Viral Story: ರಹಸ್ಯ ಮಸಾಲೆ ಎಂದು ಆಹಾರದಲ್ಲಿ ಗಾಂಜಾ ಬೆರೆಸುತ್ತಿದ್ದ ರೆಸ್ಟೋರೆಂಟ್

ಇಂದಿನ ಪೈಪೋಟಿ ಯುಗದಲ್ಲಿ ಯಾವ ರೆಸ್ಟೋರೆಂಟ್​ನಲ್ಲಿ ಹೆಚ್ಚಿನ ರುಚಿ ನೀಡಲಾಗತ್ತೊ ಅಲ್ಲಿ ಗ್ರಾಹಕರು ಹೆಚ್ಚಿರುತ್ತಾರೆ. ಹೀಗಾಗಿ ಶೆಫ್​ಗಳು ಕೂಡ ವಿಭಿನ್ನ, ವಿಶೇಷ ರೆಸಿಪಿಗಳ ಮೊರೆ ಹೋಗುತ್ತಾರೆ. ಆದರೆ ಲಾಸ್ ವೇಗಾಸ್​ನ ರೆಸ್ಟೋರೆಂಟ್​ವೊಂದು ತನ್ನ ಆಹಾರಗಳಲ್ಲಿ ಗಾಂಜಾ ಬೆರೆಸುವ ಮೂಲಕ ಗ್ರಾಹಕರಿಗೆ ನಶೆ ಭರಿತ ರುಚಿ ನೀಡುತ್ತಿದೆ ಎಂಬ ಗಂಭೀರ ಆರೋಪಕ್ಕೆ ಗುರಿಯಾಗಿದೆ. ದಿ ಸೀಕ್ರೆಟ್ ಆಫ್ ಸಿಯಾಮ್ ಎಂಬ ಹೆಸರಿನ ಈ ಥಾಯ್ ರೆಸ್ಟೋರೆಂಟ್ ವಿರುದ್ಧ ಅನೇಕ ಜನರು ದೂರುಗಳನ್ನು ನೀಡಿದ್ದಾರೆ. ಈ ರೆಸ್ಟೋರೆಂಟ್​ನಲ್ಲಿ ಆಹಾರ ಸೇವಿಸಿದ ಬಳಿಕ ನಶೆಯಲ್ಲಿ ತೇಲುತ್ತಿರುವಂತ ಅನುಭವ ಅನೇಕರಿಗೆ ಉಂಟಾಗಿದೆ. ವಿಶೇಷ ಮಸಾಲೆ ಎಂಬ ಹೆಸರಿನಲ್ಲಿ ಕೆಲ ಆಹಾರಗಳನ್ನು ಗ್ರಾಹಕರ ಮುಂದಿಡಲಾಗುತ್ತಿತ್ತು. ಈ ಆಹಾರಗಳನ್ನು ಸೇವಿಸಿದ ಅನೇಕರಿಗೆ ಅಮಲಿನಲ್ಲಿ ತೇಲಿದ ಅನುಭವವಾಗುತ್ತಿತ್ತು. ಇದನ್ನು ಕೆಲವರು ಇಷ್ಟಪಟ್ಟಿದ್ದರು. ಹೀಗಾಗಿಯೇ ರೆಸ್ಟೋರೆಂಟ್​ನ ವ್ಯವಹಾರ ಕೂಡ ಉತ್ತಮಗೊಂಡಿತು.

ಆದರೆ ಇತ್ತೀಚೆಗೆ ದಿ ಸೀಕ್ರೆಟ್ ಆಫ್ ಸಿಯಾಮ್​ನಲ್ಲಿ ಸೂಪ್ ಸೇವಿಸಿದ್ದ ಸಮಂತಾ ಡಯಾಸ್ ಎಂಬ ಮಹಿಳೆಯು ಅಸ್ವಸ್ಥರಾಗಿದ್ದಾರೆ. ಅಲ್ಲದೆ ಆಕೆಗೆ ಹೃದಯಾಘಾತವಾದಂತೆ ಭಾಸವಾಗಿದೆ. ಇದಾಗ್ಯೂ ತನಗೆ ಏನಾಗುತ್ತಿದೆ ಎಂಬುದನ್ನು ವಿವರಿಸಲು ಸಮಂತಾ ಡಯಾಸ್​ಗೆ ಸಾಧ್ಯವಾಗುತ್ತಿರಲಿಲ್ಲ. ಕೂಡಲೇ ಪತಿಯು ಆಕೆಯನ್ನು ಮನೆಗೆ ಕರೆದುಕೊಂಡು ಬಂದಿದ್ದಾರೆ. ಆ ಬಳಿಕ ಪರಿಶೀಲಿಸಿದಾಗ ಅಮಲಿನಲ್ಲಿ ತೇಲುತ್ತಿರುವ ಅರಿವಾಗಿದೆ.

ಇದರಿಂದ ಅನುಮಾನಗೊಂಡ ಸಮಂತಾ ದಿ ಸೀಕ್ರೆಟ್ ಆಫ್ ಸಿಯಾಮ್ ರೆಸ್ಟೋರೆಂಟ್​ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಹುಡುಕಾಡಿದ್ದಾರೆ. ತನಗಾದ ಅದೇ ರೀತಿಯ ಅನುಭವಗಳ ಬಗ್ಗೆ ಅನೇಕರು ವ್ಯಕ್ತಪಡಿಸಿದ್ದರು. ಅಲ್ಲದೆ ಈ ರೆಸ್ಟೊರೆಂಟ್‌ನಲ್ಲಿ ಆಹಾರದಲ್ಲಿ ಡ್ರಗ್ಸ್ ಬೆರೆಸಲಾಗುತ್ತಿದೆ ಎಂದು ಹಲವರು ಆರೋಪಿಸಿರುವುದನ್ನು ಕಂಡು ಅಚ್ಚರಿಗೊಂಡಿದ್ದರು. ಹೀಗಾಗಿ ಇದೀಗ ಸಮಂತಾ ಡಯಾಸ್ ದಿ ಸೀಕ್ರೆಟ್ ಆಫ್ ಸಿಯಾಮ್ ವಿರುದ್ದ ದೂರು ನೀಡಿದ್ದಾರೆ.

ಪ್ರಾಥಮಿಕ ತನಿಖೆಯ ವೇಳೆ ದಿ ಸೀಕ್ರೆಟ್ ಆಫ್ ಸಿಯಾಮ್​ ರೆಸ್ಟೋರೆಂಟ್​ ಅನ್ನು ಮುಚ್ಚಲಾಗಿದ್ದು, ಈ ಬಗ್ಗೆ ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ಲಾಸ್ ವೇಗಾಸ್ ಪೊಲೀಸರು ತಿಳಿಸಿದ್ದಾರೆ. ಈ ಆರೋಪಗಳು ನಿಜವೆಂದು ಕಂಡುಬಂದರೆ, ರೆಸ್ಟೋರೆಂಟ್ ಪರವಾನಗಿಯನ್ನು ರದ್ದುಗೊಳಿಸಲಾಗುತ್ತದೆ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ: World Record: ಟಿ20 ಕ್ರಿಕೆಟ್​ನಲ್ಲಿ ಹೊಸ ಇತಿಹಾಸ ನಿರ್ಮಿಸಿದ ಯುವ ಬ್ಯಾಟ್ಸ್​ಮನ್

ಇದನ್ನೂ ಓದಿ: ಐಪಿಎಲ್ ಆರಂಭಿಕ ಪಂದ್ಯಗಳಿಗೆ ಈ ಆಟಗಾರರು ಅಲಭ್ಯ

ಇದನ್ನೂ ಓದಿ: IPL 2022: ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಶೇನ್ ವಾಟ್ಸನ್ ಎಂಟ್ರಿ..!

(thai restaurant in mix marijuana in food as secret spice)