Viral Video: ಮೆಕ್ಡೊನಾಲ್ಡ್ಸ್; ಡೇಟಿಂಗ್, ಪ್ರೇಮದ ಬೆಲೆ ಇಲ್ಲಿ ರೂ. 179?; ನೆಟ್ಟಿಗರ ಆಕ್ರೋಶ
McDonald's : ದುಡಿಯುವ ಹೆಣ್ಣುಮಕ್ಕಳೆಂದರೆ ಇಷ್ಟೊಂದು ಸದರವೆ? ಇದು ಹೆಣ್ಣುಮಕ್ಕಳ ಮೇಲಿನ ಲೈಂಗಿಕ ಕಿರುಕುಳವನ್ನು ಪ್ರೋತ್ಸಾಹಿಸುತ್ತದೆ, ಕೆಟ್ಟ ಸಂದೇಶವಿರುವ ಪ್ರಚಾರವನ್ನು ಅನುಮೋದಿಸಿದವರು ಯಾರು? ಕಟುವಾಗಿ ಟೀಕೆಗೊಳಗಾಗುತ್ತಿದೆ ಈ ಹೊಸ ಜಾಹೀರಾತು.
Woman : ತನ್ನ ಆರ್ಡರ್ ಪಡೆದುಕೊಂಡ ಯುವಕ ಮೆಕ್‌ಡೊನಾಲ್ಡ್‌ನ (McDonald’s) ಮಹಿಳಾ ಉದ್ಯೋಗಿಗೆ ಧನ್ಯವಾದ ಹೇಳುತ್ತಾನೆ. ಆಕೆ ಪ್ರತಿಯಾಗಿ ಮುಗುಳ್ನಗೆಯಿಂದ ಉತ್ತರಿಸುತ್ತಾಳೆ. ಹುಡುಗನಿಗೆ ಆ ಹುಡುಗಿಯ ಬಗ್ಗೆ ಮೊದಲ ನೋಟಕ್ಕೇ ಆಕರ್ಷಣೆಯಾಗಿರುವುದು ಸ್ಪಷ್ಟ. ಅದನ್ನು ಗಮನಿಸಿದ ಹುಡುಗಿಯೂ ಅಂಥದೇ ಭಾವನೆಯಿಂದಲೋ ಅಥವಾ ವೃತ್ತಿಪರ ಸೌಜನ್ಯದಿಂದಲೋ ಮುಗುಳ್ನಗುತ್ತಾಳೆ. ಇಷ್ಟಕ್ಕೇ ಅದು ಕೊನೆಗೊಂಡಿದ್ದರೆ ಅಂಥಾ ತೊಂದರೆಯೇನಿರಲಿಲ್ಲ. ಆದರೆ ಆ ಹುಡುಗ ಮರುದಿನ ಮತ್ತೆ ಬರುತ್ತಾನೆ, ಅಷ್ಟೇ ಅಲ್ಲದೇ ಇನ್ನೊಂದು ಕೌಂಟರ್ ಖಾಲಿ ಇದ್ದರೂ ಸರದಿಯಲ್ಲಿ ನಿಂತು ಆ ಹುಡುಗಿಯನ್ನು ಭೆಟ್ಟಿಯಾಗಿ ಮಾತಾಡಿಸುತ್ತಾನೆ. ಇದರ ಮುನ್ನೆಲೆಯಲ್ಲಿ, “ಡೇಟ್… ಒಂದು ಬಗೆಯಲ್ಲಿ…” ಎಂಬ ಕ್ಯಾಪ್ಶನ್ ಮತ್ತು “ಕೇವಲ ರೂ. 179ಕ್ಕೆ ಬಹಳಷ್ಟು ಸಂಗತಿ ಸಂಭವಿಸಬಹುದು..” ಎಂಬ ಅಶರೀರವಾಣಿ!
ಯಾರಿಗೆ ಎಲ್ಲಿಯಾದರೂ ಯಾರ ಬಗೆಗೂ ಪ್ರೇಮಾಂಕುರವಾಗಬಹುದು. ಅದರಲ್ಲೇನೂ ತಪ್ಪಿಲ್ಲ. ಆದರೆ ಈ ಜಾಹೀರಾತು ಕೊಡುತ್ತಿರುವ ಸಂದೇಶವೇನು? ಮೆಕ್‌ಡೊನಾಲ್ಡ್‌ಗೆ ಬಂದರೆ ಸುಲಭವಾಗಿ ಡೇಟಿಂಗ್ ಮಾಡಲು ಹುಡುಗಿ ಸಿಗಬಹುದು ಎಂದೇ? ಪ್ರೇಮದ ಬೆಲೆ ಕೇವಲ ರೂ. 179 ಎಂದೆ? ದುಡಿಯುವ ಹೆಣ್ಣುಮಕ್ಕಳೆಂದರೆ ಇಷ್ಟೊಂದು ಸಸಾರವೆಂದೇ? ಹೆಣ್ಣುಮಕ್ಕಳು ಅದರಲ್ಲೂ ಹೊರಗಡೆ ಹೋಗಿ ದುಡಿಯುವವರು ದಿನೇದಿನೇ ದೌರ್ಜನ್ಯಕ್ಕೆ ಒಳಗಾಗುತ್ತಿರುವ ಈ ದೇಶದಲ್ಲಿ ಈ ರೀತಿಯ ಜಾಹೀರಾತು ಏನು ಪರಿಣಾಮ ಬೀರಬಹುದು ಎಂಬ ಕನಿಷ್ಟ ಪ್ರಜ್ಞೆಯಿಲ್ಲದವರಿಗಷ್ಟೇ ಇದು ರುಚಿಸಬಹುದು.
ಇದನ್ನೂ ಓದಿ : Viral: “ಕಚರಾ”; ಮರುಬಳಕೆ; ಝೊಮ್ಯಾಟೋದ ಕೀಳು ಅಭಿರುಚಿಯ ಜಾತೀವಾದಿ ಜಾಹೀರಾತು
ಒಮ್ಮಿಂದೊಮ್ಮೆಲೇ ಸೂಕ್ಶ್ಮತೆಯನ್ನು ಕಳೆದುಕೊಳ್ಳುತ್ತಿದ್ದೇವೋ? ನಮ್ಮ ಸುತ್ತಮುತ್ತಲೂ ನಡೆಯುತ್ತಿರುವುದರ ಗ್ರಹಿಕೆಯೇ ಇಲ್ಲದಷ್ಟು ದಪ್ಪ ಚರ್ಮದವರಾಗಿದ್ದೇವೋ? ಯಾಕೆ ಹೀಗೆಲ್ಲ? ಈ ವಿಷಯವಾಗಿ ನಿಮ್ಮ ಅಭಿಪ್ರಾಯ ತಿಳಿಸಿ.
ಮತ್ತಷ್ಟು ವೈರಲ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
Published On - 3:18 pm, Thu, 8 June 23