Trending : ಪರಾರಿಯಾಗಲೆತ್ನಿಸುತ್ತಿದ್ದ ವರನನ್ನು ಹಿಡಿದೆಳೆದುಕೊಂಡು ಬಂದು ಮದುವೆಯಾದ ವಧು

Trending : ವರ ತನ್ನನ್ನು ಮದುವೆಯಾಗಲು ನಿರಾಕರಿಸಿ ಪಲಾಯನ ಮಾಡಿದಾಗ ವಧು ರಸ್ತೆಗುಂಟ ಅವನನ್ನು ಹಿಂಬಾಲಿಸುತ್ತ ಓಡಾಡಿದ ವಿಡಿಯೋ ವೈರಲ್ ಆಗಿದೆ. ‘ಮೇರಿ ಶಾದೀ ಕರ್ವಾವೋ’ ವಿಡಿಯೋದಲ್ಲಿ ವಧು ವರನನ್ನು ಬೇಡಿಕೊಳ್ಳುತ್ತ ಅವನ ಹಿಂದಿಂದೆ ಓಡಾಡುವ ದೃಶ್ಯ ಮನ ಕಲಕುತ್ತದೆ. ಈ ಘಟನೆಯು ಬಿಹಾರದ ನವಾದಾದಲ್ಲಿರುವ ಭಗತ್ ಸಿಂಗ್ ಚೌಕ್‌ನಲ್ಲಿ ಸಂಭವಿಸಿದೆ. ವಧುವಿನ ಕುಟುಂಬ ಮೂರು ತಿಂಗಳ ಹಿಂದೆ ಈ ಮದುವೆಯನ್ನು ನಿಗದಿ ಮಾಡಿತ್ತು ಎನ್ನುವುದು ವರದಿಗಳಿಂದ ತಿಳಿದುಬಂದಿದೆ. ಟೈಮ್ಸ್ ನೌ ವರದಿಯ ಪ್ರಕಾರ, ಈ ಯುವತಿ ಮಾಹುಲಿ ಗ್ರಾಮದವಳಾಗಿದ್ದಾಳೆ. ವರ ಮೆಹ್ಕರ್​ ಗ್ರಾಮದವನು.

ಭಾವೀ ಅಳಿಯನಿಗೆ ವರದಕ್ಷಿಣೆ ರೂಪದಲ್ಲಿ ರೂ. 50,000 ಮತ್ತು ಮೋಟಾರ್ ಸೈಕಲ್ ಕೊಡಲಾಗಿದೆ ಎಂದು ಕುಟುಂಬದವರು ಹೇಳಿದ್ದಾರೆ. ವರದಕ್ಷಿಣೆ ಇಸಿದುಕೊಂಡ ನಂತರ ಮದುವೆ ಬೇಡವೆಂದು ಓಡಿಹೋಗುತ್ತಿದ್ದ ವರನನ್ನು ಮಾರ್ಕೆಟ್​ನಲ್ಲಿ ಓಡಾಡಿ ಹಿಡಿಯಲು ಪ್ರಯತ್ನಿಸಿದ್ದಾಳೆ. ಈ ಸುದ್ದಿ ಪೊಲೀಸರಿಗೂ ಗೊತ್ತಾಗಿದೆ. ನಂತರ ಅವಳೇ ಅವನನ್ನು ವಾಪಾಸು ಕರೆತಂದಿದ್ದಾಳೆ. ಆಗ ಪೊಲೀಸರು ಎರಡೂ ಕಡೆಯ ಕುಟುಂಬದವರನ್ನು ಠಾಣೆಗೆ ಕರೆದು ಸಲಹೆ ನೀಡಿದ ಮೇಲೆ ದೇವಸ್ಥಾನದಲ್ಲಿ ಮದುವೆ ನಡೆದಿದೆ. ಅಂತೂ ಈ ಯುವಕ-ಯುವತಿ ದಾಂಪತ್ಯ ಜೀವನಕ್ಕೆ ಹೀಗೆಲ್ಲ ಕಾಲಿಟ್ಟಿದ್ದಾರೆ.

ಈ ಮದುವೆಗಳೆಂದರೆ ಯಾಕಿಷ್ಟು ಅವಾಂತರ? ಇನ್ನು ಮದುವೆಯ ನಂತರ? ಯಾರು ಕಂಡವರು!

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ