಹುದು ಮತ್ತು ನಿರ್ದಿಷ್ಟವಾದ ಫಲಿತಾಂಶ ಪಡೆಬಹುದು ಎಂದು ಟೆಕ್​ನಾಡು ವರದಿ ಮಾಡಿದ್ದು, ಸ್ವತಂತ್ರ ಸಂಶೋಧಕ ರಾಜಶೇಖರ್ ರಜಾರಿಯಾ ಅವರ ಹೇಳಿಕೆಯನ್ನು ಉದಾಹರಿಸಲಾಗಿದೆ. ಆದರೆ ಈ ಮಾಹಿತಿ ಕಳುವಿನ ಆರೋಪವನ್ನು ಮೊಬಿಕ್ವಿಕ್ ನಿರಾಕರಿಸಿದೆ.

“ಮಾಧ್ಯಮಗಳ ಹುಚ್ಚು ಇರುವ ಕೆಲವರು- ಸೋ ಕಾಲ್ಡ್ ಭದ್ರತಾ ಸಂಶೋಧಕರು ಪದೇಪದೇ ಯಾವ್ಯಾವುದೋ ಫೈಲ್​ಗಳನ್ನು ಹುಟ್ಟು ಹಾಕುತ್ತಾ ನಮ್ಮ ಸಂಸ್ಥೆಯ ಹಾಗೂ ಇದರ ಜತೆಗೆ ಮಾಧ್ಯಮ ಪ್ರತಿನಿಧಿಗಳ ಸಮಯವನ್ನು ಹಾಳು ಮಾಡುತ್ತಿದ್ದಾರೆ. ನಾವು ಪೂರ್ತಿ ತನಿಖೆ ಮಾಡಿದ್ದೇವೆ. ಯಾವುದೇ ಭದ್ರತಾ ಲೋಪ ಕಂಡುಬಂದಿಲ್ಲ. ನಮ್ಮ ಬಳಕೆದಾರರು ಮತ್ತು ಕಂಪೆನಿಯ ಡೇಟಾ ಸಂಪೂರ್ಣವಾಗಿ ಸುರಕ್ಷಿತವಾಗಿದೆ ಮತ್ತು ಭದ್ರವಾಗಿದೆ,” ಎಂದು ಮೊಬಿಕ್ವಿಕ್ ಪ್ರತಿಕ್ರಿಯೆ ನೀಡಿರುವುದಾಗಿ ಮನಿಕಂಟ್ರೋಲ್ ವರದಿ ಮಾಡಿದೆ.

ಪ್ರಮುಖ ಮಾಹಿತಿಯ ಪ್ರಕಾರ, ಯಾರಾದರೂ ಖರೀದಿ ಮಾಡಬೇಕು ಎಂದು ಬಯಸಿದಲ್ಲಿ 1.5 ಬಿಟ್​​ಕಾಯಿನ್ (84 ಸಾವಿರ ಅಮೆರಿಕನ್ ಡಾಲರ್) ಪಾವತಿಸಿ ಸಂಪೂರ್ಣ ಡೇಟಾಬೇಸ್ ಖರೀದಿಸಬಹುದು ಅಥವಾ ಡಾರ್ಕ್ ವೆಬ್ ಪೋರ್ಟಲ್​ನಲ್ಲಿ ಆಫ್​ಲೈನ್​ನಲ್ಲಿ ಪಡೆಯಬಹುದು. ಈ ಪ್ಯಾಕ್​ನಲ್ಲಿರುವ ದತ್ತಾಂಶದಲ್ಲಿ ಕೆಳಕಂಡಂಥವು ಒಳಗೊಂಡಿವೆ. – ಒಟ್ಟಾರೆ 350 ಜಿಬಿ MySQL ಡಂಪ್​ಗಳು: 500 ಡೇಟಾಬೇಸ್​ಗಳು – 9.9 ಕೋಟಿ ಡೇಟಾ- ಮೇಲ್, ಫೋನ್, ಪಾಸ್​ವರ್ಡ್​ಗಳು, ವಿಳಾಸಗಳು ಮುಂತಾದವು – 4 ಕೋಟಿ- 10 ಅಂಕಿಯ ಕಾರ್ಡ್, ತಿಂಗಳು, ವರ್ಷ, ಕಾರ್ಡ್ ಹ್ಯಾಶ್ ಮುಂತಾದವು – ಕಂಪೆನಿ ಡೇಟಾ – 7.5 ಟೆರಾಬೈಟ್​ನ 30 ಲಕ್ಷ ವರ್ತಕರ ಪಾಸ್​ಪೋರ್ಟ್​​ಗಳು, ಆಧಾರ್ ಕಾರ್ಡ್​ಗಳು, ಪ್ಯಾನ್ ಕಾರ್ಡ್​ಗಳು ಮುಂತಾದವು ಸೇರಿಸಿ ಕೆವೈಸಿ (Know Your Customer- ನಿಮ್ಮ ಗ್ರಾಹಕರ ತಿಳಿಯಿರಿ) ಡೇಟಾ.

ಇದನ್ನೂ ಓದಿ: 5 safety tips to follow in digital payment: ಡಿಜಿಟಲ್ ಪೇಮೆಂಟ್ ವೇಳೆ ಈ 5 ತಪ್ಪುಗಳನ್ನು ಮಾಡಬೇಡಿ