Viral Video : ಬೆಂಕಿಯಿಂದ ಈ ನಾಯಿಮರಿಗಳನ್ನು ರಕ್ಷಿಸಿದ ಅಮೇಝಾನ್ ಲೇಡಿ ಡ್ರೈವರ್
Dog Love : ಅಮೇಝಾನ್ ಡೆಲಿವರಿಗೆಂದು ಈ ಯುವತಿ ಗ್ರಾಹಕರ ಮನೆಗೆ ಹೋಗಿದ್ದಾರೆ. ಒಳಗೆ ಬೆಂಕಿ ಹೊತ್ತಿ ಉರಿಯುತ್ತಿದ್ದುದನ್ನು ಗಮನಿಸಿ ಈ ಮೂರೂ ನಾಯಿಮರಿಗಳನ್ನು ರಕ್ಷಿಸಿದ್ದಾರೆ. ನೆಟ್ಟಿಗರು ಈ ಕಾರ್ಯಕ್ಕೆ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
Updated on:Sep 06, 2022 | 3:41 PM
Viral : ಅಮೆರಿಕದಲ್ಲಿರುವ ಕೊಲಂಬಿಯಾ ಕೌಂಟಿ ಫೈರ್ ರೆಸ್ಕ್ಯೂ ತನ್ನ ಅಧಿಕೃತ ಫೇಸ್ಬುಕ್ ಪುಟದಲ್ಲಿ ಮೇಲ್ಕಂಡ ಚಿತ್ರಗಳನ್ನು ಹಂಚಿಕೊಂಡಿದೆ. ಇಲ್ಲಿರುವ ಈ ಯುವತಿ ಅಮೇಝಾನ್ ಡೆಲಿವರಿ ಡ್ರೈವರ್. ಬೆಂಕಿ ಹೊತ್ತಿ ಉರಿಯುತ್ತಿದ್ದ ಮನೆಯಿಂದ ನಾಯಿಮರಿಗಳನ್ನು ರಕ್ಷಿಸಿದ್ದಾರೆ. ತನ್ನ ಜೀವ ಪಣಕ್ಕಿಟ್ಟು ಒಟ್ಟು ಮೂರು ನಾಯಿಮರಿಗಳ ಜೀವ ಉಳಿಸಿ ಮಾನವೀಯತೆಗೆ ಸಾಕ್ಷಿಯಾಗಿದ್ದಾರೆ. ಕೆಚ್ಚೆದೆಯ ಈ ಯುವತಿಯ ಕಥೆಯನ್ನು ಕೌಂಟಿ ಫೈರ್ ರೆಸ್ಕ್ಯೂ ಫೇಸ್ಬುಕ್ನಲ್ಲಿ ಹಂಚಿಕೊಳ್ಳುತ್ತಿದ್ದಂತೆ ಅನೇಕರು ಈ ಪೋಸ್ಟ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈತನಕ 541 ಜನರು ಈ ಪೋಸ್ಟ್ ರೀಶೇರ್ ಮಾಡಿಕೊಂಡಿದ್ದಾರೆ.
ಆಗಸ್ಟ್ 31ರಂದು ಈ ಪೋಸ್ಟ್ ಮಾಡಲಾಗಿದೆ. ‘ಮನೆಯಲ್ಲಿ ಮಾಲಿಕರು ಇಲ್ಲದ ವೇಳೆಯಲ್ಲಿ ಮನೆಗೆ ಬೆಂಕಿ ಬಿದ್ದಿದೆ. ಆಗ ಬೆಂಕಿಗೆ ಆಹುತಿಯಾಗುತ್ತಿದ್ದ ಈ ನಾಯಿಮರಿಗಳ ಜೀವವನ್ನು ಈ ಯುವತಿ ಉಳಿಸಿದ್ದಾರೆ. ಹೊಗೆಯಿಂದಾಗಿ ಉಸಿರಾಟದ ತೊಂದರೆಗೆ ಒಳಗಾಗಿದ್ದ ಮೂರು ನಾಯಿಮರಿಗಳ ಆರೈಕೆ ಮಾಡಿ ಕಾಪಾಡಿದ್ದಾರೆ. ಹೊಗೆಯನ್ನು ಗಮನಿಸಿ 911 ಗೆ ಕರೆ ಮಾಡಿ ಅಮೇಝಾನ್ ಡ್ರೈವರ್ಗೆ ಧನ್ಯವಾದಗಳು’ ಎಂದು ಪೋಸ್ಟ್ನ ಒಕ್ಕಣೆ ಹೇಳುತ್ತದೆ. 700ಕ್ಕೂ ಹೆಚ್ಚು ಲೈಕ್ಸ್ ಈ ಪೋಸ್ಟ್ಗೆ ಒದಗಿದೆ.
ಈ ಯುವತಿಗೆ ಧನ್ಯವಾದ ಹೇಳಿದ ನಾಯಿಮರಿಗಳ ಪೋಷಕಿ, ‘ತುಂಬಾ ಧನ್ಯವಾದಗಳು ನನ್ನ ಮರಿಗಳನ್ನು ರಕ್ಷಿಸಿದ್ದಕ್ಕೆ. ಇವು ನನ್ನ ಮಗಳು ತುಂಬಾ ಪ್ರೀತಿಸುವ ನಾಯಿಮರಿಗಳು. ಆಸ್ಪತ್ರೆಯಲ್ಲಿರುವ ಅವು ಆರೋಗ್ಯವಾಗಿವೆ. ಧನ್ಯವಾದ ಎಷ್ಟು ಹೇಳಿದರೂ ಸಾಕಾಗದು’ ಎಂದಿದ್ದಾರೆ.
ಫೇಸ್ಬುಕ್ ಖಾತೆದಾರರು, ಪ್ರತಿಕ್ರಿಯೆಗಳ ಮೂಲಕ ಡ್ರೈವರ್ಗೆ ಅಭಿನಂದನೆಗಳ ಮಳೆ ಸುರಿಸಿದ್ದಾರೆ.
ಮತ್ತಷ್ಟು ವೈರಲ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
Published On - 3:40 pm, Tue, 6 September 22
