ಪ್ರೀವೆಡ್ಡಿಂಗ್ ಶೂಟ್: ಕನ್ನಡ ಮಾಧ್ಯಮ ಸರ್ಕಾರಿ ಶಾಲೆಗಳ ಉಳಿವಿಗೆ ಪ್ರತಿಜ್ಞೆ ತೊಟ್ಟ ‘ಅನಂತಗಾಯತ್ರಿ’

ಅನಂತ ಯಲಿಗಾರ ಬೈಲಹೊಂಗಲ ಮೂಲದವರು. ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿಯಲ್ಲಿ ಅಂಚೆ ಇಲಾಖೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಅವರನ್ನು ಮದುವೆಯಾಗಲಿರುವ ಗಾಯತ್ರಿ ಬಿಕಾಂ ಪದವೀಧರೆ. ಇವರಿಬ್ಬರೂ ಸರ್ಕಾರಿ ಶಾಲಾ ಉಳಿವಿಗಾಗಿ ಪ್ರತಿಜ್ಞಾ ವಿಧಿ ಸ್ವೀಕರಿಸಿ ತಮ್ಮ ವಿವಾಹಪೂರ್ವ ಛಾಯಾಗ್ರಹಣ ಕಾರ್ಯಕ್ರಮವನ್ನು ಹೀಗೆ ಅವಿಸ್ಮರಣಿಯಗೊಳಿಸಿದ್ದಾರೆ.

ಈ ಅಪೂರ್ವ, ಅರ್ಥಪೂರ್ಣ ಘಳಿಗೆಗಳಿಗೆ ಸರ್ಕಾರಿ ಕನ್ನಡ ಮಾಧ್ಯಮ ಶಾಲೆಯ ಶಾಲಾ ಸಿಬ್ಬಂದಿ ಮತ್ತು ಮಕ್ಕಳು ಸಾಕ್ಷಿಯಾಗಿದ್ದರು. ಅವರಿಗೆ ಅನಂತ ಮತ್ತು ಗಾಯತ್ರಿ ಪುಸ್ತಕ, ಕಲಿಕಾ ಸಾಮಗ್ರಿಗಳನ್ನು ನೀಡಿದರು. ಮದುವೆಯ ನಂತರ ಸರ್ಕಾರಿ ಶಾಲೆಗಳಿಗೆ ಗ್ರಾಮೀಣ ಭಾಗದ ಮಕ್ಕಳನ್ನು ಕರೆತರಲು ತಾವಿಬ್ಬರೂ ಶ್ರಮವಹಿಸುವುದಾಗಿ ಹೇಳಿದ್ದಾರೆ. ಅದಕ್ಕಾಗಿ ಸೂಕ್ತ ಯೋಜನೆಯನ್ನು ಹಮ್ಮಿಕೊಳ್ಳುವುದಾಗಿ ಹೇಳಿದ್ದಾರೆ.

‘ಸಮಾಜದಿಂದಲೇ ಬಂದಿರುವ ನಾವು ಸಮಾಜಕ್ಕೆ ಕಿಂಚಿತ್ತನ್ನಾದರೂ ಮರಳಿಸಬೇಕು ಎನ್ನುವ ಆಲೋಚನೆ ಸದಾ ಕಾಡುತ್ತಿತ್ತು. ಮದುವೆ ಎನ್ನುವ ನೆಪದಲ್ಲಿ ನನ್ನ ಭಾವೀಪತ್ನಿಯೊಂದಿಗೆ ಈ ಪರಿಕಲ್ಪನೆ ಹುಟ್ಟುಹಾಕಿದೆ. ಸರ್ಕಾರಿ ಶಾಲೆ ಉಳಿಸುವಲ್ಲಿ ಜನರೂ ಮುಂದಾಗಬೇಕೆಂದರೆ ನಮ್ಮ ಈ ಪ್ರೀವೆಡ್ಡಿಂಗ್ ಶೂಟ್ ಪ್ರೇರಣೆಯಾಗಬೇಕು ಎಂದು ಯೋಚಿಸಿ ತೊಡಗಿಕೊಂಡೆವು. ಇದು ಖಂಡಿತ ಪ್ರಚಾರಕ್ಕಾಗಿ ಅಲ್ಲ. ಸರ್ಕಾರಿ ಶಾಲೆಗಳು ಉಳಿಯಬೇಕು. ಹಳ್ಳಿಗಾಡಿನ ಮಕ್ಕಳು ಶಿಕ್ಷಣದ ಮೂಲಕ ಸಾಧನೆಯ ದಾರಿ ಕಂಡುಕೊಳ್ಳಬೇಕು ಎಂಬ ಆಶಯ ನಮ್ಮದು’ ಎಂದಿದ್ದಾರೆ ಅನಂತ ಯಲಿಗಾರ.